Ati ara, an Yosua ap, an amu tam pil donamak talye imam-imam nang, an kwitcapu imam nang ap, anggun nirya moubuka kekepnululume! Ara, an amu tam pil donamak imam-imam nang, sik nirya ara, aminyan talak winipnamle ning ati, aminyan talak pia teleb ning yanamle ati, sikda bikilin nang unyake. Aning deiyok ara, ani. Ara, aminyan talak ara, narye na amu tam pil donamlanye dobuka, lak deipnamnarya. Winipmanto ara, weik yo deiyok arye, mitik Yo Taruk leklamle atonun, pia mambul pil donamlanye, Mesias dopdeipniba, anggun dam yanuka unamle.
Zakaria 6:12 - Eipomek12 Imam-imam nang, sik deiyoknye Yosua, el kisok deice amahkota kalupdeipnalam talak ara, elti, ayupu nyapnulyame. Ara, ani. “Allah Yahweh, aning-aning nirya talibuka, deice tam erebuka, im deice malaikat nirya, sik deiyoknye ulule. Elce ayupu nyapkile. “Anggun nirya, moubuka kekeplulume! Winipmanto ara, anye elda, yo taruk atonunye unamle. Anye nepnin balamlya ani, aminyan talak ara, na Allah Yahweh ati, na si eren aik dopnamnile. Ati ara, elda mambul weiknye ulule,” nyapsile. Gade chapit la |
Zakaria 6:12
37 Referans Kwoze
Atalak ara, Daud birye deiamukba, dadeipdanin yanganyak nang, sik kan-kan noutam arye, narye tonoknye wipdeipnamne. Ara, pia diksukumuk talibuka wininamlanye wepnirye, ‘Elda ninye deiyoknye, Raja ton unamleʼ tenen, anye wipdeipnamne. Aninye deiyoknye bira, elce pia teleb, diksukum piluk donamle. Tonda, ninye yupu bokolin talak ara, dipkoprob ninguk nyaplirye, yupu bokolinamsile. Amutuku noutam diksukum dem teleb arye winibuka pil donamle.
Na Allah Yahweh arye nyapne. “Doryanamle talak noutamak ara, Daud birye deibukba dadeipdanin, banyak nang noutamak, ton pia diksukumuk telebuk winilulnye wibuka deipniba, Israel ninye, sik ninye deiyoknye Raja ulirye, Israel ninye pia talinamle. Winiplirye, pia moubuka teleb diksukum winin ninguk teneplirye, weik kel kina arye, aninye talinamle. Elce pia teleb ubuka, aninye talilirye, diksukumuk winibuka, yupu bokeipnamle. Winipnamle deice arye, amutuku noutamak nirya, dipkoprob diksukum winina ap, malye winina kum aniryuk, pia teleb winina ap, pia awininamake.
Allah arye tenyamuk talak akunum kiplyeura, Allah arye, Yerusalem mutuku noutam winipnamle ning nirya ara, tuba tamubuka, pia teleb kipdeipnamlarya! Tonda, sikce kouamik ning yala-yala nirya ap, yo duk moulamle ning yala nirya ap ara, weik arye paplirye, pia teleb uplye ning ara, duk weik moupnamle. Atalak ara, sik Israel yala nang lyepdoplirye, amutuku noutam kam unamak nang ara, kanye teleb kipnamle. Tonda, sik koun ning weik nong uplyeba, libuka dikirye, ‘Se, wini talak ara, aning nirya ara, pia telebuk usulule,’ tenen, kanye dipnamake.
Allah el si Yahweh arye tenelamuk touk, el pil dolamuknye bira, miklamle tukwak arye duk teleb ning betekuka palamle atonun ulamuk. Anye bira, urasin telebnye kum ulamuka anya arye, elilamuburye, elti, ‘Anye bira urasin telebnye,’ kum tenelamupu. Anye el nong urasin ara, liknye ulamuka ati, nunce elti, kum dildelamuburye, ‘Se, anye bira, nun kanye deibabe,’ kum tenelamupu.
Ara, talye kume. Allah arye, ‘Atalakuk wibuka bokdeipnamne,’ tenebukce akunum kintinipdeibuka ati, aminyan talak ninye mutuku sirya im sirya nirya ati, malye unyak ning ap, teleb unyak ning ap, wibuka dipdelirye, “Aning malye, aning telebe,” nyabuka, teleb kibuka yuk-yuk wibuka bokuka deipnamle. Ara Allah arye nyaplibuk, el menopa arye wipdeibuk nang arye, ninye nirya ati, yuk-yuk wibuka bokuka deipnamake. Allah arye, ‘Ninye mutuku-mutuku nirya diba tenepnamak’ tenen, elce wipdeibuknye dipmokbuk, kam bukeibuka deice arye, aning nirya akunum lakak nyapmasile. Paulus arye ayupu nirya abulubuka wekmek nang, Arepagus nang ati, nyabuk.
