Tonda, na Allah arye nyapsine. “Ikin weik upsilye talak ara, anggunce nati, ‘Naio melibuka lyepropsilyame!’ nyabuka, moropnumunyeura, dipkoprob narye yanuka, lyepropnamsine. Akunum lyepsiminyeura, anggunce na si erebuka kina ati, “Nun ni Allah, pia teleb ulule,” nyabuka, yuk nang kekenak, lakak arye nyanamlume.
Zakaria 13:9 - Eipomek9 Winipnamne talak ara, ayupa winilye ara, tonok bokuka seper tiga, ‘Naʼ tenen deipnamne ning ara, lyebuka deipnamne. Sik alyebuka deipnamne nang ara, pia teleb lek nang kipdeipnamne. Winipnamne bukni, winina ati ara, ‘Teleb unamak do, kum do?’ tenen, ikin ning arye, anang nirya piripdenamne. Winipmanto ara, dekna weik kat ning, el si perak dobuka, ‘Malye ning kum uplyeba, teleb ninguk lak upnamleʼ tenen, uku dongobikceba, uku diplyopura, pia teleb ninguk lak ulule. Aning atonun, dekna weik kat ning emas ati, ‘Malye ning kum uplyeba, teleb ninguk tuba unamleʼ tenen, uku arye pirilelamle touk, sik anang babye, ‘Teleb wininamak do, kum do?’ tenen, piripdenamne. Winipnyeba, sik anang nirya arye, nati “Nun ni Allah melipsilyame,” nyabuka moronamake. Winikceura, narye sikti, tamubuka nyanamne. Narye sikti, tamubuka nyanamne yupu ara, ani. “Anggunda, na mapu koproba ululume,” nyapnamne. Winibuka nyapnyeba, sikce tamubuka nati, nyapnamniake. “An Allah Yahweh ara, nun ni Allah ulyama ati, an siuk erenamkiabe,” nyabuka, natibuk si erebuka kinamniake. Gade chapit la |
Zakaria 13:9
54 Referans Kwoze
Anggun moubuka tenipdelulume! ‘Na tenen nang telebuk unamakʼ tenen, anggun akunum lak kina ati, narye kanye imun weik ning areamsisiba, ikin weik ulamlume. Winipmanto ara, ninye arye, dekna teleb ning perak dobuka, uku dongobikiba, uku buk arye dinmalya ani, malye wamlye ning kum danin baliba, perak pia teleb ninguk uplyopura, aninguk wibuka delilamak touk, narye ikin ning anggun deice deibuka piripdesise. Winipse bukni, uku pum tam kum dongopsise, kanye imun ninguk arepsisirye, piripdesise.
Anye bira, el ikin ning doproplirye, kanye imun uplye talak nirya ara, elce, “Na ti melipnilyame,” nyabuka, moropnilyopura, na kekepnirye, elti, pia kalikuka melinamne. Tonda, anye bira, el ikin ning dololamlye ning ati, lyepnirye, el dobuka ereipnamne. El anye bira, erebuka deipnyopura, yuk ninye nirya arye, el tibuk, si erenamake.
“Yata kil do, yatanye do, malye un ning ap, malye winin ninye ap nirya ati, ‘Nun like’ tenen, malye kibikirye, nati kum batakicopura, dekna ning arenamne. Ara, ance elinmalam ning ap, narye nyapkinaba, kekenmalam ning nirya ap arepniba, nati kum bataklamnik ninye arye dolonamake. Na Allah arye aninye nirya ati talipniba, sikda na mapu kopropa unamake. Na siuk erenamniyake.”
“Ati, anggunce weik mek koubuka banamlum bukni, mek noutam banumunye talak babye, narye melipnamsina deice arye, amek optua babye, mek koubuka banmamunye talak arye, kum dopnamsile. Tonda, weik uku buk pakanmalyak banamlum bukni, uku buk noutam banmamunye talak babye, narye melipnamsina deice arye, auku weik arye diptua babye, uku noutam bamunyeba, auku arye kum dipnamsile. Atonun ton, yuk asilen ning nirya anggun dam yangasilya babye, malye kum kipnamsine.
Kanye imun ning uplirye, winilelye talak kum batakalirye, pia palibuka pil dolamlenye bira, kanye deibuka telebuk unamle. Ara winildena talak noutam nirya arye, ikin ning weik ulamlye bukni, elda pia darapdongobuka ulamlyopura, el dekna ning dopropnamle atia. Amenenga ning dopropnamle ara, Allah arye, “Na ti kanye deipnice nang ara, winibuka arepnamsine,” nyapdeibuk touk, pia kam una deiyok ning dopropnamle.
