MICAH 7:14 - Edisana ñwed Abasi Ibom

¹⁴ Da esaŋ fo bɔk ikɔt fo, kpa ufene emi afo enyenede, emi eduŋde ikpɔŋ ke akai ke ufɔt Carmel: mmɔ eyeta mbiet ke Bashan ye ke Gilead, kpa nte eyo oko.

MICAH 7:14 Referans Kwoze

MICAH 5:4

Ndien enye eyeda edibɔk ke odudu Jehovah, ke ubɔŋ enyiŋ Jehovah Abasi esie; ndien mmɔ eyebigi: koro ke emi ke enye edikpon tutu osim utit ererimbot.

ISAIAH 49:10

Biɔŋ ididɔŋke mmɔ, itɔŋ idinyuŋ isatke mmɔ; eyo ye utin idibɔŋke mmɔ: koro anditua mmɔ mbɔm eyeda mmɔ usuŋ, eyeda mmɔ aka ke ɔtɔ eke mmɔŋ otopde ɔwɔrɔ.

AMOS 9:11

Ke usen oro nyediɔŋ ataya David emi ɔduɔde, nnyuŋ nsiri ŋwure esie; nnyuŋ ndiɔŋ ufɔk esie emi ebiarade, nnyuŋ mbɔp enye, kpa nte ke eyo oko:

ISAIAH 40:11

Enye eyebɔk ikɔt esiemɔ nte ɔbɔk ufene: eyetaŋ nditɔ erɔŋ ke ubɔk esie, akama ke ikpanesit esie, onyuŋ ada mme ɔnɔ-mmɔŋeba usuŋ.

ISAIAH 37:24

Afo amada ubɔk ikɔt fo osuŋi Ɔbɔŋ, onyuŋ ɔdɔhɔ, ete, “Ami nda ediwak chariot mi ndɔk ke enyɔŋ ikpɔ obot, ye ke ŋkaŋ Lebanon; ndien nyekpeŋe ŋko-koŋo cedar esie, ye ndimek fir esie: nyenyuŋ nsin ata akpatre nsom esie, kpa eti iŋwaŋ akai esie.

ŊWED MME PSALM 100:3

Mbufo efiɔk ete ke edi Jehovah edi Abasi; edi enye akanam nnyin, ndien nnyin inyene enye, ikɔt esie, ye ufene emi enye ɔbɔkde.

ŊWED MME PSALM 95:7

Koro enye edide Abasi nnyin; ndien nnyin idi ikɔt emi enye ɔbɔkde, ye ufene ubɔk esie.

ŊWED MME PSALM 28:9

Nyaŋa ikɔt fo, nyuŋ diɔŋ mbon udeme fo: bɔk mmɔ ŋko, nyuŋ menere mmɔ ke enyɔŋ ke nsinsi.

JOHN 17:16

Mmɔ idige eke ererimbot, kpa nte Ami mmendige eke ererimbot.

MATTHEW 2:6

Ndien afo Bethlehem, isɔŋ Judah, Ukprike ukaha ke baba usuŋ kiet ke otu mbɔŋ Judah; Koro andikara eyeto fi ke esit ɔwɔrɔ, Emi edikpemede ikɔt Mi Israel.

MALACHI 3:4

Ndien uwa Judah ye Jerusalem eyenem Jehovah esit, kpa nte ke mme usen eset, ye ke eyo oko.

ZEPHANIAH 3:13

Ubak Israel emi ɔsuhɔde idinamke ukwaŋ-ŋkpɔ, idinyuŋ isuhe nsu: owo idinyuŋ ikwe edeme abiaŋa ke inua mmɔ: koro mmɔ eyedia ŋkpɔ enyuŋ esuhɔre ena, ndien baba owo kiet eke anamde mmɔ ndik ididuhe.

ŊWED ESEME 5:21

Nam nnyin ifiak itiene fi, O Jehovah, ndien nnyin iyefiak; nam usen nnyin ekabare edi mbufa, kpa nte ke eset.

ISAIAH 65:10

Ndien Sharon eyekabare edi ebiet eke ŋkpri ufene eduŋde, ebedeŋ Achor eyenyuŋ akabare edi ebiet eke enaŋ edinade, ɔnɔ ikɔt mi emi ebinede mi.

ISAIAH 35:2

Eyediɔŋ asiaha ikɔŋ, onyuŋ ebre mbre, onyuŋ ɔkwɔ: eyenɔ enye ubɔŋ Lebanon, ye uyai Carmel ye Sharon; mmɔ eyekut ubɔŋ Jehovah, uyai Abasi nnyin.

ŊWED MME PSALM 143:5

Mmeti eyo oko; mmese ofuri utom fo; mmetie ŋkere se ubɔk fo ekenamde.

