Yohanes 15:20 - Eipomek

²⁰ Nyabukce, ayupu dukdongobuka nyabuk. Na akunum nyapdeiyamsise yupu ara, tuba tenenamlulume. Ara, talye pil melin ninye ara, mitik mambul bukni, sik deiyok nang ara, weik mambul unyake. Yuk nang arye deiyok nang ati wininyak atonun, adeiyok nang sik amu tam unyak ninye ati ara, atonun wininamake. Ati, na talye kum nyapsine. Sik malye nang arye, nati, malye yupu nyabuka na nong deice ikin ning weik delilamnike. Aning atonun, anggunda na amu tam ululum ninye ati ara, malye nang arye anggunti, ‘Anang ara, nun lik’ tenen, malye yupu nyabuka, ikin ning anggun nong deice delinamsiake. Bukni, na yupu kekebuka dobolbalamak ninye ara, anggun na mapu nyalulum yupu babye, kekebuka dobolbanamake. Na yupu kum kekenyak ninye ara, anggun na mapu nyalulum yupu babye kum kekepnamake.

Yohanes 15:20 Referans Kwoze

2 Timotius 3:12

Malye nang arye, ‘Allah yupu nun lik’ tenen, ikin ning weik na nong deice deiamnik ning ara, na tonok kume. Dipkoprop ning ara, yata nang do nirya, ‘Yesus Kristus ap, kanye dukdongobuka Allah yupu nyasilye touk, nun diksukumuk unamyabe,’ tenenyak nang nirya ati, malye nang arye sik nong deice ikin ning delinamake.

Yohanes 13:16

Na dipkoprop nyapsine. Pil deiyok nang arye, “Pil doplulume,” nyabikibuk, sik amu tam pil donyak nang ara, mitik mambuluk unyak bukni, el pil deiyoknye, sik deice tam ululnye bira, weik mambule. Aning atonun, deiyoknye birye, “Na yupu dobuka laka nyalbilyame,” nyalinye bira, weik mambul ulul bukni, el yupu dobuka laka nyalbinulinye bira, mitik mambul uka.

Matius 10:24

Nyabukopura, ayupu ton nyabuk. “Peterebiceba, kel kibice nang ara, mitikto mambule bukni, sik peterena deiyoknye bira weik mambule. Tonda, ‘Pil doplulume,’ nyabikiba, talya pil donyak nang ara, mitikto mambule bukni, sik pil deiyoknye bira, weik mambule.

Yehezkiel 3:7

‘Na nyanye yupu kekepnitinge,’ tenenamlam bukni, an kayapu Israel yala ninye ara, an nyanamlam yupu, pia kum kekenamkiyake. Ara, talye ati kume. Sikda, na Allah arye nyanye yupu babye, pia kum kekeninyake. Sik Israel ninye nirya ara, kanye tenina, kat kibuka anye arye, mandipna kanye bobuka, tatdayuk ninye unyakce, ‘Nun like,’ nyanyaka ati, na yupu babye, kekena kum unyake, nyapkine.” Allah arye Yehezkiel biti, laka nyabuk.

2 Korintus 4:9

Nun dib tenenyaba ati, malye nang arye, nun nong deice, ikin ning delisinyak bukni, Allah arye kum batakasulule. Sikce opsikiba, tukwak sakanyap bukni, sirya dakuka kum, kum daneipsitinge.

1 Korintus 4:12

Nun bidamnye taruk deice aryuk, ikin pil dobuka ulamibyopura, dikdik usiliba mitang asauk unyabe. Yuk ninye arye, nunti, malye yupu nyabuka, ikin ning nun nong deice deipsicopura, nunce tamubuka aninye ati, teleb yupu uk nimalye arye, nyanyabe. Allah el pil dopya ati ara, yuk ninye arye, ‘Anang ara nun lik,’ tenebuka, ikin ning weik nun nong deice delisinyak bukni, kwang dakna kum aryuk, talye lamapdongobuka, tuba pil donyabe.

Yohanes 8:51

Tonda ayupu dipkopropuk nyapsine. Yata ninye do nirya, na nyasinye yupu diba tenebikirye, pia talibuka dobolbanyak ninye nirya ara, sik nong dibikce babye, pia kamuk unamake,” Yesus arye nyabuk.

Lukas 6:40

Tonda, kel kin nang ara, sik peterena nang deice tam kum unyake. Bukni, peterelamica ani, sik yupu kekenyak nang, apeterenyak ning nirya akunum kele kibikcopura, sik peterena deiyok nang wininyak atonun wininyake.

1 Tesalonika 2:15

Sik Yahudi ninye ara, wininyake. Sikda nun Weik Deiyoknye Yesus ap, Allah el yupu laka nyana nang, nabi nang ap olamik. Tonda, nunti, sik mutuku noutamak arye wenebuka dopkwetepsike. Anang ara, malye winilamikibuk, Allah arye sikti, lik ulule. Tonda, yuk mutuku nang nirya ati ara, yakanyakce, oldan nang atonun unyake.

