Zakaria 6:5 - Eipomek

⁵ Nyabuka asipdesiba, amalaikat arye tamubuka nyapnuk. “Akereta perang dumbarye balamuk ning, el nong noutam deiyok ara, ani. Ara, sik adumbarye kereta perang nong noutam ara, mutuku sirya, im sirya balamle kumanya yuk-yuk dabinamake. Ara, sikce, Allah aning-aning nirya talibuka, deice tam erebuka, Pia Mikip Weik Deiyoknye ululnye, el dam binmangu bukni, wini talak ara, tamubuka yamakce, yuk-yuk mutuku ton binamake.

Zakaria 6:5 Referans Kwoze

Wahyu 7:1

Aning nirya eipsopura, aminyan eipse ning ton nyapnusine. Ara malaikat dumbarye nang arye, tukwak mutuku koluka biyik. Ton malaikat ara, mutuku sirya im sirya bukni, keting yangan tam tikilbiyuk. Tonye bira keting wekelban tam tikilbiyuk. Tonye bira outam, tonye itam bukni, mutuku sirya im sirya tikilbirik. Sik malaikat dumbarye nang arye, dana-dana tam nirya yangalye kumanya ati, talibuka kalikil biyik. Ara, kumanya arye tukwak mutuku deice ap, yo kan-kan noutamak ap, laut mekwen tam nirya ap, ‘Min doplyak’ tenen, kumanya kalikil biyik.

Ibrani 1:14

Anggun ton teneipdelulume. Allah el im deice pil don nang malaikat nirya ara, im deice ning, dib kanye atonun nang unyakba, Allah arye sik malaikat ati, ‘Kume, ninye tukwak ninye lyepneba, ninye lyen ning nirya dolonamak ninye ati, sik melipnamlyame. Tukwak ninye, lyepnamne ninye ara, sik melina ati, ‘Pil melibuka donamlum’ tenen, anggun malaikat dolkwetesunune.’ Allah arye untenyamukce, sik malaikat ati nyabuk. Malaikat ara, Allah arye lyelul ninye sik melina ati, dolkwetelula anya arye, sik malaikat ara, mitik mambul unyak bukni, Allah el Mi Kopropa ara, eluk weik mambul ulule, nyapsine.

Ibrani 1:7

Allah arye, el malaikat nirya ati tenebukce, ayupu nyabukba, Mazmur yupu deice arye, adomon yupu sekamik. Ayupu ara ani. ‘Allah arye, el im deice pil don nang malaikat ati, sik winina yuk ning urasin yuk kililulba, kumanya atonun dakirye, unyake. Tonda, sik urasin yuk kililulba, uku buk ulamle atonun dakirye, el pil melibuka donyake.’ (Mazmur 104:4)

Yehezkiel 37:9

Winibuka, isin kum arepmok ati, Allah arye nati nyapnuke. “Se, anda ninye sirika arye, deiamkiknye ati nyapkine. Ance isin punanye bak, nyapnulyame. Pupun danamuk ninye nong nirya, isin dongona ati ara, winipnulyame. Allah Yahweh aning nirya talibuka, deice tam Weik Erenanye ulirye, ‘Winipnamne’ tenelul touk winilule. Elce nyapsile. Otam ap, eitam ap, outam ap, aulul kumanya nirya, dana-dana tam nirya ara, yamunce, minop talak oltaklamik ninye, sik pupun danamuk ning, yanuka weknulyame. Wini talak, sik nong dukdongobuka nong kipman deiamik ning nirya, nong pum bisik yanuka, pupminba, sik nong nirya buppu upliba, tuba tamubuka kam buknamake,” nyapnuke.

Matius 24:31

Na yanamne talak ara, im deice weik bung-bung ana nyabikiba, na im deice pil don nang, malaikat dopkwetepnyeura, im sirya, mutuku sirya dana-dana nirya, Allah minop arye wibuka deiyamuk nang bulubuka deibikirye, na dam boyanamake.

