Zaitun mutuku deice unmek talak ara, Yesus arye el mapu 12 nang ati nyabuk. “Anggunce nati diba tenepmanulum bukni, ninye weika arye lyebuka, anggun talima talinamlanye, Mesiasnye bira, ‘Yesus ara, anye ulul do, kum do?’ tenen, kanye boktopsilyopura, ilil ati, na batakuka bik-bik abuka bindopnamlume. Allah yupu laka nyalamuknye, nabi Zakaria arye sekamuk domon yupu ani. ‘Na Allah arye domba weina deiyoknye opnamne. Opnyopura, el batakuka el domba nirya bai sakuka bindopnamak.’ (Zakaria 13:7) Ati, nabi Zakaria arye nyalilamuk touk, anggunce nati winipnamnulume.
Zakaria 13:7 - Eipomek7 Allah arye nyabuk. “Se yu parango, anda bukminyak arye, domba basam weilula deiyoknye ulye touk, Allah na mapu ati, melibuka bobalula deiyoknye bira, na ap neika pil donimnye bukni, an parang arye olbinulyame. Binuka opminyeura, adomba atonun nang, na mapu nirya ara, bai sakikcak arye, mutuku yuk-yuk bibik abuka, bindopnamake. Winipnamak talak ara, na mapu koproba, sik Israel nang nirya ati, wenebuka opnamne. Gade chapit la |
Zakaria 13:7
76 Referans Kwoze
Zaitun mutuku deice unmek talak ara, Yesus arye el mapu 12 nang ati nyabuk. Anggunce nati dib tenepmanulum bukni, ‘Malye nang arye opnamap’ tenen, tapu koubuka bobinikcopura, anggun nirya arye, ‘Se ninye nirya lyebuka talinamlanye, Mesias bira, Yesus dipkoprop ulul do, kum do?’ tenen, kanye boktopsilirye, na batakuka bindopnamnulume. Allah yupu laka nyalamuknye, nabi Zakaria arye, ‘Winipnamake’ nyabuka sekamuk touk winipnamnuluma ati, elce sekamuk yupu nyapnusine. Zakaria arye nyalamuk domon yupu ara, ani. ‘Na Allah arye domba weina deiyoknye opnamne. Opnyopura, el domba nirya buru sakuka bindopnamake.’ (Zakaria 13:7)
Tonda ninye tonok basam weina deiyoknye birye, el domba basam nirya bulubuka tonokak delilamle touk, Allah el mapu sirika nirya ara bulubuka telebak deipnamsile. Tonda, domba weina deiyoknye birye, domba basam mapu bico tenen, iribuka bobalamle touk, Allah arye el mapu koproba dobuka iribuka bobinamsile. Tonda domba basam mapu nirya sik nin birye, ‘Na mapu na dam nimalyap asa yanamal’ tenen, ‘Yalulume,’ nyapnin balibuk, sik nin yupu kekebuka balamak touk, Allah arye el mapu koproba ati atonun wininamle.
Bukni, aminyan yanamle talak noutamak ara, malye nang arye anggun nong deice ikin ning deipsicopura, anggun nirya na batakuka, yuk-yuk bindopnamnulume. Nati, bataknumunce, anggun aik ap, anggun mutuku koprop ap, batakuka yuk-yuk benamlume. Ilil ati, anggun nirya arye na batakuka, yukak bindopmunyopura, na yuk unamne. Na ni Allah ap, na ap neika tuba unyama anya arye, dipkoprop na yuk kum unune.
Tonda, na pil donanye Daud el yalanye wibuka deipnebuk, sik nirya talibuka ninye deiyoknye unamle. Winipmanto ara, domba basam weik unyak bukni, sik domba weina deiyoknye tonok ulirye, el domba nirya tonok kibuka deiplirye, teleb ubuka weilamle atonun, Israel ninye ayala-ayala nirya ara, sik deiyoknye tonok dem unamle. Elce Israel ninye nirya talinamle talak ara, sikce teleb un ninguk wininamake. Ara, na Allah arye, ‘Aning ara wininamlume, aning ara kum wininamlulume,’ nyapdeiamse ninguk talibuka unamake. Na yupu nirya moubuka kekenamake.
