Winipliba, ninye mutuku-mutuku nirya arye, sik deice weik dirin ulul ning eibikirye, kanye weik deibuka sik dirinak uk dilyanamake. Tonda sik dam arye weik dirina lak koprop uplyopura, yuk pera mutuku ninye, sik ninye deiyok kibuka talinyak nang Raja-Raja nang weik tonun, adirina lak uplya eibikirye, kanye talima lipdopliba, sik adiparyuk yanganamake. Ara, pia teleb kipdeipsiniba, aning dilyanganamaka ati nyapsine.
Zakaria 8:23 - Eipomek23 Na Allah Yahweh, aning-aning nirya talibuka, deice tam erebuka, Pia Mikip Weik Deiyoknye ununye birye, im deice tam unyak yin talen malaikat nirya, sik deiyoknye ununa ati, narye nyapsinye yupu ara, dipkoprob nong upnamlarya! Ara, aminyan talak ara, Yahudi yala nang kum bukni, mutuku-mutuku im sirya, mutuku sirya nirya arye, sik yupu koproba yuk-yuk nyanyak nang arye, Yahudi yala nang eibicopura, sik baju talibikirye, moronamake. Ara, “Se, anggun ton melipsululume! Yuk nang arye, ‘Allah ara, dipkoprob sik Yahudi yala nang ap, neika ulirye sikti, pia melilule,’ nyalamikba, kekelamupa ati, anggunda Yerusalem mutuku binumunye talak ara, ‘Nun ap ansinibuka bitibyeʼ tenen, moropsiyabe!” nyabuka moronamake. Atalak ara, winipmanto ning ara, ani. Ara, asum-asum nirya ara, Yahudi yala kum nang arye bulubuka yakirye, Yahudi yalanye tonok, el dam yakirye, ‘Bataksilirye bilyakʼ tenen, el baju talibikirye, ayupu nyanamake. Ara, “Amio, anda Yerusalem mutuku binuka, Allah Yahweh ati, el si erepnuminye talak ara, nun ap ansinibuka neika bitibyeʼ tenen, moropkiyabe. Anggunce Allah Yahweh ati, el si eremunye touk, nun babye atouk ubirye, Allah el si erenamabe,” nyabuka moronamake. Gade chapit la |
Zakaria 8:23
35 Referans Kwoze
Anggun Israel ninye kekepnululume. Dipkoprop anggunce bita kel kum kiamlum ninye, mutuku-mutuku nirya pera mutuku daunyak ninye ati yukupmunba, sik aninye nirya kekebikirye, adiparyuk anggun dam anyuk yanganamake. Aning atonun, yuk pera mutuku unyak ninye, sik Israel ninye bita kel kum kiyamik bukni, anggun dam bikbik abuka yanganamake. Anggun dam yanganamaka deiyok ara, na si erenululum Allah ara, na Yahweh arye anggun Israel ninye ati, wipdeiamsirye, ereipsisa ati, sik yuk yala ninye arye, ‘Se, Israel nang ara, weik mambule,’ tenesinyake. Nara malye winin ning tonok ning babye kum ununa anya arye, Pia Telebnye unirye, anggun Israel ninye ati pia kalikuka melisunune. Narye anggunti erepdeipsisirye, teleb kililamsisa ati, yuk pera mutuku ninye arye, anggun dam dilyanamake.
Anggunce Allah yupu lak kibuka peterepmunyopura, dib tenena kum ninye, ayupu kekebikca deice arye, sik talima noutamak malye winibuka, dungnulamice ning ara, laka upliba, kisok talipdanuka malye kanye bobikirye, “Se, Allah ara, aninye sik talima noutamak dipkoprop ulule. Bukni, nunda malye ninye tuba unyabe,” nyabuka, Allah ati, dib tenebikirye, el si erenamake. Na Paulus arye, nyapsine.
