Yohanes 17:24 - Eipomek

²⁴ Winibuka morobukopura, ayupu ton nyabuka morobuk. “Naio, ance aning-aning nirya ap, tukwak mutuku nirya ap, min kum kwepdeiplum talak ara, ance nati weik arye kanye talima areamnulume. Winibuka talima areamnuluma ati, weik mambulnye kipdeipnulumce erepdeipnulumba, na si weik arye kibuka si erenamake. ‘Aning nirya pia teleb kipdeipnulumnye bira, na mapu arye eipkitingce kel bikiting’ tenen, moropkine, naio. Ara, ‘Aning nirya eipnamak’ tenen, ance areamnulum ninye, ‘Na mapu nirya ap, na ap, na unamne mutuku neika unamap’ tenen, moropkine, naio.

Yohanes 17:24 Referans Kwoze

Yohanes 17:5

Wini talak, na ni Allah, pia teleb kipdeipniminba, an dam noutamak ara, pia dirina weik ap, teleb winina ap, akunum wininyopura, na si erebuka kinamniyake. Ara, tukwak mutuku nirya min kum kwepdeialum talak, pia teleb ap, dirina weik ap, ulamsibuk, na si weik arye kibuka si erelamnik touk, wini talak babye, ‘Ance pia teleb kipdeipniminba, na si erebuka, weik arye kinamniyak’ tenen, na ni anti moropkine. Yesus arye ayupu nyabuka, el li Allah ati morobuk.

Yohanes 12:26

Yata ninye do nirya, na amu tam bukuka, na yupu kekebikirye, na pil ati dokcopura, na unye touk adiparyuk wininamake. Na ban bisikuk adiparyuk melinamniyake. Tonda, na unun mutuku nirya, na mapu unamake. Na amu tam bukuka, na yupu kekebikirye, na pil ati donilinye biti ara, na Ni Koprop Allah arye, anye erebuka teleb kipdeipnamle.” Yesus arye nyabuk.

Yohanes 14:3

Anggun asik kintinilbinamna anya arye, dipkoprop tuba tamubuka tonap dolyamsine. Ara, ‘Na ap, na mapu ap, tonok akuk neika pia unamap’ tenen, dolyasinirye, na unamnak dobinamsine.

2 Korintus 4:6

Allah arye, “Kuna noutamak arye, dirina unamle,” nyabuk. Ayupu nyabuknye Allah, elcuk nunti pia mambul ning arepsuke. Ara, nun kanye talima noutamak, el dirina ning arepsuka deice arye, Allah el pia teleb ulul ning ap, pia teleb winilul ning ap ara, bikinyabe. Allah el pia teleb ulula ara, Yesus Kristus el winilamuk ning kel kibibya deice arye, laka usilibuk, bikinyabe.

1 Yohanes 3:2

Na kayapu na kanye deipsine. Wini talak ara, Allah el mapu unyabe. Aminyan nun nonge unamaba ara, min kum laka nyapsike. Bukni, nun kele. Yesus el yanamle talak ara, el nong babye, el ulul ning babye, dipkoprop ulye touk eipnamaba ati, nun babye el ulye touk unamabe.

Kejadian 45:13

Ati anggunce na ni dam bimunce, nyapnamlume. ‘Kume, sik Mesir mutuku nang arye, nun weit koproba Yusup biti, weik arye si erenyake,’ nyapnululume. Anggunce amutuku noutam eipmalum ning nirya ara, na ni biti laka nyapmunce, el bobuka na mutuku boyanamnulume.” Yusup birye, el du yapu ati nyabuk.

2 Korintus 3:18

Tonda, nun nirya ara, nun urasin lelina kum, kimilana deice arye ninye urasin elilamak touk, nun ubya deice arye, yuk ninye arye, Yesus el winilul ning elinyake. Ara, nun Deiyoknye Yesus Kristus, el pia teleb ulye touk eibikirye, kel bikinyake. Nun Deiyoknye Yesus ara, Allah El Dib Kanye eluk ulule. El pia teleb ulya deice arye, nun talima pum tam pil dosilirye, el teleb ulye touk, nun babye atonun teleb ulisulule. El ulye touk teleb winilisilye talak nirya ara, teleb winipnin balamibya ani, aminyan ara pia teleb wininamabe. Anirya ara, Yesus Kristus aniryuk, teleb ulisulule.

Matius 25:21

Nyabukopura, el deiyoknye birye tamubuka nyabuk. “Telebe, anda pil pia batakna kumce, teleb ubuka dolamnulume. Na mitik anunuk areamkisibuk, pil batakna kumce, teleb ubuka pil dolamnuluma ati, wini talak na talyamse ning weik arye arepnukine. Na ap, an ap, kanye deipdanimirye, teleb ubuka neika unamname,” nyabuk.

