Nyabukce, ayupu ton nyabuk. “Ikin kanye bona kumce, kanye deibuka yuk nang ap neika teleb una ati, deiyok ning aresunune. Sik diba tenena kum, talye tukwak ninye arye, yuk nang ati, tenebuka arye arenyak touk, kum aresunune. Ikin kanye bona kumce, teleb kanye bobuka, teleb una deiyok ning aresunun ning ara, na ninguk aresunune. Aning ati ara, anggunce, ‘Se,’ tenen, ikin kanye bona ap, ilil una ap, ikin kanye bobuka bouku sukuna ap, aning nirya kum unamlulume. Ilil asa kum aniryuk, kanye deibuka telebuk unamlulume.” Yesus arye nyabuk.
Yohanes 16:33 - Eipomek33 Aning-aning nirya, min nyapmasina deiyok ara, ‘Sikce nati diba tenepnikirye, na ap, na mapu ap, kanye talima dukdongobuka neikauk ubibyopura, sik ikin kanye bona kumce, kanye deibuka telebuk unamak’ tenen, ati nyapmasine. Tukwak mutuku noutamak unamlum talak nirya ara, ikin ning ap, kanye imun ning ap, unamsile. Bukni, bouku sukuna kumce, kanye deibuka lamapdongobuka unamlume. Ara, tukwak mutuku ulul ning ap, tukwak mutuku unyak ninye ap nirya ara, narye akunum malye kibuka bisipsirye, sik deice tam akunum ununa ati nyapsine.” Yesus arye el wipdeiyamuk nang, sik 12 nang ati nyabuk. Gade chapit la |
Yohanes 16:33
46 Referans Kwoze
Yata ninye do, nirya, sikce diba tenebikbuk, Allah arye sik talima kam bukeibuk ninye nirya ara wininyake. Ara, talye diba tenena kum ninye, sik wininyak ning ap, tenen ning ap, patalamle ning ap, diba tenena ninye arye, aning nirya yaniptabik. Allah diba tenenyak nang arye, tukwak malye ning ara, akunum yaniptabik ati, ‘Allah el yupu nirya dobolbana ara, ikine usulule,’ kum tenenyake. Allah el yupu uk dobolbanyake. Allah arye sik kanye tenen ning ap, talima ap, akunum kam bukeibuka ati, Allah el yupu kanam aryuk dobolbanyake. Ikine kume. Amalye winina nirya yaniltana deiyok ning ara, nun diba tenebibya deice aryuk, aning nirya bisibuka yaniltanyabe.
Ara, Allah ara ikin una ap, oldana ap, kum arye, pia telebuk ubuka, kanye deibuka una deiyoknye, elce anggunti, atalak-atalak nirya ap, anggun winin ning noutam nirya ap, ‘Kanye deibuka teleb una deiyok ning pia arenamsil’ tenen, Allah morosunune. Tonda, ‘Allah arye, anggun melipsilibuk, el ap, kanye talima dukdongobuka neika unamak’ tenen, Allah morosenyabe.
Na mapu atonun nango, anggunda Allah ati, diba tenebuka taliplum nang ara, anggun talima ak usilinye, Allah, el mikip pia weik ulule. Bukni, tilila yupu peterenyak nang nirya, sik talima ak ulirye, talilinye bira, Isa Mutuku Dongonye, el mikip mitika. Ati ara, Allah el mikip deice talisilibuk, ululuma anya arye, Isa Mutuku Dongonye, el talilye nang nirya, akunum yanibuka bataklulume.
Allah pia morolamunyopura, Allah arye kanye teleb bobikirye kanya, lamabuka dakiyam asa un ning arenamsile. Kanye tunim abuka una deiyok ning arisilya deice arye, anggun ap, Yesus Kristus ap, kanye dukdongobuka unamlulume. Atalak nirya ara, anggun ilil una kum aryuk, mankau kanye bobuka telebuk unamlulume. Allah arye, ‘Kanye teleb bopnamak’ tenen, teleb un ning aresilya ara, talye ninye kanye aniryuk kum kel kiptibye.
