Zakaria 1:15 - Eipomek

¹⁵ Tonda, nara sik yuk-yuk mutuku nang, pia dakeiam asa arye, nimalyap asa mutuku-mutuku nirya unyak nang nirya ara, ‘Nunda pia telebe,’ tenen, maknya kintinibuka, kwalinyaka ati, narye sikti, pia lik ubuka, malye kanye bopse. Deiyok ara, mince na mapu koproba, sik Israel nang arye malye winilamik ning ati, na mitik tonun talima noutam yu upnukba, ‘Anang wenepnamne,’ tenepse bukni, nati diba kum teneninyak nang, yuk-yuk mutuku unyak nang arye, na mapu koproba Israel nang ati, pia weik tonun yu ubukba, ikin ning pia weik tonun dobuka, sik nong deice delilamik. Na mapu koproba deice arye, kanye imun weik ning, pia weik tonun boyanuka delilamika ati, narye sikti, malye kanye bonune. Ati, anang wenepnamnarya!

Zakaria 1:15 Referans Kwoze

Yeremia 51:24

Allah Yahweh arye nyabuk. “Ara narye Babel mutuku noutam unyak nang, sik malye weik winilamik touk, dengna ati opnamne ning ara, anggun babye biknamlume. Tonda, sik Kasdim mutuku ulamik nang aryuk, Yerusalem mutuku noutam ulamik nang ati, malye kililamikce, olamik. Sik Babel mutuku nang arye winilamika ati ara, sikti, wenepnirye opnamne. Na Allah Yahweh arye nyapmasina ati, aning ara dipkoprob nong upnamlarya!

Yesaya 54:8

Malye weik winilalumba, narye anggunti yu upnukba, bataklamsise. Anggun malye weik ulamlumba, yu weik upnukba, tia talak ati mitik tonunuk bataksisirye, na donga anibuka anggun ton kum dililamsisirye, kum melilamsise. Bukni, wini talak ara, na yu upnuk ning batakuka, narye anggunti bico uniliba, tuba teninamsine. Pia kum bataknamsine. Aning ara, talye kum nyapsine. Anggun ni koproba Allah, na si Yahweh, anggunti dekuka lyepromsisinye birye nyapsine.

Zakaria 1:11

Nyabukba, akuda basam nirya ara, Allah Yahweh arye, dopdeipmok malaikat, asukum tikmoknye biti, laka nyabik yupu ara, ani. Ara, “Nun atikmap kuda basam nirya ara, tukwak mutuku im sirya, mutuku sirya, dana-dana tam nirya ara, akunum dipnin balamupu bukni, mutuku sirya, im sirya nirya, aunyak nang ara, mal olana kumce, pia teleb dakeiam asa unyake,” nyabik.

Zakaria 1:2

Anggun apu yapu nang, na mapu koproba, sik Israel nang ati, ‘Nyanamlyame,” nyapdeipnuke. Ara, nara Allah Yahweh ara, anggun apu yapu arye, malye weik winilamika ati, yu weik upnukba, anang ati, pia weik tonun wenelamse.

Mazmur 69:26

Winipminba, aninye sik aik dobuka, unyak mutuku nirya ara, oldemuk uplirye, bipla papnamle. Amutuku noutamak ara, aik ap, ninye ap, ton pia kum unamake.

Amos 6:1

Allah arye nyabukba, Amos birye kekebuka sekuk yupu. Se, Sion mutuku noutam umunce, ‘Nunda telebuk ubuka unyabe’ tenen, talye kanye bobuka ululum ninye ara, bicoe nyapsine. Tonda, sik Samaria mutuku deice ukirye, ‘Ikin ning nun dam kum yatue’ tenen, teleb kanye bobuka, umunye ninye babye, anggun bicoe. Anggun nirya ara, malye umunye bukni, ‘Nunda teleb unyabe,’ tenelulum ning ara, Allah arye wenepsilirye, anggun deice ikin ning deipnamsila ati, anggunda bicoe. Sik Samaria mutuku nang ara, talye nang kume. Israel ninye nirya arye, sik si akunum kel bikamik. Tonda, Israel ninye nirya arye, ‘Nun ni yapu arye, kalikuka melinamsiyak’ tenen, sikti, kanye deibuka dikirye, ‘Nun melipsilyame,’ nyabuka moronyake. Bukni, sik nirya ara, bicoe nyapne.

Yehezkiel 26:2

Anda, ninye tukwak nang arye deipkiknye, moubuka kekepnulyame. Tirus mutuku noutam unyak nang nirya arye, kanye weik deipmakce, Yerusalem mutuku nang ati, nyapnamake. “Se anango, anggunda bita dilulume! Ninye mutuku sirya, im sirya nirya, unyak nang arye, patalamuk bona dobuka, asukum arye, yuk pera mutuku weik tonun, dolkwetelamikba, dopromik. Yerusalem ara, dekna weik deiyok arye, yuk mutuku-mutuku weik donoklamikak bukni, wini talak ara, yuk mutuku yu yin nang arye, Yerusalem weik asik akunum ulubuka batakmakba, anyaik domik cang poka wekelban bisik bublan memamik bisik bublan ara, el si ara, Pintu Gerbang ara, akunum uluplobik. Ati, nun min arye talye lukparabuka, Yerusalem mutuku wektibye. Tonda, wini talak ara, sik dana-dana tam mutuku noutam unyak nang arye, nun Tirus mutuku unyabakbuk, yakirye, aning-aning nirya winibikceura, nunda bona talin nang unamabe,’ nyabik.

