Yosua 21:17 - Eipomek

^17-18 Aning atouk, Benyamin yala nang arye, talibuka ulamik mutuku noutam arye, dumbarye mutuku taleamik ning dobuka, sik Lewi yala nang bukni, Kehat el tam nang ati, wilibuka arebik. Atalibuka ulamik mutuku si ara ani. Ara, Gibeon mutuku ap, Geba mutuku ap, tonda Almon mutuku ap, Ananot amutuku ap nirya ara, bokuka sik kayapu nang ati arebik. Anoutam domba basam ap, sapi basam ap weilamik mutuku ton arebik.

Yosua 21:17 Referans Kwoze

Yosua 9:3

Sikce amutuku-amutuku ulamik nang arye, ansinipdobikce, kintinibik bukni, sik ayupu kekebik nang ton, sik yuk yala nang, Gibeon mutuku ulamik nang ara, sik yuk winibik. Ara, yuk nang arye, “Yeriko mutuku ap, Ai mutuku ap ati, Yosua birye nyapdeibukba, Israel yala yin talin nang arye, abitinye mutuku dam binuka, obuka sirya dakikce, amutuku ulamik nang ap, sik talilamik bona ap, sirya dakmake,” nyabuka, lake nyabik Gibeon mutuku ulamik nang nirya kekebik.

1 Tawarikh 6:60

Tonda, Benyamin yala nang, sik mutuku dopromik noutama ara, Kehat yala nang ati arebik. Amitik-mitik asik si ara ani. Geba asik ap, Alemet asik ap, tonda Antot asik ap arebik. Tonda, amitik asik dana-dana tam uamukce, weik maning palamuk mutuku luak ap, arebikura, doprobik. Ara, mitik asik domik yupa, mikbarye (13) asik dobuka ulamikak ara, Kehat yala nang, sik duweituk una ati doprobik.

1 Raja-Raja 15:22

Aning akunum winibukopura, Raja Asa birye, “Rama mutuku bimunce, winipnamlume,” nyaibukba, elce taleamuk ninye, Yehuda tam ulamik ninye nirya ara, tonoknye babye, ton kum batakuk. Sik aninye nirya, Rama mutuku biyikce, Israel tam Raja Baesa birye, ‘Rama mutuku mikip kipdeipnamneʼ tenen, aik don ning nirya deiamuk ning ara, Asa taleamuk ninye, sikce aning nirya binuka doprobik. Ara, ‘Rama mutuku kum malye kiptingʼ tenen, mikip kilina ati, keil ap, yo ap dobuka, deiamuk ning nirya ara, dobukabikce, bobiyik. Abobiyik ning nirya ara, Raja Asa birye dobuka, sik Benyamin yala ninye mutuku, ara Mispa ap, Geba ap, ‘Amutuku bitinye ara, nun oldan nang arye, kum malye kiptingʼ tenen, binuka mikip kipdeibuk.

2 Raja-Raja 23:8

Yehuda yala nang ulamikak arye, amutuku-amutuku nirya noutam, Raja Yosia birye nyapdeibukba, Allah el aik pum tam pil dona deiyok nang, imam nang nirya bulubuka yayikopura, yuk nang arye, isa si erena do, Allah el si erena ati do, talye nang arye, sik talye si eren aik domik ning nirya uluplobikce malye-malye kipdeibik. Deiyok ara, ‘Anyaik tuba kum wekenamak’ tenen, anyaik nirya ulubuka batakik. Winibik ning ara, mutuku si Geba mutuku arye, diprongobuka anerye, Bersyeba mutuku ap, anoutam mutuku ap nirya, ‘Allah si erepnamap’ tenen, nintong teleb ning dobuka uku dongona ati, domik aik ap, pala keil yangapdeiamik ning nirya ara, ulubuka daklobik. Tonda, Yosia birye nyapdeibukba, sik imam-imam nang nirya Yerusalem mutuku bulubuka yayik. Yayikopura, isa si erena ati, malye nang arye, delilamik ning ulubuka batakik. Ara, Yerusalem mutuku dana-dana cang keil poka wibuka bublan wekna ati, botoamik bublan weik ning dam, isa si eren ati domik ning ulubuka batakik. Tonok weik bublan el si ara, Yosua bublan. Ton ning ara, Yerusalem mutuku wekelbana ati, abublan dam bukni, kwanim tam botobik bublan ara, abublan el si ara, Yosua nyalamik. Deiyok ara, amutuku Gubenur el si babye, Yosua nyalamik. Abublan bitinye dam ara, isa si erena ati dobuka delilamik ning nirya ulubuka batakik.

