2 Samuel 23:3 - Biblia Enxet

³ Appaqmetchek ma'a Dios apagkok nak Israel; aptáhak seyáneya Apmasma nak chá'a Israel se'e: ‘Énxet apkeláneykha nak chá'a énxet'ák yetlo ekpéwomo aptémakxa', apkeláneykha nak chá'a énxet'ák yetlo apcháyo Dios,

2 Samuel 23:3 Referans Kwoze

2 Samuel 22:32

¡Dios apteme wánxa xama, méko pók. Méko mók aqsok kéláyókxa awanchek hentaqmelchesek!

Deuteronomio 32:4

Cha'a apteme segmasma m'a; kelpéwók ma'a aptamheykha nak, kelpéwók nahan chá'a m'a aqsok apkelane nak. Cha'a apteme Dios apmámnaqsoho m'a, méko xama aqsok enxoho megkapéwomo apkelane; ¡appéwomo m'a tén han apmámnaqsoho!

Éxodo 18:21

Elyésha sa' xép nepyeseksa énxet'ák ma'a énxet apmopwána nak aptamheykha, ekha nak apcháyo m'a Dios, tén han meyke nak apteme apmopwána amya'a, énxet megkóllekweykmoho nak chá'a exkágwók ma'a selyaqye ekmaso nak ektegyamaxche, tén sa' nahan egkések chá'a xama aptaqmelchesso apnámakkok ma'a mil énxet, tén sa' nahan pók apkeltaqmelchesso m'a cien, tén sa' nahan pók apkeltaqmelchesso m'a cincuenta, tén sa' nahan pók apkeltaqmelchesso m'a diez énxet.

Zacarías 9:9

¡Kapayhekxoho agko' apwáxok xép, tegma apwányam Sión! ¡Enneykmés kapayhekxak apwáxok, xép tegma apwányam Jerusalén! Apya'aweykteyk xép, Wesse' apwányam apagkok Wesse' appéwomo, tén han segwagkassamo teyp, háwe eyke eyeymáxkoho apwáxok, yámelyeheykok apchánte, yámelyeheykok étkok.

Salmos 72:2

yaqwayam enxoho elanha yetlo ektaqmalma aptémakxa m'a énxet'ák apagkok, tén han elánekxések ektémakxa apheykha m'a énxet'ák apagkok, meyke nak aqsok apagkok.

Salmos 42:9

Atnehek chá'a wának Dios, apteme nak semasma: “¿Yaqsa ektéma megkaxeyenma nak apwáxok ko'o? ¿Yaqsa katnehek ko'o kayaqhapmakha ewáxok, eñama setwáseykegkoho m'a sélenmexma nak?”

Génesis 33:20

Tén axta apkelana xama ekwatnamáxchexa aqsok, apteméssessek axta ekwesey El-elohé-israel.

Jeremías 23:5

Aptáhak Wesse' egegkok se'e: “Kammok sa' ekhem yaqwánxa exek xama aptáwen neptámen apagko' ma'a David, xama wesse' apwányam ekpéwomo aptémakxa, etnehek sa' wesse' apwányam yetlo apya'áseykegkoho, elánekxések sa' chá'a apheykha énxet'ák, yetlo ekpéwomo aptémakxa tén han ekpayhawo nak chá'a etnehek se'e apchókxa nak.

Isaías 32:1

Etyapok sa' xama wesse' apwányam yaqwayam etneykha yetlo ekpéwomo aptémakxa tén han ma'a kelwesse'e apkeláneykha nak chá'a apkelókxa yaqwayam sa' eltemeykha chá'a apkelókxa yetlo ekpéwomo apkeltémakxa.

Proverbios 31:9

Énnaqtés chá'a appeywa, elánekxés chá'a ektémakxa apheykha; ¡epásem chá'a m'a meyke nak aqsok apagkok, tén han ma'a apkelmopyóseka nak!

Salmos 110:2

Esawheyásekxohok sa' xép apteme wesse' apwányam ma'a Wesse' egegkok, eyeynamo m'a Sión. ¡Etne kaxwók apkeláneykha m'a apkelenmexma nak!

Nehemías 5:14

axta ko'o apaknegweykmohok ma'a aqsok sepayhémo axta eykhe yaqwayam amha sekteme séláneykha apchókxa, tén han ma'a sélxegexma'a nak, ekweykmoho doce apyeyam, eyeynmo m'a ekhem veinte setnéssessama axta séláneykha apchókxa Judá m'a wesse' apwányam Artajerjes, ekweykmoho treinta y dos apyeyam apteme wesse' apwányam.

Éxodo 20:2

“Ko'o sekteme Dios Wesse' apagkok, ektáha axta aptekkesso m'a Egipto, aptémakxa axta kélásenneykha naqsa.

Éxodo 3:15

Aptáhak axta anhan apcháneya Dios Moisés se'e: —Etne sa' nahan elának israelitas se'e: ‘Eyáphássek xeyk ko'o kélnepyeseksa kéxegke m'a Wesse', Dios apagkok nak ma'a kélyapmeyk nano', cham'a Abraham, Isaac, tén han ma'a Jacob nak Dios apagkok.’ Cháxa sekwesey megkatnégwayam néxa xa; sekwesey megkamassegwayam yókxoho apyeyam chá'a xa.

1 Reyes 10:9

¡Apcheymákpoho sa' kólteméssesek ma'a Dios Wesse' apagkok, ektaqmeleykencha'a nak chá'a apwáxok apkelányo, apméssama nak apteme wesse' apwányam ma'a Israel! ¡Apkelásekhayo meyke néxa han keñamak Wesse' apagkok énxet'ák Israel, apteméssessama exchep wesse' apwányam, yaqwayam enxoho etnehek chá'a apkeláneykha ekpéwomo aptémakxa, keñe han apkelánekxésso chá'a apheykha!”

Job 34:17

Naqsók agkok aptaqnagko Dios ekpéwomo nentémakxa', mopwanchek etnehek apkeláneykha énxet'ák. ¡Mopwanchek xép exének eyesagko aptáhakxa m'a ekpéwomo agko' nak aptémakxa!

Salmos 72:1

O Dios, egkés wesse' apwányam aptémakxa ekpéwomo nak xép, tén han ektémakxa nak xép ektaqmalma aptémakxa,

2 Samuel 8:15

Aptemegkek axta wesse' apwányam David ma'a ekyókxoho nak Israel, aptaqmelchessamók axta han chá'a apkeláneykha m'a apyókxoho énxet'ák apagkok, meyke apteméssesso m'a megkapayhawo nak chá'a etnéssesek.