Tonda, ‘Imam deiyoknye, el kisok kitin ning deice deibibyeba, ongonamleʼ tenen, dekna weik kat ning, el si ara emas, pia teleb ninguk bobuka, pakudakanyak ning, martalok arye, teing-teing abikba, mitikto pala kibuka memepdeibik. Winibikura, apala emas ning deice arye, ayupu puturuba memebikce sekuka deibik. Ayupu ara, ani. “Anye bira, Allah Yahweh el ninguk, pia teleb ulule,” nyabuka sekik. Winibuka, aning ton kintinibuka deibik.
Zakaria 14:20 - Eipomek20 Atalak aryuk, sik kuda basam deice, lelim nyan ning el si ara, lonceng-lonceng nirya babye, urasin teleb kibuka deibikirye, alonceng nong deice ara, puturubuka sekeipnamake. Sikce, ‘Aning ara, Allah Yahweh el tonok, aning wibuka deibupu,’ nyabuka, sekuka delinamake. Tonda, Allah Yahweh, el si eren aik pum tam delinyak yun makau ara, el si panci-panci, nirya ara, Allah el tenen ning ulula ati, ‘Aning nirya ara pia teleb lek ning,’ tenenamake. Aning atonun, yuk mek din makau, el si mangkok-mangkok nirya ara, na aren sukum, el si mesba dam delinyak mek makau babye, sikce, ‘Aning ara, Allah Yahweh el tonok, aning wibuka deibupu,’ tenenamake. ‘Aning ara, el ‘Naʼ tenen, ning,’ tenenamake. Amek makau ara, ‘Kam ning opnarye, Allah ati arenamabʼ tenen, mesba domik dam delinyak mek makau ati, aning tenenamake. ‘Aning-aning nirya ara, Allah el ninguk ulule,’ tenenamake. Gade chapit la |
Zakaria 14:20
43 Referans Kwoze
Anggun babye, kam keil atonun ululuma anya arye, Yesus ap kanye dukdongobuka ululum talak nirya ara, el dopropsilirye, aik atonun dobuka teleb updeipnamsile. Tonda, ‘Allah ap, malye winin ninye ap, ansinibuka neika utibye’ tenen, ansinilina deiyok nang ati, Allah arena deiyok nang atonun kilisulule. Winisilyopura, Yesus Kristus ap, talima dukdongobuka diksukum umunye deice arye, Allah ati teleb ning arenamlume. Ara asing elinyap ning kum bukni, tonda nong kipman talye ning ati arenamlulum bukni, Allah arye, ‘Aning teleb,’ tenelye ning uk, anggun kanye talima noutam arye arilulum ning, elti, arenamlume. Winipmunyopura, kanye delinamsile.
Bukni, atalak arye dipdongobuka, dowinipnamle talak nirya ara, Tirus mutuku nang arye, yo bok weik dekuka dolonamak ning nirya ara, sikce sik ning ton kum moubuka delinamake. Ayo bok wekenamle ning nirya ara, Allah Yahweh el ninguk upnamle ati, Allah el tibuk bobuka arelyanganamake. Tonda, Tirus mutuku nang arye yo bok dolonamak ning ara bobuka, Allah Yahweh el tenen nang, el dam tuba unamak nang ati sik ak arenamake. Winiceura, Allah el mapu koproba, sikda teleb din weik tonun ap, teleb ongon baju ap, tuba dolona uk unamake. Allah arye na Yesaya ati, aning nirya laka nyapnuke.
Tonda, Harun el kisok kouna ati, cang kain, el si serban koupdongobuk. Aserban deice ara, dekna weik kat ning, el si emas arye, urasin teleb kibuka, memebuka deiamikak, bobinuka kitipdeibuk. Aning ara, el si hiasan emas bukni, el deiyok ara, ‘Aning kinikmalinye bira, Allah el koproba ululeʼ tenen, tenelamikce ongolamik. Tonda, aning winibuka, ongopdeibuka deice arye, ‘Harun bira, Allah Yahweh el tia tenda aik pum tam pil don nang, sik deiyoknye unamleʼ tenen, laka kina ati, kintinideibuk. Aning nirya ara, Allah arye Musa biti, “Winibuka pil dopnamlyame,” nyapdeiamok touk, apil dobuk.
