Tonda, Allah Yahweh arye anggunti, amutuku noutam arye yakuka donoksiliba, ninye yuk mutuku nang unyaka noutam, binuka unamlume. Tukwak mutuku noutam, mutuku-mutuku nirya binuka unamlume. Amutuku binuka umunye talak ara, sik amutuku unyak nang arye, talye keil ap, yo ap, yuk teleb ning ap, dobuka memebukabikirye, sikce, ‘Nun ni aniʼ tenen, talye ning atibuk, si erenamake. Atalye ning ara, anggun babye, anggun apu yapu babye, kum bikamlum ning buk, talibuka, isa si erenamlume.
Zakaria 7:14 - Eipomek14 Ura, sikce na yupu nyapdeiamse ning nirya ati, kum kekelamnika ati, sik dekna wenena ati winipse. Winipmanto ara, weik kumanya mikip yalirye, pu aplyeba, aning-aning bobuka, yuk mutuku dana-dana tam bobalamle touk, na mikip weik arye, sik Israel nang nirya ara, dobuka, yuk pera mutuku dopkwetepsiba, yu nang yanuka obikce, tapu koubukabikce, yuk pera mutuku noutam dabinuka deiamikba, ikinuk daulamike. Sikda, ninye asik nang atonun ulamika ati, sik mince kum bikamik mutuku nang kan-kan noutamuk, ikin kibuka daulamike. Narye winilamsa deice arye, anggun mutuku ara, min talak, pia telebuk ulamuk bukni, atalak noutam ara, yuk amutuku tuku noutam, pia teleb sukum tuku uamuk bukni, narye aning nirya ara, kum kipdeipsiba, anggun mutuku ara oldiamuk uamukba, amutuku noutam ara, ninye ton kum ulamikce, abinuka, oyanuka kum winilamikba, amutuku noutam nirya ara, pia malye dem upnin balamuk. Aning nirya ara, na Allah deice uka! Allah arye nyabuk. Allah arye nyabukba, nabi Zakaria kekebukce, sekdeibuk Gade chapit la |
Zakaria 7:14
35 Referans Kwoze
Tonda, anggunce deibuka, pil domunce, tuku deice koulalum ning nirya ara, anggun kum bikamlum nang, yuk pera mutuku arye yangan nang yakirye, yanuka anggun wa tuku nirya doropnamsiake. Bukni, anggun ning ara, ton kum dopropnalume. Tonda, yuk nang arye yu uplyeura, anggun dam tuba-tuba ikin ning delinamsiake. Anggun ti, olbisinauk wininamsiake.
Anggun nirya moubuka dipdelulume. Allah Yahweh arye, sik malye wininyak ninye ati, yu tenelul ning ara, kumanya balamle atonun ubuka, sik aninye deice, ikin ning yangalule. Anggun malye-malyeuk winilulum ninye ara, Allah el yu arye, wenepnamsil ning ara, anggun nong deice talye karin arye yanuka opnamsile.
Tonda, malye winipmunyopura, Allah el si Yahweh arye, anggun talye bataksilirye, amutuku noutam arye, yuk mutuku dopkwetepsiliba, anggunda mutuku-mutuku nirya unyak ninye noutamak binuka unamlume. Talye tikilyangan nang atonun unamlume. Yuk mutuku noutamak unamlum talak, ninye pia weika arye dipnamlum bukni, anggun yupa mitik tonun dem kam unamlume.
Allah Yahweh arye nyapnukopura, ayupu ton dukdongobuka nyabuk. Ara, el mapu koproba, sik Israel nang nirya ati, nyabuk. “Ara narye anggun Israel yala nang nirya, malye-malye winilamluma ati, yakdonokamsisiba, Babel mutuku nang arye, yanuka obuka bobinamsikba, pera mutuku, Babel mutuku noutam ulamlum nang ara, wini talak ara, buklulume! Wini talak ara, anggun yuk mutuku dabinuka ulamlum nango, Babel mutuku arye tamupmunce, adiparyuk bikbik abuka, Yerusalem mutuku tamubuka yalulume,” nyabuk.