Na Allah arye, Yehuda yala nang ati, sik mikip kipdeipnirye, Israel yala ninye ara, lyepropnamne. Ara, Yusup birye deibukba, dadeipdanin yangalamik ninye ati nyapsine. Winipnirye, sik aninye nirya ara, na bico anya arye, yuk mutuku ninye arye malye kibikce, tapu koubuka, sik mutuku koproba bobinamik bukni, narye ‘Naʼ tenen, ninye nirya dobuka, yanirye sik ulamik mutuku uk, tamubuka bobinamne. Minop talak sik malye winilamik ning ati, aninye batakamse bukni, narye, “Sik lyepropnamsine,” nyabuka, nyalin yupu deice nyapdeiamse yupu ara, kum bataktinye. Ati wini talak ara, sik anang malye winilamik ning ati, namin kipnirye, lyelonamsine. Winipnyopura, anang ara, ‘Se yata ati batakamsuk do?’ tenen, imun ulamuk ning ati, teniltona kumce, luba kinamake. Na tenen ninye nirya melipnamna deiyok ara, na sik ni koproba Allah Yahweh uniba, sikce nati moropnicopura, narye melibuka lyelonamne.
Minop nyalilamsisi ning atonun kum bukni, aminyan talak noutamak arye, ninye ap na ap neika una ati, “Wininamlulume. Winipmunyopura, narye winibuka melinamsine,” nyabuka, anggun Israel ninye ati, nyalinamsin yupu ara ani. Ninye teleb una ati, “Wininamlulume,” nyasinye yupu ara, anggun kanye noutamak dongopnamsine. Dongopsinirye, anggun kanye talima noutamak sekeipnamsine. Nara, sik weik Ninye Deiyoknye Allah unyeba, na siuk erenamniyake. Sikda, na mapu unamake.
Bukni, Allah elda, na banun bisik nirya ap, tonda, na yanibuka banun sukum nirya ara, Allah el akunum bikilule. Allah arye nati, ‘Teleb upnamle do, malyeuk unamle do? Tonda, ‘Anye bira, el talima noutam ara, yata ulul do?’ tenen, dinulule. Akunum dipdenilyopura, pia teleb, diksukumuk unamne. Winipmanto ara, ninye arye dengna weik ning, el si emas ara, malye ning taplakamlyeba, aning nirya dobuka, uku dongobikceba, uku arye amalye ning nirya akunum dibuka sirya daklyopura, emas pia teleb ninguk memelamak touk, nati Allah arye dipdenilyopura, malye ning ton kum upmanilya ati, tuba kum eipnamle.
Bukni, sik malye winilamice ning ati, wenen ning akunum arepnyopura, aminyan talak, narye winiryuk nyalin yupu, sik Israel ninye dam nyapdeipnamne ning ara, atia. Minop talak narye, ‘Aning wininamlulume. Aning ara, kum wininamlume,’ nyabuka, yupu deice nyaiamse ning ara, aminyan talak ara, ayupu moubuka tenenyak, ninye ara, yuk-yuk sik talima noutamak deipniba, moubuka tenenamake. Minop talak ara, keil deice sekuka arepse bukni, aminyan talak ara, sik talima pum tam sekuka deipnamne. Winipnirye, nara sik ni koprop Allah unamne. Sikda, na mapu koprop pia aunamake.
Winipsinya deice arye, atalak-atalak nirya anggunce na moropnumunyopura, na Yahweh arye kekebuka melinamsine. Tonda anggun ikin weik upsilye talak, weik tonun malye nyabuka, anggunce nati, “Se na nio, melipsilyame,” nyapnumunyopura, kekepsinirye, ‘Na aunune,’ nyabuka melinamsine. Yuk nang arye, yuk nang ati, tapu koubuka delinyak ninye ati, ‘Anang ara, bico tenepmunce, lopdeipnamlum’ tenen, nyapsise touk, akunum winipmunyopura, teleb kipdeipnamsine. Tonda, ikin ning, anggun nong deice usilye ati, anggunda, ‘Deiyok el uka, anca,’ nyabuka, taruk kum pukulanamlulume. Aning atonun, anggun kayapu ati, yu upsiliba, anang ati, malye yupu nyabuka, lululina meme.