Nara, nabi Zakaria, sik domba basam dekenyak nang arye dekna arepnikiba, domba basam opnamak ning nirya ara, naryuk weinamne. Ati ara, na kama ara bitinye akunum bopmane. Tonok kama ara, narye si dopse ning ara, ‘Bicoe tenepnirye melipnamne,’ nyabuka, si dopse. Tonda, kama bitinye talipse ning ara, el si ati, “Tonok kanye dukdongobuka un ning,’ nyabuka, si dopse. Aning nirya akunum winipsopura, adiparyuk deiyok koubuka, adomba basam kalikuka wein pil talibuka dopmase.
Allah arye ayupu ton nyabuk. Ati anggun Israel ninye ara, Allah el si Yahweh arye namin kipsiliba, anggun mal olan nang arye, tapu koubuka bobisicopura, ikin pil aryuk unamsiyak bukni, anggun ni koproba Allah tenebuk talak akunum dam uplyopura, lyepnamsile. Ara, Israel ninye kan-kan arye, Allah elcuk wel kil tonok wipdeipliba, mi bomlya ani, aminyan talak el mi deipnamle. Tonda, akam kil arye, el mi akunum deiplyopura, el kayapu Israel yala nang, sik wenena ati, yuk pera mutuku ninye arye, tapu koubuka bobinamik mutuku noutam unyak ninye, ninye yupa weik ning nirya ara, Allah arye lyebuka doproplirye, ila tamubuka sik min arye ulamik mutuku uk, yanuka deipliba, tonok kanye bobuka, teleb kibuka unamake.
Aning-aning deice tam unirye, weik mikipnye unune. Nara, pia weik Ninye Deiyoknye Allah arye nyapsine. Aning-aning min kum uamuk talak ara, na akunum ulamse ati, na si ton, Alpa nyaninyake. Tonda, aning-aning nirya akunum kum uplyopura, nara pia kam unamne ati, na si ton Omega nyaninyake. Nara, minop talak ulamsa ani, anoutam talak unirye, aminyan doyanamle sirya talak ara, yanamne. Na Allah arye nyapsine.
Ati sik Pilistin nang weik yupu deice arye ngalukuka nyanamake. Ara, “Se, Allah Yahweh an mikip weik deice arye, an yu parang atonun unyak nang, nun ninye ona nang ara, parang ya bobuka, olyanamsiaka ara, dankaren ton, tuba olyanamsiak do? Dan talak arye, anang ati, ance, ‘Winida bataklulume,’ nyapnalam do? Winipmanto ara, yin talin nang arye, sik yu parang ara, el lin aling pum noutamuk moubuka lipdongobikirye, talye kanye bobuka bulamak touk, an babye, dan talak arye nyapnamsilam do? Ance nun olyanamsiak nang ati, “Anggun batakuka! Bindoplulume!” nyaptumopura, sikda bindopnamake. Winiptumopura, nun babye, talye tunim abuka unamtibye.
‘Malye un ninye ara, ansinibuka Allah ap, talima dukdongobuka unamak’ tenen, pia diksukum unanye, Yesus Kristus arye, nun malye un ninye dekna ati, like tonok talak aryuk dibuk. Yesus ara, ninye nong atonun dayukce ulamuka ani, obikopura dipmok bukni, dibukura, Allah El Dib Kanye mikip deice arye, Yesus ati tuba tamubuka kam bukeibuk.
Allah arye, ‘Ninye nirya, olana kum arye, teleb kanye bobuka, yuk ninye ap, neika teleb unamak’ tenen, teleb una ati deiyok ning arisululnye ulula anya arye, elcuk melisilyeba, yuk ninye ap teleb ubuka neika unamabe. Allah arye, “Na ap, ninye ap, teleb ubuka neika unamabe,” nyabuka nyalilamsuk yupu, ninye lyena yupu ara, Yesus el ining biyuka deice arye, sirya dakuka ansinipdeipsuke. Yesus obikba dibuk bukni, Allah arye Yesus tamubuka kam bukdeibukba, Yesus ara, kam tuba ulule. Allah arye nun lyena ati, nyalilamsuk yupu ara, kume kum danamle. Aning ara, pia aunamle. Winipmanto ara, sik domba weina deiyok nang arye, sik domba ati, teleb-teleb kibuka weilamak touk, Yesus arye nun diba tenenyap ninye ati, pia teleb kibuka melibuka kalikisulule.