1 Tesalonika 4:17

Im deice ei, tukwak du noutamak ara, sik min deiamik nang akunum welebicopura, sik kam tuba tukwak aunmace ninye ara, Allah arye aninye dobuka, erebuka deiplibuk, sik min diamik ninye ap, nun Deiyoknye Yesus ap, dua kan-kan noutamak adiparyuk eibdanamake. Anirya akunum winiplyopura, nun nirya Allah arye dobuka bisilibuk, im deice Allah ap neika pia unamabe.

Lukas 12:37

Yata nang do nirya, ‘Nun deiyoknye yanul do?’ tenen, dinmakibuk, el yalyopura sik deiyoknye birye, anang ati kanye deiplirye, teleb ulilule. Anye birye el pil melina nang ati, kanye deiplirye, pil don ongon baju ongoplirye, el melina nang ati, ‘Dina dinak bulyalulume,’ nyaplirye, sik din ning ati arepnamle.

Wahyu 3:21

“Malye winin ning nirya ati, ‘Nun like’ tenen, malye kilamice ninye ati ara, weik ninye deiyok ning arepniba, na weik deiyoknye buna ning deice ara, na ap, sik ap, neika bunamabe. Aning ara, narye malye winin ning nirya ati malye kipsirye, na Ni Kopropa Allah, el deiyoknye ulul ati bulul sukum deice, el ap neika bunyam touk ati, nyapsine. Aning ara, narye malye winin ning nirya ati malye kipsirye, na ni Allah el deiyoknye ulul ati bululak deice, el ap neika bunyame. Anggunce malye winin ning batakmunce, diksukumuk upmunyopura, na ni ap neika bunyam touk, anggun ap, na ap, neika bunamtibye nyapsine.

1 Korintus 13:12

Ayupu nyapmasina ara, deiyok ani. Mek kwen pum bisik dipdekirye, sik mining urasinuk yalyopura, kanya eibikirye, mitik teleb ubuka elilamak touk, wini talak ara, aning-aning nirya mitik anun kanya atonun elinyabe. Bukni, ninye epdanduka miningdam epdakirye, pia teleb ubuka urasin laka elilamak touk, aminyan sirya talak ara, aning-aning nirya lakak aryuk eibibirye, teleb ubuka nong noutamak ning moubuka kel kipnamabe. Wini talak ara, mitik anun bikamse, ton ning ara, kum bikamse bukni, Allah arye nati, na wininye ning ap, tenenun ning nirya ap, teleb ubuka kel bikinilye touk, aminyan sirya talak ara, na babye aning-aning nirya, moubuka kel bikuka unamne.

Matius 26:29

Nyabukopura, ayupu ton nyabuk. “Na dipkoprop nyapsine, wini talak arye deiyok koubuka, noutamak talak ap, doyanamle talak ap, anggur mek tonap pia kum dinamne bukni, Allah arye el wiamuk ninye lyeplirye, aninye ap, aning-aning nirya ap, talinamle talak akunum uplyopura, nun nirya im deice wekeipyobirye, atalak aryuk, ila tonap anggur mek dipnamne.” Yesus arye nyabuk.

Matius 25:34

Deipnyopura, na Raja unamna ati, na sirik taruk tam deipnamne ninye ati ayupu nyapnamne. Sikda na ni Allah arye talima aribukba, bico tenebuka kanye deilisilye ninye ara, na dam wekelyalulume. Allah arye aning-aning nirya min kum kwepdeiyamuk talak arye, ‘Anang aryuk talinamak’ tenen, akunum kintinibuka deiamsuk ning ara dolyalulume.

Pilipi 1:23

Na kam una babye, dipna babye, ara telebe anya arye, na kanye teniltonauk unune. Pia weik teleb ning ara, ‘Na diptinyeura, tukwak mutuku batakuka, Kristus ap, ansinibuka, nun neika unamtinimnye’ tenen, patanulule.

2 Korintus 5:8

Arup nyapmasin touk, nun kanye teniltona kum aniryuk, dib tenebuka lamapdongobuka unyabe. Nun kanye patapsilye ning ara, tukwak ninye nong unyaba ara, dawaptubuk aning batakuka, nun Deiyoknye Yesus ulyak neika uptibyetoura, ‘Aning ara, pia telebe,’ tenenyabe.