Ura, Daud birye deibukba, deipdanin yanganyak nang nirya ap, Yerusalem mutuku weik asik noutam unyak nang nirya ap ara, narye sikti, kanye talima namin una deiyok ning arepnamne. Ara, aning arepnyeura, sikce, ‘Seʼ tenen, bico tenebuka, talima lamapdongobuka unamake. Tonda, sikda talima erelana kum aryuk, nemalyap aryuk, na Allah ati, moronuk unamake. Winipnamsina deiyok ara ani. Ara, aminyan talak ara, sik tam nang arye, nati lukuka opnamniake. Aminyan talak ara, sikce lukuka opnikirye, anang nirya arye eipnamniake. Tonda, eipnikirye, ‘Se, bicoeʼ tenen, engepnamake. Nati, engenamniaka ara, sik mi tonok deiamikcak, ami diplyeba, ami ati weik arye engelamak touk, unamake. Tonda, sik anang nirya arye, engenamniaka ara, sik min yuma deiamikce mi tonok, diplyopura, atonok mi ati, engelamak touk, na eipnikirye, atonun weik arye engenamake.
Ninye arye talye tuku ap, keil ap palibuka doprobikirye, ‘Aning nirya noutamak ara, emas ap, perak ap, tabakuka aupmal do?’ tenen, weik uku dinmalyak dongobikiba, uku arye dinmalya ani, malye ning palilamlya ning nirya diplirye, kat ning pia teleb ning batakliba, emas ap, perak ap, nong uk lakak upliba dolonyake. Winilamaka deice, ninye arye emas ap, perak ap ara, uku deice arye, winilinyake. Bukni, ninye tukwak mutuku unyak ninye nirya, sik kanye talima noutamak ulul ning ara, Allah Yahweh arye asipdenamle. ‘Teleb ning ara ani, malye ning ara ani,’ teneplirye lakak uk deipnamsile.
Diba nun ni, aning-aning moropmakiap ning nirya ara, Allah ance, arepsiminyopura, aning yuk-yuk ning nirya dolonamap nang ara, pia teleb kilinamsilame. Ance melipsiminyeba, dopropnamap nang ara, dipkoprob pia kanye deibuka unamabe. Diba, yata yala nang do nirya, sikce Allah Yahweh anti, si erenyak nang ara, dipkoprob pia kil-kil kanye bobikirye, unamake. Yahweh ance talilyam nang nirya ara, dipkoprob kanye bobuka, pia telebuk unamake.
Bukni, atalak noutam ara, yatanye do nirya, Allah Yahweh el tibuk si erelirye, ‘Naio, na melibuka lyepnilyame,’ nyabukam morolulnye bira, Allah aryuk aninye nirya lyepnamle. Ara, urdem ati, kum nyapsine. Deiyok ara, minop talak arye, Allah Yahweh elce nyabuk touk, Sion mutuku ap, Yerusalem mutuku noutam ap ara, ton ninye lyepnamle. Kam tuba unamak ninye ara, Allah Yahweh elce wipdeiamuk ninye ati, nyapliba, kekebice ninyeuk, kam unamake. Yuk ninye ara, Allah arye oplopliba, dibikirye, sirya daknamake. Allah arye nyapdeibukba, nabi Yoel birye sekuk.
Aning nirya wininamna deiyok ara ani. Ara, sik anang ara, na Allah arye, “Aning ara wininamlume, aning ara pia kum wininamlume,” nyapdeipse yupu nirya ara, pia dobuka talibikirye, moubuka teninamake. Tonda, aninguk talibikirye, moubuka unamake. Winibuka, teleb kilisinyeba, diksukum ubicopura, sikda dipkoprob na mapu koproba unamake. Tonda, na Allah ara, anggun ni koproba, pia unamne. Sikda, na siuk erebuka unamake.
Min deiyok koubuk malaikat arye, el bopmok terompet pong-pong abuk deice arye, adiparyuk uku buk ap, ining ap, dekne dukduka puru ap, lakak ubukba, aning-aning nirya tabakuka bobukce, im deice arye tukwak mutuku mikip asa arye dopkwetebuk. Dopkwetebukba, tukwak mutuku sakuka deice arye, tukwak mutuku im sirya, mutuku sirya nirya bokuka winilye kibukce, bitinye ning batakuk bukni, tonok tam ning ara, uku dibuk deice arye kum dayuk. Aning atonun, yo kan-kan nirya bokuka, winilye deibuk bukni, yo kan-kan bitinye ning ara, batakuka tonok ning ara uku dibuk deice arye kum dayuk. Tukwak mutuku maning ap, mutmuta ap nirya ara, uku dibuka deice arye kum dayuk.