Ara, Allah arye nun lyena ap, yok pununa ap ati, malye winin ning tonok ning babye kum ulamukce, pia diksukum ululnye Yesus ara, Allah arye dobuka, tukwak ninye nun malye winin ning nirya el nong deice deibukba, nun malye ning nirya dobuka kum kipdeipsuke. Ara, nun malye winin ning pununa ati, winipsuke. Winibuka deiyok ara ani. Allah arye utenyamuk, ‘Tukwak ninye nirya, malye winin nang unyak bukni, nara Allah pia diksukum unye touk, Kristus ap aninye ap talima dukdongopniba, Kristus deice arye, aninye diksukum kipdeipnamne,’ tenebukce, Allah arye apil dopsuke. Na Paulus arye nyapsine.
Allah morobukopura, el yupu kekenmek nang ati ayupu ton nyabuk. Na ni Allah arye, ‘Na mi Yesus, aning-aning nirya talibuka deiyoknye unamle’ tenen, akunum arepnuke. Ninye nirya tonoknye ton, Allah el Mi Koprop arye, el kanye talima noutamak tenelul ning ara, kum kel biktinge. Allah el Mi Koprop kanye talima ulye ning ara, Allah elcuk kel bikilulue. Ninye nirya tonoknye ton, na ni Allah el kanye talima noutamak tenelul ning ara, kum kel biktinge. Na ni Allah, el talima noutamak ulye ning ara, tukwak ninye ton kum bukni, nauk ara, el Mi Koprop arye kel bikinune. Tonda, ‘Narye peterenunba, na ni ulye ning kel kipnamak’ tenen, wibuka deipse nanguk, na ni Allah arye pataplyeba, tenelul ning kel biktinge.
Tonda, Asyur mutuku ninye arye, ‘Israel ninye malye kibibirye, opnamabe’ tenen, nun mutuku noutam yanuka weksetingce, nun mutuku tuku yanuka yanipsitingopura, Israel ninye nirya mikip kibikirye, sik tekbarye kalikna deiyok nang ton, wibuka tekeipnamake. Sikda, gembala atonun nang kibuka, Israel yala nang melinamake. Aning atonun, anggunti, ‘Teleb bisik ara ani, teleb winin ning wininamlum ning ara ani,’ nyabuka peterenamsiaka ati, weik deiyok nang pinbarye arye, ton wibuka deipnamake. Winibicopura, apinbarye deiyok nang arye, Israel ninye talibikirye, kalikinamake.
Asipdeyukura, Yesus arye nyabuk. “Na ti diba tenebikirye, kanye talima deipnikcopura, aninye dipkoprop na yupu kekepnikirye, anyuk talibuka dobolbanamake. Na yupu pia talibuka diksukumuk unyak talak noutamak nirya ara, na Ni Koprop Allah arye sikti, bico tenebuka melinamle. Winiplirye, na ni Allah ap, na ap, aninye sik un dam yanimirye, aninye ap kanye talima dukdongobuka neika unamabe.
Yesus arye el wipdeiamuk nang ati nyabuk. “Anggunce mambul kanye bobuka talima bouku sukuna kum unamlume. ‘Allah elce, melinamsil’ tenen, diba tenebuka anggun kanye talima el deice delinamlulume. Tonda aning atonun, nati, ‘Elce melinamsil’ tenen, dib tenebuka, anggun kanye talima na deice delinamnulume.
Nyabukce ayupu ton nyabuk. “Bukni, na Ni Koprop Allah arye, pil dolye ninguk pil dopnyopura, adeice arye adiparyuk dib tenepnulume. Anggunce nati ara, ‘Talinye binya,’ tenepnutum bukni, ninye kum winipmanto ning, weik mambul pil donuna ara, eipmunce, adeice arye dib tenepnululume. Apil donuna deice arye dib tenepnutumopura, aminyan kel biknamlume. Ara, na Ni Koprop Allah ap, na ap talima dukdongobuka ansinibuka unyame. El ap, na ap ara nun neika. Aning kel kipmunce, moubuka tenenamlume.” Yesus arye nyabuk.
