Bukni, nara Allah Yahweh, nara Weik Erenanye unune. Tonda, nara, Kam Una Deiyoknye unune. Na Pia Teleb Lek Aik, na si eren aik pum tam unune. Aning ati ara, tukwak mutuku im sirya, mutuku sirya unyak ninye nirya ara, na dam yamunce, yupu nyana kumce, ilil upsiliba, tunim abuka unamlume. Nati, yupu nyana kumce, kekenauk unamlume.” Allah arye, nabi Habakuk biti nyabuk.
Zakaria 2:13 - Eipomek13 Aning nirya ara, anggun tukwak mutuku, im sirya, mutuku sirya, noutam ululum nang nirya ara, pia dakeiam asa arye, tunim abuka, Allah el dam tamupmunce, yanuka unamlume. Yupu nyana ara, kume. Deiyok ara, Allah Yahweh el dam ara, wininamlume! Allah Yahweh, el pia teleb, lek diamuk ulamukak, im deice akunum buklirye, yanuka lyepropnamsila ati, anggun nirya ara, yupu nyana kumce, tunim abuka unamlume! Na Zakaria birye nyapsine. Gade chapit la |
Zakaria 2:13
26 Referans Kwoze
Nabi Sefanya arye, ayupu nyabuk. Allah Yahweh aning-aning nirya talilirye, weik tonun erebuka, Pia Mikip Weik Deiyoknye ulule. Elce, ‘Tukwak mutuku unyak nang nirya ati, sik wininyak ning ara, teleb do, malye do?’ tenen, dipdesilirye, wenepnamsil talak, akunum dam upmala ati, anggun tukwak nang nirya arye, kekeplulume! Ara, Allah Yahweh, el dam yamunce, yupu nyana pia kumce, pia tunim abuka unamlume. El Allah arye, tukwak nang nirya, yupu bokeipnamle sum, akunum dam upmala ati, elce tenyamukce, akunum wiamuk nang nirya ati, akunum kintinip deipmale. Ara, winipmanto ara, ninye arye, ‘Allah ati, si erenamap’ tenen, sikce talye kam un ning, domba basam do, kambing basam do, obikirye, uku dongolamak touk, Allah arye anggun Israel yala ninye ati, atonun winipnamsile. Allah arye, ‘Anang ara, ‘Naʼ tenen, nang unyaka ati, na si erena ati, wenebuka opnirye, sirya daknamne,’ akunum tenebuka ati, aning ara, adiparyuk winipnamsil ati, anggunda, Allah el dam yamunce, tunim abuka unamlume. Ara, sik malye-malye weik wininyak nang ara, Allah arye sikti, weneplirye, opnamla ati, akunum kintinipmale.
Anggun Israel yala nang nirya ara, Allah ati, “Anda pia teleb ulyame,” nyabuka, mot deice arye, el siuk erenamlume. Ara, im deice arye, dua deice bukuka banmalanye, nun ni Allah ati, kanye lon mot nyamunyak arye, el siuk erenamlume! Nun ni koproba Allah, el si ara, Yahweh ulule. Ati, Allah Yahweh el dam yamunyopura, kanye deibuka unamlume.
Ati ara, anggun amutuku ululum nang ara, narye anggun dam, yanuka nyapnamsin sum ati, moubuka dinamlulume! Deiyok ara, narye anggun malye weik winilulum ning ati, tukwak arye laka nyananye unamsina ati, anggunce, ‘Se, Allah ara, dan talak arye, nun malye wininyap ning ati, yanuka laka nyaplirye, wenepnamsil do?’ tenen, moubuka dinauk unamlume. Aning ara, talye ati kum nyapsine. Deiyok ara, ani. Ara, narye tukwak nang mutuku sirya, im sirya nirya ukirye, ninye ayala-yala nirya ara, sik malye winin ning ati, yu weik arye wenepnamsine. Winapnamne ati, ninye deiyok kibuka, talinyak mutuku nirya ap, weik nang ap, narye akunum bulupdeipsinyopura, anggunti wenepnamsine. Tonda, anggun malye winin ning ati, na yu teninun ning ara, weik uku buk dilamle atonun unulula ati, aning nirya ara, anggun deice deipnyopura, tukwak mutuku im sirya, mutuku sirya nirya, unyak nang ara, uku arye dibuka, sirya daklamle touk, winipsilirye, obuka, sice buklopnamsina atia.
