2 Samuel 15:25 - Biblia Enxet

²⁵ Keñe axta wesse' apwányam aptáha apcháneya Sadoc: —Esakxa makham tegma apwányam xa Dios yántéseksek apagkok nak, hakte taqmeláha agkok ko'o apwáxok sélano m'a Wesse' egegkok, yának makham ataqhoho', tén óteyekxak makham ma'a yántéseksek, tén han ma'a ekyetnamakxa nak chá'a.

2 Samuel 15:25 Referans Kwoze

Jeremías 25:30

“Jeremías, eñes sa' sektáhakxa ko'o sekpeywa s'e ekyókxoho aqsok nak. Sa' etnehek elának se'e: “Kextegyókek appeywa Wesse' egegkok ma'a netnók agko' nak, cham'a kañe' ekpagkanamaxchexa aphamakxa nak. Apkelpáxegkáseyha apkeltaqnaweygko m'a nepkések apnaqtósso, máxa aptáhak ma'a apkelteyáyam la'a anmen yámet ekyexna, apkeltaqnaweygkek ma'a apyókxoho énxet'ák apheykha nak keso náxop.

Salmos 84:10

¡Tásek axek chá'a ko'o xama ekhem ma'a kañe' nak tegma appagkanamap apagkok, kaxnók aweynchamha aqsa ekwenaqte m'a yókxexma! Émenyeyk ko'o atnehek sektaqmelchesso átog ma'a Dios ahagkok nak tegma appagkanamap apagkok, kaxnók axek ma'a apxanák nak élmasagcha'a apkeltémakxa.

Salmos 26:8

Wesse', eyásekhayók ko'o m'a tegma appagkanamap aphamakxa nak, ekyetnamakxa nak apcheymákpoho.

Éxodo 15:13

Yetlo apkelásekhayo exchep apnaqleykha s'e énxet'ák apagkok apkelwagkasa nak teyp; yetlo apmopwána nahan apnaqleykekxak ma'a yókxexma ekpagkanamaxchexa apagkok nak.

Jeremías 7:4

Nágkóleyxho m'a apkelyexancháseykencha'a nak chá'a, aptéma nak chá'a apkelanagkama s'e: ¡Keso apyetna Wesse' egegkok tegma appagkanamap apagkok se'e, keso apyetna Wesse' egegkok tegma appagkanamap apagkok se'e!

Isaías 38:22

Tén axta Ezequías apkelmaxneyáncha'a m'a Isaías: —¿Yaqsa sa' aqsok magkenatchesso awanchek ko'o hey'ássesagkohok yaqwayam amhagkok ma'a Wesse' egegkok tegma appagkanamap apagkok nak?

Salmos 122:9

Almaxnéssesek sa' ko'o exchep wának kataqmelek apha, eñama seyásekhayo Wesse' Dios egagkok nak tegma appagkanamap apagkok.”

Salmos 122:1

¡Kapayhekxa nak la'a chá'a ko'o ewáxok kéltáha enxoho hélának se'e: “Ólmeyekxak Wesse' egegkok tegma appagkanamap apagkok!”

2 Samuel 7:2

axta aptáhak apcháneya Natán, apteme axta Dios appeywa aplegasso: —Ekheyk ko'o kaxwók tegma apyawe apkelánamap nak yámet cedro, ekhawo ektáhakxa nak apwet'a, keñe Dios yántéseksek apagkok ekyetna kóneg apáwa kélpakxanma.

2 Samuel 6:17

Kélsákxeyk axta Wesse' egegkok yántéseksek apagkok, kélpekkenwákxeyk axta m'a ekyetnamakxa axta, kañe' nak kélpakxanma apkelánesso axta m'a David. Yetlókok axta han apwatno aqsok kélwatno m'a David, keñe han ma'a aqsok ektekyawa segwetassamo nak sẽlásekheykekxoho nápaqtók Wesse' egegkok,

Éxodo 33:12

Aptáhak axta Moisés apcháneya Wesse' egegkok se'e: —Wesse', apkeltamhók ko'o exchep anaqlawha s'e énxet'ák nak, makke héltennásak yaqsa yáphaksek hétlók ko'o. Exénchek nahan ko'o exchep ekyetna ekwányam agko' seyáyo tén han ekleklamo apwáxok.

Éxodo 33:13

Naqsók sa' agkok xa, héltennés sa' yaqsa apmako elána', yaqwayam sa' atnehek chá'a ko'o seyáyo exchep tén han elenxanmagkohok chá'a apteme ekleklamo ko'o apwáxok. Kaxén apwáxok se'e énxet'ák nak apteme xeyep énxet'ák apagkok.