Yuk mutuku yu nang arye, ‘Yerusalem mutuku yanuka olbinuyap,’ tenepnamak talak ara, sik Yehuda noutam unyak yala nang nirya ara, mikip weik arepnamne. Ara, winipmanto ning ara, uku sekna ati, asing tilibikceura, ‘Uku seknamakʼ tenen, yo bobuka, uku sekikceba, uku minopce dilamle atonun, sik Yehuda tam nang babye, sik dam winibuka deipnamne. Winipmanto ning ton, ninye arye upna ubikirye, gandum kouamikca eipnukca ati, uku minopce balamak touk, Yudea tam nang ati, winipdeipnamne. Winipnamne talak ara, sik Yudea tam nang nirya arye, sik dana-dana mutuku sirya, im sirya nirya daunyak nang ara, ‘Opnamabʼ tenen, yakceura, Yudea tam nang arye anang nirya obuka, kum kipdeipnamake. Ara, sirik tam bisik yanamak nang babye, kwanim tam bisik yanamak nang babye, sik nirya obuka, sirya daknamake. Bukni, sik Yerusalem mutuku arye weik asik domika nirya, yu nang arye obikceba, asik oldem upnamle bukni, atalak ara, sik Yehuda yala nang ara, tamubuka tonap, amutuku noutamuk unamake. Asukumuk sikda namin arye dakeiam asa, teleb deice aryuk unamake.
Zakaria 14:10 - Eipomek10 Wini talak ara, amutuku noutam arye, mutuku kon ap, lu mutuku ap ansinibuka aubuk bukni, aminyan talak ara, amutuku nirya weik lu kipdeipnamle. Ara Geba mutuku noutam bukni, dabu tam, utara mutuku asukum dipdongobuka, Rimon mutuku iknapye dam, eitam mutuku nirya ara, weik pala lu mutuku uk kipdeipnamle. Winibuka deipnamle bukni, Yerusalem weik asik upnamlak ara, mutuku kon deice uk pia aupnamle. Ara, Allah arye amutuku weik erebuka deiplyeba, tonok mutuku kon deice uk tuba aupnamle. Amutuku noutam el pala ara, ani. Ara, Yerusalem weik asik dana-dana antanap dongobuka, domik keil poka noutam bukni, wekelyangan bisik botopdeiamik bublan, el si ara, Benyamin yala nang wekelban ati bublan bisik, weik pala bisik bublan dam arye dipdongobuka binamlya ani, minop talak botopdeiamik weik pala bisik bublan, asukum dipdongobuka binamlya ani, akeil poka domikak ara, el si ‘Minop Wekelban Bisik Bublanʼ, asukum dipdongobuka binamlya ani, minop talak domik cang keil aik el si ara, Menara Hananel, anoutam arye dipdongobuka binamlya ani, Israel nang taleamuknye, ninye deiyoknye Raja arye, el anggur duk mek kintinip deiamukce, anggur duk purulamukak binuka dipnamle. Ati, weik pala lu mutuku kwepdeipnamle ning ara, pala weik upnamle. Gade chapit la |
Zakaria 14:10
28 Referans Kwoze
Bukni, Benyamin yala nang ulamik asik dam, bublan wekelbalamik bisik dam biyukba, abublan kaliklamuk yin talinanye birye, Yeremia tomobukce, ayupu nyabuk. “Kume, na kele, anda, ‘Babel nang, sik tam kipropnamne,’ teneplumce, sik mutuku banmalam atia,” nyabuk. Ayupu nyabuknye bira, el si ara, Yeria. El li koprop el si ara, Selemya. Selemya el li koproba si ara, Hananya ulamuk. Ayin talinanye Yeria birye, nabi Yeremia biti, asipdeyuk.
Nyabukopura, Allah Yahweh arye, ayupu tonap yanuka, yupu nyapdeibuk. “Narye anggun Israel nang ati, pia bico tenesunune. Ati ara, narye anggun unamlum mutuku ara, tamubuka arepsinirye, teleb kipdeipnamsine. Yerusalem weik asik domik ning ara, yu nang arye ulubuka, sice buklobik bukni, na pil donamna deice arye, anyasik ara, tuba tamubuka, el mutuku kon deice deibikirye, tamubuka moupdeipnamake. Tonda, amutuku Raja ulamuk teleb weik aik ara, el si istana babye, uluplobik bukni, anyaik babye lipsisikuka teleb kipdeipnamake. Tonda, ‘Anyaik asukumuk, pia aunamle tenyamsakuk, lipsisikuka dopnamakca.