Ikin ning pia weik, Israel nang deice yangalamukak, imun kanye bobuka ulamik bukni, atalak ara, Allah ara aning-aning nirya talelirye, mikip pia weiknye, tonap bukukce, ‘Israel nang lyepnamne’ tenen, kintinibuka yayuk. Winipmanto ara, ninye arye kanye wangalamak mek weik tonun dibikiba, kanye bona kumce mapmakca ani, aminyan talak tamubuka bukikirye, talye yupu weik arye minop nyalamaka atonun, Allah arye, sik Israel nang dam yanuka minopce lyeprobuk.
Aning asipdenutum bukni, anggunti tamubuka nyapsine. “Kume, anggunda talye tukwak ninye ululuma anya arye, Allah ati yata wiribuka, asipdetumce, elti, wenena yupu nyaptum do?” Nabi Yesaya birye sekeiamuk touk, ayupu dobuka, anggunti nyapsine. Elce sekuk yupu ara ani. ‘Allah arye kwepdeibukba, talye aulul ning aning-aning nirya arye, aning-aning nirya kwepdeiamuka deiyoknye Allah ati, “Anda yata ati, na unye touk kwepdeiamnulm do?” nyabuka, weneptu do? Kume, aning ara kum winipmantoe.’ (Yesaya 29:16)
Allah arye ayupu nyapdeibukba, sik Israel nang arye nyabik. “Se, nun ni Allah Yahweh, an adiparyuk kekepsimince, melibuka lyepsilyame! Na nio, an mikip weik deice aryuk, nun lyepdopsilyame! Minop talak ance nun apu yapu ati, melibuka lyepdonlum touk, nunce, ‘Adiparyuk tikibirye, nun atalak unyap nang ati ton, yanuka lyepdopsutumʼ tenen, moropkiyabe. Ura, nun ni Allah anti, nun apu yapu arye, ‘Nun ni koproba Allah, melipsilyame!’ nyabuka, moropkikba, yu weik ulamuk isa kwatima, akam ulamuk ning, el si Rahab, akunum parang ya arye sekuka omuka deiyoknye birye, yatanye birye do? Kume, yuknye birye kume. An Allah aryuk, weik laut mekwen noutam kam ulamuk kwatima, el si Naga Laut, weik laut mekwen pum tam arye lukuka oplumba, diamuke.
Ninye yu deice arye, mal olalamaka ara, Allah arye, ‘Akunuma,’ teneplye talak ara, yupu sekelule. Tonda ninye sik olan yin ap, mal ap nirya lakuka, batakalule. Tonda ninye ona ati, ketelinyak yo tace nirya, kau kibuka celtakalule. Tonda, ‘Mal dobikiba, na nong deice yanuka biknilyak’ tenen, lelilongon ting aning babye, dobuka uku dongolule. Allah ara, Pia Mikip Weiknye ulula atia.
Bukni, nun ni Allah, el si Yahweh bira, aning-aning nirya talibuka, ninye deiyoknye ulirye, el mikip ara, pia weik ulule. Allah Yahweh, aning-aning nirya talilulak ara, im deice arye, pia teleb takhta deice bukuka, yupu bokolisulule. Ati ara, yata ning do nirya, elcuk disulule. Ati, tukwak mutuku unyak nang nirya, sikce wininyak ning, yuk-yuk ning nirya babye, elcuk elilirye, bikisulule.
“Ati ara, Allah an mutuku im deice arye, pia teleb koprop ulyam mutuku arye dilamsilamak, nunti disilyame. Winipmince, ance wipdeiamsulum ninye, Israel ninye ati, ‘Teleb kipdeipsimince, nun patan ning arenamsilyame. Nun mutuku teleb kipdeipnamsilyame’ tenen, moropkiyabe. Ara, ance nun apu yapu ati. ‘Wininamsine, tonda pia teleb mutuku, aning-aning nirya weik ulul mutuku arepnamsine,’ nyabuka, nyapdeiamsulum touk, ‘Wini talak nunti arepnusilam’ tenen, moropkiyabe.” Anyapmasin touk nyapnamlulume. Musa birye, Israel ninye ati nyabuk.