Winipnamle talak ara, dipkoprob aning-aning nirya deice tam talibuka, mikip weik talibuka ululnye Allah Yahweh, im deice unyak malaikat nirya, sik weik deiyoknye ulula anya arye, el wibuka deiamuk ninye ara, el mikipnye amu tam ulamikiba, el nong arye lelildongonamle. Adeice arye, sikce sik mal olan nang nirya obuka, sirya daknamake. Ara, ‘Ninye opnun,’ tenepne talak ara, tapu arye keil kirikdongobuka, bobanmana ani, akeil mikip upnopura, ninye nong deice dobuka opdandenamak bukni, Allah el ‘Naʼ tenen, ninye ara, melipliba, amal olan ninye malye kibikirye, obuka sirya daknamake. Winipmanto ara, ninye arye yu lelamle mek dibikiba kanye teleb ning wangabikiba, malye kibuka, lukparabuka ninye talye olamak touk upnamake. Winipmaka deice arye, obice nang, sik ining ara, pia weik binamle. Winipmanto ara, Allah arena ati, kam ning obikirye, Allah si eren aik pum tam deiamice, marikna deice ining likililamak atonun, ining weik binamle. Tonda, yangalin makau pum tam, ining dikdongobikiba, langdilamle touk, sik mal olan nang arye, omice nang ining ara, weika arye binamle.
Netanel birye arebuk ning ara ani. Urasin teleb namin ning, dekna weik ning, el si perak arye puturubuka deibik piring, el ikin ara 1.5 kilo gram arebuk. Tonda, teleb ning perak aryuk membik baskom ton dobuka deiamuk makau, el ikin ara 800 gram ning ap, boyanuka arebuk. Aperak ikin nukik ning, ara min arye Allah ap, ninye ap el dan aik taleamika deiyok nang arye, “Dekna weik ning ara, perak do, emas do, tonok syikal, el ikin ara, dipkoprob winibuka boyanamake,” nyabuka min arye nyapdeiamikba, aninguk boyanuka arebik. Tonda apiring ap, abaskom ap kintinibuk ning pum ara, gandum tikinmakiba, pia teleb roti kwaning deiyok ning, el si ara tepung ap, minyak mek anyapce tabakuka, delilamak ninguk, langdibuka deibuk.
Nahason birye arebuk ning ara ani. Urasin pia teleb namin ning, dekna weik ning, el si perak arye puturubuka deibik piring, el ikin ara 1.5 kilo gram arebuk. Tonda teleb ning perak aryuk memebik baskom ton dobuka deiamuk makau, el ikin ara 800 gram ning ap, boyanuka arebuk. Aperak ikin nukik ning ara, min arye Allah ap, ninye ap el dan aik taleamika deiyok nang arye, “Dekna weik ning ara, perak do, emas do, tonok syikal, el ikin ara, dipkoprob winibuka boyanamake,” nyabuka min arye yanuka nyapdeiamikce, aninguk boyanuka arebik. Tonda apiring ap, abaskom ap kintinibik ning pum ara, gandum tikinmakiba, pia teleb roti kwaning deiyok ning, el si ara tepung ap, minyak mek anyapce tabakuka, delilamak ninguk, langdibuka deibik.
Tonda, amesba deice ara, unggu urasin kain arye, akunum bibikdeibikcopura, Allah el si erena ati, pil don talak una ati yala nirya ara, adeice uk dobuka, delilyanganamnyake. Ara, uku sekenak ap, libuka lun ning karpu ap, sekdok ap, lukuka dolon ning ap, tonda din ning lukuka delina ning, baskom ap nirya kintinilinamnyake. Aning nirya, akunum kintinip deibikcopura, namin pia teleb kain ara, urasin pia teleb ning aryuk, kitipdongobuka delinamnyake. Tonda, aning nirya akunum kitibikirye, adeibikce ning nirya dobuka, boban talak uplyeura, aning bobana ati, cang yo dongon ati, cincin ato ning memepdeiamice bisik, ayo dongobuka bobanamyake.
