1 JOHN 1:8 - Edisana ñwed Abasi Ibom

⁸ Edieke nnyin idɔhɔde ite, nnyin inyeneke idiɔk-ŋkpɔ, nnyin ibabiaŋa idem, akpanikɔ inyuŋ iduhe nnyin ke esit.

1 JOHN 1:8 Referans Kwoze

ŊWED MBON ROME 3:23

koro kpukpru owo ema enam idiɔk-ŋkpɔ, enyuŋ etaba ubɔŋ Abasi.

JAMES 3:2

Koro kpukpru nnyin idedue ke ediwak ŋkpɔ. Edieke owo ekededi miduehe ke ikɔ-inua, enye ɔfɔn ama, onyuŋ ekeme ndikara ofuri idem esie nde.

ECCLESIASTES 7:20

Koro baba eti owo kiet eke anamde eti ndien midiɔkke, iduhe ke ererimbot.

ISAIAH 53:6

Kpukpru nnyin idiyo nte erɔŋ: kpukpru nnyin ikabare iduk ke usuŋ nnyin; ndien Jehovah ada idiɔk ido nnyin kpukpru odori enye ke idem.

1 JOHN 2:4

Owo emi ɔdɔhɔde ete, Mmɔfiɔk Enye, ndien minimke mbet Esie, edi osu-nsu, akpanikɔ inyuŋ iduhe Enye ke esit;

1 JOHN 1:10

Edieke nnyin idɔhɔde ite akanam nnyin inamke idiɔk-ŋkpɔ, imakabare Enye inim ke osu-nsu, ikɔ Esie inyuŋ iduhe nnyin ke esit.

MME ŊKE 20:9

Anie edidɔhɔ ete, “Mmeyet esit mi asana, mmeyet idiɔk-ŋkpɔ mi ke idem mi mfep?”

ŊWED JOB 15:14

Owo edi nso eke enye akpasanade? Owo eke ŋwan amande onyuŋ edi nso eke enye ekpenende?

ŊWED MBON GALATIA 6:3

Koro edieke owo abatde idem ke ŋkpɔ ke ini enye midige ŋkpɔ, enye ababiaŋa idem.

ISAIAH 64:6

Nnyin kpukpru inyuŋ ibiet ŋkpɔ ndek, kpukpru nti ido nnyin enyuŋ ebiet edidehe ɔfɔŋidem; kpukpru nnyin inyuŋ iyemere nte ikɔŋ; mme idiɔk ido nnyin enyuŋ emen nnyin efep nte ofum.

ŊWED MME PSALM 143:2

Kunyuŋ ukot owo fo ikpe: koro ikpe misanake baba andidu uwem kiet ke iso fo.

JAMES 1:26

Edieke owo abatde idem ke owo Abasi, minyuŋ imumke edeme esie ikama, edi abiaŋade esit esie, erinim eke enye onimde ido Abasi ɔwɔrɔ ikpikpu.

1ŊWED TIMOTHY 6:5

ye isuŋi, ye idiɔk ekikere, ye ɔkpɔsɔŋ eneni ke otu mmɔ emi ekikere mmɔ ama akabiara, akpanikɔ ama onyuŋ ɔbɔhɔ mmɔ; etie mmɔ nte uteŋe Abasi edi afaŋ udia-udori.

ŊWED JOB 25:4

Ndien owo anam didie enen ye Abasi?

1 NDIDEM 8:46

Adaŋemi mmɔ ediduede fi, (koro owo baba kiet eke miduehe fi miduhe), ndien afo ama ayat esit ye mmɔ, onyuŋ ayak mmɔ ɔnɔ mme asua mmɔ, ndien mmɔ eke emumde mmɔ etaŋ mmɔ efep, enyɔŋ ke isɔŋ mme asua mmɔ, edide anyan usuŋ, onyuŋ edide mkpet-mkpet;

1 ŊWED CORINTH 3:18

Owo okubiaŋa idem. Edieke owo mbufo ekededi esede idem ke enyene-ibuot owo ke eyo emi, yak enye akabare edi ndisime, man enye ɔfiɔk ŋkpɔ.