Ura, nun nirya akunum kel kiyamupe. Allah arye el mem yupu nyabuka areamukba, Yahudi yala ninye doprobikce, ayupu uk talibuka, ayupu amu tam unyake. Ayupu noutamak nyasilye ning nirya ara, anggunti nyasulula anya arye, anggun kan-kan noutamak arye, tonoknye babye, “Nara, malye kum unune,” kum nyaptue. Yahudi yala ninyeuk kum bukni, ninye mutuku-mutuku nirya atonun, malye nanguk unyaba anya arye, Allah arye yupu lepsisikuka bokeipsilirye, wenepnamsila ati, nunce elti, yupu ton tamubuka kum nyaptibye. Allah ati tamubuka yupu nyana kumce unamabe.
Nyabukce, ayupu ton dukdongobuka nyapnuke. “Yeremiao, an dam anyapmakin yupu nirya ara, sik tukwak mutuku, im sirya, mutuku sirya nirya unyak nang kekenak nyalbinulyame. Ara, aminyan talak winipnamle ning ati, laka nyalbinulyame. Abinuka nyapnin banamlam yupu ara, ani. Bai tam kam ulamle ning, el si singa kus, din pataplyeba, yuk talye kam ning obuka dipnulirye, yupu weik nyalamle touk, Allah arye ninye nirya opnamalye talak ara, yupu weik deice arye nyapnamle. Ara, pia mambul lek sukum, im deice tam ululak arye, el yupu ara, liman nyalamle touk uplirye, el mapu koproba bukni, malye wininyak nang nirya ati, wenebuka opnamle. Tonda, Allah el yupu weik nyapnamle talak ara, ninye arye, anggur tapu duk dakuka deibikirye, mek purunamaca ati, yupu weik panalamle touk ubuka, weik yupu arye nyapnamle. Ayupu nyapliba, mutuku sirya, im sirya nirya unyak nang arye, alelim kekepnamake.
Diba nun ni Allah Yahweh, anda im deice alip tam pia telebak umince disilyame. Anda pia mikip weiknye ulyame. Malye ning tonok babye kum winiminya ati, weik erebuka eitam umince, im deice pia teleb mutuku ulyame. ‘Ance bico tenesimince, ilil kumce malya kibuka, nunti melisilyam ning ara, wini talak dan sukum ulul do? Tonda ance talye lukparabuka opsutum bukni, lyelosilyam ning ara, dan sukum ulul do?’ tenekinyabe. ‘Anda yata ning ati, nunti yukuna atonun winilisilyam do?’ tenekinyabe.
Nara Allah, aning-aning nirya deice tam erebuka ununye birye, nyapsine. Tonda, aning-aning nirya deice tam ununa ati, na siuk weik tonun ereninyaknye birye, nyapsine. Nara min talak akunum kam ulamsirye, aminyan doyanamle talak babye, na pia Kam Una Deiyoknye unune. Na ap, na si ap, Pia Teleb, Lek Ululnye unune. Nara, pia weik erenak, im deice unune. Na ununak ara, dipkoprob malye ning tonok babye kum ulula ati, pia teleb kurunak unune. Bukni, nara yata nang do nirya, sik talima amu tam kibikirye, sikce, ‘Se, nun malye unyap ning ati, alye dakdanuka unyaba ati, aning nirya batakabe,’ tenebikirye, talima erena kumce, malye kanye bobuka, sik kanye talima namin unyak nang ap, neika unamne. Na ap, sik epdanuka neika unamap deiyok ara, narye sik malye kanye bobuka talima lamapdongobuka unyak nang ara, mikip arepnyeba, sik kanye deipnamake. Tonda, sikce, ‘Se, nun malye unyap ning ati, alye dakdanuka unyaba ati, aning nirya batakabe,’ tenebikirye, engenyak nang ati, sik talima kwa dipnyeba, sikce kanye deibuka teleb unamake. Sik ato unyak nang, sik dam ara, na aunamne, nyapsine.