Lukas 23:43

Nyabukopura, Yesus arye ateleb yupu nyanmoknye biti tamubuka nyabuk. “Na dipkoprop nyapkine. Arup aniryuk, na ni dam, pia teleb ak weknye talak ara, an ap na ap neika pia unaname,” Yesus arye nyabuk.

Yohanes 1:14

Yupu nyalamapnye bira, ninye nong atonun dayukce, tukwak mutuku yayukura, nun kan-kan noutamak neika ulamubu. El pia teleb ubuka ulamukba, elilamubu. El pia teleb ulula ara, talye ati kume. Ara Allah el Mi Koprop tonok ululnye bira, el uka. Allah el Mi Koprop ulamukce, el dipkoprop una ap, el dipkoprop yupu nyana ap, el kanye aryuk tukwak ninye ati bico tenebuka, pia melina deiyok ning ap, anye deice weik arye uamuk. Nun ni koprop Allah arye anye bira dopdeipsukba, pia telebuk ulamukak, elilamubu.

Wahyu 21:22

Anyasik Yerusalem Winiryuk ning noutamak nirya dipdese bukni, Allah el si erena aik ton kum domika ati, anyaik ton kum ubuk. Aning-aning nirya deice tam ulul weik mikipnye Allah, nun Weik Deiyoknye ap, Domba Mi Atonye ap, anyasik noutamak ururakba, im deice unyak ninye arye, ‘Sik si erepnuyap,’ tenebice talak nirya ara, adiparyuk talye luparabuka erenamaka ati ara, sik si eren aik kum patalula ati, anyaik ton kum domik.

Matius 25:23

Nyabukopura, el deiyoknye birye tamubuka nyabuk. “Telebe, anda pil pia batakna kumce, teleb ubuka dolamnulume. Na mitik anunuk areamkisibuk, pil batakna kumce, teleb ubuka pil dolamnuluma ati, wini talak na talyamse ning weik arye arepnukine. Na ap, an ap, kanye deipdanimirye, teleb ubuka neika unamname,” nyabuk.

Yohanes 6:37

Yata ninye do nirya, na ni koprop Allah arye arinilye ninye nirya ara, nati dib tenepnikirye, na dam yanganamniake. ‘Elcuk lyepnamsil’ tenen, na dam yanganamniyak ninye nirya ara, ‘Sikda na lik,’ nyabuka kum batakanamne.

Yohanes 6:39

Dopdeipnuknye, ‘Wininamle,’ tenyamnuka ara nyapnusine. Ara, na Ni Koprop Allah arye, ‘Aninye nirya ara, na mi ati arenamne,’ tenyamukce, wibuka areamnuk ninye nirya ara, tonok babye kum wangapnamnile. Tonok ning babye, kum winipnitinge bukni, sirya talak ara, ‘Aninye nirya ara, pia kam unamak’ tenen, sik nirya kam bukeibuka ereipnamne.

Yohanes 8:58

Nyabikba, Yesus arye nyabuk. “Kume, pia dipkoprop yupu deice arye nyapmasine. Abraham min kum deiamik talak ara, na akunum ulamse. Pia ununye bira na uka,” nyabuk.

Yohanes 15:9

Na Ni Koprop Allah arye, nati kanye talima deipnukce arenulul touk, narye anggun na mapu ati, talima aresunune. Wini talak ara, narye anggunti bico tenebuka melisunun noutamuk, tuba unamlume.

Yohanes 17:2

Ance nati, Weik Ninye Deiyoknye winina deiyok ning arepnulum deice arye, ninye mutuku-mutuku nirya ati, sik deice tam upniba, sikda na amu tam unyake. Winibdeipnuluma ara, talye ati kume. Ara, ance, ‘Na akunum wipdeiyamse ninye, na mi ati areamse ninye nirya ati ara, bol koplobuka pia kam una deiyok ning arenamle’ tenen, ance nati, ninye deiyok ning areamnulume.

Yohanes 17:22

Nyabukce ayupu ton nyabuk. “Naio, an ap, na ap wininyam touk, ‘Aninye nirya arye talima dukdongobuka, tonok kanye bobuka telebuk neika unamak’ tenen, ance pia teleb kipdeipnulum touk, narye aninye ati akunum teleb kipdeipse.

1 Peterus 1:21

Yesus pil dopsukce, melisilya deice arye, Allah diba tenelulume. Yesus dibukura, Allah arye kam bukeibukce, weik dirina ap, mambul una ap deice arye, ereibuka ati, anggunce Allah ati diba teneplulume. Diba teneplumce, ‘Allah arye wininamsile’ tenen, kintinibuka dinauk ululum ning ap, ‘Allah elcuk melinamsile,’ tenena ap ara, anggun kanye talima Allah el deiceuk deililulume.