Winibicopura, ‘Allah Yahweh ara, nun dam aululeʼ tenena ati, roti kwaning delinyakak ati, memebuka delinyak meja ara, cang kain el bol ara, im sukulamle atonun ning arye, bibikdeipnamnyake. Winibikiba, teleb uplye talak ara, siltong teleb nyana ati, uku dabuka delina ati piring ap, mek makau ap, cangkir ap, tonda anggur duk arye, purubuka delin mek libuka delina ati, amek makau ton, yuk-yuk kintinbuka, im sukulamle atonun kain deice deipnamnyake. Tonda, Allah el arena ati, din mek arena ati mek makau ap, tonda din ati kintinbuka dalulum roti kwaning ap, kintinbuka, im sukulamle atonun kain deice deipnamnyake. Aning-aning nirya ara, akain deice, kintinbuka deipnamnyake.
Tonda, tuku arye dobuka memamlum makau, weik din ning yun makau, el si periuk ara, akam ning obikirye, ‘El tup ara, aweik makau arye yunamakʼ tenen, memebuka deiamlum ning ara, cobuka batakanamlume. Ara, akam ning, el tup dobuka, amek makau pum tam akunum yubicopura, adiparyuk aweik makau cobuka, batakanamlume. Bukni amakau, periuk makau, teleb kat ning, el si tembaka arye, memebuka deiamica pum tam yubicopura, amakau ara, kum cobuka batakmanto ning ulule ati, atup ap, aining ap, amakau deice sakuka bol pipmalye ning ara, aining sakuka aweik tembaka makau deice doulbinmalyak nirya ara, cubuka pia teleb kibuka deipmunce, mek wininga ap, mek ap arye, pia teleb kibuka, mek likinamlume.
Winibukopura, din ning lukuka delina ati, ara piring ap, mitik mek makau, el si cangkir ap, tonda, mek dikuka delina ati, weik cang mek makau, el si kendi ap, mek kwebuka din makau mangkok ap, nirya kintinibuk. Ara, Allah ati, arenamik ning, anggur mek dikuka delina ati, kintinibuk. Aning nirya ara, urasin teleb kat ning, emas pia teleb ning deice aryuk, moubuka memebuk.
Sik minyuma talak kam buknamak ninye ara, Allah arye teleb updeipliba, pia kanye deibuka unamake. Sikda pia mambule. Allah arye aninye ati webuka deiamuk ati, sikda malye winin ning tonok babye kum talinyakce, pia diksukum ninyeuk unyake. Aninye ara, Allah arye minyuma talak kam bukeipnamle. Bukni, yuk malye ninye nirya ara, dipna bitinye talak ton dipnamak bukni, atalak minyuma kam bukuka unamak ninye ara, like bitinye talak kum dipnamake. Telebuk pia kam unamake. Sikda, keting tamun yupa weik 1.000 tahun deice arye Allah ap, Kristus ap, sik amu tam buknamak bukni, sik bitinye ap, aninye ap ninye deiyok ning talibuka, aning-aning nirya talibuka unamake. Sik aninye ara, Allah el mambul pil don nang pia unamake.
Ance dekuka lyeplum ninye nirya ara, “Nun ni Allah el amu tam bukuka, elti, pil donyaka deice arye, yuk ninye im sirya, mutuku sirya nirya, ‘Allah el yupu kekenamak’ tenen, teleb kipdeiplume. Teleb kipdeiplumba, Allah arye, ‘Sikda na tenen ninye’ tenen, aninye nirya talilule. Talilirye, sik dobuka, ‘Weik ninye deiyok nang unamak’ tenen, ninye deiyok kina ati deiyok ning areplumba, tukwak mutuku nirya talibuka unamake,” nyabuka mot nyanmekba, kekepse.
Lyepsuka deiyok ara, ‘Na ni Allah el amu tam bukuka, elti, pil donyaka deice arye, yuk ninye im sirya, mutuku sirya nirya, Allah el yupu kekenamak’ tenen, Yesus teleb updeipsukba, Allah arye, ‘Anggunda na tenen ninye’ tenen, talisulule. Ati, ‘Ninye nirya arye Yesus el siuk pia erenamak’ tenen, Allah moronune. Ninye im sirya, mutuku sirya nirya arye, Yesus ati, “Elda weik mikipnye ulule. Dotalak nirya ara el siuk weik arye erenamabe,” nyabuka, ‘El ti si pia erenamak’ tenen, ‘Se,’ tenenune. ‘Aning ara dipkoprop nong upnamle’ tenen, “Amin,” nyapsine.