Malaikat bitinye anye birye, el terompet pong-pong abuk deice arye lelim lebukopura, weik mutuku kon atonun ning ara, weik uku dinmoka ani, laka kibuk. Winibukba, amutuku doprobukce, im deice arye tukwak mutuku laut mekwen noutamak, mikip asa arye dopkwetebukba, tukwak mutuku laut mekwen nirya bokuka winilye kibukura, bitinye tam batakuka, tonok tam ara ining mekwen dayuk.
Aning atonun, laut mekwen noutamak ulirye, balamle ning aning-aning nirya noutamak, yupa winilye bokeibuk bukni, yupa bitinye batakukba kam tuba ulamik bukni, tonok bokuka deibuk ning ara, adiparyuk dibik. Aning atonun laut mekwen deice banmek mek liya yo, el si ara kapal laut, nirya dobuka winilye bokukabukce, yupa bitinye batakuk bukni, tonok yupa kapal laut ara oplobukba, laut mekwen dibuka deice arye kum dayuk.
Malaikat winilinye birye, el terompet nyabuka deice lelim nyabukura, im noutam akuku buk weik arye dinmok kurya weik ning ara, tukwak mutuku balamuk mek ap, mek puak ap, adeice sakuk. Mek nirya aubuk bukni, winilye bokreibukce, bitinye ning batakuka telebuk ubuk bukni, bokuka tonok ning ara malye kipdeibuk.
Im noutamak arye sakuk kurya el si ara, Sikulula anya arye, tukwak mutuku balamuk mek ap, mek pu panalamukak ap nirya bukni, winilye bokreibukce, bitinye ning batakuka, tonok ning ara sik weik ubukba, kum dipmanto ubuk. Amek nirya sik pia weik ubukba, tukwak ninye amek kwebuka mangkau arye dipnarye, sik deice aryuk, dilamukba, tukwak mutuku ninye weika arye dipra balamik.
Malaikat dumbarinye birye, el terompet nyabuka deice lelim nyabukopura, adiparyuk keting ap, wala ap, kurya ap malye updeibukba, kunukuk. Ara keting ap, wala ap ara, nong tonok-tonok bukni, anoutamak bokukabukce, mitik tam kunukuk bukni, weik tam ara tuba teleb ubuk. Kurya ara, yupa weik uamuk bukni, winilye atonun bokukabukce, mitik tam kunukukce, weik tam ara, tuba teleb ubuk. Keting ap, wala ap, kurya ap bokuka, mitik tam kunukuka deice arye, keting noutam babye, lukunyan babye, mitik talak ara, dirin kum kibukce, pia kunukuk. Ton talak ara, dirin tuba ubuk.
“Yeremiao, nara Allah Yahweh unune. Sik Israel yala nang nirya arye, na si ereninyak Allah unune. Ance eipmalam ning ara, laka nyapnukine. Ara, an eipmalam kwarang duk, pia teleb ning ton, lipdeipmanunguba, eipmanilama ara, winipmanto ning ulule. Deiyok ara, ani. Ance, akwarang duk libuka deipmak, teleb ning ara eipnamlame. Aning atonun, narye lo arepsiba, sik Babel mutuku nang arye yanuka, Yehuda mutuku nang weik tonun tomobuka, sik mutuku akunum tamubuka bobinamike. Narye batakamsiba, aboyanamik nang ati, kanye deibikirye, ‘Sikda tuba teleb uka,’ tenenyake.
Aning atonun, anggun anang kan-kan nirya arye, na yupu ati, ‘Nun like. Aning kum winipnamabe,’ tenenyak nang ap, na yupu yanibikce yu nang nirya ara, sik ninye asik nang atonun unyak kan-kan arye wibuka, dopnirye, Israel nang unyak mutuku dam deipnamne. Sikce nati, ‘Nun lik,’ tenenyak nang ara, tiya talak ati, na dam deipnamne bukni, sik anang ara, Israel yala nang aminyan talak unamak mutuku noutam ara, pia kum binuka unamake. Anang ara, wenepnirye, yakdonoknamne. Winipnyeura, anggun tuba aunamlum Israel yala nang arye, nati, ‘Se, nun ni Allah ara, dipkoprob Yahweh ulule. Elda dipkoprob tonokaʼ tenen, biknamnulume.