Nara, Allah Yahweh arye nyapsine. Narye, yata yala nang nirya do, narye sik malye winin ninguk, talinyak nang ton, yupu akunum seksirye, anang akunum kum kipdeipse. Sik ayala nang, amutuku noutam ulamik ninye arye, weik asik dobuka, ulamik mutuku nirya ara, aning nirya narye dakuka, sice buklopseba, oldemuk kibuk. Winipseba, sik anyasik noutam pala bisik yamik ning ara, minop talak ninye weik balamik bukni, narye abisik nirya, dakuka sice buklopseba, wini talak ara, tonoknye babye, abisik kum balule. Tunim abuka oldemuk ulule. Tonda, sik amutuku asik dobuka, ulamikak ara, ‘Yuk tam yu nang arye olyasicakʼ tenen, kalikna ati, dolamik cang keil aik ap, kat keil arye, cang poka domik ning nirya ara, narye akunum dakuka bataksiba, wini talak ara, oldem kibuke. Tonda, amutuku noutam ara, ninye tonok babye ton, amutuku noutam kum unyaka ati, amutuku noutam yamik bisik ara, kum banyaka ati, tunim abuka, oldemuk ulule.
Allah el si Yahweh ara, el mapu koproba, sik Israel ninye ara, sik deice weik dua tiklamle touk, yanuka unamle. Winipmanto ara, minopce bebeya laklamle touk, upnamle. Tonda, mal dobikiba, minopce balamle atonun, Allah el mikip ara, winipnamle. El ‘Naʼ tenen, ninye, mal olan nang ati, el mal dopkweteplirye, minopce oplopnamle. Aning-aning nirya talibuka, Weik Erena Deiyoknye birye, ‘Wininamne’ tenelye touk ninye winipmanto kum pil dolulnye, Allah el si Yahweh arye, bilkong el si terompet arye, pong-pong apliba, weik lelim lepnamle. Ati, ‘Ninye olbinamap’ tenen, kintinipnamaka ati, bikilina ati, pong apnamle. Atalak ara, weik kumanya mikip eitam arye doplibuk, bubatek-bubatek abuka, kolukuka yangalamle touk winibuka, yalirye, el mal olan ninye ati, yanuka onamle.
Aninye deiyoknye, el yin talin nang arye, nun Israel ninye ati, ‘Aninye obuka sirya daknamap’ tenen, yanganmasik talak ara, aweiknye, el ninye ona ati, cang yo taice bopmuka ara, ance el ning alubuka, elti oplume. Atalak ara, sik malye ninye, sik ninye deiyoknye birye, ‘Sik Israel nang ara, ilil ati, duknupmak bukni, narye sik ayala ninye nirya, opnirye sirya daknamne,’ tenelamukce, el bidamnye kanye talima erepdayukce, kwalibuka ulamukbuk, ance anye bira oploplume.
Dipkoprop Allah Yahweh ara, minopce yu upliba, adiparyuk kum wenesulule. Bico tenepsilirye, namin asa aryuk melisulule. Bukni, el babye, mikip weiknye ulule. Ati ara, yata nang do nirya elti, ‘Nun likʼ tenebikirye, pia malye winibikcopura, sik wenenak arye batakliba, talye kum wininamake. Allah arye, sik malye uning ati, ‘Daupmalyeʼ tenen, talye namin kum kilule. Aning kum bukni, yu weik upliba, mikip arye anang ati wenepnamlarya. Dan mutuku do nirya, Allah Yahweh banamle mutuku noutam, el pil doplyopura, amutuku noutam ara, mikip weik kumanya dolamle. Tonda weik mok ap, kum ap, bebeya laklamle ning ap, ulule. Winipmanto ara, Allah Yahweh, el yan yanibuka, banamla sukum arye, atu sung-sunga ara, dua bum atonun unamle.