Aning akunum winibukopura, Raja Asa birye, “Rama mutuku bimunce, winipnamlume,” nyaibukba, elce taleamuk ninye, Yehuda tam ulamik ninye nirya ara, tonoknye babye, ton kum batakuk. Sik aninye nirya, Rama mutuku biyikce, Israel tam Raja Baesa birye, ‘Rama mutuku mikip kipdeipnamneʼ tenen, aik don ning nirya deiamuk ning ara, Asa taleamuk ninye, sikce aning nirya binuka doprobik. Ara, ‘Rama mutuku kum malye kiptingʼ tenen, mikip kilina ati, keil ap, yo ap dobuka, deiamuk ning nirya ara, dobukabikce, bobiyik. Abobiyik ning nirya ara, Raja Asa birye dobuka, sik Benyamin yala ninye mutuku, ara Mispa ap, Geba ap, ‘Amutuku bitinye ara, nun oldan nang arye, kum malye kiptingʼ tenen, binuka mikip kipdeibuk.
Yayukopura, min yuma talak yanmok malaikat arye, aminyan yanmok malaikat ati, nyabuk. “An adiparyuk, kiklilen tapu bopmal welnye dam bimince, nyapnulyame. Ara ani, “Kota Yerusalem mutuku noutam nirya ap, akota dana-dana tam ap ara, ninye pia weik tonun langdipnamle. Tonda, sik amutuku unamak nang arye, talibuka weinamak kam ulamle ning nirya arye, amutuku noutam upnamle tuku nirya ara, langdiplirye lipnamle. Ati, amutuku noutam upnamle tuku ara, keil poka antanap dongobuka, weik keil tembok pia kum doptinge. Pala weik mutuku kipmnamla ati, nyapne.
Atalak ara, ninye tonok el si ara, Ebet-Melek, Etiopia mutukunye, elda ninye deiyoknye, Raja el aik melibuka pil dolamuk. Winilamuka anya arye, kekenmokba, yuk nang arye, “Yeremia bira, sumur lukamik pum bisik akunum dopkwetepmake,” nyabikura, kekebukce, el adiparyuk, ninye deiyoknye unmokak nyalbiyuk. Ninye deiyoknye Raja ara, Benyamin yala nang arye, bublan botopdeibuke nyalamik bublan dam, binuka bukmokba, anye birye, Raja binyak nyalbiyuk.
Ura aning ara, Yerusalem mutuku domik poka, ‘Yata wiryamukba, tuba tabakuka domik do?’ tenena ati, lak nyapsine. Allah el si eren aik pum tam pil dona weik deiyoknye, Imam Elyasib ap, el kwit capu, yuk imam nang nirya ap arye, akeil poka tabakuka dolamik talak ara, domba basam bobuka wekelbalimik bisik bublan ara, tuba tabakuka dobik. Ara, ‘Allah el si erena atibuk dopnamabe,’ tenebuka dobik. Tonda acang keil poka tuba tabakuka domik keil poka deice arye, mitik cang aik ton domikce, anyaik pum tam kalikin nang tiklamikce, kalikuka dilamik. Anyaik cang, el si ara, “Anyaik Seratus Cang Aik,” nyabuka si domik. Seratus Aik dam arye, dib dongobuka otam domik aik, el si ara Menara Hananel Aik dam ara, apoka noutam nirya ara, Allah ati kintinibuka arebik.
Bukni, sik Benyamin yala nanguk bukni, sik yupa noutam arye, ton nang bokukabikce, kata mutuku tam arye bikbik abuka binmeka ani, keil kon mutuku ara Rimon mutuku tam kibuka yayik yin nang yupa ara, yupa mitik weik, enam ratus (600) dukunubuka biyik. Sikce Rimon mutuku biyikopura, amutuku noutam aryuk daulamik. Ara, wala yupa dumbarye deice arye, amutuku binuka dukunubuka ulamik.
Winibikopura, Benyamin yala nang sik yin talin nang yuk nang nirya ara, ‘Bikbik abuka bibirye, lyepdanuyapʼ tenen, tamubuka bikbik abuka, kata mutuku tam arye kipdomika ani, keil kon mutuku dinibuka, Rimon nyalamik mutuku tam arye kibuka biyik. Tonda, sik kayapu nang bukni, lima ribu (5.000) nang ton bokuka, weik bisik noutam arye obik. Tuba kam unmek nang nirya ara, pia dobolbanauk unmeka ani, otam uamuk mutuku, Gibeon mutuku dam binuka, Israel nang arye, sik Benyamin yala nang adobolbanmek nanguk, ton ap dua ribu (2.000) yin nang obuka sirya dakik.