Ura, atalak ara, sik kel weik bikuka unamak nang kan-kan, ton tam nang, malye nang arye anang ati, obikcopura dipnamake. Bukni, Allah elti, dipkoprob tenebikce, el tam nang unyaka ati, adipnamaka deice arye, Allah arye anang teleb kipdeipnamle. Allah arye anang ati, malye winina ning pia kum, pia teleb nang kibuka, telebuk kipdeipnamle. Tonda, sik malye nang arye, opnamak kel weik nang ara, Allah arye anang, sik minop talak malye ulamik ning nirya ara, namin kiplirye, pia kum kipdeipnamle. Sik malye nang arye, Allah el mapu opnamak bukni, Allah el tam nang unyaka ati, aning nirya ara, sik mikip kilina ap, ‘Telebuk wininamak do, kum do?’ tenen, asilena ap ati upnamle. Ikin ning yalyeba, asilen ning ara, aminyan sirya daknamle talakuk, Allah arye aning nirya kum kipdeiplirye, el tam nang, tamubuka teleb kipdeipnamle. Tonda, Allah arye, ‘Ikin weik unamle ning ap, aning-aning nirya, kum kipdeipnamak ning nirya ap ara, atalakuk, min kum kum winipnamle,’ akunum tenebuk. Aning-aning kum kipdeipnamle talak ara, kabula. Aning ara, minop talak Allah arye, ‘Atalakuk, aning nirya kum kipdeipnamnarya,’ tenen akunum kintinip deiamukce, tenyamuk touk winipnamle.
Ton tam nang weik tonun, sikti, ‘Lek teleb nang upnamakʼ tenen, ikin ning uplya deice arye, mingne kibuka, telebuk kipdeipdanamake. Sikda, pia teleb, lek diamuk upnamake. Bukni, yuk nang ara, sikda malye winin ninguk talibuka ukirye, malye ning talibuka wininamake. Ati ara, amalye winin ninguk wininamak nang ara, ayupu deiyok ning, moubuka kum bikinamake. Bukni, ‘Dibaʼ tenen, kel weik bikina deiyok ning kel bikamikirye, diksukumuk unyak nang ara, sikcuk, awininamle ning ara, ‘Deiyok aniʼ tenen, bikinamake.
Ayub birye, ayupu tamubuka nyabuk. Nun nirya akunum bikupu. Dengna weik ning, el si perak ara, aning tuku pum tam uplyeba, ‘Dopropnuyabʼ tenen, palinak aulule. Tonda, dengna weik ning, el si emas ara, tuku pum arye akunum palibikirye, ‘Emas ap, malye tuku ap, tabakuka ulye ning ara, ‘Malye ning kum kipdeipnamapʼ tenen, emas dobuka, uku dongonak ati, ninye arye kintinilinyake.
Narye na dopnamnilanye biti, weik tonun bico tenenirye, elti, na kanye delinune. El tonok ara, na ning ulule. Yuk nang ton pia kum patanulule. Aning atonun, na kanye delinunye birye, nati, weik tonun bico tenenilirye, nati kanye delilule. Ati, nara, el kil unune. Yuk kilapu nirya ara, pia kum patalule. Nun bitinye arye, pia bico tenelanauk unimirye, kanye delilanauk unyame. Winipmanto ara, domba basam weina deiyoknye birye, el domba basam bobalirye, urasin teleb kita, el si ara bunga bakung noutam deipliba, dinmakiba, eiplirye kanye delilamle touk, narye moun dinun nye birye, na si bam bol deice mutupnilye talak ara, pia kanye deibuka ulule.
Aning atonun, yuk nang ati, ikin ning, sik nong deice pia delinyake. Tonda, talye minin yupu deice arye, tilila yupu uk, pia nyanyake. Anang nirya arye, amalye winin ninguk, tuba-tuba wininyaka ati, anang nirya arye, na Allah Yahweh ati, ‘Elda, dipkoprob nun ni koproba Allah ulule,’ kum nyakirye, nati moubuka kum bikininyake.
Aning nirya ara, winipnamne deice arye, sik Israel yala nang nirya ara, tuba tonap, na dam arye kisikdakuka, yukak ton pia kum binamake. Winibuka, narye, “Aning ara, wininamlume. Aning ara, pia kum wininamlume,” nyapdeipse yupu ati, ton kum yanipnamake. Winibikirye, tuba malye weik kum wininamaka ati, na sik dam arye kisikdakuka, yukak kum binamne. Sikda telebukceura, narye anggunti, ‘Sikda, telebuk unyakak ati, tuba tonap, na dam yatinge,’ tenenamne. Malye winin ning ton bindobuka, kum unamake. Ati ara, sik Israel nang ara, na mapu koproba unamake. Sikda winikceura, na, anggun ni koproba Allah unamne. Nara Allah Yahweh, pia deice tam erebuka unirye, aning-aning nirya talibuka, Pia Mikip Weik Deiyoknye birye nyapsine.
Piblisite