“Na Allah Yahweh arye, anggun Israel ninye ati nyapsine. Israel ninye sikce na si ereninyaknye bira, pia diksukum pia Teleb koprop Unanye unune. Narye anggun kwepdeiamsisirye, tuba kalikuka melisunune. Mesir mutuku ninye wa wiamikirye libuka delinyak ning ap, tonda, Etiopia mutuku ninye sik dekna ati, kintinibuka delinyak ning ap, Syeba mutuku ninye sik cang arye nenyak ninye, sik bon-bona ap weik tonun arelyanganamsiake. Amutuku nang ap, sik talinyak ning nirya ara, anggun dam boyakiba anggun diamuk dopropnamlume. Winipmunce, sik aninye ara taruk balye tam bisik dobuka tapu koubikiba, sikda anggun Israel ninye uk dobolyanamsiake. Sik anang nirya anggun dam yakirye, anggun si erena ati, urasin kanupdongopnamake. Sikce, ‘Allah el tonok ulirye, sik Israel ninye pia melilul’ tenen, kel bikikirye, ‘Sikce nun kum onamsil,’ tenena ati, moronamsiake. ‘Israel nang arye si erenyak Allah ara, pia dipkopropnye ulule. Yuk Allah ton kum ulule,’ nyanamake.” Allah arye nyabuk.
Ura, na Allah arye, tukwak nang im sirya, mutuku sirya nirya ara, sik kanye tenelamice ning ap, sikce mem pil donyak ning ap, sikce wininyak ning nirya ap ara, na elilamsa ati na akunum bikinune. Aminyan talak ara, na tamubuka yanyeura, tukwak mutuku im sirya, mutuku sirya ap, ninye ayala-ayala nirya ap, yupu yuk-yuk nyalamice nang nirya ap, noutam arye sal ton, kilapu ton, bulupdeipnamne. Sik aninye akunum bulup deipnye ati, wekice talak ara, na pia teleb unye ning ap, na pia mikip weik unilye ning ap ati, dirina weik unilye ning ara, lake upliba, eipnikirye bita biknamake.
Wininun bukni, anggun ni koprop arye, like yupa weik, keting tamun 10 talak arye, ubula dolamnuke. Ara, elce, ‘Winibuka arenamkine,’ nyabuka nyalilamnuk bukni, tuba tamubuka tonap, aning batakuka, yuk ninguk teneplirye, min arye nyapdeiamnuk touk kum bukni, “Yuk ning ton arenamkine,” nyabuka, tenepce aryuk nyanulule. Winilul bukni, Allah melilnilya deice arye Laban birye, malye ning weik kum winipnuke.
Ura, sik nong mek kilina ati, gisok koulongolamik cang kain ap, tonda, ‘Nun cang baju sung-sunga bolpipsilyak’ tenen, lelipdongobuka kitilongolamik baju ap, Paulus el bola pil amuk ning ara, dobuka, uk dilamuk ninye dam deililbalamik. Abaju dobuka delilbalamik arye, aninye uk dilamuk ning, kum danalamuk. Tonda, anang sik talima noutamak weklamik isa kutukuka balamik.
Allah arye sik wenena ati, weik ikin ning dobuka, Yerusalem mutuku nang deice deipnamle talak ara, ninye ara, mitik tonunuk kam unamaka ati, sik tekbarye kilapu nirya arye, ninye tonoknye talibikirye, moropnamake. “Se, ance nunti telebe tenepsutumce, dopsutumopura, nunce anti, ‘Nun dopsuknye ani,’ nyapkitibye. Nunce anti, ikin kum kipdeipnamkiyabe. Aning kum bukni, nuncuk, nun baju deknamabe. Tonda, nuncuk, nun din ning kintinibuka dinamabe. Ance aning-aning nirya ara, kum arenamsilame. Nuncuk aning nirya enamabe. Nunda, ‘Ninye arye kum dopsikceura, nun alye upsilyakʼ tenen, ance dopsiminyakarye, ‘An yala siuk arepnamsilamʼ tenen, moropkiyabe,” nyabuka moronamake.