Allah arye amambul pil dobuka, el Mi Koprop ati aribuka deiyok ara, ‘Ninye mutuku-mutuku nirya, nati si erebuka, na si kilamniayak atonun, na Mi Koprop ati atonun, si erebuka el si kipnamake’ tenen, yupu bokolina deiyok pil ara, el mi koprop ati aribuk. Ati, yata ninye do nirya, Allah el Mi Koprop ati si erebuka, el si kum kinyak ninye ara, wininyaka deice arye, Allah el babye ati si erebuka, el si kum kinyake. Yesus arye sik Yahudi yala deiyok nang ati nyabuk.
Allah arye nyabuk. “Se, Esra anda, ninye arye deipkiknye ulyame. Narye nyapnukin yupu ara, bobuka yuk daunyak nang ati, laka nyanamlyame. Ance sik Amon tam unyak nang nirya ati, laka nyapnalam yupu ara, ani. ‘Nun ni koproba Allah Yahweh, elda aning-aning nirya deice tam erebuka, Pia Mikip Weik Deiyoknye birye, nyapsile. Anggun Amon yala nang arye, Yerusalem mutuku unyak nang ati, pia malye-malye nyan yupu weik nyalamlumce, sik nong deice, ikin weik ning delilalume. Ati ara, Allah arye anggunti, ninye on parang ya ara, akunum kintinibuke! Elce, ninye ona ati, parang ya ara, akunum koubuke. Aparang ya ara, elce ninye opnamle ati, akunum ketebuka deibuk parang ya, el si yu ara, liman obuka, bebeya laklamle touk ulule. Aya arye, ninye pia weika arye oplopnamle!
Aning nirya ara, talye ati kum nyanyabe. Aminyan talak, pia telebuk wininamsil ning deiyok ara ani. Ara, Allah arye tenelamsuk touk, wini talak ara, nun lyena ati, sal mi tonok akunum deipmasirake. Allah arye weik mambul mi akunum kintinibuka arepmasile. Nun lyena ati, ami akunum arepmasil mi elda, aminyan talak aning-aning nirya talibuka, nun ninye deiyoknye unamsile. Winibuka daulamepya ani, ninye nirya arye, el si erebikirye, el si ati nyanamak ning ara, ani. Pia Mambulnye ulule. Ninye melina ati, Kanye Talima Kwadina Deiyoknye ulule. Pia Mikip Weiknye Allah ulule. Nun Ni Allah, Pia Kam Unamlanye ulule. Allah ap ninye ap, neika teleb una ati, Ansinilina Deiyoknye ulule. Aning-aning nirya, ninye arye el si tenibuka nyana ati, ayupu nyanamake.
Allah arye nyapnuke yupu ara, ani. “Winira na tenyamse pil nirya ara, akunum sirya dakne. Aning-aning nirya min kum uamuk talak, na akunum ulamse ati, nara deiyok kouna deiyoknye ununa ati, na si ton Alpa nyaninyake. Tonda, aning-aning nirya kum danamle talak babye, nauk ara, pia kam unamna ati, na si ton Omega nyaninyake. Na si ton, Deiyok Kouna Deiyoknye ap, tonda, Sirya Dakna Deiyoknye ap nyaninyake. Yata ninye do nirya, mek pataplyopura, narye sikti, Pia Kam Una Mek kwebuka urdem arenamsine. Ara pia kam una deiyok mek pu arye, kam una mek kwebuka urdem arenamsine. Amek ara kum dekenamake.”
Talilamukba, atalak noutamak tukwak mutuku im sirya, mutuku sirya nirya, Allah ati dib kum tenyamikce, urdem unamak ninye nirya ara, el siuk erenamake. Bukni, Kam Pia Unamak Ninye Si Sekna Buku noutamak, Allah arye si akunum sekeiamuk ninye tonok ara, amalye kam un ning, el si kum erenamake. Allah arye aning-aning min kum kwepdeiamuk talak arye, ‘Ninye Lyenanye obica deice arye, diba tenenyak kile sal lyepnamne’ tenen, Allah arye Domba Mi Atonunye kintinipdeiamsukce, tukwak mutuku dopdeiyamsuknya bira, elce aninye si sekna buku talilule. Ara kam unamak ninye sik si seklamuk buku ara, el ning uka.