Zakaria 4:14

Nyapsiba, amalaikat arye nyapnuke. “Aning bitinye ara, Allah arye, aning-aning nirya talibuka, deice tam erebuka, Pia Mikip Weik Deiyoknye ululnye, tukwak mutuku im sirya, mutuku sirya talilirye, weik deiyoknye ulule. Elce, ‘Abitinye nang, na pil melibuka dopnamnirakʼ tenen, minyak mek kwebuka, sik kisok deice dikdeibukce, sik akunum wipdeiamukba, Allah el dam tuba-tuba tikidurake.” Malaikat arye, na Zekaria biti, laka nyapnukba, kekepse.

Daniel 7:10

Atalak ara, el yanuka bukmoka dam arye, weik mek balamle touk, uku dilamuk mek, kutukuka sakukce biyuk. Winibukba, im deice ninye, yupa pia weik, nukmanto kum beribu-beribuan ap, berjuta-jutaan nang ap nirya arye, el tibuk kanye deibikce kinmek. Sik nirya arye, ‘Elce tenebuka nyapsilye touk wininamap’ tenen, el dam kintinibuka kekenmek. Atalakuk, sik im deice unyak ninye, pia kum nukmanto ninye ton, el dam yanuka wekuka, antanap dongopmek diparyuk, tukwak ninye nirya bukni, sik yuk-yuk winilamik ning, sekiamuk buku yanuka deibikce, ‘Ninye yupu bokeipnuyap’ tenen, abuku yanuka yok deibik.”

Daniel 7:2

Daniel birye sekuk ning ara, ani. “Na Daniel lukunyan mopmanu buk, alengdar mapsirye, eipse ning ara, ani. Weik kumanya outam tonap, itam ap, tonda otam ap, atam ap, im deice arye yayuk kumanya ara, weik mekwen deiamukak yan dobukba, amekwen weik arye, lonting-lonting abuk.

Yesaya 54:5

Aning ara, talye ati kum nyapsine. Deiyok ara, anggun kwepdeiamsuknye, el Allah ati, ‘Se na dopnuknye bitonun ulule’ tenen, unamlume. Allah ara, el si Yahweh ulule. Elce anggun akanye bitonun melibuka unamsile. El dem aryuk, im deice unyak yin talin malaikat nirya talibuka, sik weik deiyoknye ulule. Anggun Israel ninye arye, malye winilamlum ning ati, opsutu bukni, anggun malye winilulum ning namin kipsilirye, anggun lyepnamsilnye bira, el Allah ulule. Anya arye, Allah ara pia Telebnye ulirye, anggunti pia kalikuka melisulule. Ninye mutuku-mutuku nirya arye, elti, ‘Allah ara, Weik Erebuka Eitamnye ulirye, tukwak mutuku, mutuku-mutuku nirya unyak ninye talilula deiyoknye bira, el si ara Allah Yahweh ulule,’ nyabuka, Allah el si atibuk erenamake.

Mazmur 68:17

Anggun weik mutuku kon deice ululum nang ara, yata deiyok ati, Sion mutuku eiplumce, ‘Se, yata ati, Allah arye nun mutuku kum weibuk do?’ teneplumce, malye kanye boplum do? Ara, sikda, Allah el si Yahweh arye, ‘Sion mutuku noutam ara, amutuku akunum kanye deipmana ati, nara amutuku noutam pia-pia aunamne,’ tenebukce, akunum wibuka ati, nun like,’ teneplum do?

Ayub 1:6

Ayub diksukumuk ulamuk bukni, Allah el pil dona nang malaikat dilamikce, ‘Nun ni koprop Allah damak unamap’ tenen, biyik talak ara, isa sik deiyoknye Isa Mutuku Dongonye babye, sik neika biyik.

