Babel mutuku ninye deiyoknye, Nebukadnesar birye, Mesir mutuku yanamle talak ara, Mesir mutuku nang nirya obuka, sice buklopnamle. Winipnyopura, na Allah arye, ‘Amutuku nang ikin weik ning, sik nong deice deipnamnarya,’ tenyamse nang ara, pia imun kanye bon uk, weik dina deiyok ning arepniba, ninye weik tonun dipnamake. Tonda, na Allah arye, ‘Amutuku nang ara, Babel mutuku yin nang arye bobinuka, sik yuk mutuku bobinamake,’ tenyamse nang ara, tapu koubikirye, bobinamake. Tonda, narye, ‘Sik anang ati, mal olan deice arye, obikiba dipnamake,’ tenyamse nang ara, Babel yin nang arye, ninye on parang arye boyanuka, anang obikiba, asukumuk dipnamake.
Zakaria 11:9 - Eipomek9 Winipsopura, narye tamubuka, sik domba basam dekna deiyoknye biti nyapse. “Ati narye anggun domba basam nirya ati, narye kum weipnamsine. Dadipnamak domba basam ara, sik dibina teleb uka. Tonda dawangapnamle domba basam ara, daupnamle. Winipliba, tuba mitik tonun arye kam unamak ning ara, sik domba basam weina ati poka pum noutamuk, daopdakirye, dibina uk unamake.” Gade chapit la |
Zakaria 11:9
22 Referans Kwoze
Bukni, pia malye wininyak ninye ara, tuba malyeuk wininamake. Allah el ulul ning nirya ati, ‘Nun like’ tenen, yanibikirye, malye winin ninguk talibuka unyak ninye ara, apia unamake. Teleb winin ninguk talibuka diksukum wininyak ninye ara, tuba teleb ninguk wininamake. Malye ning pia kum ululba, diksukumuk wininyak ninye, Allah el mapu koprop ara, diksukumuk wininamake,” nyapnukba, kekepse.
Nyabikura, Yesus arye domon yupu deice arye tamubuka nyabuk. “Wini talak ninye moubuka kel bikna ati, dirina upsil ning ara, anggun ap mitik anunuk, anggun neika unamsile. Dirina tuba wapsilye talak ara, teleb bisik adiparyuk banamlulume. Aminyan talak ara, kunuknauk unamsila ati nyapsine. Kunuknak balinye bira, el bisik banmalya ara, moubuka kel kum biktue.
Arup ara narye anggunti, ‘Anggun malye ululum ning noutamak aryuk dipnamlume,’ nyapmasine. Tonap ayupu ton nyapsine. Narye anggunti, ‘Na aunune,’ nyabuka, na bidamnye ati laka nyasinye yupu kekepmunce, diba kum tenepnumunyopura, dipkoprop anggun malye ululum ning noutamak aryuk dipnamlume.” Yesus arye Yahudi deiyok nang ati nyabuk.
Ton talak ara, Yesus arye sik Yahudi yala nang ati nyabuk. “Aminyan talak amutuku batakuka, yuk mutuku akunum binyopura, anggunce nati, ‘Dan tam binmal do?’ tenen, epdenamnulum bukni, kum eipnamnulume. Anggun malye winilulum ning noutamak aryuk nyapnamlume. Na benamne mutuku ara, anggun ton kum yanmanto anya arye, dipkoprop kum yanamlume.” Yesus arye nyabuk.
Nyabukopura, adomon yupu ton nyabuk. “Aning ati ara, na dipkoprop nyapsine. Allah arye ninye mutuku-mutuku nirya talinamsil ara, anggun Yahudi yala deiyok nang ap, Yahudi yala nang nirya ap, min arye areamsutu bukni, anggun dam dobuka, yuk nang ati arenamle atia. El arenamle ninye ara, teleb yo arye duk teleb ninguk moulamle touk, el yupu moubuka kekebikirye, el yupu uk talibuka, el piluk donamak nang ati arepnamle,” Yesus arye nyabuk.
Din patabuka ati, kwarang yo duk moulamle touk, ara yo tikamukak binuka pera arye eibukce, bok weik ulamuk ati, ‘Duk moubuk do?’ tenen, ayo dam dilbiyuk. Dilbiyukbuk, ayo duk mouna kumce, bok dem uamuk. Bok demuk uamuk ati, Yesus arye ayo wenen ati nyabuk. “Akiting tamun, aketing tamun nirya, duk kum mouminya ati, ninye arye an yo duk kum dakuka dipnamkiyake,” nyabuk. Ayo ati ayupu nyabukopura, atalak aryuk, ayo yating ap, bok ap, nirya kolubuk.
Ati, na mapu anggunti nyapsine. Anggunce sik Farisi nang ati, tenena kume, sik dauplye. Sik Farisi nang ara, bisik peterena deiyok nang atonun unyak bukni, dipkoprop ara asing kun nang atonun unyake. Tonok asing kunanye birye, yuk asing kunanye biti, ‘Narye an taruk talibuka teleb bisik bobinukine,’ nyaplirye, bobuka banmaliba, bisik noutamak weik pum wamlyak barikirye, sik bitinye nang kote sakarurake. Sik Farisi nang ara, na mapu koprop kum unyake. Sik Farisi nang ara, asing kun nang atonun unyak nang ati, dauplye, nyapsine,” Yesus arye el mapu 12 nang ati nyabuk.