Atalak ara, tonye birye, sik ni koproba aik bilirye, el kwit, el yalanye biti doproplirye, ayupu nyapnamle. “Na kao, an diamuk baju teleb ning ongopmalam ati, anti nun pia kanye imun upsilye talak ara, ancuk nun deiyoknye kipsilyame,’’ nyapnamle. “Anyaik ara, yu ati akunum ulubuka bataklopse bukni, ancuk amutuku talibuka, nun deiyoknye unamsilame,” nyapnamle.
Anggun talilulum ning noutamak arye bokuka, ninye tekbarye atonun ap, tonda ninye pinbarye atonun ap, bokuka arepnamlume. Wininamluma deiyok ara, ani. Ara, aminyan talak weik ikin upnamsil ning ara, ‘Atalak ara, aikin ning yanamle. Yuk talak ara, aning yanamle’ tenen, kel kum biktuma ati nyapsine. Ara, anggunce, anggun ning koproba bokuka yuk nang ati, melibuka arepmunyopura, aminyan talak anang arye, anggun ikin ning dopropmunye talak, anggun arelamlum nang arye melipnamsiaka ati nyapsine.
Nyabuk talak ara, Allah el Lek Sambala, Amasia el deice langdibuk. Tiga puluh (30) nang, sik deiyoknye, el Amasia birye nyabuk. “Isai, elce deiamuknye Daud, ‘Nunda, an ap an mapu nirya ap neika aunmabe. Dipkoproba Isai bira deiamuknye an ap, nun melina nang ap ara, nimalyap aryuk neika aunmabe. Tonda, Allah arye melipkiliba, teleb deice arye upmalame. Tonda, anti melipkice nang babye, Allah arye melipliba, teleb deice arye unamake. An ni koproba Allah, elcuk anti melikulula ati nyapkine,ʼ nyabuk. Nyabuka ati ara, Daud birye el dam yayik nang ati, ‘Telebe, neika unamabe,’ nyabukce, anang nirya bobuka, ‘Na yin talin nang, sik deiyok nang unamakʼ tenen, anang wipdeibukba, apil talibuka ulamik,” nyabuk.
Nyabukura, atalak aryuk, Elia birye Elisa biti nyabuk. “Anda aulyame. Nara, Allah el si Yahweh arye, ‘Yordan mekin yanulyame,’ nyapmanila ati, binune,” nyabuk. Nyabukura, Elisa birye tamubuka nyabuk. “Anda tuba kam unmalame. Aning ara dib ulye touk, dib yupu nyapkine. Tonda Allah ara, pia kam ulinye. Aning ara dib ulye touk, dib yupu nyapkine. Ati ara, Allah el si deice arye, nyapkine. An batakuka na yukak kum binune. Na melipkineba, neika Yordan mekin binamaname,” nyabukura, sik neika birik.
Atalak ara, Asyur mutuku ninye babye, Nimrod mutuku ninye nirya babye, ‘Israel ninye opnamap’ tenen, sik Israel yala ninye unamak mutuku yanuka weknamake. Bukni, winibuka wekicopura, Israel ninye arye sik Asyur mutuku ninye ap, Nimrod mutuku ninye ap ati, obikirye bisipnamake. Ara, Asyur mutuku nang obuka dakna ati, Allah arye wipdeipnamle mikip weiknye birye deiyok kiplirye, Israel ninye arye Asyur mutuku nang nirya ara, malye kibikirye, parang ya dobuka, sik Asyur mutuku ninye bobuka, amu tam delinamake. Tonda, Nimrod mutuku babye, ayin talin nang arye, parang ya arye obuka sirya dakikiba, aninye sik amu tam deibikirye, sik mutuku talinamake. Winibicopura, sik Israel ninye nirya, telebuk ubikirye darabuka, kat asa unamake.