Ati, na Allah arye, mutuku si Raba mutuku poka domika ap, weik cang poka dobuka antanap dongobik ning ap, uku dopkwetepniba, diplirye kum danamle. Tonda, sik Raba mutuku nang arye, ‘Nun olan ninye arye yanuka opsicak’ tenen, weik keil poka dobuka, antanap dongamik ning nirya ara, uku dopkwetepniba, sikce domik aik nirya, uku arye dipnamle. Winibuka aninye opnamne talak ara, mal olan talak, weik lelim nyalamle touk, nyanmaliba kekepnamake. Tonda, mal olan talak ara, like tonok uku buk dingaplirye, dilamle touk winipnamle. Tonda, weik kumanya mikip arye dopliba, aik ap, aning-aning nirya ap, ulubuka, sirya daklamle touk winipnamle.
Adumbarye kisok taice belebukura, akan-kan arye, tonok ning ara, mitik tonun kisok taice ton belebuka tikuk. Amitik tonun kisok taice ara, el mikip weik ati, dabu tam ara, arah utara tam ap, keting palanyangan tam ap, tonda pia urasin teleb mutuku, Israel nang mutuku tam nirya ara, elcuk, ‘Amutuku nirya talipnamneʼ tenen, dinmok.
Tonda, Babel mutuku ninye deiyoknye birye, amutuku taleamukce, pil dolamuk keting tamun ara, dua puluh tiga (23) deice, el amu tam yin talin nang, sik weiknye Nebuzaradan birye, Yerusalem mutuku ninye yupa ara, tujuh ratus empat puluh lima ninye (745) ton tongobuka, Babel mutuku tamubuka bobiyuk. Aninye nirya ara, Babel mutuku nang arye, ikin pil dilamikba, talye piluk dolamikce, Babel mutuku noutamakuk, imun kanye bobuka ulamik.
Ati ara, anggun malye ulamlum ning ati, na yu weik upnukba, wenen ning dobuka, anggun deice deipsise. Tonda, Yehuda mutuku noutam ulamik nang, sik asik dobuka ulamik sukum ap, Yerusalem mutuku, weik asik noutam ulamik nang, sik bisik yamikce balamikak nirya ara, na yu upnukba, amutuku nirya ara, obuka sice buklopseba, oldemuk ubuk. Winipmanto ara, ninye arye, uku sekikirye diplyeba, tuku nirya silal selamle atonun, wini talak Yehuda mutuku nirya, eibuka biknamlume.
Anggun nirya moubuka dilulume! Winipmanto ara, Allah Yahweh el yu ara, weik yinya dolamle touk ubuka, malye wininyak nang, sik wenena ati, Allah el yu weik ulye ning ara, sik malye winilamak nang, sik kisok deice minop yalyeba, dolonyake. Tonda, Allah el yu weik upliba, elce, ‘Aning winipnamne,’ tenyamuk ning ara, atenyamlye touk ubuka, pil doplirye, sirya daknamle. Wini talak ara, aning ati, mitik tonun dem moubuka tenelulum bukni, aminyan doyanamle talak, sirya talak ara, Allah el mapu arye, aning winipliba eibikirye, dipkoprob moubuka biknamake. Allah arye, nabi Yeremia biti nyabuk.
Se, anggun Israel nang bicoe! Na Allah Yahweh arye, ninye yala yuk nang, ara pera mutuku nang ton, dobuka deipnyeba, anggun Yudea tam noutam ululum nang ati, ‘Aninye obuka, sirya daknamapʼ tenen, anggun dam yanuka warikil yanganamsiake. Asukum mutuku yala nang ara, pia min talak dodarapce, ulamik touk, tuba mikip aryuk unyake. Sik yupu nyanyaka ara, anggun Israel nang arye, kum kel bikluma ati, anang arye nyanamak yupu ara, kum kekepmanto unamlume.
