Yosua 15:19 - Eipomek

¹⁹ Nyabuka asibukba, el kilmu Aksa birye, tamubuka, el li koproba, Kalep biti nyabuk. “Kume na nio, na patanmanil ning ara, na unirye mek kwebuka dinamne ati, mek balamle sukum ara, yata wiribuka arepnutum do?” nyabuka asibuk. Ara, “Na ni ance na tuku arepnulumak ara, mutuku si Negeb mutuku bukni, amutuku ara, ilim mutuku arepnuluma ati, ayupu nyabuka moropkine,” nyabuk. Nyabukura, Kalep birye tamubuka, “Mek pu koprop sukum ara, itam babye, mek dara tam babye, anti arepkine,” nyabuka nukuk.

Yosua 15:19 Referans Kwoze

2 Korintus 9:5

‘Alye upsilyak’ tenen, narye utenepse. ‘Teleb ning ara, nun du weit atonun nang, sik Korintus ninye dam dopdeipnibuk, ninye melina yo bok min kum arepmace talak, kintinina pil ati melibicopura, ayo bok bulubuka dipkoprop kintinipnamake,’ tenepsise. Ara anggunce, “Yo bok weik arye bulubuka arepnamabe,” nyabuka nyalina yupu nyapdeiyamlum touk, ‘Dipkoprop kintinipnamake’ tenen, anang dobuka anggun dam dopdeipnamsine. Winipniba, anggun dam yanuka melipsicopura, aminyan talak ara, ayo bok weik akunum kintinipdeipmamunye arye, kanye deibuka arepnamlume. Min kum yanmapye talak, kum kintinipmunyopura, ‘Aminyan talak ara, mikip arye nyabibya deice aryuk arepsikibuk, aminyan talak ara, lik kanye bobuka arebiyak,’ tenena ati, na Paulus arye nyapsine.

1 Samuel 25:27

Wini talak ara, narye, anda na deiyoknye ulama ati, an amu tam kil unirye, aning-aning memebuka, boyanmasin ning ara, ance dokuka, an amu tam pil don nang ap, anggun nirya ap arye, dopropnamalume. Na nio, anggunti boyanmasin ning, doproplulume,” Abigail birye, Daud biti nyabuk.

Ulangan 33:7

Nyabukopura, Musa birye, Yehuda yala nang ati morobuk. “Na ni Allah, Yehuda yala nang moropkiyaka ati, kekepnulyame. Minop talak ara, Israel ninye bukni, yuk ayala-yala nirya ap, Yehuda ap, bokuka yuk-yuk kibik bukni, wini talak ara, tuba tonap, sik bidamang nang ap, tonokak tamubuka deipnalyame. Yuk nang kum melibikiba, sik bidamang taruk aryuk, sik mal olan nang ati, opiripnamake. Aning ati, na ni Allah, ance Yehuda yala nang ati, melipminyopura, an mikip deice arye, sik mal olan nang ara, obuka sirya daknamake,” Musa birye nyabuk.

Kejadian 33:11

“Nun ni Allah bico tenyamnukce, weika arye meliamnukba, aning-aning weik talinune. Na 'Se,' tenenye ning nirya aupmanila anya arye, anti, ‘Arepnamakine’ tenen, boyanmakin ning ara, talye mangkau asa arye doproplyame,” nyabuk. Yakub birye, Esau biti mikip arye, “Doproplyame,” nyabuka, weika arye nyanmoka ati, Esau arye aning-aning nirya doprobuk.

Kejadian 12:9

Aning nirya akunum winibukopura, amutuku batakuka, yuk mutuku si Negeb mutuku lyu bisik biyuk.

Yosua 15:18

Akunum dopdarikura, Aksa birye, el akanye Otniel biti, nyabuk. “Ance na ni koproba Kalep biti, moropminyeba, tuku mitik tonun ton, bokuka arepsutue.” Nyabukopura, aminyan talak Aksa bira, el keledai basam balye deice sakuka banmoka ani, el li koproba Kalep dam biyuk. Biyukura Kalep birye nyabuk. “Anda, yata ning pantanmakil ati, yalam do?” nyabuka asipdeyuk.

Yosua 15:20

Wini talak ara, Yehuda yala nang arye deiamikba, dadeipdanin yanganyak nang, sik mapu silip nirya ati, sik ulamik mutuku, bokuka arebikura, talibuka pia ulamik ning ara, ani.