Sikce, isa si erena ap, ‘Mapu ap, din ning ap weik tonun taliptipnye,’ tenena ap, weik yo tikamlya dam bimunce, amem yo dam isa si erepmunce, yolalulume. Tonda, ‘Nun koun ning kounyabuk, isa arye yanuka melisilya deice arye, teleb-teleb kibuka bokosulule’ tenen, keil deiya dam bimunce, anggun deiplum mapu bobuka, isa si erepmunce, aisa arena ati, anggun mapu olulume.
Sik imam nang ap, sik pil don ati melin nang, Lewi yala nang ap, sikce Allah ati, “Se, nun ni Allah, ance amutuku unyak nang nirya ara, teleb kipdeiplyame,” nyabuka morobik. Nyabuka morobikura, pia teleb sukum, im deice pia teleb lek pia teleb ululnye Allah arye, sik anang patabuk ati, morobik ning ara, akunum kekebuka melibuk.
Allah arye nyabuk. Na nyasinye yupu kekebukapmunce, pia darabuka unamlume. Se, anggun dana-dana tam, laut mekwen arye sekdongobuk mutuku umunye ninye nirya, tonda anggun yuk-yuk mutuku winimunye, ninye ayala-ayala nirya ara, mikip kum ulamlum bukni, narye anggun mikip, ila tuba tonap arepnamsine. Ati, anggun nirya ara yamunyeba, na ap yupu talipnamabe. Yupu awapsilyopura, anggunce nyapnamnulume. Yupu lipsisikuka bokolina deice, bulubukapbibirye, yupu talipnamabe. ‘Weik mambul pil dolulnye bira, yatanye do?’ nyabuka, yupu talinamabe.
Yata nang do nirya, ‘Allah arye nyapnuka ati, mambul ning winipnamle ning ara ani, ani,’ nyabuka, laka nyanyak bukni, sik nyanyak ning, nong kum kiplyopura, akunuma. Adeice arye kel kipnamlulume. Anang ara, sik nyanyak ning nong kum upmala ati, Allah arye el pil dona ati, anang kum wipdeibuk. Sik nyanyak yupu ara, nong kum kipnamle. Sikda, talye nang unyake. Sida, tilila nang uka. Sik bidamang kanye aniryuk nyanyake. Allah el si deice, ‘Winipnamle,’ nyace nang bukni, sik nyanyak yupu nong kum uplyopura, aning ara, Yahweh arye dipkoprob kum dopdeipsuk ati, ato nang ati ara, ‘Mambule,’ kum tenenamlulume. ‘Allah arye nyalye yupu kum nyanyake. Sik dem aryuk nyanyake,’ tenenamlulume. Ato nang ara, oplopnamlulume. Allah arye nyapnuke. Musa birye Israel ninye ati, nyabuk.
Minop talak, sik Babel mutuku ulamik nang arye, Israel nang obuka, Babel mutuku bobinamik bukni, aminyan talak ara, yuk mutuku nang weika arye, sik Israel nang melibikceba, sik ni Allah arye, sikti, min arye areamuk mutuku tamubuka yanamake. Atalak ara, sik Israel nang arye, sik bobinamik nang ati, sik amu tam deibiceba, Israel nang, sik ikin pil melibuka donamake. Tonda, sik mutuku koproba, neika unamak talak ara, yuk yala ninye asik nang, sal babye, kilapu babye, sik Israel yala nang ati, sik amu tam kibikcopura, dekna dolona kum aryuk, talye pil melibuka donamake. Ara wini talak, Israel nang ati dobuka, wenen aik dongobikce nang ati ara, kwang dakuka tomobikirye, sik amu tam deibikceba, daunamake. Tonda, Babel mutuku nang arye, Israel nang ati, ninye deiyok kibuka taleamikce, ikin ning, sik nong deice delilamikba, kanye imun asa ulamik touk, aminyan talak ara, sik Israel nang ninye deiyok kibuka talibikirye, sik Babel tam nang deice, ikin ning deibikirye, darapnamake.