An amu tam kibuka, pil dolamkise talak, keting tamun 20 tahun deice arye winilamnuke. An kilmapu bitinye ara, keting tamun 14 tahun pil dolamse deice arye dopse. Domba ap, kambing ap, arepnulum ning ati ara, keting tamun 6 tahun deice arye pil dolamse. Apil dolamse ning, aning pununa ati, ‘An menenga dekna ning ara, winibuka arepnamkine,’ nyapdeipnulum bukni, tonap tuba, aning batakuka, yuk ning teneplumce, nati arin ning ara, tagu barye diamuk, yuk-yuk arepnulume.
Yesus pil dolamuk ning kekebuka ati, elce utenebuk. ‘Yesus el cang baju, el si juba talye bol piptinyetoura, kwetepnute,’ tenebuk. Utenebuka ati, abanmek nang noutamak arye, Yesus el balye tam tikilyayukce, Yesus el deice ongopmok baju, el si juba bol pibuk. Yesus el cang baju bol pibukopura, adiparyuk, el ining balamuk ara, tunim abukura, teleb kibuk.
Ara, ‘Allah arye melipnamsilʼ tenen, kel biknamak’ tenen, Mesir mutuku noutamak ulamik talak ap, mek kum ati ninye kum ulamik mutuku noutamak ap, narye sirya dakne pil ap, ninye winipmanto kum pil dolamse ning ap, na dirina arelamse ning ap, sik asing koproba arye elilamik nang bukni, kum dib tenenyak kili sal nirya ara, wenebuka opnamne. Na mambul ning elilamik bukni, dib kum tenenyak ati ara, anang ara tonok ton kum bataknamne. Sik nirya wenebuka opneba dipnamake. Deiyok ara, sikce nati yanilamnikce, ‘Allah bira dipkoprob mikip weiknye ulul do, dib ulul do, kum do?’ tenen, teniltolamnike. Ila tuba tonap tagu barye (10) kali deice arye yaniplopnikce, winilelamnike ati nyapne.
Akaren noutam ara, Musa birye sekdeiamuk yupu nirya ara, Yosua elce dobuka, el mapu koproba, Israel nang bulubuka wekmeka kan-kan, sik kekena ati nukuk. Tonok yupu babye kum batakuk, aning nirya nukuk. Ara, sal ap, kilapu ap, mapu ap, yuk mutuku nang sik ap, sik nirya neika bukuka wekmek nang kan-kan arye, sik kekena ati abuku ara, Yosua birye dobuka, nukukura, kekebik.
Minop talak ara, anggun obuka sirya daksikce, anggun nong deice ikin ning delilamsik nang, sikce deibikba dadeipdanin yanganamak mapu nirya ara, anggun dam yakirye, anggun tibuk si erena ati, kisok kanupdongobuka kinamsiyake. Tonda anggunti malya nyabuka yep-yep alamsik nang nirya ara, anggun damuk yanuka kekebuka weknamake. Winipsikirye anggun mutuku Yerusalem mutuku ati nyanamake. “Se, amutuku ara dipkoprob Allah Yahweh elce wipdeiamuk mutuku, el ‘Naʼ tenen, mutuku ulule,” nyabuka nyanamkiyake. Tonda, “Se, Sion mutuku ara, malye ning tonok ning kum ulirye, Pia Lyena Deiyoknye Allah ara, Israel ninye kalikuka melilulnye, el amutuku ati kanye delilule,” nyabuka, Yerusalem mutuku ati nyanamake.
