Ayub birye, awinilye nang, Elifas ap, Bildad ap, Zofar ap, sik nirya ati, Allah morobuk. Akunum morobukopura, Allah arye Ayub morobuk ning kekebuk. Kekebukce, Ayub talyamuk bukni, kum danamuk ning ara, Allah arye Ayub biti, dua kali lipat nyalamak touk, utam kum kiyamuk ning pununa ati, eitam tonap tabakuka, pia weik arye arebukce, melilamuk. Winibuka anya arye, minop talak ara, Ayub bon-bona mitik tonun dem talilamuk bukni, atalak ara, tonap bon-bona utotoa pia weik talinanye dayuk.
Zakaria 9:12 - Eipomek12 “Se, anggunda yuk pera mutuku bobinamsikba, wenen aik pum tam tuba ululum ninye ara, ‘Dipkoprop Allah arye, lobuka lyepnamsil’ tenen, kintinibuka dinauk unamnulume. Asum ara, narye anggunti, ‘Tuba tonap teleb kipdeipnamsine,’ nyabuka, nyalin yupu deice arye nyapsine. Winipnamna ati, tamubuka anggun minop talak, cang keil poka dobuka, antanapdongamlum mutuku yanuka unamlume. Narye anggunti, melipsiniba, pia telebuk unamlume. Ati kekeplulume, na weik tonun langdibuka arenamsine. Ara, anggun imun kanye bobuka, winilamlum ning pununa ati, like bitinye deice arye, arelbalamak touk kibuka, arenamsine. Imun kanye bobuka ulamlum ning ara, mitik weik ulamuk bukni, pia kanye delin ning arenamsina ara, kum nukmanto, like bitinye deice arye, arelbalamak touk, kibuka arenamsine. Gade chapit la |
Zakaria 9:12
23 Referans Kwoze
Anggun Israel ninye, minop talak ara, yuk pera mutuku nang amu tam ulamlum talak noutam arye, ‘Se nun pia malye winilamupe ati aunmabe,’ tenen, alye dakaldanamlume. Anggun malye winilamlum ning ati, alye dakalanamlumbuk, sik yuk mutuku nang arye anggun Israel ninye ati, yep-yep abuka nalilamsike. Winilamsikba, anggunda imun kanye bobuka ulamluma ati, alye dakalanamlume nyapsine. Bukni, aminyan talak ara, alye dakalalumunya dekna ati, na Allah arye pia teleb ning like bitinye atonun kibuka arenamsine. Winibuka arepsinyopura, aning-aning nirya weik upsiliba, kanye deibuka pin-pin asa arye pia unamlume. Aning ara, kume kum danamle, pia aunamsile.” Allah arye nyabuk.
Allah arye, “Wininamsine,” nyabuka, nyalilamuk yupu ap, el si kopropa deice arye nyabuk yupu ap ara, urasin yuk pia kum tamupmanto, elce nyabuk touk dipkoprop unamle. Allah arye aning bitinye ati, tilila yupu kum nyaptua anya arye, dipkoprop wininamle. Allah arye, ayupu bitinye deice nyapsuk ning deiyok ara ani. Ara, sikce, ‘Allah dipkoprop lyepnamsil’ tenen, diba tenebuka dinauk unyak ninye ara, ayupu kekebikca deice arye, talima kwa dipsilyopura, kanye teniltona kum unamake. ‘Allah arepsiliba, dopronamak ning, batakna kumce pia moubuka talibikirye unamak’ tenen, nyapsine.
Allah Yahweh arye, el mapu koproba, nun Israel yala nang ati, akunum lak kibuka, lak nyapmale. Ara elce, “Kume, na mapu koproba, sik Israel yala nang ara, teleb nanguk unyake. Sikda ‘Naʼ tenen nang, unyaka ati, sik Babel mutuku nang arye, sik nong deice weik ikin ning delilamik ning ara, wini talak anggun nong deice deipnusine,” nyapmale. Ati ara, nun Israel yala nang nirya, bulubibirye, tuba tamubuka, Yerusalem mutuku noutam bipyopura, nun si erenyap Allah, nun ni koproba Allah Yahweh ati, el siuk erenamabe. Ara, Allah Yahweh arye, pia mambul weik pil dolul ning ara, nukuka nyanamabe.
