Zakaria 4:14 - Eipomek

¹⁴ Nyapsiba, amalaikat arye nyapnuke. “Aning bitinye ara, Allah arye, aning-aning nirya talibuka, deice tam erebuka, Pia Mikip Weik Deiyoknye ululnye, tukwak mutuku im sirya, mutuku sirya talilirye, weik deiyoknye ulule. Elce, ‘Abitinye nang, na pil melibuka dopnamnirakʼ tenen, minyak mek kwebuka, sik kisok deice dikdeibukce, sik akunum wipdeiamukba, Allah el dam tuba-tuba tikidurake.” Malaikat arye, na Zekaria biti, laka nyapnukba, kekepse.

Zakaria 4:14 Referans Kwoze

Wahyu 11:4

Abitinye nang ati ara, sik winipmanto ning ara, duk moulamle yo si ara, Ara yo bitinye ap, weisa delin ning bitinye ap, dobuka deibikba, aning-aning nirya ap, tukwak mutuku nirya ap talilirye, Weik Deiyoknye, el urasin tam deibikba dilule.

Keluaran 40:15

Harun el mapu nirya ati, kemeja, el si juba cang ning, akunum ongopdeipminyopura, anang sik deice babye, sik deiyoknye Harun, el kisok deice, minyak likdeipmaminye touk, el mapu nirya babye, sik kisok deice minyak likdeipnulyame. Winipminyeba, sik babye, na Allah si eren aik pum tam, pil don nang, imam unamake. Tonda, ance Harun ap, el mapu ap ati, minyak mek likuka, delin pil dopminyopura, sik anang arye deibikiba, dadeipdanin banamak Lewi yala nang nirya babye, na Allah si eren aik noutam ara, sikcuk talipnin banamaka ati, laka kilin ning ati winipdeipnalame.

Zakaria 6:13

Wininamle talak ara, el anye biryuk, na Allah, si eren aik ara, dopnamnile. Tonda, ninye arye elti, ninye deiyok nang ati, si erelamak touk, sikce anye biti, si erenamake. Anye bira, ninye deiyok nang bun ning, el si ara, ‘tahkta kursiʼ, adeice buklirye, amutuku talibuka, yupu nyanamle. Wininamle talak ara, imamnye ton, el tahkta kursi damuk tiknamle. Winiplyopura, imam ap, aninye deiyoknye ap, tonok kanye bopdikirye, ‘Telebuk neika unamnameʼ tenen, kanye delilanauk unamdake. Wininamle talak ara, elcuk amutuku noutam unamak nang nirya ati, taliplirye, yupu nyalamliba, telebuk unamake.

Mika 4:13

Na Allah Yahweh arye, anggun Yerusalem mutuku noutam ululum ninye nirya ati, nyapsinye. Yerusalem mutuku noutam ululum ninye, anggun adiparyuk bamunce, anggun mal olan ninye nirya ati, yaniplobuka binamlulume. Ara, na anggun ni koproba Allah arye, anggunti, mikip weika arye arepnamsine. Winipmanto ara, sapi basam kisok deice, yang belelamle kat ning ulamle touk, mikip weik kipdeipnamsine. Tonda, sapi basam el yan kala tace kat weik ulamle touk, anggun yan nirya babye, mikip weik kipdeipnamsine. Winipmanto ning ara, kat ning el si tembaga ap, tonda kat ning, el si besi ap, mikip weik ulamle touk, kipradeipnamsine. Winipsiniba, pera mutuku yuk daunyak ninye ayala-ayala nirya, anggunce aninye ati, malye kibuka yaniptapnamlume. Winibuka unamlum talak ara, anggun mal olan nang arye, ubula dalubuka dopdobikirye, talinyak bon-bona aning-aning nirya ara, anggunce dalubuka dopropmunce yamunyopura, na Allah Yahweh, si erena ati arenamnululume. Sik yuk mutuku ninye arye, koulamak ning nirya ubula libuka, na dam boyamunce, na si erena ati, arenamnululume. Na Allah Yahweh ara, im sirya, mutuku sirya nirya talibuka, deice tam unirye, weik eren mikipnye unune.