Winisulula ati, lik tenebuka bisipmunce, malye kinamlulume. Ara, anggun diba tenelulum touk, mutuku-mutuku nirya diba tenenyak ninye ara, anggun ikin usilye touk, aninye nirya babye, ikin ulule. Aning ara, anggun akunum kel kiyamluma ati, anggun akunum diba tenyamlum ning tunim abuka, talibuka umunyopura, Isa Mutuku Dongonye ati, lik tenebuka bisipmunce, malye kinamlulume.
Yesus arye el wipdeiamuk nang ati nyabuk. “Anggunce mambul kanye bobuka talima bouku sukuna kum unamlume. ‘Allah elce, melinamsil’ tenen, diba tenebuka anggun kanye talima el deice delinamlulume. Tonda aning atonun, nati, ‘Elce melinamsil’ tenen, dib tenebuka, anggun kanye talima na deice delinamnulume.
Malye nang arye, ‘Allah yupu nun lik’ tenen, ikin ning weik na nong deice deiamnik ning ara, na tonok kume. Dipkoprop ning ara, yata nang do nirya, ‘Yesus Kristus ap, kanye dukdongobuka Allah yupu nyasilye touk, nun diksukumuk unamyabe,’ tenenyak nang nirya ati, malye nang arye sik nong deice ikin ning delinamake.
Aminyan talak, amutuku winilye Listra mutuku ap, Ikonium mutuku ap, Antiokia mutuku ap, Yesus diba tenebik nang ati amutuku tamubuka peterepra balamrikce, anang kanye talima kwa dilamrik. Anang talima kwa dilamrik akarye, amutuku nang Yesus diba tenebuka pia talibik ning ara, atalibika atonun, ‘Pia kanye lamabuka unamak’ tenen, sik kanya talima kwa dilamrik. Winilamrikak arye ayupu nyaprik. “Nun diba tenenyap ninye Allah aryuk, pia talipnamsil talak ara, ikin ning pia weik ulamsilya noutamak arye Allah el dam weknamabe, talye parapkabuka kil-kil kanye bon deice aryuk kum wektibye,” nyaprik.
“Malye winin ning nirya ati, ‘Nun like’ tenen, malye kilamice ninye ati ara, weik ninye deiyok ning arepniba, na weik deiyoknye buna ning deice ara, na ap, sik ap, neika bunamabe. Aning ara, narye malye winin ning nirya ati malye kipsirye, na Ni Kopropa Allah, el deiyoknye ulul ati bulul sukum deice, el ap neika bunyam touk ati, nyapsine. Aning ara, narye malye winin ning nirya ati malye kipsirye, na ni Allah el deiyoknye ulul ati bululak deice, el ap neika bunyame. Anggunce malye winin ning batakmunce, diksukumuk upmunyopura, na ni ap neika bunyam touk, anggun ap, na ap, neika bunamtibye nyapsine.
‘Teleb ning ara, Mesir mutuku nang arye, Allah el na tenen ninye, Israel ninye nirya ati, ikin ning sik nong deice delilamak touk, na nong deice delina babye telebuka. Malye wininyak ninye arye kanye deibuka, malye-malye wininyak ning ara, tia talak ati, na ap winiptibye bukni, aning ara teleb kum ati, kum wininamne,’ tenyamuk.
Asipdenukbuk, narye, “Na walwal bukni, anda kele,” nyapse. Nyapsiba, anye birye ayupu tamubuka, laka nyapnuke. “Kume, sik aninye ara talye nang kume. Sirya talak noutamak ara, malye nang arye, Allah el mapu nirya ati, ‘Nun like’ tenen, ikin ning pia weika arye, sik nong deice delilamikba, imun kanye weik bolamik bukni, Allah pia kum bataklamik. Kanye darapdongobuka, Allah elti, diba tupa tenelamik. Domba Mi Atonye obikba, el ining biyuka deice arye, sik malye winin ning nirya kum kipdeibukce, pia diksukumuk kipdeibuk. Winipsuka ati ara, sik nirya arye pia teleb koprop kurun baju ongopmake,” nyapnuke.
“Allah el mapu nirya ara, Domba Mi Atonye, el ining sik lyena ati arebuk deice arye, Isa Mutuku Dongonye malye kibik. Tonda, aninye arye, “Ninye lyena ati laka teleb yupu ani,” nyabuka lak akarye, peterelamika deice arye, Isa Mutuku Dongonye malye kibuka nirya obik. Aninye nirya arye, ‘Kume, nun kam unyaba ara weik mambule, nun kam una ara nun dokola ati ara, opsicak ati, Allah yupu nyanyaba ara bataknuyabe’ tenen, ilil kum ulamuk. ‘Malye nang arye opsica babye, telebe uka,’ tenelamik. Aning nirya winilamika deice arye, Isa Mutuku Dongonye ati, malye kibuka ulamik.