Bukni, Allah Yahweh elda pia teleb ulule. Winilirye, elda elti, diba tenenyak nang nirya ati, kanye imun upsilye talak ara, elce pia melisulule. Ninye arye, ‘Nun mal olan nang yanuka opsicakʼ tenen, kat keil arye dobuka, cang keil aik ap, poka ap dobikirye, akeil aik pum tam dungnubuka balamak touk, Allah Yahweh ara, ‘El dam ati, yanuka melibuka lyepropsutueʼ tenen, el dam yanganamak nang, sikti, kalekuka melinamle. Kanye imun ning, sik dam kum yanganamle. Weik mok ceplirye, weik mek deipturye, obuka tokna dobuka, ninye asik dam yatua babye, Allah arye elti, diba tenenyak nang ati, kalekuka melipliba, telebuk unamake.
Sik malye wininyak ning dekna ati, akunum wenepnirye, aminyan talak ara, narye sik Israel ninye ati, anggur duk wa winak ap, yo duk moulamle yo noutamak ap ara, tuba tamubuka arepnamsine. Winipnamna deice arye, Akhor mutuku dam ara, winiryuk bublan atonun kipnibuk, amutuku ati tenebikirye, ‘Se, aminyan talak ara, telebuk unamabe,’ tenebikirye, kanye deibuka unamake. Ara, minop talak ara, malye winilamikba, Akhor mutuku noutam, weik wenebuka opse bukni, aminyan talak ara, tuba tamubuka, Akhor mutuku teleb kipdeipnamne. Minop talak ara, Israel ninye wel nang atonun ulamik talak ara, Mesir mutuku noutam pia ikin ulamikba, narye lyebuka lopdeipsiba, Mesir mutuku arye, batakuka bindobik talak ara, Israel ninye arye, ‘Nun ni Allah, el siuk erenamabe,’ tenebikce, sik kanye talima, na deiceuk deipnik. Winibuka, na siuk erelamnik touk, aminyan talak babye, tuba tamubuka, na dam yangakirye, teleb kanye bobuka, na siuk erepnamniake.
Yerusalem mutuku unyak ninye nirya ati, teleb yupu lamapdongobuka arye nyapnamlulume. Anggun malye-malye weik ulamlum ning ara, anggun wenena ati, ikin ning anggun nong deice delilamsisiba, wini talak ara, akunuma. Anggun malye winilamlum ning dekna ati, akunum arelamsise ning ara akunuma. Nara Allah, na si Yahweh arye, anggun malye winilamlum ning wenena ati, ikin ning weika arye anggun deice delilamsise. Tonok malye ning ati ara, wenena ning like bitinye deice arye arelamsise. Bukni aning nirya ara akunuma. Winipmanto ara, ninye arye malye winibikiba, wenena aik pum tam dongobikiba, daulamikca ani, wenen talak akunum kiplyopura, loltaklamak touk, anggunti lyepsinirye, ila tuba tonap, tamubuka teleb kipdeipnamsine.
Atalak ara, Allah Yahweh el unamlak, Sion mutuku deice yanuka tiklirye, weik yupu arye nyapliba, ninye nirya kekenamake. Ara, Yerusalem mutuku noutamak arye, weik yupu nyapliba, tukwak ninye nirya kekenamake. El yupu nyapnamla ara, liman lelamle atonun, nyapliba kekepnamake. Atalak ara, Allah el yupu weik arye nyapliba, im deice ulul ning ap, mutuku-mutuku nirya ulul ning ap, luluknamle. Bukni, Allah Yahweh, el mapu koproba Israel ninye, sikda kum bataknamle. Elce sikti, pia melibuka kalikinamle ati, sikda ilil kum unamle. El damuk teleb ubuka pia aunamake. Nabi Yoel birye nyabuk.
Winibik talak ara, Allah arye nati nyapnuk. Se, anda ninye sirika arye deiamkiknye bira, na yupu kekepnilyame. Aning ara ance moubuka biknulyame. Apun danamuk ninye yok nirya ara, an kayapu Israel yala ninye nirya daunyake. Israel ninye ayala-ayala nirya unyak ninye arye nyanyake. “Se, nun yok ara, akunum pun dasuke. Allah arye akunum luba kipsuke ati, dorupnin banamle talak nirya ara, yatanye birye lyepsuturye, lopdeipsutu do? Kum ati ara, nunda talyeuk unamabe. Yo mungkaba dakaltaklamak atouk unamabe. Tonap, ‘Yatanye birye lyepnamsil do?’ tenen, pia kum tenenamabe.” Israel ninye arye nyanyake.
