Yohanes 19:31 - Eipomek

³¹ Ura, Yesus dibuk sum ara, talye sum kume. Asum ara, sik Yahudi yala ninye arye, weik Kaplina ati Kwalina sum ati, Kintilin Sum nyalamik. Ambusumto ara, weik mambul Sabat sum upnamuk anya arye, utenebik. ‘Kume, wanwanun yo deice deipmangu nang kum dibicopura, sik nong ara, nun mambul sum, Sabat sum noutamak ara, wanwanun yo deice tuba una ara, pia malye,’ tenebik. Winibuka tenebika ati, sikce Pilatus ati morobik. “Pilatuso, wanwanun yo deice deipmalum nang ara, tuba kam unmakiba, ambusum nun mambul sum, Sabat sum noutamak wanwanun yo deice tuba ubicopura, nun like. Ati, ‘Anang minopce dipnamak’ tenen, sik keil yok ceplyopura, minopce dipnamakca. Anang akunum dibicopura, sik nong dobuka, yukak deiptume,” nyabuka morobik.

Yohanes 19:31 Referans Kwoze

Yohanes 19:14

Pilatus arye aning deice bukuk sum ara, Kaplina ati Kwalina kintinin sum nyalamik. Keting ara, keting dukduk arye nyabuk. Pilatus, yupu bokolina deiyoknye bulamak ning deice bukukce, nyabuk. “Anggun Yahudi yala ninye, anggun weik ninye deiyoknye, Raja Yesus aunmala atia,” nyabuk.

Yohanes 19:42

Sik Yahudi yala ninye weik kwalina sum ati, kintinina sum akunum ubuka anya arye, ‘Ambusum ara, apil ton kum doptibye,’ teneprikce, akeil deiya dam ubuka anya arye, Yesus el nong dobuka, asukumuk dongoprik.

Markus 15:42

Yahudi yala nang arye Allah si erena ati, ‘Pil dona kum aniryuk, dikdik sena ati, Sabat sum deice Allah el siuk erepnamap’ tenen, dikdik selamik sum upnamoka ati, sik kintinilamik sum akunum ubuk.

Yosua 8:29

Tonda, Yosua birye, Ai mutuku noutam ninye deiyok kibuka ulamuknye Raja bira, weik cang yo awamuk ning arye, cang tapu kitibuka, Raja Ai el ngang biribuka diripkwetebuk. Aninye deiyoknye, winibuka diripmokak arye, mangkau unmoka ani, inilamle keting ubuk. Atalak ara, awinipmuka ani, keting akunum wekuk. Winibukba, Yosua birye dipmoknye, el nong dobuka, Ai mutuku weik bisik balamikak, Ai mutuku weik bisik bublan wekelbanak uk binuka deiplobik. Winibik ning ara, sik Israel nang arye, pia weik keil arye dobuka, anye el opmika deice tam, weik tonun siknibik. Asingamik keil nirya ara, wini talak abuku sekenyak talak babye, tuba aulule.

Yohanes 19:1

Abulupmek ninye arye, “Yesus lolina kume,” nyabikura, Pilatus arye nyapdeibukura, el yin talin nang arye Yesus dobuka, el nong deice kama arye weikto onmek.

Mika 3:3

Tonda, winipmanto ara, anggunce na mapu koproba Israel yala ninye ati, sik tup noutam, aubuk ning dobuka, dipnumunye talak ara, sik aninye nirya ati, yok cebuka batakmumce, sik tup kulolulume. Tonda, sik bol nirya sekuka, batakalulume. Winipmanto ara, basam tup toubukabikirye, makau pum bisik dongolamak touk winilulume. Aning atonun, basam toubuka mitik-mitik kibuka, yangalin ning, el si ara kuali deice arye, dabuka dilamak touk, anggunce na mapu koproba ati, winibuka dilulume.

Amsal 12:10

Talima telebnye birye, teleb kibuka ulula anya arye, el basam do, el weilul ning nirya ara, teleb ubuka weilula ati, telebuk unamake. Bukni, malye winin ninguk talibuka ululnye bira, ‘Teleb winipnamne,’ teneplirye, pirilul bukni, teleb un ning kum winipmanto ulule. El kanye talimak ara, yu un ninguk winilula ati, el winilul ning nirya ara, ninye oldan nang atonun ulule. Elda, yuk ninye nirya ati, malyeuk kililule.

Keluaran 12:16

Nyabukopura, ayupu ton nyabuk. Anggunce minyuma sum ap, tonda tekbarye sum ap ati tenibuka, anggun nirya tonokak bulupnamlume. Ara, nati kibuka si eren sum ap, na si erena ap ati, bulupnamlume. Ati ara, anyapmasin sum, like bitinye ara (tanggal 1 ap 7) anggunce talye mangkau asa pil kum donamlume. Ati, anggunce din ning dinamlum ninguk, kentinipnamlume. Yuk aning-aning nirya ara, pil dona meme.

Matius 27:62

Yesus akunum dibukura, sik nirya daulamika ani, mapmeka Sabat sum lukunyan berekuk sum ara, sik Yahudi yala ninye arye, Kaplina ati Kwalina deiyok koulamik sum ubuka ati, sik Farisi nang ap, Allah arena ati deiyok nang ap arye, Pilatus el dam ayupu nyalbiyik.