Allah ara, pia telebnye ulula anya arye, yata ning do nirya, tukwak mutuku ubuk ning do, im deice tam ubuk ning do, aning nirya ap, Allah ap, neika kum upmanto ulamuk bukni, Allah arye, ‘Aning-aning nirya teleb kipnirye, na ap, dukdongopnyopura, teleb kibuka neika unamabe,’ tenyamuk. Utenyamuk ati, Allah arye Yesus wipdeibukura, Yesus el pil wanwanun yo deice pil dopsuka deice arye, aubuk ning nirya ap, nun ap, Allah ap, akubuka dukdongopdeipsuke. Minop talak ara, im deice ubuk ning ap, tukwak mutuku unyap ninye ap, Allah ap, neika kum upmanto ulamubu bukni, Allah arye Yesus wipdeibukura, el pil dopsuk deice arye, akunum akubuka dukdongopdeipsuk ati, wini talak ara, Allah ap, neika uptibye. Yesus arye nun malye ning lyebuka, teleb kipdeipsukce, Allah ap kanye talima dukdongopsuk ara, wanwanun yo deice dibukba, el ining biyuka deice arye, teleb kipdeipsuke. Aning ati ara, Allah arye nyapdeibukura, Yesus lyepsukce wini talak ara, nun Weik Deiyoknye ulirye, talisulule. Tonda, Yesus ara, aning nirya deice tam ulirye, weik mambulnye ulule. Yuk ning nirya ara, el amutamuk ulule.
Ara, Yesus dib teneluluma ati, nun du weit atonun ululum ninyeo, anggun sal babye, kilapu ababye kekepnululume. Narye anggunti, ‘Se, winibuka, winibuka winipting’ tenen, patapnil ning ara nyapsinibuk, anggun kekebuka wininamlulume. Ara, ‘Allah arye nun malye winin ning nirya kum daneipsuturye, pia diksukumuk updeipsilibuk, kanye talima wisipnamsile’ tenen, patasilibuk, unamlulume. Tonda, tonok kanyeuk tenebuka, teleb ubuka neika unamlulume. Walana ap, oldana ap, malye winilana ap kumce, nimalye arye teleb ubuka neika unamlulume. Aning-aning nirya akunum upmunyopura, nun Ni Koprop Allah ap, anggun ap kanye talima dukdongobuka unamlulume. Anggunti bataksilirye, el Allah yuk kum unamle. Allah elda, yuk nang ati bico tenebuka melildana deiyok ning aresulule. Tonda, nun ap, yuk nang ap, kanye talima namin ubuka teleb ubuka neika una ati, deiyok ning aresulule. ‘El ap, anggun ap neika unamlum’ tenen, Allah morosunune.
Narye yata ning do nirya, kanye deipnirye merkapang kum donamne. Bukni, tonok ning atibuk, si erebuka kanye deipnirye, merkapang donamne. Ara, nun Deiyoknye Yesus Kristus wanwanun yo deice obikura, nun lyena ati dipsuk ning ati, kanye deibuka, pin-pin asa arye merkapang donamne. Yuk ning nirya ara, pia kume. Yesus Kristus wanwanun yo deice obikba, nati dipnuk ara, na ap dukdongopnukce, na malye ulamse ning pununa ati dipnuke. Na lyena ati akunum dibuka anya arye, adeice arye na kanye ara ani. ‘Tukwak mutuku ulul ning, malye ning nirya ara, nati ara, aning nirya akunum kum danmala anya arye, na talima lipropnuturye, malye kum kipdeipnutue,’ tenenune. Tonda, ‘Na tenenuna ara, tukwak ulul ning, malye ning nirya ara, pia kum patanamnile’ tenen, unune. Nara, akunum dibikce ninye nirya kum patalamle atonun unune.