Yeremia 49:19

Tonda, Yordan mek biyuka, lilun tam, bai tam arye, weik yu singa arye ubuka, domba basam sik maning dilamakak, tikilyakirye olamle touk, na babye, talye karin arye, Edom mutuku yanamne. Winibuka tikilyanirye, sik Edom nang ati, sik mutuku noutam unamakak arye, yakuka dopkwetepniba, sik bikbik abuka bindopnamake. Akunum bindobikcopura, na Allah arye, ‘Anye wibuka deipnamne,’ tenenye touk, amutuku noutam talibuka ulirye, ninye deiyok kibuka, yupu nyanamlanye biti, wipdeipnamne. Aning ara, talye ati kum nyapsine. Na mikip weik unye touk, yatanye ton aulul do? Tonda, yatanye do, ilil tenena kumce, mikip kanye bobuka ululnye birye, na tenepman ning ati, ‘Kume aning ara, kum kiptume,’ nyabuka, yupu seknutu do? Aning atonun, yata ninye deiyoknye ton, na yupu yanipnuturye, malye kipnutu do? Kume, tonoknye babye, pia ton kum ulule. Nara, na tenenye touk wininune.

1 Samuel 16:1

Allah el si Yahweh arye, Samuel biti nyabuk. “Like yata barye atonun mapmince, Saul biti engenalam do? Ara, urdem ati kume. Saul birye, Israel ninye deiyok talina ati, weik Raja kiamuk ning ara, na akunum bataksa atie. Tonda, wini talak ance minyak zaitun mek kwebuka bopmince, Betlehem mutuku binulyame. Ara, ninye deiyok nang kina ati, bikilin ning ati ara, aminyak mek, sik kisok deice likibikirye, erenyake. Amutuku noutamak bukni, mutuku si Betlehem mutuku ara, tonoknye el si Isai, el dam binulyame. Deiyok ara, Isai el mapu noutamak, tonok mi ara, narye akunum wipdeipsa ati, ance ninye deiyoknye, Raja wipdeipnamlyame,” Allah arye, Samuel biti nyabuk.

1 Samuel 10:1

‘Ninye deiyoknye, Raja unamle’ tenen, Samuel birye Saul biti, wipdeibuk. Tonda, atalak sik Israel ninye ulamik touk, Samuel birye, zaitun yo duk, mek teleb cang makau arye, libuka deiamika dobukabukce, Saul kisok deice dikeibukce, Saul biti, taruk talibukce, ‘Telebe, akunum teleb kipdeipkine,’ nyabukce, amutuku nang ulamik touk, Saul mutubuk. Samuel winibukce nyabuk. “Allah el si Yahweh arye, Israel ninye, sik ninye deiyoknye kina ati, akunum wipdeiamkuke. Ance Israel ninye ati, sik ninye deiyoknye, Raja kipmince, talipnamlyame. Aning ati ara, aminyak mek an kisok deice dikeipmakina ara, Allah arye bikilina ati, narye an kisok deice dikeipmakine,” nyabuk.

Ulangan 10:8

Amutuku noutamak biyik talak ara, Allah el si Yahweh arye, Lewi yala nang ati wipdeibuk. Ara, Allah nyalin yupu yo lakase marikna, el si Peti Perjanjian pum tam deiamuk ning ara, anang arye bobuka banamika ati, anang wipdeibuk. Tonda, Lewi yala nang arye, Allah el si eren aik binuka wekikirye, el pil dopnamik ning ap, tonda, ‘Allah arye Israel ninye ati, teleb kipdeipnamsile,’ nyanamik ning ap, tonda, Allah el si erepnamik ning ap ati, Allah arye Lewi yala nang wipdeibukba, wini talak tuba sikce deibikba, dadeipdanin yangalamik Lewi yala nang ara, tuba apil dobuka unyake.