Yohanes 10:31

Yesus arye nyabukba, sik Yahudi deiyok nang kekebikce, yu weik ubukba, ‘Keil arye opnuyabe,’ tenebikce keil dobuka kintinibik bukni, Yesus arye sikti, nyabuk.

Yohanes 11:57

Yahudi yala nang, Allah arena ati weik deiyok nang ap, sik Farisi nang ap arye, ninye nirya ati nyabik. “Yata ninye do nirya, Yesus yalyeba, eipmunyopura, ‘El unmalak ani,’ nyabuka, adiparyuk laka nyalyanamsulume,” nyabik. Ayupu nyabika deiyok ara, ‘Yesus tapu koubibirye, wenebuka optibye’ tenen, nyabik.

Yohanes 8:59

Yesus arye ayupu nyabuka deice arye, sik Yahudi yala nang arye, ‘Anye bira adiparyuk opnuyap’ tenen, keil dobuka kintinipmek. Kintinipmek bukni, Yesus arye, Allah el arilamik aik dam unmokak arye batakuka, dungnubuka biyukba, sikce Yesus tonap atalak kum eibik.

Yohanes 7:32

Awekmek ninye kan-kan arye, sik Farisi nang ton wekmeka ati, aninye nyanmek yupu kekebikce yu ubuk. Yu ubukba, sik Farisi nang ap, Allah arena ati weik deiyok nang, sik imam nang ap arye, ‘Yesus tomobuka tapu koupnamak’ tenen, biyikce yupu nyapdeibikba, Allah arilbalamik aik yin talibuka kaleklamik nang arye, Yesus ati elelbiyik.

Yohanes 5:16

Laka nyalbiyukura, sik Yahudi deiyok nang arye, ‘Se, Yesus arye nun pil dona kum sum, Sabat sum arye, ninye kwetena ap, aning atonun ning ap winilula ati, aning nirya pil dona atonun anya arye, elda malye,’ tenelamikce, Yesus el nong deice ikin ning weik delilamik.

Lukas 2:34

Simeon arye sik bitinye ati, “Allah arye teleb ulinamsile,” nyapdeibukce, Maria el yuk ati ayupu tonap nyabuk. “Allah arye, ami wibuka deibuka deiyok ara, el pil dolamlyeura, Israel ninye kan-kan arye, ton nang el nyalul yupu batakikcopura, Allah arye amu tam kipdeipnamle. Ton ninye arye, ‘Diba’ tenen, kekebuka doprobikce ninye ara, Allah arye aninye lyebuka ereipnamle. Ami Yesus pil dolamlya deice arye, Allah arye ninye weik lyeplirye, kanye talima talinamsil ning lak nyanamsile. Nyapsilyopura, ninye weika arye, el nyalul yupu ati, malye yupu nyanamake.

1 Samuel 8:7

Nyabuka morobukba, Yahweh arye Samuel biti nyabuk. “Israel nang arye, nyapmakiyak yupu ara, kekepnulyame. Dipkoprop, sikce na Allah ati, ‘Nun weik deiyoknye el uka,’ kum teneninyaka ati ara, anti kum batakike. Dipkoprop nati batakmaniyake,” nyabuk.

Yohanes 8:52

Nyabukura, sik Yahudi yala deiyok nang arye Yesus ati, tamubuka nyabik. “Winira akunuma. Anyapmasilama deice arye akunum lakak upsil ak, kel bikape. Isa mer arye dipkoprop, an kanye talima talikinyak arye winilyame. Ura, nun kele. Nun apu Abraham ap, Allah el yupu laka nyalamik nang, nabi nang babye daulamika ani, aminyan talak akunum diamik. Sik nirya diamik bukni, ance, ‘Na yupu diba tenebuka dobolbanyak ninye ara, pia kam unamake,’ nyapsilame.

Rasul 14:22

Aminyan talak, amutuku winilye Listra mutuku ap, Ikonium mutuku ap, Antiokia mutuku ap, Yesus diba tenebik nang ati amutuku tamubuka peterepra balamrikce, anang kanye talima kwa dilamrik. Anang talima kwa dilamrik akarye, amutuku nang Yesus diba tenebuka pia talibik ning ara, atalibika atonun, ‘Pia kanye lamabuka unamak’ tenen, sik kanya talima kwa dilamrik. Winilamrikak arye ayupu nyaprik. “Nun diba tenenyap ninye Allah aryuk, pia talipnamsil talak ara, ikin ning pia weik ulamsilya noutamak arye Allah el dam weknamabe, talye parapkabuka kil-kil kanye bon deice aryuk kum wektibye,” nyaprik.

Markus 10:39

Nyabukura, sikce tamubuka nyaprik. “An donmaminya dipnalam touk, nun babye, atouk winiptinimnye,” nyaprik.