Kume, na Paulus arye anggunti, pia teleb kanye deipsisirye, teniltona kumce, ‘Aninye ara teleb nang,’ tenesunune. Yuk mutuku ninye ati, ‘Sik Korintus ninye ara, pia telebe,’ nyabuka laka nyanune. Anggun winimunya ati ara, tenepnirye, na teleb kanye bobuka unune. Tonda na talima melibuka kwa dinululume. Ikin ning usilya noutamak babye, narye anggunti, tenepnirye, pia teleb kanye bobuka, pin-pin asa arye unune.
Atalak ara, Asyur mutuku ninye babye, Nimrod mutuku ninye nirya babye, ‘Israel ninye opnamap’ tenen, sik Israel yala ninye unamak mutuku yanuka weknamake. Bukni, winibuka wekicopura, Israel ninye arye sik Asyur mutuku ninye ap, Nimrod mutuku ninye ap ati, obikirye bisipnamake. Ara, Asyur mutuku nang obuka dakna ati, Allah arye wipdeipnamle mikip weiknye birye deiyok kiplirye, Israel ninye arye Asyur mutuku nang nirya ara, malye kibikirye, parang ya dobuka, sik Asyur mutuku ninye bobuka, amu tam delinamake. Tonda, Nimrod mutuku babye, ayin talin nang arye, parang ya arye obuka sirya dakikiba, aninye sik amu tam deibikirye, sik mutuku talinamake. Winibicopura, sik Israel ninye nirya, telebuk ubikirye darabuka, kat asa unamake.
Allah el pia mikip weik ulula ati, winipmanto ara, ninye olyangana ati, kuda basam arye libuka, tuku deice balamle ning, el si ara kereta perang, yupa pia weik ribuan aulula ati, nunce kum nuktibye. Akereta perang ap, Allah ap, Sinai mutuku arye batakuka, Yerusalem mutuku noutam bukni, el pia teleb lek unamle aik dam ara, akunum yanmale. Allah bira aning-aning nirya talibuka, mikip weik ulya deiyoknye ulule.
Nun Deiyoknye Yesus Kristus arye, ‘Atalak malye-malye wininyak ninye ara, sik malye wininyak ning ap, malye tenenyak ning ap deice arye, na mapu malye kipdeibicak’ tenen, ‘Sik malye wininyak ning noutamak arye lobuka lyepnamle,’ tenyamukce, nun malye wininyap ning kilina ati, el babye el bidamang nong arepsuke. Yesus arye nun dekna ati, el nong arepsukba, malye nang arye obikba, nun pununa ati dibuk. Ara, nun malye wininyap ning wenena ati, Allah arye talye luba kibuka oplopsutu bukni, ‘Aninye wenebuka kum oplopnamne,’ tenyamukce, Yesus arepsukba, nun pununa ati dipsuke. Aning nirya ara, nun Ni kopropa Allah arye Yesus ati, ‘Wininamle’ tenen, wipdeiyamuk touk, Yesus winibuka deice arye deksuke.
Winibikce, aminyan talak, sik Yudea tam ap, Galilea tam ap, Samaria tam ap, Yesus diba tenebuka ulamik nang ara, sik diba tenena kum nang arye, ikin ning kum delilamik ati, teleb kanye bobuka ulamik. Atalak ara, Allah El Dib Kanye arye, Yesus diba tenelamik nang nirya ati, sik kanye talima mikip kipdeibukce, melina ati teleb yupu nyalamukce sik talima kwa dilamuk. Yesus ati diba tenenyak ninye nirya ara, ‘Se, nun ni Allah weik mambulnye ulule’ tenen, elti, kibuka el si erebuka ulamikce, ‘Malye winibibiba wenepsilyak’ tenen, pia kanye moubuka ulamikce, Allah ati ilil ulamuk.
Teleb yupu nyapdeibukba, Abraham arye yuk mutuku deiyok nang obukabukce, sik bona ning weik dalubuka yayuka noutam arye, sepuluh persen (10%) bokukabikce, Melkisedek el si erena ati aribuk. Melkisedek el si deiyok ara ani. Malye una kum arye diksukum una deiyoknye ulamuka ati, el si Melkisedek nyalamik. Tonda, mutuku si Salem nyalamika deiyok ara ani. Ara, olana kum arye kanye deibuka telebuk una ati, asi ara Salem mutuku nyalamik. Ati Melkisedek bira, Salem mutuku deiyoknye ulamuka anya arye, el si Raja Salem nyalamika deiyok ara, elda kanye deibuka, teleb una deiyoknye ulamuka ati asi nyalamik.