Yerusalem anda, na Allah arye, tonap tuba teleb kipdeipnamne. Na Allah ara, na mapu koproba, sik Israel ninye ara, Yerusalem mutuku noutamak unamake. Minop talak ara, Yerusalem mutuku daulamik ninye arye, yuk mutuku, dana-dana tam mutuku nirya talibuka, pia mikip weik ulamik touk, aminyan talak babye, narye anggunti, teleb kipdeipsiniba, tuba tonap tamubuka, anggun mikip weik ninye unamlume. Anggun Yerusalem mutuku unamlum ninye ara, ‘Se, sikda na kilmapu atonun unyake’ tenen, weik arye bico tenesununa ati, teleb kipdeipsinyopura, yuk mutuku unamak ninye nirya ara, anggun amu tamuk unamake.
Yerusalem ninyeo, anggun malye kanye bona ati, butbuta deice umunyeba butbuta palipsuk ning ara, kiliplopmunce, weik kota mutuku noutam teleb kibuka ulamak touk unamlume. Sik ninye deiyok nang arye, pia teleb bun ning deice bulamak touk, narye ereipsiniba, telebak unamlume. Tonda yuk mutuku nang arye, malye kipsikce, tapu kouamsik ninye, anggun Sion mutuku umunye ninye ara, anggun ngang dam tapu koubuka wenen aik deiamsikba bulalum ning ara, wini talak ara lopdalulume. Anggun Sion mutuku deice arye deiamsik ninye ati nyapsine.
“Aning nirya wininamlume,” nyapmasina ara, urdem ati kum nyapsine. Deiyok ara, dipkoprob na tenepse talak akunum uplyopura, amutuku kalikina ninye noutamak, tonoknye birye, Efraim mutuku noutamak yukupnamle. Ara, nyapnamle. “Anggun nirya yangalulume. Nun nirya tuba tamubuka, Sion mutuku binamabe. Ara, nun ni koproba Allah, el si Yahweh, el si eren aik dam bibirye, el si erenamabe,” nyabuka yukupnamle.
Ance kam una lo ton arepnuluma deiyok ara, ani. Ara, ninye dibikirye, Sheol mutuku banyakak, akunum bikcopura, ninye arye anti tamubuka, ‘Naie telebe,’ kum nyapkitinge. Tonda, sik akunum diamik nang arye, an Allah ati, ‘Anda pia telebe,’ nyabuka, an si kum erepkitinge. Tonda, akunum diamikce nang tuku pum tam akunum bikcopura, sikce anti, ‘Kume, nun ni Allah ara, elce nyapsilye touk, dipkoprob aninguk wininamsululʼ tenebikirye, ‘Dan talak melibuka lyepnamsil do?’ tenen, antibuk dinauk kum unamake.
Ninye wenebuka dongolamak aik bunyak nang ara, lopdeipnirye, ‘Bai tam bilulume,’ nyapniba binamake. Tonda kunuknak unyak ninye ara, dirin dam dobuka deipnamne. Winipnirye sik aninye ara, dobuka yo pata mutuku aning-aning nirya teleb kibuka pana kum mutuku deipniba, unamak bukni, sik unamakak nirya ara, din ton pia kum patapnamle. Auna uk upnamle. Sik weinyak ning babye, bisik lilunak palamle maning ap, mutuku kon palamle maning ap, talye lukparabuka dinamake.
Anggun daunamlum nang mutuku sirya, im sirya nirya ululum nang nirya kekeplulume! Sik Babel mutuku nang arye tomobuka bobinamik Israel yala nang ara, atalak arye deiyok koubuka, Babel mutuku batakuka, Yerusalem mutuku noutam tamubuka yanganamake. Sikce Yerusalem mutuku yanamak nang arye, nyanamak ning ara, ani. Ara, “Nunce si erenyap Allah, nun ni koproba Allah Yahweh arye, sik Babel mutuku nang ara, wenebuka opnamle. Ura, sik malye winilamik ning ati, kwang daknamne! Tonda, sik Babel mutuku nang arye minop talak, nun ni koproba Allah Yahweh, el si eren aik ara, akunum ulubuka, sice buklomika ati, kwang daknamle,” nyabuka, weik yupu arye nyanamake!