Awenen yupu ara, Allah arye, weik laut mekwen deibuka lilun, mek wininga kan-kan unyak nang, Babel mutuku nang ati, na Yesaya dam yanuka nyapdeipnuke. Weik kanye ikin una deiyok ning yanamle ning ara, winipmanto ara, mikip weik kumanya pu abuka yalirye, dana tam kibuka, dana tam kibuka kilirye, tamubuka yangalamle touk kibuka, iknapye tam arye, (arah selatan) tam, malye weik unyak mutuku, Negeb mutuku noutam arye, ikin weik ning ara yanamle.
Diba, sik ona ati, yuk mutuku nang yanamak ning ara, mek obuka yangalamle touk kibuka, lelim weik nyabikirye yanamake. Winibikce talak ara, Allah arye sik yuk mutuku arye yanamak nang ati, yupu weika arye nyabuka wenepnirye, yupu sekdongopnamle. Winiplyeura, sik ayanganamakce nang nirya ara, kwarabuka karen-karen uk bikbik abuka bindopnamake. Sik anang ara, an dum duk koproba wepdobikirye, el kala batakikceba, kum arye bobuka balamle touk wininamake. Tonda buta ara, kumanya yalirye, pu abuka bobalamle touk, anang babye atonun upnamake.
Tonda, sik anang ati winipmanto ara, ipye arye ninye dakmaliba, ining dipmalyak arye, ining saklamle touk unyak nang ara, ance, ‘Atonun nang ara, wenebuka opminyakarye, kum kipdeipnalamʼ tenen, moropkine. Tonda, kilapu arye mi bomikca ani, aminyan talak mapu min kum deiamice talak, amapu ara, mun pum tamuk dibikiba, talye deliltaklamak touk, ‘Ance, sik malye winina deiyok nang ara, sik malye winin ning ara, min kum winipting talak aryuk, wenebuka opminyakarye, kum kipdeipnalam’ tenen, moropkine na nio.
Aning ara, Allah arye nabi Yeremia dam, “Amutuku ara aminyan talak opnamle. Talya lo uk unamlarya,” nyamukak, kekebuka laka nyalamuk ninguk, dipkoprob nong winibuka, dukdongobuk. Winibukura, keting tamun ara, tujuhpuluh (70) tahun noutam nirya ara, Yehuda mutuku ninye ton pia kum ulamikba, amutuku ara, talye lo uk uamuk. Ara, Sabat sum nirya ati, Israel nang arye, ‘Asum ara, weik mambul sum ati, pil kum dopnamabe,’ tenelamik atouk, amutuku-amutuku nirya ara, Allah arye, “Aning ara, winipnamle,” tenyamuk touk winibuk.
Winipnamsila ati, Allah Yahweh elcuk, anggun yupu kekena kum nang, yuk pera mutuku daunyak yu nang, mutuku sirya, im sirya, daunyak nang arye dopdeipliba, anggun olyangana ati yanamake. Winipmanto ara, talye karin arye, Bib maka lakuka yangaliba, ninye ilil ulamle atouk, sik pera mutuku yu nang arye, anggun dam minopce olyanamsiyak talak ara, ilil weik upnamsile.
Aninguk kum bukni, anggun Israel nang arye, nati, ‘Elda nun like ati, elce nyapdeipsuk yupu ara, kum kekebuka talinamabe,’ teneplumce, na yupu tuba yaniplopnumunyopura, na Allah arye, anggun unamlum mutuku nirya ara, olana deiyok ning arepnyeba, yuk mutuku yu weik yin talen nang arye, sik parang ya ap, olan ning nirya ap bobikirye, anggun dam yanuka, obuka sirya daknamsiake. Obuka sirya daksikirye, anggun nirya tapu koupsikirye, anggun babye, pera mutuku bobinamsiake. Aning winipsikcopura, yuk pera lo mutuku yu nang arye, anggun Israel nang ara, dana-dana tam mutuku bobinamsiake. Atalak noutam ara, tonok mutuku ak, kum unamlume. Dipkoprob, malye kanye bonamlume. Malye kanye bopmunce, yuk mutuku ninye asik nang ulamak touk unamlum talak ara, anggun wa windam nirya babye, malye kipdeipnamsine. Tonda, anggun unamlum asik, weik kota mutuku nirya ara, batakmunyeba, talye louk uplyeura, dimbulanguk, walang yo uk upnamle ati, nyapsine.