Atalak akunum kiplyeura, Mesir mutuku noutam unyak nang nirya ara, kilapu ulamak touk, mitang asa ubikirye, ilil weik upnamle. Deiyok ara, Allah Yahweh, el mikip weik taruk erebuka, sik amutuku unyak nang deice deiplirye, sikti, wenebuka oplyeura, sik amutuku nang nirya arye eibikirye, yok berber abuka, ilil upnamle. Deiyok ara, Allah Yahweh elda aning-aning nirya talibuka, deice tam erebuka, mikip weiknye ulirye, im deice yin talin malaikat nirya talilule.
Na Allah Yahweh, aning-aning talibuka, deice tam erebuka, Pia Mikip Weik Deiyoknye ununye birye, im deice yin talin malaikat nirya ara, sik deiyoknye unune. Narye dipkoprob nyapsine. Nara Allah, anggun Israel nang yala-yala nirya talinirye, anggun deiyoknye unune. Narye anggunti, melibuka kalikisiniba, anggunce, nati si erenululume. Nara dipkoprob kam pia ununye. Na si deice arye dipkoprob nyapsine. Moab mutuku unyak nang ap, Amon mutuku unyak nang ap, narye obuka, pia kum kipdeipnamne. Ara, minop talak, Sodom mutuku ap, Gomora mutuku ap, amutuku pia malye weik ulamik nang, sik wenena ati, obuka kum kipdeiamse touk, winipnamne. Sik mutuku noutam unyak nang nirya ap, aik ap, akunum wenebuka kum kipdeipnyeura, oldemuk upnamle. Aminyan talak ara, talye garam ulamla atonun upnamle. Tonda, bai tam talye palamle taice palamle atonun kibuka upnamle. Amutuku nirya ara, dakuka bataknyeba, pia malye mutuku upnamle. Winiplyopura, na mapu koproba, sik Israel nang ara, mitik tonun tuba kam aunamak nang ara, sik Pilistin nang taleamik mutuku nirya, alubuka doprobikirye, asukum unamake.
Ninye deiyoknye Zerubabel birye, na si eren aik dona ati, keil min yuma dobuka, na aik ayukumna ati ikamuk keil ara, el taruk mikip arye deiamuk. Winibukopura, adiparyuk dopnin balamika ani, sirya ara, na si eren aik nong nirya dobuka, sirya daknamnile. Aning akunum winipnilyopura, na mapu koproba, sik Israel nang nirya arye, moubuka bikinamake. Ara, ‘Se, nabi Zakaria bira, dipkoprob Allah arye, anye wibuka dopdeiamukba, nun dam yanuka, Allah arye nyapdeiamuk yupu, laka nyapsuk touk, akunum winipmala atia,’ tenebikirye, bikinamake. Ara, Allah Yahweh, im deice unyak yin talen malaikat nirya, sik deiyoknye ulula ati, elce, ‘Winipnamne,’ tenyamuk touk, akunum winipmale!’ tenen, bikinamake.
Ura, aminyan talak ara, sik yuk pera mutuku noutam arye unyak nang ara, teleb arin ning arenamaka deice arye, na Allah, si eren aik dona ati, melinamake. Ton nang arye, asukumuk yanuka, anyaik melibuka donamake. Winilamikca ani, anyaik akunum dobuka sirya dakikcopura, sik Israel nang nirya arye, na Allah Yahweh arye, winipnamne ning deice arye, moubuka biknamlume. Ara, Allah Yahweh, aning-aning nirya talibuka, deice tam erebuka, Pia Mikip Weik Deiyoknye ululnye birye, na nabi Zakaria dam yanuka, yupu nyapdeipnukba, anggun dam yanuka laka nyapsise ning ara, bikmunce, diba tenenamlume. Narye, ‘Aning-aning ara, Allah arye winipnamsile,’ nyabuka, laka nyapsise ning nirya ara, dipkoprob nong upnamlarya! Ara, anggun si erelulum Allah Yahweh arye, aning-aning nirya talibuka, deice tam erebuka, Pia Mikip Weik Deiyoknye ululnye birye, nyapsilye yupu nirya, moubuka kekepmunce, batakna kumce, aninguk dipkoprob talibuka winipmunyopura, elce, ‘Winipnamsine,’ nyabuka, nyalin yupu deice nyapdeiamsuk ning nirya ara, dipkoprob nong upnamle. Aning nirya ara, na nabi Zakaria birye, dipkoprob nyapsine.
Piblisite