‘Allah arye lyesulule’ tenen, diba tenebuka dinauk unyaba deice arye, nun kanye bokoltona ap, ilil una ap pia kum diparyuk, kanye deibuka, batakna kumce pia talibuka unyabe. Nun kanye talima ara, ‘Dip do, tilila do?’ tenen, kum teniltonyabe. Aning kum bukni, Yesus ati, ‘Nun Lyenanye usulule’ tenen, nun kanye talima Yesus el deiceuk delinyabe. Yesus ara, Allah el ulyak im deice pia teleb noutam aik akunum wekelbiyuk. Allah el arena ati, minop talak baju aik dopra balamik ning noutamak wilibuka domik aik ara, talye nang ton kum wekmanto ak ati, anyaik dana-dana noutamak ara, baju arye lapkwetebuka wilyamike. Aning atonun bukni, im deice ning ara, anyaik noutamak talye nang kum wekmanto ak bukni, Yesus arye nun melina ati, Allah el dam wekelbiyuk ning ara, talye lukparabuka noutam aik, pia teleb aik wekuk.
Sik aning ap, anang ap nirya ara, tuku pum tam arye bulubuka tonokak uk deipnamle. Ara, ninye arye malye winibikceura, deiyok nang arye anang bulubuka, wenen aik dongolamak touk, Allah arye amalye un ning nirya bulubuka tonokak pum tam uk deipnamle. Sik anang ara, asukumuk deibuka bublan tirikdongobuka, weik tonun ton asukumuk daulamikca ani, aminyan talak elce tenyamlye talak akunum kiplyopura, atalak aryuk amalye un ning nirya ap, malye unyak deiyok nang ap wenebuka oplirye, kum kipdeipnamle.
Diba, nun ni Allah, anda nun Israel ninye ati, pia melibuka kalikisilyamnye ulyame. Tonda, yu ninye arye nunti, opmanto usinyak talak ara, melibuka lyesilyame. ‘Allah elcuk winisulule,’ tenekinyabe. Bukni, yata deiyok ati, ance kum kekelamsiyak nang atonun upnamsilam do? Winipmanto ara, ninye asik nang, tia yanuka tonok lukunyan yanuka mapmaca, adiparyuk balamak nang atonun upnamsilam do? Tonda, yuk mutuku ninye asik nang arye, nun mutuku tikilyanabica ani, adiparyuk tamubuka, bisik balamak nang atonun upnamsilam do?
Allah arye nyabukba, nabi Yeremia birye, tamubuka nyabuk. Na ni Allah Yahweh, anda erebuka ulyamce, mikip kilinilyame. Na kanye imun unilye talak ara, na ni anda, na mikip kelinilyamnye ulyame. Tonda, imun kanye bobuka, unun talak do, ikin ning yanuka unilye talak do, na mal olan nang arye opmanto uninyak talak do nirya ara, ancuk melibuka kalikinilyame. An damuk yanuka dungnubuka uniba, yuk nang arye kum opnitinge. Telebuk wininune. Tukwak mutuku im sirya, mutuku sirya, unyak nang nirya ara, ‘Elcuk melibuka lyepdopnamsilʼ tenen, an damuk yanganamake. Mutuku sirya, im sirya nirya unyak nang, an dam yakirye, nyanamake. “Nun apu yapu arye talibuka, si erelamik ning ara, nong kum ning, talye ninguk talibuka si erelamik. Tilila yupu uk, diba tenebuka taleamikce, dipkoprob nong kum upnamle ning, ninye kum melipmanto ninguk talibuka winilamik,” nyanamake.
Se, Allah anti, an mapu Israel nang, nun nirya arye, ‘Nun ni Allah Yahweh el dem melibuka lyepropnamsile,’ tuba tenenamabe. Nun kanye pum tam nirya ara, an deiceuk deilinyabe. Ton nang ara, anti, batakanamkiak nang ara, ikin ning, sik dam yalyeba, dipkoprob alye upnamle. An Allah ati, ‘Nun likʼ tenen, batakikirye, yuk bisikuk banamak nang nirya ara, dibikcopura, sik akunum dibikce, unyak nang unyak mutuku uk, tuku amu tam, sik dam wekelbinamake. Ara, talye ati kum bukni, sik anang arye, an Allah ati akunum batakikce, donga tam kilongokinyaka ati, dibikcopura, akunum diamik nang dam binuka unamake. Na nio, anda Allah Yahweh, Kam Una Deiyoknye ulyame. Winipmanto ara, anda tukwak mutuku nang nirya ati, kam mek pu atonunye, Allah Yahweh ulyame. Bukni, sik malye wininyak nang arye anti, batakinyake.
Piblisite