ŊWED JOB 14:4

Edisana ŋkpɔ akpakam oto ke ŋkpɔ ndek; baba kiet itoho.

2 CHRONICLES 6:36

Adaŋemi mmɔ ediduede fi, (koro owo baba kiet eke miduehe, miduhe), ndien afo ediyatde esit ye mmɔ, edinyuŋ ayakde mmɔ ɔnɔ mme asua mmɔ, ndien mmɔ eke emumde mmɔ etaŋ mmɔ enyɔŋ ke isɔŋ eke oyomde, mme eke ekperede:

2 JOHN 1:2

ke ntak akpanikɔ eke oduŋde nnyin ke esit, edinyuŋ odude ye nnyin ke nsinsi.

1 JOHN 1:6

Edieke idɔhɔde ite, iduk nduk ye Enye, ndien nnyin isaŋa ke ekim, nnyin isosu, inyuŋ inamke se idide akpanikɔ:

JAMES 1:22

Yak mbufo edi mme anam-ikɔ, ekudi mme andikokop ikpɔŋ-ikpɔŋ, ebiaŋa idem.

2 ŊWED TIMOTHY 3:13

Edi ndiɔi owo ye mbon abiaŋa eyedɔdiɔŋ ediɔk eka iso, ebiaŋa owo, owo eyenyuŋ ebiaŋa mmɔ.

ŊWED JOB 9:2

Ke akpanikɔ, mmɔfiɔk nte ke edi ntre: ndien owo edinam didie akaŋ idem esie ke iso Abasi?

3 JOHN 1:3

Koro mmedat esit eti-eti ke ini ndusuk nditɔ-ete edide, enyuŋ edɔhɔde ete, ke afo edi owo akpanikɔ, kpasuk nte afo onyuŋ asaŋade ke akpanikɔ odu uwem.

2 PETER 2:13

Mmɔ ebat ete edi ŋkpɔ inemesit ndidu otime uwem ke uwemeyo; mmɔ edi ɔkɔp ye ndo, emi enamde ido otime-otime ke usɔrɔ ima mmɔ, ke ini mmɔ ediade udia ye mbufo.

JEREMIAH 2:35

Ndien afo ɔdɔhɔ, ete, Koro mmennyeneke se nduede, ŋkɔm enye eyemen mi iyaresit esie ke idem efep. Sese, ami nyekpe ikpe ye afo: koro afo ɔdɔhɔde, ete, nnamke idiɔk.

JOHN 8:44

Mbufo edi nditɔ ete mbufo, kpa Satan, enyuŋ eyom ndinam obukpo udɔŋ ete mbufo. Enye edi owot-owo toto ke eritɔŋɔ, ikonyuŋ isɔŋɔke ida ke akpanikɔ, koro enye minyeneke akpanikɔ ke esit esie. Ke ini enye osude nsu, enye osio se idude ke esit etiŋ: koro enye edi osunsu, ye ete nsu.

ŊWED MBON ROME 3:10

nte emi ewetde ete, Baba owo kiet eke enende iduhe, baba owo kiet;

1 JOHN 4:20

Edieke owo ɔdɔhɔde ete, Mmama Abasi, ndien enye asua eyen-ete esie, enye edi osu-nsu; koro owo emi mimaŋa eyen-ete esie emi enye okokutde ke enyin ikemeke ndima Abasi emi enye mikekwe.

LEVITICUS 13:12

Ndien edieke akpa-mfia oro ɔtɔtde ke ikpɔhidem, akpa-mfia onyuŋ ofuk ofuri ikpɔhidem owo udɔŋɔ oro, ɔtɔŋɔde ke ibuot esie tutu osim ukot esie, adaŋa nte enye oku okutde;

2 NDIDEM 20:15

Ndien enye obup, ete, Mmɔ ekekut nso ke ufɔk fo? Ndien Hezekiah ɔbɔrɔ, ete, Mmɔ ekekut kpukpru se idude ke ufɔk mi: baba ŋkpɔ kiet eke mmeŋkowutke mmɔ iduhe ke ebiet unim-ŋkpɔ mi.