Na Allah arye, bai tam pia yu ulamle ning, kam ning nirya dobuka deipneba, anggun dam olyanganamsiake. Aning boyakirye, anggun mapu weika tonun, yanuka obuka sirya daknamsiake. Tonda, anggunce talibuka weinamlum ning ayala-yala nirya, yanuka obuka sirya dakanamsiake. Atonun, anggun wisi nang babye onamsiake. Winipsikce bukni, ninye weik dibikcopura, anggun yupa ara, mitik tonunuk unamlume. Ninye weik dibikceba, kum danin bacopura, anggun unamlum mutuku nirya babye, anggun banalun bisik babye, dipdemunyeba, talye louk uplyeba, banmamunce eipmunba, yuk-yuk ning kum dalya arye, amutuku nirya ara, din bulanguk, walang yo uk unalume.
Aning ara, talye ati kume. Na Allah arye aning nirya winipnamna deiyok ara, ani. Ara dipkoprob, na Allah Yahweh arye, aning anggun wenena ati, uku bobuka yanamne. Tonda na yanamne talak ara, weik kumanya mikip asa yalirye, lelim weik nyalamle touk, tonda kuda basam arye libuka tuku deice bobalamle ning, el si kereta perang minopce bikbik abuka balamle touk, na Allah babye minopce yanamne. Aning nirya winipnirye, sik malye winin ning kwang dakna ati, na yu weik uamnuk ning dobuka, sikce nati, ‘Nun like,’ tenepnikirye, na yanininyak nang, sik dam deipniba, weik kanye imun ning upnamle. Sik ti wenepnamne ning ara, weik uku buk dilamlirye, tin weik ulamle touk, mikip weik arye anang wenebuka opnamne.
Minop talak ara, anggun malye winilamlum ning wenena ati, narye batakamsisirye, lo arepsiba, yuk pera mutuku ninye arye, obuka sirya daksikba, yuk ninye nirya arye, ‘Anang ara nun like,’ nyabuka yep-yep alamsikba, yuk mutuku ninye arye anggun dam kum yangalamik. Bukni, wini talak ara, anggunti teleb kipdeipsiniba, pia telebuk unamlume. Narye ila tamubuka teleb kipdeipsinyeura, yuk yala ninye arye anggun Yerusalem unamlum ninye atibuk, tuba-tuba kanye deipsikirye, pia anggunti si erenamsiyake.
Yuk mutuku ninye deiyok kibuka unyak nang arye, na anggur wa nirya ara, akunum yanuka, malye kipdeipnike. Tonda, na wa wiamsak nirya ara, akunum yaniptaplopnike. Tonda, na tuku pia urasin teleb wamnuk mutuku nirya ara, sik yuk mutuku nang arye, ninye deiyok kibuka talibikce, pia malye kipdeibikba, bataklamaka mutuku, ninye kum ulamak mutuku atonun, oldem kipdeipnike. Ara, yuk mutuku yu nang arye, ‘Naʼ tenen nang, Israel nang ati, akunum olyanganyaka ati, nyapne.