Akil arye deiyamuk mapu nirya ara oplopnamne. Winipniba, amutuku-amutuku diba tenenyak ninye nirya arye, moubuka kel kipnamake. Ara, ‘Se, ninye kanye tenen ning ap, ninye talima pum tam usilye ning nirya ap ara, elce kel kisulule. Nun nirya arye ulamap touk, yupu bokeipsilirye, wenesulule,’ tenebikirye, kel kipnamake.
Anye epsirye, mambul kanye bobuka, ‘Si erebuka kipnun’ tenen, el yan dam bisirye, gutam ap, kisok ap, tuku deice dipdongobuka buksirye, pia yupu kum asa bukse. Winibuka buksibuk, anye el sirik taruk arye, na nong deice deibuka talipnukce, ayupu nyapnuke. Ara, ani. Anda ilil una meme. Aning-aning nirya, min kum uamuk talak ara, na akunum ulamse ati, nara Deiyok Kina Deiyoknye unune. Tonda, aning-aning nirya, akunum kum uplye talak babye, na pia kam unamne anya arye, nara Sirya Dakna Deiyoknye unune.
Kekepsiba, Allah arye nyapnuk. “An kekepnulam ning ap, eipnulam ning ap nirya ara, moubuka seklyame. Surat sekminyopopura, Asia tam noutamak diba tenenyak ninye ati, mutuku si tekbarye dopdeipnulyame. Amutuku si ara, ani. Efesus ap, Semirna ap, Pergamus ap, Tiatira ap, Sardis ap, Piladelpia ap, Laodikia ap, ulule,” nyabuk.
Nun malye tenenyap ning ap, malye wininyap ning ap, kum ubuka delina ati, akunum deksukce, lyebuka deipsuke. Allah arye nun malye unyap ning ati wenebuka opsutu bukni, ‘Sik opnyak’ tenen, nun pununa ati, Allah tenyamuk tok, sik malye nang arye, Yesus obikbuk, el ining binmoka deice arye, nun malye winin ning nirya kilibuka, kum danalisulula ak, Allah arye namin kilisulule. Ara nun malye wininyap ninguk kume. Ninye mutuk sirya im sirya nirya sik malye wininyak ning babye kiliplirye, lyelule.
Allah arye nyapdeibukba, Musa arye sekeiyamsuk yupu, mem yupu nirya moubuka talibikirye, diksukum kibuka kum dobolbanyak ninye ara, “Allah arye weneplirye, oplopnamle,” nyalamuk yupu aupmale. Bukni, Kristus arye nun tukwak mutuku ninye ati, el bidamnye nong arepdayukba, yu nang arye obikba, nun malye ulamubu ning lyepnamsuka ati dibuka deice arye, lopdeipsukce lyepsuke. Minop talak ara, mem yupu amu tam ulamububa, amem yupu arye tapu koulamsuk bukni, Yesus arye pil dopsuka deice arye akunum loplopsuke. Anyapmasin yupu ara, talye ati kum nyapsine. Ara, Allah yupu sekamik yupu noutamak aubuk yupu deice arye kel kinyabe. Ayupu ara ani. ‘Wanwanun yo deice deibuka olamak ninye ara, Allah arye aninye ati wibukaplirye, wenebuka oplopnamle.’ (Ulangan 21:23) Aning ati ara, kel kinyabe. Nun malye winina ati, Allah arye talye luparabuka oplopsutu bukni, Kristus wanwanun yo deice obikba, dibuka ara, talye ati kume. Nun malye winina ning pununa ati, dibukce lyepsuke.
Anggun ton teneipdelulume. Allah ara, el Mi Kopropa tonokuk ulul bukni, ‘Na mi ara tonoknye anya arye, na tenen kum arepnune,’ tenena kumce, nun lyena ati, arepsuk. Ati, el mi kopropa dobuka, nun lyena ati akunum arepsuka anya arye, yatato ning do nirya, nun patasulu ning nirya bico tenesilirye, el kanye deibukap, talya demuk kum arenamsil do? Kume, nun patasilye ning nirya ara urdem arenamsile.
Ura, minop talak Allah arye, ‘Sikce Yesus ati winipnamake,’ akunum tenyamuk ati, min kum winipmok talak ara, el akunum tenyamukce, kel bikamuka anya arye, ‘Yuk nang arye, Yesus dobuka, sikce opnamak’ tenen, malye nang arye, Yesus dobuka anggunti arepsike. Aripsikura, sik yuk pia malye ulamik nang meilyamika arye, Yesus dobuka, wanwanun yo deice deibikce, paku dakuka, Yesus obikura, dibuke.