Ura, na ni birye, weik malye winina deiyoknye, Isa Mutuku Dongonye ati, yupu lipsisikuka wenepnamle. Isa Mutuku Dongonye, tukwak mutuku nirya talibuka, weik malye deiyoknye, ulamle bukni, na pil dopnamna deice arye, Isa Mutuku Dongonye bisibuka opnyopura, el kum danamle. Ati Allah El Dib Kanye arye, Isa Mutuku Dongonye el amu tam unyak ninye ati, wenepnamle. Yesus arye nyabuk. Nyabukopura, ayupu tonap nyabuk.
Yesus wekuka bulbiyuk aik unmokce, peterenmok talak ara, dumbarye nang pala yo deice arye, nong nirya meiyal semuknye, binmanto kumnye, baya wibuka boyayik. Sikda, ‘Yesus arye anye kweteptue’ tenen, boyanmaka deice arye, Yesus ara, ‘Na ti dipkoprop diba tenepmaniyake,’ tenebuka kel kibukce, anye min kum kwetebuk talak arye, ameiyal semuknye biti nyabuk. “Na mio, an malye teneminye ning ap, malye winiminye ning ap, kum daneipkinirye, namin kipnamkine,” nyabuk.
Allah ati, “Telebe,” pia nyanune. Ara, ton tam ninye arye, ton tam ninye ati obisibikirye, anang tomobikirye, kanye deibuka, lubuka, anang bolbalamak touk, nun Ni Koprop Allah arye, nun nirya ati, akunum talisulule. Talisiliba, ‘Yesus Kristus, el amu tam unamak ninye, elce bobaliba, sikda el aminyan tam yangakirye, ninye nirya eipnamak’ tenen, Allah arye nun dib tenenyap ninye dopropsukce, Kristus el amu tam akunum deipsuke. Teleb kita ning arye tong teleb ning balibuk, ninye kekelamak touk, Allah arye menekuka balirye, nunda el aminyan tam yangapyopura, elce melisilyeba, nun ap, Yesus ap talima dukdongobuka unyaba deice arye, ninye mutuku-mutuku nirya eipsikirye, Kristus ati kel bikinyake.
Arup nyapmasin mambul ning, Yesus ati diba tenepmupka ati, elti moubuka tenena ati, Allah arye nunti dirina atonun ning arepsuka ara, nun mikip kum ninye unyap bukni, nun kanye talima noutamak ara, ila mambul ning, dirina weik aresulule. Winipmanto ning ara, ninye arye kira tuku dobuka, makau kintinibikirye, winiryuk arye dabuka delilamak ning, pia namin ning ulule. Aning ulye touk, nun nong babye, namin ninguk unyabe. Ara, talye ati kume. Deiyok ara, ninye nirya, ‘Allah arye, mambul ning arepsuk ning ara, mikip weik ning ulul bukni, Allah el mikip aryuk usulule. Ara, ninye mikip arye, Allah el laka teleb yupu peterenyak, kum tenepnamak’ tenen, nun diba teneyab ninye nong pum tamuk, dirina weik ning kunum arepsuke.
Malye winina pia kum aniryuk, nunda Allah el amu tam ubirye, el pil melinang unyaba anya arye, yuk ninye nirya arye, nun wininyap ning nirya eipsikirye, ‘Anang ara, teleb nang uk’ tenen, kel biknamaka ati, yatato winin ning noutamak do nirya, diksukumuk wininyabe. Ikin usilya babye, batakana kum, pia pi dobuka pil tuba donyabe. Ikine usilye ning ara ani. Kanye eito-uto winina ap, ikin upsiliba talima sukuna ap, kanye imun ning usilibuk, kanye imun kanye bobuka una ap,
Anggun dipkoprop wisi nang ara, na ni yapu atonun ululume. Aning-aning nirya min kum uamuk talak, minop arye el tonok ulamuknye, Allah akunum kel kiplume. Allah akunum kel kipluma ati, ayupu seksene. Anggun kam nang ara, Pia Malye Ululnye, Isa Mutuku Dongonye akunum bisibuka yaniptapluma ati, ayupu seksene. Tonda, na mapu atouk nang ara, nun ni Allah akunum diba tenebuka kel kipluma ati, ayupu seksene.
Piblisite