Amos bira, Tekoa mutuku unye ulamuk. Tonda, Amos bira domba weinanye ulamuk. Atalak ara, Israel yala ninye ati, deiyoknye kibuka taleamuknye bira, Yoas el mi Yerobeam ulamuk. Tonda, atalak ara, Yehuda yala ninye ati, deiyoknye kibuka taleamuknye, Raja Uzia ulamuk. Atalak ara, Allah arye, ‘Amos bira, talye domba weinanye ulul bukni, na yupu laka nyalbinamle’ tenen, el yupu nyapdeibukba, Amos kekebuk. Amos birye, ayupu kekebuka, seklamuk talak ara, mutuku lulukna weik ning, min kum lulukamuk talak noutam, Raja Yerobeam ap, Raja Uzia ap arye, ninye deiyok nang kibuka, amutuku noutam ulamik ninye nirya taleamdik. Amos ayupu kekebuk talak arye diprongobuka, keting tamun bitinye tonap, mabik talak noutam ara, Allah arye weik mutuku lulukna arebuk. Arebuk talak arye, ayupu nyapdeibuk talak ara, weik mutuku lulukna min kum dobuk bukni, Allah el yupu laka nyananye Amos, el dam yanuka lak nyapdeibukba, kekebuk. Ara, Israel ninye ati, aminyan talak arye winipnamuk ning ati, ‘Lak nyapnulyame,’ nyabuka, yanuka lak nyabuk.
Zakaria 14:5 - Eipomek5 Ati ara, Zaitun mutuku nirya adiparyuk toplirye, keting panalyangan tam arye, otam keting kumulban tam lipdopnamle. Liplyeura, amutuku noutam ara, weik lu ara, lak kipnamla ati, anggunce adiparyuk alu mutuku noutam bikbik abuka binamlume. Bikbik abuka binamlumak ara, Asal mutuku dam binamlume. Ura, minop talak, ninye deiyoknye Raja Usia birye Yehuda mutuku talibuka ulamuk talak, sik mutuku noutam ara, weik mutuku lulukna lulukukba, anggun apu yapu nang arye minopce, bibik abuka binamik touk, Zaitun mutuku topnamle talak ara, anggun amutuku unamlum nang babye, atonun bibik abuka binamlume. Ati ara, na Zakaria birye si erenun Allah, na ni koproba Allah Yahweh ap, el im deice pil don nang, sik pia teleb lek malaikat nirya ap, sik neika yanamake. Gade chapit la |
Zakaria 14:5
30 Referans Kwoze
Yesus arye ayupu nyabukopura, ayupu tonap nyabuk. Na Ninye Mi Koprop Atonunye ap, na im deice pil donyak nang, malaikat ap, im deice arye yanamap talak ara, im deice ning nirya ulye touk, na babye urasin teleb una ap, na nong dirina weik una ap winipnamne. Winipnilyopura, weik ninye deiyok nang bulamak ning atonun ning deice buknirye, ninye mutuku-mutuku nirya unyak ninye ati bokuka deipnamne. Aning deice bunamne talak ara, na ning nirya ara, im alip ning ulye touk, pia telebuk upnamle.
Ara, talye ati kume. Nara, Ninye Mi Koprop Atonunye, na ni el urasin pia teleb ulirye, dirina weik ulya atonun, na babye atonun upyopura, Allah arye kwepdeibukba, el im deice pil don nang, malaikat ap, ansinibibyopura, tukwak yanamabe. Yanamap talak ara, tukwak ninye nirya wenebuka lipsisikuka bokeipnamne. Yata ninye do nirya, sik winilamikce ning atonun, narye moubuka dipdebuka nuknirye lipsisikuka bokeipnamne. Ara malye winin ninye ati wenebuka opnamne. Teleb winin ninye ati dekna ning arepnamne. Yesus arye awekmek nang ati nyabuk.
Tonda, nun Deiyoknye Yesus ap, el im deice melina nang, malaikat ap, tukwak tamubuka yanamak talak noutamak bukni, anggun Tesalonika ninye ara, nun ni Allah dam tikilbinamlum talak ara, ‘Anggun malye winin ning tonok ning babye, kum uplye deice arye, pia diksukumuk wininamlulum’ tenen, Allah morosunune. Tonda, ‘Winibuka wininamak’ tenen, ‘Yesus arye anggun talima mikip kilililamsilya deice arye unamak’ tenen, Allah morosunune. Na Paulus arye nyapsine.
Anggunce eipnalume. Nara Allah Yahweh, Pia Mikip Weiknye, im deice yin talin malaikat nirya, sik deiyoknye ununa ati, na talye karin arye, weik liman ap, weik mutuku lulukna ap, pia mikip kumanya ap, weik lelim ap, yanirye, anggun mal olan nang nirya obuka, sirya daknamne. Ara, weik uku buk arye, aning-aning nirya diplirye, sice bultakalamle touk, na yanirye anggun Yerusalem mutuku nang nirya ati, lyebuka teleb kipdeipnamsine.
