DANIEL 2:47 - Edisana ñwed Abasi Ibom

⁴⁷ Edidem ɔbɔrɔ Daniel onyuŋ ɔdɔhɔ, ete, Ke akpanikɔ Abasi mbufo edi Abasi mme abasi ye Ɔbɔŋ ndidem: edi enye ayarare ndibe-ndibe ŋkpɔ, koro afo ekemede ndiyarare ndibe ŋkpɔ emi.

DANIEL 2:47 Referans Kwoze

DANIEL 2:28

edi Abasi emi ayararede ndibe ŋkpɔ odu ke enyɔŋ, ndien edi enye asian edidem Nebuchadnezzar se ididide ke ukperedem usen. Ndap fo ye ŋkukut ibuot fo ke bed fo ekedi mme mmɔ emi;

DANIEL 2:22

Enye ayarare ndituŋɔ ye ndibe-ndibe ŋkpɔ, ke ɔfiɔk se idude ke ekim, uŋwana onyuŋ oduŋ ye enye.

AMOS 3:7

Koro Ɔbɔŋ Jehovah midinamke baba ŋkpɔ kiet, ke mibɔhɔke ini enye ayarade uduak esie ɔnɔ ikɔt esie mme prophet.

DANIEL 11:36

Ndien edidem eyenam kpa nte enye amade, onyuŋ emenere idem esie ke enyɔŋ, onyuŋ onim idem esie ke akamba akan kpukpru abasi, onyuŋ etiŋ mme utibe ŋkpɔ abaŋa Abasi mme abasi, eyenyuŋ oforo tutu ikpahesit okure ama: koro enye eyenam se ekewukde.

DEUTERONOMY 10:17

Koro Jehovah mbufo edide Abasi mme abasi, ye ɔbɔŋ mme mbɔŋ, Abasi emi edide ata akwa, ye ɔkpɔsɔŋ, ye akpakop, emi miteŋeke owo baba kiet enyin, minyuŋ ibɔhɔ enɔ:

ERIYARARE 19:16

Enye onyuŋ enyene enyiŋ emi ewetde ke ɔfɔŋ-idem Esie ye ke ifuhi Esie ete, EDIDEM NDIDEM YE ƆBƆŊ MBƆŊ.

ERIYARARE 17:14

Mmɔ eyeŋwana ekɔŋ ye Eyen-erɔŋ, ndien Eyen-erɔŋ eyekan mmɔ, koro Enye edide Ɔbɔŋ mbɔŋ ye Edidem ndidem; mmɔ emi edude ye Enye eyenyuŋ ekan, kpa mmɔ emi Abasi okokotde, onyuŋ emekde, emi enyuŋ edide mme anam akpanikɔ.

ERIYARARE 1:5

onyuŋ oto Jesus Christ, emi edide ntiense emi anamde akpanikɔ, andibem iso mmana ke otu mme akpa-mkpa, ye andikara ndidem isɔŋ. Enye emi amade nnyin, okonyuŋ adade iyip Esiemɔ atat nnyin uruk mme idiɔk-ŋkpɔ nnyin;

1ŊWED TIMOTHY 6:15

emi Abasi ediyararede ke edikem ini; kpa Enye emi edide Andikara, emi enyenede itoro onyuŋ ikpɔŋ-ikpɔŋ adade ubɔŋ, onyuŋ edide Edidem mme edidem ye Ɔbɔŋ mme ɔbɔŋ;

DANIEL 2:37

Afo, O edidem, edi edidem ndidem: koro Abasi enyɔŋ ɔmɔnɔ fi ubɔŋ, ye odudu, ye nsɔŋidem, ye ukpono.

ŊWED MME PSALM 136:2

Oh mbufo ekɔm Abasi mme abasi: koro ima esie odude ke nsinsi.

ŊWED MME PSALM 82:1

ABASI ada ke esop ata mkpɔsɔŋ; ke otu mme ebierikpe ke enye ekpe ikpe.

ŊWED MME PSALM 72:11

Ndien kpukpru ndidem eyenuhɔ enɔ enye: kpukpru mme idut eyenam ŋkpɔ esie.

GENESIS 41:39

Ndien Pharaoh ete Joseph, Sia Abasi ama akanam fi ɔfiɔk emi kpukpru, owo ndomo kiet eke enyenede ikike ye ifiɔk nte afo iduhe.

DANIEL 4:32

Ubɔŋ amadaha ɔkpɔŋ fi; ndien mmɔ eyebin fi ke otu owo efep, iduŋ fo eyenyuŋ odu ye mme unam ikɔt; eyebɔk fi ke mbiet nte enaŋ; ndien isua itiaba eyebe fi, tutu afo edifiɔk ete ke Ata Edikoŋ akara ke ubɔŋ ererimbot, onyuŋ ada enye ɔnɔ owo ekededi eke enye amade.

DANIEL 4:17

Ŋkpɔ emi oto ke ewuhɔ mme andikpeme, ikɔ emi onyuŋ oto ke uyo me edisana (angel); man mmɔ eke edude uwem efiɔk ete ke Ata Edikoŋ edi etubom ke ubɔŋ ererimbot, onyuŋ ada enye ɔnɔ owo eke enye amade, onyuŋ emen ata ŋkpri owo odori, ete edi etubom ke esit.

DANIEL 2:19

Ndien eyarade ndibe ŋkpɔ emi enɔ Daniel ke ndap ke okoneyo.