Apia kanye imun weik ning, akunum arepsinyopura, ikin weik unamsila ati, anggunce obuka dinamlum ning ara, anggun aumunye nang kan-kan arye, anggun wisi nang arye, anggun bidamnye delilamunye mapu, obuka dinamlume. Aning atonun, anggun kan-kan arye, yuk mapu arye, sik ni yapu koproba bukni, obikirye, dinamake. Aning atonun, anggun Yerusalem mutuku ululum nang nirya ara, wenebuka kanye imun weik ning dobuka, anggun deice deipsinyopura, ninye weik dipnamak bukni, sik tuba batakniba, mitik tonun tuba kam unamak nang ara, yukak yakuka dopkweteptiniba, yuk mutuku im sirya, mutuku sirya nirya, binuka unamake.” Kumanya dana-dana tam arye dolamle touk, anggun babye dana-dana tam mutuku noutam bikbik abuka binuka unamlume.
Allah el si Yahweh arye, anggunti nyasulule. “Nara Allah Yahweh unune. Anggun tuba malyeuk nyaluluma anya arye, narye anggunti, ton kum teninamsine. Narye anggunti, na dam arye yankuka, pera mutuku bokwetepnamsine. Na damak, ton kum yanganamnulume. Tonda, Yerusalem mutuku noutamak arye dobuka, pia pera mutuku donoknamsine. Wini talak aunmalum mutuku ara, minop talak narye anggun deiyok nang ati areamse bukni, wini talak ara, anggun malye winilulum ninye ara, na dam ap, Yerusalem mutuku dam ara, kum yanganamnulume. Anggun ti, akunum bataksine.
Allah arye Yeremia biti, nyabuk. Yeremia, na mutuku unyak nang, tonok-tonok nang ton, an dam yakirye, asipnamkiyake. Ara, tonok-tonok nang arye do, tonda dotalak winipnamle ning ati, narye nyaipneba, laka nyana deiyok nang noutamak, nabinye birye do? Akumopura, na si eren aik pum tam, pil dona deiyok nang noutamak, imamnye birye do, an dam yakirye asipnamkiyake. Ara, nyapnamkiyake, “An dam ton, Allah Yahweh arye, dotalak ikin ning yanuka, wininamsil ning ati, an dam yanuka nyalinmakil yupu ara, yatato yupu nyapdeiamkuk do?” nyabuka, sik anang arye yanuka, asipdekicopura, ance tamubuka, sik anang ati nyapnulyame. “Allah arye, dotalak ikin ning, nun damak yanamle ning ati, na dam nyapdeipnuk yupu ara, yuk yupu kume. Ikin ning upnamsil ning ara, anggun malye winilulum nang atibuk, nyapmanile. Ati ara, Allah Yahweh arye anggunti, wenepsilirye, yukak donoknamsile,” nyapnalyame.
Tonda, sik oldan ninye arye, ‘Amutuku unyak ninye nirya, obuka sirya daktibye’ tenen, mikip arye yanuka, warekinamake. Yanuka wariknamak ning ara, pia weik kanye imun kipnamsila anya arye, anggun amutuku noutamuk unamlume. Anggun wa wina ap, lina ap, din ning elbana ap, mek kwelbana ap ara, pia kum winipmanto upsilye talak ara, dina pia patanauk usilibuk, ‘Se, yata wiriptibye do?’ tenen, amutuku unamlum ninye nirya ara, kanye imun ning, pia weik upsiliba, ninye arye sik mining mapu obuka dipnamake. Tonda, wisi nang arye, sik kayapu nang ap, sik aik mining dam unyak nang ap, obikirye, aninye sik mining nonguk, kalibuka dinamake. Ara, sik mal olan ninye arye, weik kanye imun weik ning, sik nong deice deibice talak ara, ikin pia weik unamsila ati, weik malye ninguk, pia weik arye wininamlume. Na Allah arye, dipkoprob nyapmasin touk, nong upnamle. Allah arye na Yeremia biti, “Ayupu nyalbinulyame,” nyapdeipnuke.
Na Allah arye, wipdeiamse ninye, na mapu koprop Israel ninye ara, wenebuka opnamne deiyok ara, ani. Sikce na Allah wininye ning ap, na nyasinye yupu ap, na si ap kel bikna kum atia. Israel ninye arye nati, walwal tuba unyaka deiyok ara, sik iman-imam nang atia. Anggunda, na si erenyak aik pum tam, pil dona deiyok nang ululum bukni, anggunce, na wininye ning nirya kel bikna ati, ‘Aning ara, nun like’ tenen, ‘Like,’ tenebuka ululuma ati, sik Israel ninye elisinyakce, ‘Nabi nang arye, malye winilyak touk, nun babye malyeuk wininamabe’ tenen, sik babye malyeuk wininyake. Ati ara, narye anggun imam-iman nang nirya ati, ‘Sikda, na si eren aik pum tam, pil dona deiyok nang dipkoprob kum unyake,’ tenesinirye, anggunti akunum bataknamsine.
Piblisite