JEREMIAH 3:1 - Edisana ñwed Abasi Ibom

¹ KPA nte edɔhɔde ete, Edieke owo osiode ŋwan esiemɔ, ndien ŋwan ɔkpɔŋ enye, onyuŋ akabare edi ŋwan owo efen, nte ebe ekeme ndifiak ntiene enye ŋko? Nte ikpasabakede isɔŋ oro eti-eti? Ndien afo amanam ido akpara ye ediwak mme ufan; edifiak tiene mi; Jehovah ɔdɔhɔ.

JEREMIAH 3:1 Referans Kwoze

EZEKIEL 16:26

Afo onyuŋ anam use ye nditɔ Egypt mbɔhiduŋ fo emi ekponde obuk-idem; onyuŋ anam use fo awak, onyuŋ ayat mi esit.

JEREMIAH 4:1

JEHOVAH ɔdɔhɔ ete, O Israel, afo ama afiak edi, fiak tiene mi: ama onyuŋ emen ŋkpɔ mbubiam fo ke iso mi efep, afo udusehekede.

JEREMIAH 2:20

Koro ŋkobuŋde fi ɔkpɔnɔ tutu ko, ŋkonyuŋ ŋkibide fi ŋkpɔkɔbi: ndien afo ɔdɔhɔ ete Ndinamke ŋkpɔ; koro afo ɔsuhɔrede ana nte akpara ke enyɔŋ kpukpru edikoŋ obot, ye ke idak kpukpru awawa eto.

ZECHARIAH 1:3

Dɔhɔ mmɔ, ndien, ete, Ntem ke Jehovah mme udim ɔdɔhɔ ete, Mbufo ekabare etiene mi, Jehovah mme udim ɔdɔhɔ, ndien ami nyekabare ntiene mbufo, Jehovah mme udim ɔdɔhɔ.

HOSEA 1:2

Eritɔŋɔ ikɔ emi ke Jehovah akada Hosea etiŋ. Ndien Jehovah ɔdɔhɔ Hosea, ete, Ka kada ŋwan efibe ye nditɔ efibe ke idem fo: koro isɔŋ emi esinde ata efibe onyuŋ ɔkpɔŋde Jehovah.

EZEKIEL 33:11

Dɔhɔ mmɔ, ete, Ɔbɔŋ Jehovah ɔdɔhɔ, ete, Ma uwem mi, mkpa idiɔk owo inemke mi esit, edi idiɔk owo akam akabare ɔkpɔŋ usuŋ esie, ndien odu uwem: mbufo, O ufɔk Israel, ekabare, ekabare; koro nsinam mbufo ekpekpaŋa?

JEREMIAH 4:14

Ɔdɔdiɔk ye nnyin koro emesobo nnyin. O Jerusalem, yet esit fo idiɔk-ŋkpɔ fep, man enyaŋa fi. Adaŋa didie ke mme idiɔk ekikere fo ediduŋ fi ke esit?

JEREMIAH 3:9

Ndien edikem enye asabare isɔŋ ke oburobut use esie, onyuŋ esin efibe ye itiat ye eto.

JEREMIAH 2:23

Afo edinam didie ɔdɔhɔ, ete “Ndeheke, mbineke Baalim?” Se usuŋ fo ke itihere: fiɔk se afo anamde: (afo) ɔsɔp-ukot dro-medary eke ɔyɔrɔde ke usuŋ esie;

JUDGES 19:2

Ndien ŋwan esie oro ɔdiɔk ye enye, aka owo, onyuŋ ɔkpɔŋ enye, aka ufɔk ete esie ke Beth-lehem-judah, onyuŋ oduŋ do ke ofuri ɔfiɔŋ inaŋ.

MICAH 2:10

Mbufo edaha ke enyɔŋ eka: koro midige ebiet nduɔk-odudu (mbufo) edi emi: koro enye edehede, eyesobo (mbufo), ndien nsobo oro eyediɔk eti-eti.

JEREMIAH 3:22

Mbufo nditɔ mfiakedem efiak edi, ndien ami nyekɔk mfiakedem mbufo. “Sese, nnyin itiene fi, koro afo edide Jehovah Abasi nnyin.

JEREMIAH 2:7

Ndien ŋkada mbufo nduk ke isɔŋ enyene eti iŋwaŋ, nte edia mfri esie ye mfɔn esie: ndien mbufo eduk edisabare isɔŋ mi, enyuŋ enim udeme mi ke ŋkpɔ mbubiam.

ISAIAH 24:5

Isɔŋ onyuŋ edehe ke idak mmɔ emi eduŋde ke esit: koro mmɔ eduede mbet, ebiatde ewuhɔ, enim nsinsi ediomi ke ikpikpu.

DEUTERONOMY 22:21

ndien yak mmɔ eda eyen-aŋwan ewɔŋɔ ke enyin-usuŋ ufɔk ete esie, mbio-obio mmɔ enyuŋ etɔŋɔ enye ke itiat ewot: koro enye ama anam ɔburɔbut ido ke Israel, ke erika owo ke ufɔk ete esie: ntre ke afo edisio idiɔk ido ke otu fo efep.

MATTHEW 5:31

Ekenyuŋ edɔhɔ ete, Owo ekededi eke osiode ŋwan esie ndɔ, yak ɔnɔ enye ŋwed usio-ndɔ.

ŊWED MME PSALM 106:38

enyuŋ eduɔk iyip owo eke miduehe isop, kpa iyip nditɔ mmɔ iren ye iban, emi mmɔ ewade enɔ ndem Canaan: ndien isɔŋ abiara ke iyip.

JEREMIAH 22:20

Dɔk ke Lebanon, nyuŋ fiori; nyuŋ menere uyo fo ke Bashan, nyuŋ tie ke Abarim fiori: koro kpukpru mmɔ eke emade fi esuanade.

ŊWED ESEME 1:2

Enye atua eyet eti-eti ke okoneyo, mmɔŋeyet esie onyuŋ eyere enye ke mfuk: baba owo kiet eke ɔdɔŋde enye esit iduhe ke otu kpukpru mmɔ eke emade enye: kpukpru mme ufan esie ebiaŋa enye emekabare edi mme asua esie.

HOSEA 2:2

Mbufo etɔhɔ ye eka mbufo, etɔhɔ: koro enye midige ŋwan mi, ami nnyuŋ ndige ebe esie: yak enye osio ndien use esiemɔ ke iso esie efep, onyuŋ osio efibe esiemɔ ke ufɔt eba esie efep; mbak ndifuhɔre enye iferi,

JEREMIAH 31:22

Adaŋa didie ke afo ediyɔrɔ, O eyen-aŋwan mfiakedem? Koro Jehovah obotde obufa ŋkpɔ ke ererimbot, ŋwan eyekan eren.

EZEKIEL 16:30

Ɔbɔŋ Jehovah ɔdɔhɔ ete, Esit fo efere didie ke emi afo anamde kpukpru ŋkpɔ emi: utom nsɔŋido aŋwan use;

EZEKIEL 16:35

Akpara, kop ndien uyo Jehovah: ntem ke Ɔbɔŋ Jehovah ɔdɔhɔ ete,