Tonda, moubuka dilinamlulume! Doyanamle talak ara, yu nang arye, anggun Israel yala nang ati, ikin ning, anggun nong deice delilamsik ning ap, ikin pil aruk lamsik ning ap ara, anggunti olyangalamsik nang ap, naryuk amalye nang ati, obuka kum kipdeipnirye, malye kibuka bataknamne. Tonda, winipmanto yupu deice arye, nyapnusine. Ara, domba basam wein nang arye, yan bir yok cepmalye domba basam ara, bisik binmanto kum upliba, adeiyoknye birye, adomba basam iribuka bobalamak touk, anggun babye, winipnamsene. Ara, anggun Israel nang babye, nong mitang upsilye talak ara, anggunce, ‘Se, yata wiriptibye do? Yata ubuka bitibye do?’ tenen, walwal kipdanin balamluma nang nirya babye, na Allah aryuk lyepropsinirye, teleb kipdeipnamsine. Tonda, yuk pera mutuku nang arye anggunti, obuka malye kipsikirye, si mutuku bobinamsiakopura, narye anggunti, lopdeipsinirye, dobuka tuba tamubuka, anggun mutuku koproba boyanamsene. Tonda, malye nang arye, anggun mutuku noutam arye yaksikcopura, narye anggun dam yanuka, kaliksinirye, anggun bulubuka, anggun mutuku koproba tamubuka boyasinirye, teleb kilinamsine. Winipnamne deice arye, anggun Israel nang ati, malye yupu nyapnarye, nalibuka akutulamsikba, alye weik ulamsuk ning ara, kum daneipnamne. Narye anggunti, tamubuka teleb kipdeipsiniba, yuk tam nang eipsikirye, ‘Se, wini talak ara, sik Israel nang ara, pia telebuk unyake,’ tenepsikirye, anggunti si erenamsiake. Tonda, sik yuk-yuk mutuku daunyak nang arye, anggun Israel nang ati, ‘Se, sik aninye nirya ara, dipkoproba mambul weik nang unyake,’ nyabuka, kanye pia deipsikirye, si erebuka kinamsiake. Anggun ti, pia teleb yupu nyabicopura, mutuku sirya, im sirya unyak nang nirya, ayupu kekebikirye, anggun si bikinamsiake.
Apil nirya akunum dobuka, sirya dakukopura, Asa birye sik Efraim mutuku ulamik nang nirya ap, Manasye mutuku ulamik nang ap, tonda Simeon yala nang ap, sik Yudea tam yanamikce, neika ulamik nang nirya, sik nirya ati yukubukura, Asa tam mutuku nang nirya yanuka bulubik. Tonda, sik anang nirya, ninye deiyoknye ulamuk aik damuk ulamik. Deiyok ara, sik ayala-ayala ninye ara, Israel tam noutam ulamik bukni, Asa birye teleb winilamukak, anang arye, Se, dipkoprob Asa birye si erelul Allah ara, Allah Yahweh arye Asa ap, sik Yudea tam unyak nang ap ati, kalekuka melilule tenen, bikamikce, sik aninye arye elilamik. Ati, Asa birye yukubukura, minopce yanuka bulubik.
Tonda, dan mutuku do nirya ap, dan provinsi do nirya ap, weik mutuku kota ap, apala mutuku noutamak provinsi nirya ap, ninye deiyoknye Raja arye, “Winipnamlulume,” nyana yupu laka nyapdeibukba, asurat yinipmek Yahudi yala ninye nirya ara, kanye pia deibuka, weik arye si erenmik. Winibikce, kanye teleb ubukba, sik aninye kanye teleb deice arye, weik kwalya kwalibuka deiamikce, si erebik. Tonda, Allah ati, telebe nyana ati, ton talak ara din si tebuka, din ning kum dilamik. Ton talak ara, kwalya kwalibuka dilamik. Winilamik talak ara, yuk mutuku nang bukni, sik Yahudi yala ulamik nang nirya ati, sik ilil pia weik ulamuka anya arye, kanye deibikce sik talima teleb ubukba, ‘Yahudi yala ninye winilamak touk, nun babye wininamabe’ tenen, Yahudi yala ninye diba tenelamik ning talibuka ulamik. Aninye nirya, kwalya kwalibuka dinmikce, si erenmik.
Piblisite