Mazmur 137:7

Diba, nun ni Allah, ance Edom mutuku ulamik ninye, sik malye winilamik ning ati, luba kina kume. Pia teninamlyame. Sik Edom mutuku ninye arye, pia malye ulamik ning ara, kum luba kinamlame. Ara, sik Edom yala ninye arye, Yerusalem mutuku noutamak dobuka ulamupu aik, uku dongopnuyik talak, malye nyanmek ning ara ani. “Anyaik nirya batakana kume. Asik-asik nirya dakuka bataknulame. Daknin banmamunya ani, aning nirya babye batakana kume, akunum nirya daklopnamlume,” nyapdeiamuk. “Anyaik-anyaik nirya ara, dakuka uluplobibiba, keil pala deice deibik ning ara, lakak upnamle. Anyaik nirya dakuka uluplobibiba, aik oldem upnamle,” nyalamik. Nyabikba, aik deiya deibuka domupu ning nirya dakuka uluplobik. Winibika ati, aning ara, Allah ance pia kum luba kinamlame. Nun ni Allah, anda awinibik ning ati, weik arye wenenamlyame.

Mazmur 123:4

Yata karin talak arye, nun kanye talima noutam ara, ‘Se,’ tenen, lik weik akunum usulule. Se, yupa weik talak deice arye, ikinuk akunum ubupu ati, ara tuba kum winitibye na nio. Aning deiyok ara, ikin kum uplyeba, sik talye kanye bobuka, telebuk unyak nang arye, nunti, ‘Sikda malye nang unayake,’ tenesikirye, nyek-nyek nyabuka, malye yupu nyasinyake. Aning nirya ati, nunda akunum lik usulule. Diba, sik maknya kipdanuka, nun Israel nang ati, ‘Nun lik, anggunda mali nang uka,’ tenesikirye, malye yupu nyasinyak nang ati, nun akunum ‘Lik,’ tenenamabe na nio. Ati, ancuk, yanuka melipsilyame na nio.

Zakaria 6:8

Winibuka bindobik talak ara, el amalaikat arye, na Zakaria biti, tamubuka nyapnuke. Ara, “Mirin kuda basam, Babel mutuku noutam binmala deice arye, Allah Yahweh el yu uamuk ning nirya ara, adiparyuk kanye namin kipdeipnamale,” nyapnukba, kekepse.

Ayub 30:13

‘Sik anang arye, nati opnikcakʼ tenen, ‘Binamne,’ tenepse bisik babye, abanmanye bisik yanuka eipnikirye, sekdongobuka opmanto uninyake. Sik anang arye, na dam yakirye, warikdongobuka opnunikce talak ara, yuk nang arye, ton kum yupu sekeninyake.

Yeremia 30:16

Bukni, wini talak ara, anggun ati dobuka alupdomsik nang nirya ara, narye sikti, alubuka dopnamne. Tonda, anggun mal olan nang arye, ‘Israel nang nirya obuka, sice buklopnamabʼ tenen, olyangalamsik nang nirya ara, narye obuka, sice buklopnamne! Aning atonun, narye lo arepninyeba, anggun mal olan nang nirya ara, yuk mutuku nang arye obikirye, tapu koubuka, sik pera mutuku bobinuka deipnamake. Naryuk, anang yakuka donoknamne. Tonda, anggun mutuku yanuka opsikce, anggun talilamlum bona nirya alubuka doprobikce, bobinamik nang nirya ara, yuk mutuku nang arye, anang obikirye, sik talinyak bona nirya, alubuka bobinamake. Atonun, yata mutuku nang do nirya, sik Israel nang ati, ‘Ayala nang ara, opnamabe,’ tenyamse nang nirya ara, narye lo arepniba, yuk-yuk mutuku nang arye, anang ati, sik dam yanuka opnamake. Deiyok ara, anggun deice ikin ning delisinyak nang nirya ara, na Allah arye, sik deice tamubuka ikin ning delinamne.

Yeremia 50:33

Nara, Allah Yahweh, im deice unyak yin talin malaikat nirya, sik deiyoknye ununa ati, nara Pia Mikip Weiknye unirye nyapsine. Ara, anggun Israel nang ap, sik Yehuda mutuku noutam unyak nang ap, nirya ara, Babel mutuku nang arye, ikin ning sik deice deibikiba, ikin weik uplya ati, mambul kanye bonyake. Sik Israel nang ap, Yehuda mutuku nang ati, Babel mutuku nang arye obikce, tapu koubuka, sik mutuku tamubuka bobinamikce, wini talak ara, tuba talibuka unyake. Mikip weik arye kalikinyak nang arye nyanyake, “Kume, sik Israel yala nang ara, pia kum lopdeipnamabe. Sikce nun mutuku kum batakuka binamake,” nyanyake.

Habakuk 3:12

An yu ulamkuk talak ara, tukwak amutuku-amutuku noutamak arye, tuku yanibuka balamlume. Atalak ara, yu ulamkukba, amutuku ulamikce, malye-malye winilamik nang ati, yaniplobuka kama arye, ninye pia olamak touk, amutuku ninye nirya wenelalume.

Zakaria 14:12

Yata yu mutuku nang do nirya, sikce, ‘Yerusalem mutuku noutam unyak nang optinyeʼ tenen, pataplye nang yala-yala nirya ati ara, Allah Yahweh arye, weik imun kanye bobuka, ilil unamle nakina arenamle. Aweik imun nakina yala ning ara, ani. Sik anang ati areplyeba, anang sik asing ap, sitang ap, tonda sik nong bol nirya ap ara, sik kam tuba unamak talak babye, adiparyuk lyupnamle.