Keluaran 29:7

Aning nirya akunum winipminye ning ara, ‘Anye bira, Allah el aik pil dona deiyoknye, imam akunum teleb winipnyeba, Allah el si eren aik pum tam wekuka pil donamle,’ tenena ati, zaitun yo duk minyak, teleb ning akunum kintinyaminye ning dobuka, el kisok deice dikuka deipmince, likipnalyame. Ara, ‘Anye bira, Allah el aik pum tam, pia teleb lekak pil donamle ati, akunum erepdeipne,’ tenepnulyame.

Lukas 1:19

Nyabukura, amalaikat arye tamubuka nyabuk. “Nara, talinye kume. Na si ara, Gabriel unune. Nara, Allah damak unirye, Allah elce dopkwetepmanilura, laka teleb yupu nyalyanmakine.

Zakaria 6:5

Nyabuka asipdesiba, amalaikat arye tamubuka nyapnuk. “Akereta perang dumbarye balamuk ning, el nong noutam deiyok ara, ani. Ara, sik adumbarye kereta perang nong noutam ara, mutuku sirya, im sirya balamle kumanya yuk-yuk dabinamake. Ara, sikce, Allah aning-aning nirya talibuka, deice tam erebuka, Pia Mikip Weik Deiyoknye ululnye, el dam binmangu bukni, wini talak ara, tamubuka yamakce, yuk-yuk mutuku ton binamake.

Yesaya 54:5

Aning ara, talye ati kum nyapsine. Deiyok ara, anggun kwepdeiamsuknye, el Allah ati, ‘Se na dopnuknye bitonun ulule’ tenen, unamlume. Allah ara, el si Yahweh ulule. Elce anggun akanye bitonun melibuka unamsile. El dem aryuk, im deice unyak yin talin malaikat nirya talibuka, sik weik deiyoknye ulule. Anggun Israel ninye arye, malye winilamlum ning ati, opsutu bukni, anggun malye winilulum ning namin kipsilirye, anggun lyepnamsilnye bira, el Allah ulule. Anya arye, Allah ara pia Telebnye ulirye, anggunti pia kalikuka melisulule. Ninye mutuku-mutuku nirya arye, elti, ‘Allah ara, Weik Erebuka Eitamnye ulirye, tukwak mutuku, mutuku-mutuku nirya unyak ninye talilula deiyoknye bira, el si ara Allah Yahweh ulule,’ nyabuka, Allah el si atibuk erenamake.

Yesaya 5:1

Kekenmanulum buk, mot senmana ara, anggur tapu wa wina deiyoknye biti, bico uniliba, nyanmane. Na kayapu, anggur wa wina deiyoknye birye, wa wiamuka ati, mot senune. Mot sena deice arye nyapne. Bico tenenunye birye, mutuku bukamuka lilunak, tuku pia telebak anggur wa wibuk.

Mazmur 110:4

Dipkoprop Allah Yahweh arye, na deiyoknye ati nyabuk. Na Allah Yahweh arye, akunum nyapkisa ati, anyapkise ning ara, tonap tenepnirye, yuk ning ton kum punubuka nyapnamne. Ara, na Allah ap, ninye ap, teleb ubuka neika una ati, ansinilina deiyoknye pil talibuka pia donamlyame. Ara, minop talak ulamuknye, el si ara Melkisedek birye, apiluk talibuka dolamuk touk, an babye, apiluk talibuka pia donamlyame.

Mazmur 89:20

Minop talak an yupu lak lena deiyoknye tonok ati, lengdar mana deice arye, yanuka nyapdeiamlume. Ara, “Talye daunmace ninye kan-kan arye, tonoknye ton, narye wipdeipnirye, narye nyapniba, anda na yupu lak lenanye birye, el kisok deice minyak mek dikeipminba, Israel ninye sik deiyoknye Raja unamle,” nyapdeiamlume. “Anye Daud bira, ninye noutamak daulamlya ani, narye erepdeipniba, ninye deiyoknye kiplirye, Israel ninye talibuka unamle,” tenen, nyapdeiamlume.