DEUTERONOMY 33:28

Ndien Israel oduŋ ke ifure ikpɔŋ ke idem esie, idim Jacob oduŋ ke isɔŋ ibokpot ye wine; enyɔŋ esie onyuŋ ɔtɔi mbara.

NUMBERS 23:9

Ndinyuŋ ntɔk didie se Jehovah mitɔkke? Koro ntiede ke enyɔŋ mbuot ikpɔ itiat ŋkut enye, nnyuŋ ntie ke ikpɔ obot nse enye: sese, edi mbio emi editiede ikpɔŋ ke idem mmɔ: idinyuŋ ibatke mmɔ isin ke otu mme idut.

EXODUS 33:16

Edinam didie, ndien, efiɔk ete ke afo enen iso ye ami ye ikɔt fo? Nte idige ke erika emi afo akade ye nnyin? Ntre ke eyedianare mi ye ikɔt fo ke kpukpru owo emi edude ke isɔŋ?

ŊWED ESEME 1:7

Jerusalem eti kpukpru ŋkpɔ-uto esie eke ekedude ke ini eset, ke ini eke etukde enye enyuŋ ekɔbɔde enye, ke ini ikɔt esie eduɔŋɔde ke ubɔk mme asua, ndien baba owo kiet eke aŋwamde enye miduhe: mme asua esie ekut enye enyuŋ esak ŋwure esie.

LEVITICUS 27:32

Ndien ama edi ɔyɔhɔ duop ke otu enaŋ, ye ke otu ŋkpɔ ŋkpri ufene, se isuk ididi eke asaŋade ke idak esaŋ ebe, ɔyɔhɔ duop edidi edisana ŋkpɔ Jehovah.

IKWƆ SOLOMON 4:1

O! IMA mi, sese, afo emeye; sese, afo emeye; enyin fo edi ibiom ke esit ufuhɔ-iso fo: idet fo ebiet udim ebot eke enade ke ikpɔ obot Gilead.

JEREMIAH 49:31

Jehovah ɔdɔhɔ, ete, Mbufo edaha ke enyɔŋ edɔk ke ɔtɔ idut ndue idem, emi eduŋde ke mfre idem, mmɔ inyeneke itim ye eto usin usuŋ, mmɔ eduŋ ke idem mmɔ ikpɔŋ.

EZEKIEL 36:11

nyenyuŋ nnam owo ye ufene ewak ke enyɔŋ mbufo; ndien mmɔ eyewak enyuŋ etɔt: nnyuŋ nyak mbufo edaŋ kpa nte ke eyo oko, nnyuŋ mfɔn ido ye mbufo ŋkan nte ŋkɔfɔnde ke eritɔŋɔ mbufo: ndien mbufo eyefiɔk ete ke ami ndi Jehovah.

NUMBERS 32:1

NDIEN nditɔ Reuben ye nditɔ Gad enyene ata ediwak ufene eti-eti: ndien adaŋemi mmɔ ekutde isɔŋ Jazer, ye isɔŋ Gilead, ete, Sese, ebiet oro edi ebiet ufene;

NUMBERS 32:4

kpa mme idut emi Jehovah akasuande ke iso mbon esop Israel, edi isɔŋ ufene, ndien nnyin ikɔt fo imenyene ufene:

ISAIAH 27:13

Ama onyuŋ ekem ke usen oro, eyefuri akwa ukorowo, ndien mmɔ eke esopde ke isɔŋ Assyria, ye mmɔ eke esuanade ke isɔŋ Egypt, eyedi edituak ibuot enɔ Jehovah ke edisana obot ke Jerusalem.

OBADIAH 1:19

Ndien mbon edem usuk eyeda obot Esau; mbon una-isɔŋ edem-inyaŋ eyenyuŋ eda mme Philistine: mmɔ eyenyuŋ eda obot-iŋwaŋ Ephraim, ye obot-iŋwaŋ Samaria: ndien Benjamin eyeda Gilead.

ZECHARIAH 10:10

Ndien nyeda mmɔ ke isɔŋ Egypt mfiak ndi, nnyuŋ ntaŋ mmɔ ke Assyria mbon; nnyuŋ nda mmɔ ndi ke isɔŋ Gilead ye Lebanon; ndien idikwe ebiet inɔ mmɔ.

ZECHARIAH 11:7

Ndien ami mbɔk ŋkpri ufene eke ediwotde, kpa ata ubuene otu ufene. Ndien nda esaŋ iba ke idem mi, nsiɔ kiet enyin Uyai, nsio kiet eken enyiŋ Ubɔp-ŋkpɔ; ntem ke mbɔk ufene oro.