Allah ap, ninye ap, dana-dana ansinilina deiyok nang nirya ara, wibuka deibikcopura, Allah el si erena ati, teleb arin ning ap, tonda, ‘Ninye malye winin ning kum kipdeipnusil’ tenen, kam ning obuka arilbalamak ning ap, Allah ati arinyake. Aning ati ara, na nyapmasinye, nun ap Allah ap Ansinilina Deiyoknye babye, elce Allah ati, arepmanto ning ton ubuk.
Anggun Korintus mutuku ninye ara, Allah el wa dam atonun ululume. Tonda, anggunda, Allah el asik atonun ululume. Anggun Korintus mutuku ululum ninye ara, na ning kum ululume. Aning atonun Apolos, el ning kum ululume. Na ap, Apolos ap ara, Allah el amu tam pil melin nanguk unyame. Ati, na ap, Apolos ap, neika pil melibuka donyame.
Na kayapu, aning ati ara, ‘Anggun kel kipnuluma’ tenen, laka nyapsine. Allah arye Yesus deice aniryuk, nun malye unyap ning ap, nun kanye talima malye tenenyap ning ap, kum kibuka delisilirye, namin kisulule. Yata ninye do nirya, Yesus ati diba tenebiceura, malye ning arye anggun talima ap, kanye ap, talibuka moupsilirye, yupu molisulul ning nirya, Yesus deice aryuk lyepsilirye, loldongosulule. Musa sekamsuk yupu atonun winimunya deice arye, malye ning talipsuka ara, lyebuka kum lopdeipsutue
Pilipus birye el kwit koprop Nataniel biti, enmoka ani, eipdarikopura, nyabuk. “Nataniel, Allah arye, ‘Wininamlume, aning ara kum wininamlume,’ nyabukba, Musa sekeiyamsuk yupu, el mem yupu noutamak arye, ‘Anye yanamle,’ nyabuka laka nyabuka sekamsuknye bira, nun ap akunum eipdanmabe. Tonda, Allah yupu lak nyalamik nang, sik nabi nang arye, yupu sekamik ning noutamak arye mambulnye nyalamiknye bira, akunum eipdanmabe. Anyapmakin anye bira, ara Yusuf birye deibuk mi Yesus, Nasaret mutukunye biti nyapkine,” Pilipus birye nyabuk.
Nun ni Allah arye ninye nirya ati, minpola wenebuka kum osulul bukni, kanye talima areplyeura, bico tenebuka melisululnye anya arye, nun malye ning nirya kum kipsilirye, lyepnamsile. Berentam talak keting deiplirye, kuna ak dirina ulamle atonun nun ni Allah arye nun lyenanye, im deice arye dopkweteplibuk, nun dam yanamsile.
Yesus arye nyapsuk. ‘Allah arena ati, ninye taruk arye domikbuk Yahudi yala nang arye arilbalulum aik ara, narye uluplobuka, like winilye sum akunum uplyopura, yuk ning ton punubuka dopnamne. Yuk ning punubuka dopnamne,’ Yesus arye ayupu nyabukura, kekebupe,” nyabik. (Ayupu nyabik nang ara, Yesus arye “Anyaik uluplopnamle,” nyabuk ning ara, ‘Domon yupu deice arye nyabuk,’ ning ara bita moubuka kum tenebika ati, ayupu nyabik.)
Ninye yuk-yuk weik arye talya yupu uk nyanmeka ani, aminyan ara, yuk nang bitinye nang arye tikuka, el Yesus ati aminina yupu nyaprik. “Yesus arye ayupu nyabukba kekebupa ara ani. Yesus arye nyapsuke. ‘Allah arena ati, ninye taruk arye domikba, Allah ati kam ning obuka arilbalulum aik ara, narye ulupnirye, like winilye sum akunum upyopura, ila tamubuka anyaikuk lipsisikuka dopnamne,’ Yesus arye ayupu nyabukba kekebupe,” nyaprik.