Yesaya 10:29

Asyur mutuku yin nang ara, mutuku tam bisik arye kibuka yanganmek. Sikda, abisik kibuka yanganmekce, Geba mutuku yanuka, tiya talak mapmek. Mapmeka berekukopura, amutuku dam uamuk mutuku, Rama mutuku ulamik nang nirya ara, ilil unmok. Tonda, Raja Saul deiamuk nang arye taleamik mutuku, Gibea mutuku ulamik nang ara, ilil weik upmokba, sik nong nirya kouluksakmuk. Ilil weik upmuka ati, amutuku nang arye, bai sakuka, bikbik abuka bindobik.

1 Tawarikh 8:6

Ura, Gera birye deiamuknye, Ehud birye deiamuk nang ara ani. Naaman ap, Ahia ap, tonda Gera ap deiamuk. Sik anang ara, min talak Geba mutuku ulamikce, sikce deibikura, dadeipdanin yangalamik nang, sik duweit nirya ati, ninye deiyok talibuka, bululin nang ulamik. Bukni, aminyan talak ara, yuk nang arye, sik anang ara, amutuku arye yakuka, yuk mutuku donokamik. Yakuka dobonmikba, Gera birye bulubuka deibukba, amutuku arye batakuka, Manahat mutuku binuka ulamik. Winyamik talak ara, Gera birye mapu bitinye deiamuk. Sik si ara, Uza ap, tonda Ahihut ap nyabuka, sik si dobuk.

Nehemia 12:29

Tonda, Bet-Gilgal mutuku ap, Geba mutuku ap, Asmawet mutuku ap nirya arye, mot sena weik kel ninye ara, Yerusalem mutuku uk bulubuka yayik. Ara, Babel mutuku arye tamubuka yayik talak ara, amutuku-amutuku noutam sik aik dobuka ulamikak ara, amutuku arye tamubuka, Yerusalem mutuku dam yayik.

Zakaria 14:10

Wini talak ara, amutuku noutam arye, mutuku kon ap, lu mutuku ap ansinibuka aubuk bukni, aminyan talak ara, amutuku nirya weik lu kipdeipnamle. Ara Geba mutuku noutam bukni, dabu tam, utara mutuku asukum dipdongobuka, Rimon mutuku iknapye dam, eitam mutuku nirya ara, weik pala lu mutuku uk kipdeipnamle. Winibuka deipnamle bukni, Yerusalem weik asik upnamlak ara, mutuku kon deice uk pia aupnamle. Ara, Allah arye amutuku weik erebuka deiplyeba, tonok mutuku kon deice uk tuba aupnamle. Amutuku noutam el pala ara, ani. Ara, Yerusalem weik asik dana-dana antanap dongobuka, domik keil poka noutam bukni, wekelyangan bisik botopdeiamik bublan, el si ara, Benyamin yala nang wekelban ati bublan bisik, weik pala bisik bublan dam arye dipdongobuka binamlya ani, minop talak botopdeiamik weik pala bisik bublan, asukum dipdongobuka binamlya ani, akeil poka domikak ara, el si ‘Minop Wekelban Bisik Bublanʼ, asukum dipdongobuka binamlya ani, minop talak domik cang keil aik el si ara, Menara Hananel, anoutam arye dipdongobuka binamlya ani, Israel nang taleamuknye, ninye deiyoknye Raja arye, el anggur duk mek kintinip deiamukce, anggur duk purulamukak binuka dipnamle. Ati, weik pala lu mutuku kwepdeipnamle ning ara, pala weik upnamle.