Aning eipsopura, aning ton eipse. Weik deiyok nang bun ning deice bukmek kili sal ton eipse. Allah arye aninye ati, yupu lepsisikuka bokolina deiyok ning akunum aribuk. Ara, ‘Yuk kili sal ati yupu lepsisikuka bokeibikirye, wenepnamak’ tenen, Allah arye aninye ati yupu lipsisikuka bokolina deiyok ning aribukba, deiyok nang bun ning deice bukmekbuk eipse. Tonda, minop talak Yesus ap, el yupu ap ati diba tenelamikce, Allah el yupu dobuka peterelamikba, yu nang arye, ‘Nun like’ tenen, sik ngang sekeltakalamik ninye, dib kanye weik aunmekak eipse. Aninye sik dib kanye nirya kam bukikce, keting tamun yupa weik 1.000 tahun deice arye, Kristus ap, sik ap arye, aning-aning nirya talibuka deiyok nang ulamikce talilamik. Anyapmasin ninye ara, talye ninye kume. Ara, Pia Malye Kam Ululnye ap, el urasin atonun ning ap ati, si kum erelamik. Tonda, anye el laka kilin ning, el nomor ara sik asok deice ap, sik taruk deice arye kum seklamik ninye ati nyapsine.
Dinmekbuk, atalak aryuk weik mutuku lulukna mikip arye lulukukba, Yerusalem asik domikak weike lokuka bindakuk. Aik pia weik lokuka bindakuk deice arye, ninye yupa weik 7.000 ninye oplobuk. Aning nirya winibuk ning ati, sik kam tuba unmekce, dinmek ninye ara, im deice tam talibuka ululnye Allah ati, “Anda pia mambule,” nyabuka si erenmekak, eipse.
Allah arye wipdeibuknye, amalye ning siknibuknye bira, dobuka yukak deiplyopura, atalak aryuk, duknulirye, Allah el winin ning nirya ati, Yaniltana Deiyoknye lak kipnamle. Winibuka daulamlye bukni, aminyan ara, nun Deiyoknye Yesus arye, el nyapnamle yupu deice arye, amalinye biti, malye kibuka opnamle bukni, Yesus elda erepdopnamle. Tonda, Yesus el pia teleb ubuka dirina weik yanamle deice arye, amalye winina deiyoknye biti, oplirye, kum daneipnamle.
Nun nirya arye, Allah Yahweh ati, el si erebuka kinamapa ara, talye ati, kum wininamabe. Deiyok ara, Allah yanamle talak ara, nun yupu bokeipsilirye, wilipdeipnamsila ati, el si erenamabe. Tonda nun nirya ara, yupu weik arye, kanye pin-pin dobuka, el si erebikirye, kanye lon mot nyanamabe. Allah arye, tukwak mutuku tamubuka yalirye, tukwak mutuku-mutuku nirya noutamak unyap ninye nirya ati ara, ninye pil donyap ning ati, apil-apil donyap touk, Allah arye, ‘Teleb ning ani, malye ning ani,’ teneplirye, nun wenena ati, yupu bokdeipnamsile. Winibuka yupu bokeipnamsil talak ara, malye winina kum aryuk, tonda, tilila yupu nyana kum diparyuk, pia diksukum winibuka, yupu bokeipnamsile. Allah arye nyasilye yupu, el dipkoprob yupu deice arye, ninye pil donyap ning ati, apil-apil donyap touk, yupu lipsisikuka bokeipsilirye, wenepnamsile. Ati, Allah el tibuk, el si pia erenamabe.
Allah arye, Sinai mutuku dup yayukce, Seir mutuku deice keting sinarya kutukuka, pata tikilamle atonun yayukba, sik eibikba, sikti yanuka melibuk. Tonda, elda Paran mutuku dup, dirin weik arebukba eibik. Allah el yayuk talak ara, Allah el im deici pil don nang malaikat ara, yupa sepuluh ribu (10.000) malaikat nang ap, weik nukmanto kum arye, neika yayikce, el sirik taruk tam ara, uku buk paklamle atonun, ubukba eibik.
Aning nirya eipsopura, aning ton eipse. Ara, weik ninye deiyoknye kurun ning deice bunlulak eipse. Ara, pia weik kurun bun ning ap, aning deice bukmoknye ap eipse. Anye laka ubukba, im ap, im noutamak ulul ning nirya ap, tukwak ap, tukwak mutuku noutamak ulul ning nirya ap, aweik deiyoknye dam kum yanmanto ati ara, aning nirya kum dayukba eipse.
