Yohanes 4:34 - Eipomek

³⁴ Walwal arye nyaldanmekba, Yesus arye ayupu winipmanto yupu deice, el mapu ati nyabuk. Na din ning atonun ning nyapmasina ara nyapnusine. Ara, na dopdeipnuknye, elce, ‘Wininamle,’ tenyamnuk piluk, ‘Dopnin banmanya ani, sirya daknamne,’ tenenune.

Yohanes 4:34 Referans Kwoze

Yohanes 6:38

Anyapmasin yupu deiyok ara, im deice arye tukwak mutuku yasirye, ‘Na dopdeipnuknye, Allah el tenenilye piluk donamne,’ tenepsirye yase. Nara, ‘Na kanye aryuk tenenun ninguk tenebuka wininamne’ tenen, kum yase.

Yohanes 5:30

Na Yesus ara, na tenepnye touk tonok pil babye, na yuk kum donune. Na ni koprop arye nyanilye touk, kekepnirye yupu bokolisunune. Na aryuk kanye delinun ninguk tenebuka, pil kum donune. Aning kum bukni, na dopdeipnuknye, el kanye delilul ning uk, el tenelul touk wininune. Aninguk wininuna anya arye, yupu bokolisununa nirya ara, dipkoprop teleb kibuka diksukumuk yupu bokolisunune.” Yesus arye nyabuk.

Ayub 23:12

Aning atonun, Allah elce, “Aning ara wininamlume, aning ara, pia kum wininamlume,” nyapdeipsuk yupu ara, narye ayupu moubuka talipsirye, tuba dobolbanauk unune. Na kanye aryuk, ‘Aning winiptinye tenepnye ninguk, kum wininune. Tonda, Allah arye nyapsuk yupu moubuka tenipnirye, na kanye talima noutamuk bolonune. Ayupu ara, pia mambul,’ tenenune.

Yohanes 17:4

Ance, nati mambul pil areamnulumba, apil dopra balamse ani, sirya akunum dakdongopnin banman deice arye, an si weik arye erepdeipkiniba, ninye nirya eibikirye, sikce an si ati, weik arye erebikirye, anti, ‘Allah ara weik mambule,’ nyabuka kibuka si erenamkiyake.

Yohanes 19:30

Arebikbuk, Yesus arye, aning akunum mitik anun dibukopura, ayupu nyabuk. “Winira akunuma,” nyabukce, adiparyuk el ngang yalyaling apsakukce dibuk.

Matius 26:39

Nyabukopura, el mitikto karen kisikdakuka kanup donga biyukce, tukwak lumlumuk dongobuka pulbiyuk. Lumlumuk dongobuka pulbiyukce, ‘Opnikiba dipnaman ning ara, Allah arye lyepnutuopura kum diptinye’ tenen, ikin ubukba, Allah moronmok. Allah moronmok talak ara, ayupu nyanmok. “Na nio, na opnamaniyak talak ikin upniliba, donmanya dipnaman ning ara, ‘Ance lyepnutumba, aning kum winipnamniyak’ tenen, moronmakine. Bukni, na patanmanilba, tenepnarye moronmakina atonun kume. An min arye tenyamnulum atonun winipnunilyame,” Yesus arye nyabuka moronmok.

Yohanes 5:36

Nyabukopura, Yesus arye ayupu ton nyabuk. Yohanes arye nati nyapnuk yupu ara, mitik mambul ulul bukni, weik mambul ning ton aupmale. Ara, na ni koprop Allah arye, ‘Apil donmalya ani, sirya daknamle’ tenen, arepnuk pil ara tuba donune. Apil dopnyaura, mambul ning weik eipmunyopura, adeice arye, ‘Kume, dipkoprop Allah arye anye bira dib dopdeibukura, yanmasile. Talinye kume,’ tenenamnulume.

Yohanes 4:32

Nyabikura, Yesus arye tamubuka nyabuk. “Na dina atonun upmanil ning ara, anggunda kum bikmaluma anya arye, kum tenipmalume,” nyabuk.

Lukas 19:10

Nara, Ninye Mi Koprop Atonunye birye, ‘Allah diba tenena kum nang ati, eibuka lyepnamne’ tenen, na yase. Aning ati ara, arup ara Allah arye anti akunum lyepkile,” Yesus arye nyabuk.