Mazmur 2:6

Allah el si Yahweh arye nyapnamle. “Sion mutuku pia telebak, pia telebnye ulul mutuku noutamak ara, narye wipdeiamsinye amutuku deipne. Ara, ‘Amutuku noutamak ara, na si pia erenamniyak’ tenen, Yerusalem mutuku noutamak deipne. ‘Anye bira, tukwak im sirya, mutuku sirya nirya unyak ninye, sik ninye deiyoknye, Raja unamle’ tenen, wipdeipse.” Allah arye nyabuk.

1 Raja-Raja 17:1

Ura, Allah el yupu lak nyana deiyoknye, nabi tonoknye el si ara, Elia ulamuk. Elda Tisbe mutuku anye ulamuk. Elda Tisbe mutuku ulamuka ani, el weik mutuku tam ulamukak ara Gilead mutuku nyalamik. Anye bira, atalak ninye deiyoknye Raja Ahab dam yanuka nyabuk. “Allah el si Yahweh, elda dipkoprob kam tuba ulirye, Israel ninye ati pia kalikuka melilule. Tonda, nara el amu tam unirye, el piluk donune. El Allah dipkoprob ulula ati, el deice arye nyapkine. Wini talak arye diprongobuka doyanamle talak nirya ara, keting tamun winilye deice arye, mok pia kum cenamle. Aketing tamun winilyeto deice arye, dou pia maplirye mok cena kum unamle. Narye nyapnye talak uk mok cepnamle. Narye kum nyapyopura, mok purye tonok babye, ton kum saknamle. Ati anda moupnalyame,” Elia birye Raja Ahab biti nyabuk.

Yosua 3:13

Nyabukce, ayupu ton nyabuk. “Mutuku-mutuku nirya talilul Allah, el si Yahweh, el si eren aik pum tam pil donyak nang, Yahweh el yupu liyamik marikna bopmace nang arye, sik yan Yordan mek yanibicopura, atalak aniryuk, mek noutamak sekuka, eitam kilon, outam kilon kipnamle,” Yosua birye nyabuk.

Yosua 3:11

“Anggun nirya eiplulume. Anggun ni Allah, el si Yahweh ara, mutuku-mutuku nirya, talibuka kwelina deiyoknye, elce nyamuk yupu liamik marikna ara, Lewi yala nang arye bobikirye, menekuka, Yordan mek noutam binuka tiknamake. Anggun nirya ara, aminyan tamuk binamalume. Anggun kele, nun ni Allah, aning-aning nirya, tukwak ning nirya ara, elcuk talilula anya arye, elce nun dam neika babirye, melinamsile.

Imamat 8:12

Apil akunum nirya winibukopura, Musa birye, Harun wibuka deibukce, ninye deiyok nang wibuka deimokce, kisok deice dikililamak minyak mek mitik tonun ton, Harun el kisok deice likdeibuk. Awinibuka deiyok ara, ‘Harun bira, Allah el si eren aik pum tam, pil dona deiyoknye unamle. Elda malye winin ning nirya bataklirye, elda telebuk unamleʼ tenen, minyak mek mitik tonun arye, Harun el kisok deice likdeibuk.

Esra 5:2

Ayupu nyaprikba, ninye si Sealtiel el mi Zerubabel ap, tonda Yosadak el mi Yesua ap arye, anyaik dona ati, deiyok kouna deiyok nang kiprikba, Allah el si eren aik, Yerusalem mutuku noutamak, pil tuba tamubuka dopnin balamik. Tonda, Allah el yupu lak nyana deiyok nang arye ton, melibuka pil dopnin balamik.