Winipmanto ning ara, yatanye do, Allah yupu nyalulnye bira, Allah el dam yaturye, nyaptubuk elce ila tamubuka nyapsutu touk, pia mikip deice arye peternamsile. Aning atonun, yuk ninye ati, melibuka pil dolulnye bira, Allah arye el mikip arisilya deice arye, yuk ninye ati melibuka pil donamle. Allah arye, ‘Na pil donamak’ tenen, talye arisilye pil dona deiyok ning deice arye, Yesus Kristus ap, kanye dukdongobuka umunce, anggun wininamlulum ning nirya ara, teleb ubuka unamlulume. Winibuka umunyopura, yuk nang eipsikirye, Allah el si weik arye erebikirye, elti, “Telebe,” nyanamake. Ninye mutuku-mutuku nirya arye, Allah el si erebikirye, ‘Weik mikip ululnye bira, Allah eluk,’ tenebuka, ‘Pia unamak’ tenen, Allah moronune. Akunuma.
Diba tenena kum nang arye, wininyak bukni, anggunda diba tenelulum ninye ara, Allah arye, ‘Na mapu kibikirye, diksukumuk unamak’ tenen, akunum wibuka deiamsuke. Tonda, ‘Na piluk dokirye, ninye ap, Allah ap, ansinilina deiyok nang unamak’ tenen, wibuka deiamsuke. Anggunda kunuknak noutam atonun, malye ulamluma noutam ulamlumbuk, Allah yukubsukce, dobuka teleb dirinak atonun delilbisuke. Winipsuka deiyok ara, ‘Allah el si erebuka, elti, telebe nyabuka, pia unamak’ tenen, dirinak delilbisuke.
Ara, yata ning do nirya, anggun pil donamlum ning nirya ap, yupu nyanamlum ning nirya ap, nun Deiyoknye Yesus Kristus, el amu tam ubuka, el si deiceuk pil donamlulume. Ara, elce tenesilye touk, diksukumuk wininamlulume. Winibuka wininamlum talak nirya ara, Yesus arye melisilyebuk, el ap, talima dukdongobuka umunya deice arye, nun ni Allah ati fia, “Telebe,” nyanamlulume.
Nyapsibuk, ninye yupu atonun yupu deice arye tuba tamubuka tonap nyapnuk. “Yahudi yala nang arye, ‘Nun arye, aning kum diptibye,’ nyalamik ning ara, Allah arye akunum teleb kipdeibuk ati ara, wini talak ara, ‘Anggun diptume,’ nyapmasila ati, ance aning ati, ‘Aning ara, Yahudi yala nang kum diptinge,’ nyaminya ara, bataklyame. Pia kum nyanamlyame,” nyapnuke.
“Anggun dipkoprop kele. Nun Israel nang nun mem yupu deice arye yuk-yuk mutuku ninye, ara, Yahudi yala kum ninye ara, ‘Sik pia malye ninye,’ tenenyaba ati, neika una ap, uruna una ap kum unyabe. Winibuka unyaba anya arye, anda Kornelius Yunani yalanye ulyame ati ara, an aik min yanuka kum wektinye tenepse. Aning tenepse bukni, Allah arye winiryuk nyapdeipmanil yupu deice arye na kel kipse. Ara, yata yala nang do nirya, ‘Sik nininga atonun, malye unyake,’ kum nyaptinye.
Nyabukura, ninye yupu atonun arye tuba tamubuka tonap, nyabuk. “Yahudi yala nang arye, ‘Nun aning kum diptibye,’ nyalamik ning ara, Allah arye akunum teleb kipdeipmalce, ‘Wini talak ara, anggun diptume,’ nyapmasila ati, ance aning ati, ara, ‘Aning ara, Yahudi yala nang kum diptinge aning ara, mem ning,’ nyaminya ara, bataklyame. Pia kum nyanamlyame,” nyabuk.