Peterus anda, dib teneplumce, wini talak ara, ‘Anda Allah el Mi Koprop Kristus unamlame’ nyapmanilama anya arye, pia bulamle keil atonun ulyame. Ninye arye tuku palibuka mutuku yangan keil deice, aik ayukumna ikuka dolamak touk, yata nang do nirya, an nyapmanilam atonun diba tenebikceopura, Allah el mapu kipdeipniba, sik kanye talima ap, kanya ap, mikip unamake. Mikip weik kibuka ukirye, weik upnin banamake. Nati, dib tenepnikirye, na mapu weik upnin banamak ning ara, dipna deiyok isa mer ap, sik deiyoknye Isa Mutuku Dongonye ap arye, na mapu ati kum bisipnamake.
Allah arye nyabuk. “Se yu parango, anda bukminyak arye, domba basam weilula deiyoknye ulye touk, Allah na mapu ati, melibuka bobalula deiyoknye bira, na ap neika pil donimnye bukni, an parang arye olbinulyame. Binuka opminyeura, adomba atonun nang, na mapu nirya ara, bai sakikcak arye, mutuku yuk-yuk bibik abuka, bindopnamake. Winipnamak talak ara, na mapu koproba, sik Israel nang nirya ati, wenebuka opnamne.
Na Allah Yahweh, im deice yin talen malaikat nirya ara, sik weik deiyoknye unune. Narye nyapsine. Ara, anggun kanye talima noutam nirya ara, mikip kipropnamlume! Wini talak ara, anggun nabi-nabi nang arye, anyapdeipmasin yupu kekebika ati, sikce ayupu laka nyapmasiceura, anggun wini talak unmalum nang arye kekenmalume. Ati, anggun taruk ap, nong ap ara, mikip kipropnamlume! nabi-nabi nang ara, na si eren aik, minop talak ulubuka, atu buklobik ning ara, amutuku nang arye, ‘Lipsisikuka dopnuyabeʼ tenen, pil deiyok kibik talak ara, anyaik ayukumna yo deibik talak arye, anabi nang ton eipmekce, ayupu nyabik. Anyabik touk, wini talak babye, ayupu uk nyapmasinba, anggunce kekepmalume. Ara, na Allah arye anggunti, tuba teleb kipdeipsiniba, amutuku nang arye, na si eren aik tamubuka, lipsisikuka dopnamaka ati, nyapmasine.
Atalak ara, Asyur mutuku ninye babye, Nimrod mutuku ninye nirya babye, ‘Israel ninye opnamap’ tenen, sik Israel yala ninye unamak mutuku yanuka weknamake. Bukni, winibuka wekicopura, Israel ninye arye sik Asyur mutuku ninye ap, Nimrod mutuku ninye ap ati, obikirye bisipnamake. Ara, Asyur mutuku nang obuka dakna ati, Allah arye wipdeipnamle mikip weiknye birye deiyok kiplirye, Israel ninye arye Asyur mutuku nang nirya ara, malye kibikirye, parang ya dobuka, sik Asyur mutuku ninye bobuka, amu tam delinamake. Tonda, Nimrod mutuku babye, ayin talin nang arye, parang ya arye obuka sirya dakikiba, aninye sik amu tam deibikirye, sik mutuku talinamake. Winibicopura, sik Israel ninye nirya, telebuk ubikirye darabuka, kat asa unamake.
Atalak ara, sik aik don nang arye, Allah el si eren aik dona ati, weik keil pala kibikce, yangabuka ayukumna yo ikik talak ara, Allah el aik pum pil dolamika deiyok nang, sik pil don talak ongolamik baju ongobukabikce, binggong nyan ning, el si terompet dobukabikce, pong-pong nyabik. Tonda, sik Lewi yala nang bukni, ninye si Asaf, elce deiamuk mapu arye, sikce talipmek ning ara, piring pala atonun ubuka, kat ning arye memamika ak, onmekce lelim nyabik. Sik nirya yanuka, anyaik dopnamika dam tikuka, Allah el si Yahweh ati, si erebuka mot selamik. Aning winibika nirya ara, Raja Daud, Israel ninye sik ninye deiyoknye ulamuk talak arye, “Wininamlume,” nyapdeiamuk touk winibik.