Apia kanye imun weik ning, akunum arepsinyopura, ikin weik unamsila ati, anggunce obuka dinamlum ning ara, anggun aumunye nang kan-kan arye, anggun wisi nang arye, anggun bidamnye delilamunye mapu, obuka dinamlume. Aning atonun, anggun kan-kan arye, yuk mapu arye, sik ni yapu koproba bukni, obikirye, dinamake. Aning atonun, anggun Yerusalem mutuku ululum nang nirya ara, wenebuka kanye imun weik ning dobuka, anggun deice deipsinyopura, ninye weik dipnamak bukni, sik tuba batakniba, mitik tonun tuba kam unamak nang ara, yukak yakuka dopkweteptiniba, yuk mutuku im sirya, mutuku sirya nirya, binuka unamake.” Kumanya dana-dana tam arye dolamle touk, anggun babye dana-dana tam mutuku noutam bikbik abuka binuka unamlume.
Winipkilyopura, ance amutuku noutam tuba kam unyak Israel nang nirya ati, sik dam binuka, ayupu lak nyapnalyame. Ara, Allah Yahweh, pia deice tam erebuka, aning-aning nirya talibuka, Pia Mikip Weik Deiyoknye ulirye, sik Yerusalem mutuku, weik asik domika noutam tuba ululum nang ati, nyapsile. Ara, anggun anang nirya, din dinamlum talak nirya ara, ilil pia weik upsilyeba, anggun nong nirya sirem talinamsile. Atonun, anggun mek kwebuka dinamlum talak nirya ara, ‘Se, ikin weik ning, nun dam yanamsila ati, yata winiptibye do?’ tenen, kanye teniltonauk upsilyeba, anggun nong bol nirya ara, bol tililing apsilyeba, anggun nong nirya sirem talinamsile. Winipnamaka ara, talye ati kum bukni, deiyok ara ani. Ara, aminyan talak ara, sik unamak mutuku ap, amutuku noutam ulye ning ap nirya babye, pia malye unamle. Deiyok ara, wini talak sik mutuku noutam unyak nang nirya arye, pia yu weik uplirye, ‘Nun lik,’ tenelanauk ubikirye, pia tuba-tuba malye unamake. Wininamaka ati, ninye mal olana ap, walana ap, malye kililana ap, ubula dona ap, upnamaka deice arye, amutuku teleb ulye ning nirya ara, pia kum danamle.
Narye, Yerusalem mutuku ululum nang ara, yakuka donoksinyeba, yuk mutuku nang unyakak binuka unamlume. Tonda, narye wenepnamsin deice arye, yuk mutuku tam noutam ara, dana-dana tam nang unyakak noutam arye, dabinuka unamlume. Winipnamsina deice arye, narye anggun malye winimunye ning nirya, mitik-mitika arye, kum kipdeipnamsine.
Tonda, uku buk yalirye, dibuka sirya daklamle touk, sik ayin talin nang yakirye, aning-aning nirya, uku dongopnamake. Yanuka obikirye, akunum yukak banmace talak ara, uku buk dipliba, aning-aning nirya sirya dakalule. Ara, minop talak amutuku noutamak ulamuk ning nirya ara, Allah arye, Eden ban mutuku ara, aning-aning nirya kwepdeiamukba, pia teleb ulamuka atonun, uamuk mutuku bukni, sik yu yin talin nang arye, yanuka opsicopura, sul kwising arye nirya dibuka, sirya daksiliba, palamle ning nirya kum uplirye, pata mutuku ulamle touk, kiplopnamsiyake. Tonda, amutuku ubuk ning nirya ara, tonok ning babye, pia kum bataknamake. Tonda, sik ayin talin nang arye, amutuku yanuka warikice talak ara, tonoknye babye, ton kum bataknamake. Amutuku nang nirya opnamake.
Allah arye el mapu ati, kanye deiplirye, tuba bicoe kum tenepnamle. Deiyok ara, Allah elce nyalul yupu nirya ara, pia moubuka kum kekelamika atia. Aning winilamika ati, na si erenun Allah, elce sikti, bataknamle. Elce Israel nang akunum bataklyopura, sik anang nirya arye, tonok sukum una kumce, mutuku sirya, im sirya nirya ati, epra banauk unamake. Nabi Hosea birye nyabuk.
Piblisite