Nyabukopura, anyaik batakuka, Zaitun mutuku deice welebuka, abinuka bukikce, yuk nang ap tabakuka kum bukmek anya arye, sik nirya arye Yesus ati asipdeyik. “Naio nyapsilyame. Allah el si erena aik, Yerusalem mutuku ulul aik ara, dan talak arye daklopnamak do? Anyaik daklopnamak ap, sirya talak an yanamlam ning ap, sirya talak sirya daknamle ning ap ati, yata ning uptua deice arye, ‘E, aning nirya akunum dam uple,’ tenen, kel kiptibye do?” nyabuka asipdeyik.
Deiyok ara, Allah Yahweh arye yanuka, ninye tukwak nang nirya ati, dipdelirye, sik malye winilamikce ning ap, teleb winilamikce ning ati, yupu lipsisikuka bokeipsilirye, dengna arepnamsile. Allah arye, tukwak mutuku noutam unyak nang nirya ati, yupu lipsisikuka bokeipnamsil talak ara, elce, “Aning ara, wininamlume. Aning ara, pia kum wininamlume,” nyapdeiamsuk yupu deice arye, diksukum kibuka, yupu lipsisikuka bokeipnamsile. Diba, Allah arye, tukwak nang yuk-yuk nirya ati, sikce winilamikce ning moubuka dipdelirye, sik winilamice touk, yupu lipsisikuka bokeiplirye, dengna arepnamle. Nun winilamepye touk ubuka, “Anang ara, teleb wininyake, anang ara, malyeuk wininyake,” nyabuka, nun winilamepye ning ereplirye, aning atouk ubuka, yupu lipsisikuka bokeipnamsile!
Awinibuka ara, sik Israel ninye yuk daulamik nang, mining dam atikuka dinmekce, eibika ati, ilil weik ubukba, Israel ninye nirya, asukum arye batakuka, bai sakuka banmekce, nyanmek. “Se, nun nirya babye, awinipmal touk tuku likliba, tuku pum bisik wekibiba, tuku arye siknipdongopnamsile,” nyabuka, ngalukuka malye nyanmek.
“Anggun amutuku-amutuku nirya, akunum winipmunyopura, ninye mutuku-mutuku nirya, dana-dana ululum ninye ara, minopce weik mutuku lyu ak, el si ara Yosafat mutuku, lyu mutuku, otam bulubuka wekelbinamlume. Ara, ‘Anggun obilulume,’ nyapdeipmunyeba, sik abulubuka weknamak nang nirya ara, yanganamake. Sik nirya bulubuka wekikcopura, na Allah Yahweh arye, abulubuka wekmace ninye, mutuku-mutuku nirya ati, yupu lipsisikuka bokeipnirye, wenepnamsine. Ati, na Allah arye, na yin talin nang ap, na yin talin malaikat ap, nirya boyanamne.
Ninye deiyoknye, Gubenur Zerubabel, dipkoprob an dam ara, pia kanye imun weik ning aupmaliba, ance, ‘Se yatato ning winiptinyeba, aning nirya, malye kiptinye do? Winipmanto ara, cang weik mutuku, welepman kumto bulamle touk, an dam arye kanye imun weik ning tuba aupnamle. Bukni, winipmanto ara, cang weik mutuku luluklamliba, tokna paksakuka poulbalamlirye, amutuku nirya lu uk kilamle touk, akanye imun weik ning nirya ara, malye kipminyeba, narye, aning nirya kum kipdeipnamne. Winipnyopura, na si eren aik uluplopmik ning ara, lipsisikuka dopnamnilame. Tonda, anyaik dona sirya dakna ara, ance tonok keil min yuma dobuka deipnalam talak ara, atalak unamak nang arye, ‘Se, akeil ara, pia teleb keil ulule. Tonda, anyaik ara, Allah arye el si eren aik ulula ati, elcuk anyaik pia teleb kipdeipnamle,’ tenebikirye, anang nirya arye, kanye pia deibuka, kanye lon yupu nyanamake!”
Tonda, anggun Safir mutuku ululum ninye ara, yuk mutuku ninye arye anggunti, obuka sirya daksikirye, anggun ululum mutuku batakuka, yuk pera mutuku bobinamsiyak talak ara, baju ongona kumce, talye nong bananguk binamlume. Winipmunyopura, anggunda, alye weik dakanamlume. Tonda, anggun Zanan mutuku ululum ninye ara, anggun umunye mutuku ara, batakuka yuk mutuku ton, kum bitume. Ara, ‘Yuk mutuku ninye arye, yanuka opsicak’ tenen, anggun asik nirya antanabuka, doamlum cang pala keil poka, bai tam kum binmanto upnamlume. Bukni, sik Bet-Haezel mutuku unyak ninye ara, sik olan ninye arye, sik domik aik ap, keil poka domik ning ap nirya ara, dakuka uluplopnamake. Tonda, ‘Aning pia aunamle’ tenen, tuku pum tam deiamik pala keil babye, palibuka daklobikirye, sik aik nirya uluplobikiba, atu butbuta atonun unamla ati, nyapne.