Anggun Israel ninye arye, na si ati, ‘Elda mambul kume,’ tenenululum bukni, yuk pera mutuku ninye, im sirya, mutuku sirya nirya unyak ninye arye, natibuk ‘Se, Allah ara, mambul weiknye’ tenen, sikce nati si pia erekirye, nati kininyake. Ara, beren tam talak arye dipdongobuka, lukunyan noutamak babye, nati kibuka si ereninanyake. Wininyaka ara, dan mutuku do nirya, ninye mutuku-mutuku nirya arye, na si erena ati, nintong teleb ning, uku dongobikirye, si erenyake. Tonda, sik malye winin ning kilina ati, kam ning pia teleb ninguk, obuka arelyanganinyake. Na Allah Yahweh aning-aning nirya talibuka, im deice yin talin malaikat, sik deiyok ununye birye nyapsine.
Ati ara, na Allah Yahweh arye, sik Pilistin mutuku unyak nang ati, yu arye wenepnyopura, sikda ilil pia weik unamle. Tukwak mutuku, im sirya, mutuku sirya nirya, noutam unyak nang arye, talye isa ati, ‘Nun ni koproba,’ nyabuka, si erenyak talye ning ap, isa-isa nirya ara, na Allah arye obuka, sirya daknirye, malye kiplopnamne. Winipnyopura, tukwak mutuku sirya, im sirya nirya, weik laut kup-kup unyak nang ap, laut mekwen noutam arye, antanap dongobuk mitik mutuku, pulau-pulau deice unyak nang nirya ara, Allah Yahweh dam ngangkanudongobikirye, kutam tuku dipdongobuka, na Allah ati, si erenamniake. Ara, sik nirya, mutuku yuk-yuk daunyak touk, sik talibuka unyak mutuku noutam aryuk, na Allah siuk, erenamniake.
Bukni, Sion mutuku kon unamak nang kan-kan noutam ara, ninye mitik tonun, ton lyepdopnamne ati, ton tam nang ara, kam tuba unamake. Tonda, Sion mutuku ara, ‘Naʼ tenen, pia teleb lek mutuku unamle. Winiplyeura, Yakub birye deibukba, dadeipdanin yangalamik nang, sik mal olan nang arye, amutuku alubuka dobukabikce, anang yakuka dopkwetebikba, bindobik bukni, aminyan talak ara, Yakub el tam nang arye, sik apu yapu yakuka, dopkwetebik nang, sik Edom tam nang ati, tamubuka yaknamake. Winibikceura, amutuku batakuka bindopnamake. Winibikceura, Yakub el tam nang, sik mapu koproba arye, sik apu yapu taleamik mutuku, amutuku uk, tamubuka yanuka talibikirye, pia asukumuk unamake.
An oldan ninye ati, obuka bisipnalam talak ara, ance talilyamba, an amu tam unyak ninye nirya ara, sik kanye teniltona kum diparyuk, an dam yakirye, an ap, sik ap, neika ansinibuka, yuk mutuku ninye ati, olbinamlume. Winipmanto ara, lukunyan talak kurya dei sakuka, mutmuta deice palilamle atonun, asum-asum nirya, an amu tam unyak yin talin kam nang arye, ‘Nun ni ap, neika malye nang ati olbinamap’ tenen, an damak tuba-tuba yanganamake. Na Allah arye melisinirye, an amu tam, yin talin nang ap, an ap mikip kipdeipsiniba, an oldan ninye ati, mal olbinamlume.
Winibikopura, Salomo birye tenyamuk touk laka nyabukura, el pil melin nang arye, emas arye takubarye meja ton kintinip deibik. Ameja nirya delina ati, meja takubarye dobuka, Allah si eren aik pum tam deibik. Ameja deibik ning ara yuk-yuk bokuka, pamubarye ara, iknapye tam, arah selatan deibik. Ton pamubarye meja ara, dabu tam, arah utara deibik. Tonda mitik mek makau el si mangkok ara, yupa weik seratus (100) kintinip deibik. Aning ara, emas arye kintinip deibik.
Ura, acang karpu talibuka, tup ning yupman makau pum bisik dolkwetelamikce, karpu takce arye, potokdongopbuka dololamikce, Allah el aik pil dona deiyoknye ati arelamik. Ara, ‘Pia teleb ninguk dopropnuyap,’ tenena kum bukni, lukuka dopropne ninguk ara, dololamikce, Allah el aik pil dona deiyok nang ati, arelalamikba, sik dilamik. Yata nang do nirya, sik Israel ninye arye, ‘Allah si erena ati arepnuyabe,’ tenelamikce, Silo mutuku yangalamik nang nirya babye, aning atonun winilamik.