Allah arye nyabuk. “Na tenepse talak akunum uplyopura, Daud el taruk deice arye taleamuk ninye ap, taleamuk ning ap, taleamuk mutuku ap ara, narye tuba tamubuka, teleb kipdeipnamne. Winipmanto ara, Daud el domuk aik, abilinga nirya pun dayukce, daksakuk ning ara, tuba tamubuka punupnirye, dukdongopnirye, dobukapnirye, teleb kipdeipnamne. Wini talak ara, amutuku noutam aik ap, keil poka ap, aning nirya domik ning ara, yuk mutuku nang arye yanuka, ulubuka bataknamake. Winipnamak bukni, aminyan talak ara, na Allah arye, cang keil poka domik ning ap, sik aik ap, aning-aning nirya, pia teleb uamuk touk, tonap tuba tamubuka, teleb kipdeipnamne. Winipniba, minop talak, pia teleb uamuk touk unamle.
Asyur mutuku yin nang ara, mutuku tam bisik arye kibuka yanganmek. Sikda, abisik kibuka yanganmekce, Geba mutuku yanuka, tiya talak mapmek. Mapmeka berekukopura, amutuku dam uamuk mutuku, Rama mutuku ulamik nang nirya ara, ilil unmok. Tonda, Raja Saul deiamuk nang arye taleamik mutuku, Gibea mutuku ulamik nang ara, ilil weik upmokba, sik nong nirya kouluksakmuk. Ilil weik upmuka ati, amutuku nang arye, bai sakuka, bikbik abuka bindobik.
Tonda, sirya daknamle talak ara, Allah el si erena ati, domik aik tuba aubuk mutuku deice ara, weik mambul mutuku unamle. Mutuku-mutuku nirya, weik mutuku aubuk bukni, amutuku tonok ara, weik mambul mutuku kipnamle. Yerusalem mutuku dana-dana tam bukuk mutuku ara, mitik mambul bukni, amutuku tonok ara, weik mem mutuku erebuka tiknamle. Winibuka tiklyopura, mutuku dana-dana unyak ninye, ayala-ayala nang yupa weik tonun, bulubuka amutuku dilyanamake.
Winibuka pia bana uk unmapurye, Efraim yala ninye sik bisik bublan kirikuburye, minop talak domik bisik bublan dam biburye, mekwen pum bal ikan bublan dam beipu. Abiburye, weik cang ning, el si Menara Hananael ap, tonda Menara Seratus nyabuka domika dam biburye, domba bobuka wekelbalamik bisik bublan dam beipu. Winibupu ura, nunce deiyok koubuka banmapu nang yupa nirya ara, Allah el si eren aik wekelban bisik bublan kalikna deiyok nang, sik aik dam sukumuk binuka deibupu.
Winibikura, Raja Yoas birye, Yudea tam taleamuknye, Raja Amazia tomobukce, Yerusalem mutuku tamubuka boyayuk. Ara, Amazia, el li koprop Yoas ulamuk. Tonda el apu koproba ara, Yoahas ulamuk. Israel tam taleamuknye, Raja Yoas birye, Amazia tomobukce, Yerusalem mutuku tamubuka bobiyuk talak ara, Yerusalem weik asik dana-dana tam, cang weik keil poka arye dobuka antanapdongamik ning ara, seratus delapan puluh (180) meter anyak dakuka bataklobuk. Akeil poka dona ati deiyok koubika ara, “Efraim yala nang, sik wekelban bublan ani,” nyabuka, botopdeiamikak arye dipdongobuka, dabinamuka ani, sirya tam ara, atam poka, otam poka dukdongamik ning, el si ara, “Sudut bublan,” nyalamikak, botopdeiamik sukum binuka batakuk.
Ura Lewi birye deiamukba, dadeipdanin yangalamik nang arye, Merari deibik. Anye Merari birye deibukba, dadeipdanin yangalamik nang, sik unamik mutuku ara, min kum doprobik nang ara, mitik-mitik asik dolamik mutuku ap, teleb maning palamuk mutuku ap, bokuka arebikura, Merari yala nang doprobikce, sikda amutuku noutam ulamik. Anang ati tuku arebik yala nang ara, sik Zebulon yala nang arye arebik. Amutuku si ara ani. Rimono asik dam ning ap, Tabor asik dam ning ap arebikura, sik Merari yala nang arye doprobik.
Aning akunum winibikopura, sik Israel yala nang, amutuku noutam ulamik nang, wibukabikce dopdeibikba, Benyamin yala nang ara, keil si uamuk mutuku bukni, amutuku si ara Rimon nyalamik mutuku noutam ulamik Benyamin yala nang, sik dam binuka, “Amapo, nun Israel nang ap, anggun amutuku noutam tuba kam ululum Benyamin yala nang ap, ansinibibirye, teleb kanye bopdabirye, mal olana pia kum, teleb ubuka neika unamabe,” nyabuka, nyalin yupu deice arye nyabik.