Mazmur 40:8

Narye aning akunum kel kipsa ati, wini talak ara, na yanmance, an dam aunmane. Ance nyapdeiamlumba, an yupu buku noutamak, nati akunum sekeipnik ning ara, nyapnukine.

Ibrani 12:2

Nun diba tenenyap ning deiyok kouna ap, ansinibuka sirya dakna ap, deiyoknye Yesus ati, diba tenebuka talibibirye, pia tenenauk unamabe. Yesus ara, ‘Allah arye nati erepdeipnilirye, pia teleb ulinamnile’ tenenauk ulamuka anya arye, ‘Se, wanwanun yo deice ninye onyaka ara, alye una asa opnamaka ara, na like,’ kum tenebuke. Kum tenebukce, wanwanun yo deice obik talak ara, uk weik dinmokce, ikin weik unmoka babye, kum batakuke. Aminyan talak, kam bukuka im deice biyukce, Allah el weik Ninye Deiyoknye bunak, sirik taruk tam bulbiyuk. Yesus arye, ‘Allah el taruk sirik tam bulbinamna ara, pia telebe,’ tenyamukce, aninguk tenebuka deice arye, kanye deibukce, ‘Wanwanun yo deice opnamniyaka ara, na like anya arye, bataknamne’ tenen, pia kum tenelamuk.

Lukas 15:10

Aning nyaptu touk, na dipkoprop nyapsine. Malye ulamice nang noutam arye, tonoknye babye, ton, el malye ulul ning bataklyopura, Allah arye nyalin yupu laka nyana ap, pil donanye ap unyak nang malaikat nirya arye, kanye deilinyake.” Yesus arye nyabuk.

Rasul 20:35

Na pil dolamsa ap, na winilamse ning ap, deice arye peterelamsise. Pia teleb ning ara, anyuk. Na ikin pil dolamse touk, nun ato pil dobibya deice arye, bona utotoa talina kum ninye, ap, mitang ninye ap, ati melinamabe. Aning ababye peterelamsise. Nun tukak unamap talak nirya ara, Yesus el nyapsuk yupu ara, pia dib tenenamabe. Ara, ‘Sikce nun arepsiceura, mitik-mitik kanye delinyap, bukni, nunce yuk nang ati aribibyopura, pia weik kanye delisulule. Pia teleb ning ara, yuk nang arena ati, mitik malye ning ara, nun dolona atia.’ Utenenauk unamlulume.” Paulus arye, Efesus mutuku diba tenebik nang, sik deiyok nang yukubukura, Miletus mutuku yayikura, ayupu nirya laka nyabuk.

Yohanes 6:33

Anyapmasina ara, talye ati kume. Deiyok ara, Allah el im deice roti atonun ning ara yuk ning kume. Ara im deice arye tukwak mutuku yanuka ulamlirye, ninye mutuku-mutuku nirya ati, kam una deiyok ning arilya deiyoknye el uka. Elda roti kwaning atonun ululnye.” Yesus arye nyabuk.

Matius 3:15

Nyabuk bukni, Yesus arye tamubuka nyabuk. “Kume, Allah arye nunti, ‘Winibuka diksukumuk unamake’ tenepsuk touk, diksukum ninguk wininuyaba ati, wini talak ance mek dongopnilyame,” nyabuk. Nyabukura, Yohanes arye telebe nyabuka Yesus mek dongobuk.

Lukas 2:49

Nyabukopura, Yesus arye tamubuka nyabuk. “Yata ati, na ni ap, na nin ap anggun bitinye nati enudurum do? Adip aryuk na ni Allah el aik unmana ara, kum tenepmanurum do?” nyabuk.

Yohanes 8:29

Tonda ayupu nyapsine. Na dopdeipnuknye bira, el ap, na ap tuba neika unyame. Minyuma Nirya talak nirya, narye el kanye deililul ninguk pil donuna anya arye, na ni birye kum batakanulul ati, na yuk kum unune.” Yesus arye nyabuk.

Yohanes 19:28

Yesus daunmoka ani, ura, ‘Aning-aning nirya akunum winipmaniake,’ tenebukce, tonda, ‘Minop talak nabi nang arye, Allah yupu sekamik ning ara, atalak nong upnul’ tenen, ayupu nyabuk. Yesus arye, “Na mek patapnile,” nyabuka morobuk.

Matius 9:19

Moronmokba, Yesus ap, el melin nang ap, amoronmoknye ap, neika banmekce, Yesus dam dana-dana nirya langdipmekce banmek.