Yata nang do nirya, sik malye ulamice deice arye, yuk ninye ton eibikirye, ‘Sik unyak atonun nun babye, ton winipnuyabe’ tenen, malye ubicopura, sik malye una deiyok nang sik wenena ati ning ara, winipmanto ning nyapnusine. Kanam ning ara ani. Ara minop malye ulamika deiyoknye bira, weik keil arye, el ngang kirikuka, laut mekwen noutam dongoptingura, mekwen diptue. Aning ara, mitik ikin bukni, amalye una deiyok nang ara sik malye unyaka ara, yuk nang ati, malye ulinyaka anyapce yuk nang ababye, malye unyak anya arye Allah arye, amalye una deiyok ninye weik arye wenepnamla ara, aning ara ikin pia weik upnamle.
Adomon yupu nyapmasin touk, anggun ni Allah im deice ululnye el kanye ara, amitik mi atonun, ninye tonoknye babye ton, ‘Na kum bataknamne,’ kum tunimanamake. Atonoknye babye ton lyepnamne. ‘Na mi kopropa unamle’ tenen, patapliba pia tenesulule. Allah arye tukwak ninye nirya ati, ‘Ninye tonok ton uku din mutuku bana ara, na like,’ tenelule.” Yesus arye el mapu 12 nang ati nyabuk.
Sik nirya arye, amitik mi kanye talima lamapdongobuka ulamle touk unyak ninye ati, ‘Aninye ara, sik mambul kume, daupmalye,’ tenena kume. Allah dib tenebuka, talima lamapdongobuka ulamice ninye ara, ‘Aninye ara mambul kume, daupmalye,’ teneluluma ati, anggun kanye moubuka unamlulume. Aninye ara, sik kalikna ati im deice pil don nang, malaikat, na ni Allah dam unyaka anya arye, ‘Anang ara mambul kume,’ tenena meme. Anang ara sik kalikna malaikat arye laka nyalbikiba, ‘Allah kekeplirye, anggunti wenepsilyak’ tenen, nyapmasina atia. Yesus arye nyabuk.
Akama bulaklopseba, asum deice, akama bulakmase ning, nyalin yupu nyapdeipse ning ara, akunum kum kipdeipse. Winipseba, sik domba basam dekna deiyok nang arye, nati kalikuka dilamnika ati, moubuka bikike. Ara, ‘Se, nabi Zakaria birye nyapmasil yupu ap, elce winimok ning ap ara, dipkoprob ninge ara, Allah Yahweh, elcuk aning nyapsutua babye, atonun ulule. Ati nabi arye nyapmasil ning ara, Allah Yahweh el yupu uk nyasulule,’ tenelamik.
Allah arye tenyamlye talak akunum yalyopura, Allah Yahweh arye, el ona ati, pia mikip weik tatce parang ya taleplirye, Lewiatan nyanyak yu weik kam ning ati opnamle. Ara, cakuka balirye, binuka kwanibuka, weik kwatima babye, yalirye wenebuka opnamle. Tonda elcuk, el si Naga Kwatima nyalamak ning, laut kwen noutam ulul kwatima babye, wenebuka opnamle.
Na yupu yanibuka malye winimunye ning ati, ikin ning anggun deice deipnamsine. Tonda kat ning el si perak urasin pia teleb uamlya ani, butbuta palilamle ning, uku dongobikiba, malye ning kum dalirye, teleb ulamle touk, narye, anggun malye winin ning kum daneipnamsine. Anggun malye winilulum ning nirya ara, kilibuka bataknamsine. Winipsinyopura, anggun nirya telebuk unamlume.
Tonda, sik Israel mutuku noutam unyak nang ati, ayupu nyapnulyame. “Na Allah Yahweh ara, wini talak anggun olana atonunye winipnusine. Winipmanto ara, na ninye on parang ya libukadeipse ning ara, kupdopnirye, talibuka malye ninguk, talibuka wininyak nang babye, pia diksukum wininyak nang babye, anggun nirya wenena ati, anggunda, oltaknauk upnamsine.
Piblisite