ŊWED JOB 12:19

Osio mme oku ŋkpɔ ke idem, ada mmɔ ɔnyɔŋ, onyuŋ anam mmɔ eke esɔŋɔde ke itie efiɔnɔde.

JOSHUA 22:22

Abasi, Abasi Jehovah, Abasi, Abasi Jehovah ɔfiɔk, Israel eyenyuŋ efiɔk: ama edi nsɔŋ-ibuot, mme idiɔk ido ye Jehovah (kunyaŋa nnyin mfin emi),

DANIEL 4:25

ndien mmɔ eyebin fi ke otu owo efep, iduŋ fo eyenyuŋ odu ye mme unam ikɔt, eyenyuŋ ebɔk fi ke mbiet nte enaŋ; enyuŋ eda mbara enyɔŋ ebit fi; isua itiaba eyenyuŋ ebe fi, tutu afo ɔfiɔk ete ke Ata Edikoŋ akara ke ubɔŋ ererimbot, onyuŋ ada enye ɔnɔ owo ekededi eke enye amade.

1 ŊWED CORINTH 14:25

ndibe ŋkpɔ eke edude enye ke esit ewɔrɔ ke aŋwa; ntem ke enye eyeduɔ okibi iso esie ke isɔŋ, onyuŋ atuak ibuot ɔnɔ Abasi, onyime aŋwa-aŋwa ete Abasi odu ke otu mbufo ke akpanikɔ.

ŊWED MME PSALM 136:3

O mbufo ekɔm Ɔbɔŋ mbɔŋ: koro ima esie odude ke nsinsi.

EZEKIEL 26:7

Koro ntem ke Ɔbɔŋ Jehovah ɔdɔhɔ, ete, Sese, ami mmɔŋ nda Nebuchadrezzar edidem Babylon, edidem ndidem, ke edere, ye horse ye chariot, ye mbon horse, ye akwa udim owo, ntiene Tyre.

DANIEL 2:29

ama edi afo, O edidem, ekikere fo ɔkɔdɔk ke bed fo, ete, Nsidi ŋkpɔ eke edidide ke ini iso: ndien enye emi ayararede ndibe-ndibe ŋkpɔ asian fi se ididide.

DANIEL 2:30

Ndien ama edi ami, idige ɔniɔŋ eke odude mi ke idem akan kpukpru mme odu-uwem, esin eyarare ndibe ŋkpɔ emi enɔ mi, edi man esian edidem nte asaŋade, man afo onyuŋ ɔfiɔk ekikere esit fo.

DANIEL 3:15

Edi edieke mbufo enyimede ndien ndiduɔŋɔ ke isɔŋ nnyuŋ ntuak ibuot nnɔ owo o-gold emi ŋkowukde, ke adaŋemi mbufo edikopde uyo obukpoŋ, ye ifiom, ye harp, ye sacbut, ye psaltery, ye dulcimer, ye kpukpru oruk ndido, ɔfɔn: edi mbufo mituakke ibuot, ke ndo-ndo emi eyemen mbufo eduɔk ke akwa ikaŋ eke asakde; ndien ewe abasi odu eke edikemede ndinyaŋa mbufo nsio mi ke ubɔk?

DANIEL 3:28

Nebuchadnezzar ɔbɔrɔ onyuŋ ɔdɔhɔ ete, Ekɔm Abasi Shadrach ye Meshach ye Abednego, emi ɔkɔdɔŋde angel esie, onyuŋ anyaŋade ikɔt esie emi ebuɔtde idem mmɔ ye enye, enyuŋ ekpuhɔrede uyo edidem, enyuŋ eyak idem mmɔ, man ekunam ŋkpɔ, ekunyuŋ etuak ibuot enɔ baba abasi kiet, ke mibɔhɔke Abasi idem mmɔ.

DANIEL 3:29

Ami nnyuŋ ŋwuk ewuhɔ, nte ke eyeda idut, ye obio, ye usem eke etiŋde se minenke edian Abasi Shadrach ye Meshach ye Abednego, ekpok mmɔ mbak-mbak, enyuŋ enim ufɔk mmɔ ke ekwe: koro baba Abasi efen eke ekemede ndinyaŋa ntem miduhe.

DANIEL 5:11

owo kiet odu ke obio fo emi spirit edisana Abasi odude enye ke idem; ndien ke eyo usɔ ke ekekut ete ke ɔniɔŋ ye eti ibuot ye ifiɔk emi ebietde ifiɔk Abasi, edu enye ke idem: ndien edidem Nebuchadnezzar usɔ, kpa usɔ edidem okonim ndien enye ke etubom mbon-ŋwed, ye mbia-idiɔŋ, ye mme Chaldean, ye mbia-mfa:

2 NDIDEM 5:15

Ekem, enye ye ofuri udim esie efiak ekesim owo Abasi, edi edida enye ke iso: ndien enye ɔdɔhɔ ete, Mbɔk, sese, mmɔfiɔk nte ke baba Abasi kiet iduhe ke ofuri ereri-mbot, ke mibɔhɔke ke Israel: mbɔk ndien, bɔ owo fo ŋkpɔ mfɔn.

ŊWED MME PSALM 96:4

Koro Jehovah omokpon, onyuŋ odot nte ekpetorode enye eti-eti: enye enyene uteŋe akan kpukpru abasi.