Ura, Allah el si eren aik dopnamika ati, Yerusalem mutuku tamubuka biyikopura, daulamika ani, keting tamun bitinye noutamak bukni, wala bitinye akunum ubuk. Akunum biyikopura, Yerusalem mutuku Allah si eren aik tuba tamubuka dopnuyik talak ara, Sealtiel el mi Zerubabel ap, Yosadak el mi Yesua ap, sik kwit capu nang nirya ap, ton yuk nang nirya ap, Yerusalem mutuku biyikce, anyaik dona ati, pil deiyok koubik. Ura, anang noutamak ara, Allah el aik pum pil melibuka dona deiyok nang ulamik. Tonda, sik melin nang, Lewi yala nang ap, Yerusalem biyik. Anang nirya ara, minop talak arye sik Babel mutuku nang arye, Israel ninye obikce, anang nirya bobuka, Babel mutuku bobinmikba, keting tamun weika arye daulamika ani, wini talak ara Babel mutuku batakuka, Yerusalem mutuku tuba tamubuka biyik. Allah el si Yahweh, el aik pum pil melibuka dona deiyok nang arye, ‘Anyaik don pil yupu bokna deiyok nang ubikirye, pil melildanamak’ tenen, Lewi yala nang wipdeibik. Sikce wipdeibik nang ara, keting tamun dua puluh tahun deice tam ulamik nanguk wibik. Akunum wipdeibikba, anang arye Allah el si Yahweh, el si eren aik pil dolamik talak ara, deiyok nang kibuka, ‘Pil teleb kibuka donyak do?’ tenen, dipra balamik.
Sik tukwak ninye arye winibuka pil donyak bukni, anye Yesus ara, sik pil dolamak touk kum winibuke. Aning ara kume. Elda, dipkoprop Allah ap, ninye ap, dana-dana ansinilina weik deiyoknye ulula anya arye, minop talak ara, ninye malye winin ning kum kilina ati, tonok ninguk aribuk. Aning like tonok talak arye, aribuka deice arye, akunuma. Ninye malye winin ning minop ning babye, wini talak ning babye, aminyan doryanamle talak ning babye, amalye winin ning nirya ati, akunum kum daneipsukce sirya daksuke. Winibukce, adiparyuk Allah el taruk sirik tam bukukce, el ap Allah ap, aning-aning nirya talinamrake.
Pilatus arye, ayupu nyanmok talak ara, el yin talin nang arye, Yesus boyayik. Yesus ara, taice ning kwanibuka, el kisok deice koupdongopmek ning ap, mirin cang baju, el si juba, el nong deice ongopdeipmek ning ap, tuba upmok. Yesus boyanmekba, Pilatus arye el aik dam wekmek ninye nirya ati, “Anye bira aunmale. Anggun dipdelulume,” nyabuk.
Minop talak, narye na pil donanye Yakub biti areamsibuk, elce deibukba, dadeipdanin balamik ninye ulamik mutuku uk pia ati binuka unamake. Ara, sik apu yapu ulamik mutuku uk, binuka unamake. Sikce deibikiba, dadeipdanin banamak ninye nirya babye, amutuku uk talibuka pia aunamake. Ara, wini talak ululum ninye ap, aminyan talak sik mapu ap, tonda sik mapu arye deipdanin, banamak mapu ap, doyanamle talak deibikiba, dadeipdanin banamak ninye nirya ap, sik nirya amutuku noutamuk teleb ubuka unamake. Unamak talak ara, Daud el yalanye birye, ninye deiyok kibuka aninye pia talinamle. Sik Sisinanye el tonok unamle.
Allah arye nyabuk. “Na tenepse talak akunum uplyopura, Daud el taruk deice arye taleamuk ninye ap, taleamuk ning ap, taleamuk mutuku ap ara, narye tuba tamubuka, teleb kipdeipnamne. Winipmanto ara, Daud el domuk aik, abilinga nirya pun dayukce, daksakuk ning ara, tuba tamubuka punupnirye, dukdongopnirye, dobukapnirye, teleb kipdeipnamne. Wini talak ara, amutuku noutam aik ap, keil poka ap, aning nirya domik ning ara, yuk mutuku nang arye yanuka, ulubuka bataknamake. Winipnamak bukni, aminyan talak ara, na Allah arye, cang keil poka domik ning ap, sik aik ap, aning-aning nirya, pia teleb uamuk touk, tonap tuba tamubuka, teleb kipdeipnamne. Winipniba, minop talak, pia teleb uamuk touk unamle.
Na lengdar mapmasa deice arye, anye biryuk na bobukapnukce, Allah el si eren aik noutam bukni, minyuma aik, el si ara, Teleb Lek Aik delilbinuk. Anyaik minyuma pum noutam ara, lo weik uamuk. Anyaik wekelban bisik bukni, mitik bai tam abilinga domik ning ara, ‘Yata barye meter kibuk do?’ tenen, anye biryuk bopmuk pina arye, deibuka kiklipdeyukura, dana-dana tam piamik abilinga el bukam ara, 3 meter kibuk. Tonda, abisik bublan wekenak el pala ara, atam arye dipdongobuka, otam kiklipdeyukura, el pala ara, 5 meter lebar kibuk.
Piblisite