1 Raja-Raja 22:19

Ayupu nyabukura, Mikha birye tamubuka nyabuk. “Dipkoprop nyapmakine. Ati ara, Allah el si Yahweh arye, nyapmakil yupu kekepnulyame. Aning-aning nirya talilulnye Yahweh, el bunak bukmokba, el pil don nang yin talin malaikat wekuka el kwanim tam ap, el sirik tam ap, tikmokak bukmokba, eipse,” nyabuk.

Lukas 1:19

Nyabukura, amalaikat arye tamubuka nyabuk. “Nara, talinye kume. Na si ara, Gabriel unune. Nara, Allah damak unirye, Allah elce dopkwetepmanilura, laka teleb yupu nyalyanmakine.

Matius 18:10

Sik nirya arye, amitik mi kanye talima lamapdongobuka ulamle touk unyak ninye ati, ‘Aninye ara, sik mambul kume, daupmalye,’ tenena kume. Allah dib tenebuka, talima lamapdongobuka ulamice ninye ara, ‘Aninye ara mambul kume, daupmalye,’ teneluluma ati, anggun kanye moubuka unamlulume. Aninye ara, sik kalikna ati im deice pil don nang, malaikat, na ni Allah dam unyaka anya arye, ‘Anang ara mambul kume,’ tenena meme. Anang ara sik kalikna malaikat arye laka nyalbikiba, ‘Allah kekeplirye, anggunti wenepsilyak’ tenen, nyapmasina atia. Yesus arye nyabuk.

Zakaria 4:10

Ura, yata nang do nirya, anyaik don pil ati, deiyok kouamik talak ara, pil sikcuk dolamikba, mitik tonunuk, pil dopnin balamikba, sik anang arye, ‘Se, pil mitik tonunuk donyaka ati, nun like,’ tenenamake. “Anyaik dona ara, dauplye,” nyabuka, ‘Nun likeʼ tenen, malye yupu nyanyak nang nirya arye, sik kayapu nang arye, anyaik don pil tuba donmakca ani, sirya dakmanto talak eibikcopura, sikce, ‘Se, aning ara, pia telebe,’ tenebikirye, teleb kanye deipnamake. Tonda, sik anang nirya arye, aminyan talak Zerubabel birye, ‘Kume, anyaik donauk unamabeʼ tenen, ‘Aik abilinga ara, moubuka dopmap do, kwalipmal do?’ tenen, kiklilen tapu doplirye, balyopura, sik anang nirya, anye eibikirye, kanye pia deipnamake. Zerubabel birye nyabuk. Aminyan talak, na ap, yupu talipmanumu malaikat arye, nati tamubuka nyapnuke. “Atekbarye lampu weisa ara, bikilina ati, asing tekbarye atonun ulule. Aweisa tekbarye ara, winipmanto ninguk ulul bukni, el nong, ara Allah Yahweh el asing arye, tukwak mutuku, im sirya, mutuku sirya nirya, uamlye ning dilamlirye, ‘Yata wirinyak do? Yata wiripnamak do?’ tenen, dipnilibuka kalikilula ati, aweisa memebuka deiamik,” nyapne.

Yehezkiel 11:22

Aning nirya, akunum winibukura, sik pol dana-dana uamuk malaikat, sik si ara Kerub, sikda bulubuka, sik pol arye erebuka, laka biyik. Tonda, sik yan dam ara, bisik ban ning, el si ara, roda-roda nirya babye, banmik. Wininmek talak ara, Israel nang arye, si erelamik Allah, elce, ‘Israel yala nang ap, na ap, neika asukum aunamabe’ tenen, bikna ati, el pia teleb weik dirina ara, sik aKerub deice tam deipmokba, aning ara, lak kibukba, na Yeheskiel birye eipse.

Mazmur 148:8

Se, bebeya lakliba, uku lalamle ning ap, weik mok purwu saklamle ning ap, dua ap, mikip weik arye balul kumanya ap, mok ap, dou ulamle talak ap, aning-aning nirya ara, Allah arye, “Winipnamlulume,” nyabuka nyalilye touk, Allah Yahweh el yupu uk kekebuka unyake.