Aning atouk, Benyamin yala nang arye, talibuka ulamik mutuku noutam arye, dumbarye mutuku taleamik ning dobuka, sik Lewi yala nang bukni, Kehat el tam nang ati, wilibuka arebik. Atalibuka ulamik mutuku si ara ani. Ara, Gibeon mutuku ap, Geba mutuku ap, tonda Almon mutuku ap, Ananot amutuku ap nirya ara, bokuka sik kayapu nang ati arebik. Anoutam domba basam ap, sapi basam ap weilamik mutuku ton arebik.
Atalak ara, Raja Yoas birye, mutuku si Bet-Semes mutuku binuka, Raja Amazia tomobuk. Winibukopura, Yoas ap, el yin talen nang, adiparyuk Yerusalem mutuku aweik asik dam biyikce, amutuku ninye dana-dana tam, antanap dongobuka, cang weik poka domik ning ara, dua ratus (200) meter binuka, dakikce uluplobik. Yoas ap, el asik ninye ap arye, cang keil poka uluplobik ning ara, “Efraim yala ninye, sik wekelbana ati bublan ara ani,” nyabuka, botopdeiamikak arye dipdongobuka, binameka ani, poka wiamik tam arye, sirik bublan botopdeiamikak, anoutam domik cang keil poka nirya ara, daklobik.
Pasyur ayupu akunum kekebukopura, Allah el yupu lak nyananye, nabi Yeremia biti, el taruk arye obuk. Obukce, ninye yuk nang ati, “Anggun adiparyuk, anye bira tomobuka tapu koupmunce, Benyamin yala nang, sik Allah pil dopnuca ati, Allah el si eren aik wekelbace aik, bisik bublan dam binuka, kirikdeipmunce, wenepnalume,” nyapdeibukba, Yeremia tomobikce, tapu koubuka, wenena aik dongobik.
Tonda, Raja Uzia birye, ‘Nun mal olan nang arye, pera karin mutuku arye yanuka opsicakʼ tenen ati, ‘Perato yanganmaca ninye babye, elinamapʼ tenen, Yerusalem mutuku mikip kilina ati ara, amutuku asik dobuka ulamik sukum, sirik tam botodeiamik bublan winilye dopdeibuk. Ton ning ara, el si ‘Pintu Gerbang Sudutʼ ap, keil poka dobuka antalongolamikak ap, tonda, bitinye ning ara, keting komulban tam, anyaik batakuka, bai tam noutam, dana tam dana tam bisik bana ati, boteiamik bublan ton dopdeibuk. Abublan el si, ‘Pintu Gerbang Lembahʼ, cang weik aik ton dobuk. Winilye ning ara, acang keil poka deice deiamika, kwalipdongamik tam, asukum arye ninye kalekina ati cang weikto aik doamike. Apoka deice, sik mal olan nang kalikna ati, dobuk keil aik ara, Yerusalem mutuku cang weik keil poka antanap dongobuka domikak deice tam, cang keil aik winilye dopdeibuk.
Aminyan doryanamle talak winipnamle ning ara, ani. Allah Yahweh el si eren aik domik mutuku ati, ninye mutuku-mutuku nirya arye, ‘Se, yuk mutuku ara, mitik mambul bukni, amutuku ara, weik mambul mutuku ulule,’ tenenamake. Allah el si eren aik domik mutuku erepdeipliba, yuk mutuku nirya ara, amutuku amu tam atonun unamle. Winipliba, im sirya, mutuku sirya nirya, daunyak ninye arye, amutuku uk, yanganamake. Amutuku yacopura, Allah el siuk erenamake.
Nara, Allah Yahweh arye nyapsine. Nara, tuba tamubuka, Sion mutuku uk, yanamne. Ara, nara weik asik domikak, Yerusalem mutuku noutamuk unamnarya! Ninye nirya arye, amutuku ati, ‘Se, sik Yerusalem mutuku unyak nang arye, Allah ati, pia diba tenebikirye, el tibuk talibuka ukirye, el siuk erenyake,’ nyanamake. Tonda, na Allah Yahweh, im deice yin talen malaikat nirya ara, sik weik deiyoknye unune. Na mutuku koproba ara, Sion mutuku ati, ninye nirya arye, ‘E, amutuku ara, dipkoprob pia teleb lek mutuku ulule,’ nyanamake. Nara Allah Yahweh, amutuku noutam yanirye, amutuku pia unamne.