Tonda, ameja deice deipnamlum din delina piring ap, mek kwen makau cangkir ap, cang mek makau kendi ap, tonda mangkok ap, nirya memepnamlume. Aning nirya memena ara, urasin teleb dekna weik ning, emas arye memepdeipnamlume. Amemepdeipnamlum ning nirya ara, na si erena ati, anggur mek arebikiba, kwebuka dina ati, kintinipnamlume. Ati ara, ameja deice deipnamlum ning nirya ara, dekna weik kat ning emas, pia teleb ning aryuk memepdeipnamlume.
Se, Yerusalem mutuku ululum Israel ninyeo, kanye moubuka tenena kumce mapmaluma ara buklulume. Ninye arye teleb baju ongobuka balamak touk, anggun talima noutam mikip upsiliba unamlume. Winipmunce, ‘Pia kanye deibuka unamap’ tenen, kwerya teleb baju uk ongopmunce unamlume. Na Allah arye, ‘Amutuku noutam ara, na si ara amutuku deice deipniba, ‘Naʼ tenen, mutuku unamnil’ tenen, wipdeiamse mutuku, Yerusalem ati nyapne. Narye kum wipdeiamsa ati, sik den bol mouse kum sekenyak ninye ara, malye wininyak deice arye na dam kum yatinge. Aninye aning-aning nirya ara, na Allah ati diba kum tenenyak ninye ara, Yerusalem mutuku domik poka bublan noutam ara, tuba tonap pia kum wekenamake.
Winibikirye, amutuku lyu nirya dana-dana tam nirya ara, na Allah Yahweh ati, lipsisikuka dobikirye, na si erena ati arepnamniake. Amutuku nirya ara, ‘Naʼ tenen mutuku,’ ati, pia talinamne. Ara, wini talak ara, uku dilamlye atu yamul balamakak ap, dipmakce ninye, sik nong weilbanyak sukum ap, kintinip deibikirye, anirye dipdongobuka, otam ulul yini mutuku ap, weik lyuak, el si Kidron mek lilun ap, tonda keting yangan tam dipdongobuka, cang keil poka, bublan bisik botopdeibikce, abublan si, Kuda Basam Bublan nyabik bublan dam nirya ara, lipsisikuka dobikiba, ‘Amutuku nirya ara, na ning uka,’ nyabuka talinamne. Yerusalem mutuku weik asik nirya akunum lipsisikuka dobikcopura, pia tonap kum ulupnamake. Yuk ninye arye, amutuku tuba tamubuka, tonap malya kum kipnamake. Na aryuk taliniba, pia aunamle,” Allah arye nyabuk.
Israel yala nang nirya, sik mutuku noutam, tuku nirya yuk-yuk bokuka arepmunyeba, doprobikirye, atuku talibuka unamaka ati, kanam kum bokaminye talak ara, min talak adiparyuk, na Allah Yahweh ati, yuk tuku ton bokuka, kintinip deipnamnilyame. Ara, atuku el cang ara, 12,5 kilometer nukuka wipnalyame. Aning atonun, atuku el pala ara, 10 kilometer nukuka wipnalyame. Atuku ara, winibuka kintinip deipnamlumak nirya ara, na Allah Yahweh, na babye tenen ning wininamla ati, atuku ara, pia teleb lek mutuku ulamlule.
Nara, Allah Yahweh arye nyapsine. Nara, tuba tamubuka, Sion mutuku uk, yanamne. Ara, nara weik asik domikak, Yerusalem mutuku noutamuk unamnarya! Ninye nirya arye, amutuku ati, ‘Se, sik Yerusalem mutuku unyak nang arye, Allah ati, pia diba tenebikirye, el tibuk talibuka ukirye, el siuk erenyake,’ nyanamake. Tonda, na Allah Yahweh, im deice yin talen malaikat nirya ara, sik weik deiyoknye unune. Na mutuku koproba ara, Sion mutuku ati, ninye nirya arye, ‘E, amutuku ara, dipkoprob pia teleb lek mutuku ulule,’ nyanamake. Nara Allah Yahweh, amutuku noutam yanirye, amutuku pia unamne.
Piblisite