1 Raja-Raja 19:11

Nyabukura, Allah el si Yahweh arye Elia biti tamubuka nyabuk. “An keil deiya aunmalamak arye kisipdaka na yanuka tiknun damak, amutuku dupak ayalyame. Nara Allah, na si Yahweh, narye an dam yanapnya ani, kisibuka binuna atia,” nyabuk. Nyabukura, Allah unmok dam ara, kumanya mikip weik balamleto ubuka biyukba, amutuku-amutuku yo pamuka nirya weik arye lulukdayuk. Tonda, amutuku weik keil nirya ara, teleb bukabukce, aning sakuk bukni, atalak ara Yahweh el nong ton akumanya noutamak kum ubukba, Elia kum eibuk. Weik kumanya dopdandobukopura, weik mutuku lulukna ton dobuk. Winibuk talak babye, Allah el si Yahweh, el nong ton lak kum kipmokba, Elia ton kum eibuk.

Yosua 3:11

“Anggun nirya eiplulume. Anggun ni Allah, el si Yahweh ara, mutuku-mutuku nirya, talibuka kwelina deiyoknye, elce nyamuk yupu liamik marikna ara, Lewi yala nang arye bobikirye, menekuka, Yordan mek noutam binuka tiknamake. Anggun nirya ara, aminyan tamuk binamalume. Anggun kele, nun ni Allah, aning-aning nirya, tukwak ning nirya ara, elcuk talilula anya arye, elce nun dam neika babirye, melinamsile.

Yeremia 49:36

Winipnamne talak ara, na Allah arye, ‘Elam mutuku noutam unyak nang nirya, yakuka dopkwetepniba, dana-dana tam nirya, bikbik abuka bikiba, kum danamakʼ tenen, narye im deice ulye mikip weik kumanya dobuka, dana-dana tam nirya ara, dopkwetepnamne. Ara, narye winipniba, Elam mutuku dana-dana tam arye, yuk mutuku yu nang arye, yanuka opnamake. Winibikcopura, Elam mutuku noutam unyak nang nirya ara, ilil upliba, dana-dana mutuku nirya, bikbik abuka bindopnamake. Winipnyopura, sik mutuku batakikirye, amutuku dana-dana ulye mutuku nirya ara, sik amutuku binuka unamake. Tonok mutuku babye, ‘Amutuku binuka kum unamabeʼ tenen, kum luba kipnamake.

Daniel 11:4

Winibuka ninye deiyok kibuka, daupnin balamlya ani, aminyan talak ara, el anye akunum diplyopura, elce taleamlye mutuku nirya ara, noutam bokuka, yuk-yuk wiliprobikirye, dumbarye kipdopnamake. Atalak ara, min yuma talak Raja kiamuknye, elce delinamle mapu, sikce amutuku nirya ati, Raja kibuka kum talinamake. Aning kum bukni, yuk talye nang, sik delinamak mapu arye, Raja kibuka talinamake. Atalinamak nang arye, ninye deiyok kibuka, amutuku talinamak bukni, sikda, min yuma tikamuknye, el mikip weik arye, amutuku taleamuk touk, sik aminyan dumbarye Raja nang arye, kum wininamake.

Zakaria 6:1

Na Zakaria birye, yuk ning ton, lengdar man deice arye lake kibukba, eipse ning ati, nyapnune. Ara, na wi mapsa talak arye dinmaseba, dumbarye kuda basam arye libuka, tuku deice ban ning eipse. Ara, ninye buknarye, ninye olban ning, el si ara, kereta perang, mutuku kon bitinye noutam arye, yanganmokbuk, eipse. Amutuku kon bukuka ara, el teleb kat ning, el si perunggu uamuk. Amutuku bitinye dana-dana tam bukukba, anoutam arye, kereta perang dumbarye kutukuka yanganmek.