Yohanes 12:27 - Eipomek

²⁷ Nyabukce, ayupu ton nyabuk. “Wini talak ara, na mambul kanye bopmane. Yata yupu nyaptinye do? ‘Naie, atalak ikin ning na nong deice deipnamaniyaka ati, lobuka lyepnilyame,’ nyaptinye do? Kume. Aning ara kum nyaptinye. Dipkoprop ‘Winipnamniyak’ tenen, wini talak unune.

Yohanes 12:27 Referans Kwoze

Yohanes 12:23

Nyalbirikura, Yesus arye nyabuk. “Nara, Ninye Mi Koprop Atonunye biti, Allah arye pia teleb winipdeipnamnil talak akunum yanmasile.

Ibrani 5:7

Yesus ara, tukwak mutuku noutamak ulamuk talak ara, elce el dipnamuk ning ati tenebukce, el lyepmantonye Allah ati morobuke. Elce morobuka ara, “Naie, ance melipnilyame,” nyabuka, asing maka deice ap, weik malye nyana ap deice arye morobuke. Morobukce, el Yesus ara, ‘Allah ara, weik mambule anya arye, elti, si kipnirye, el amutamuk pia unamne,’ tenelamukce, talima naminye ulamuka ati, Allah arye, Yesus morobuk yupu kekebukce melilamuk.

Yohanes 13:21

Yesus arye ayupu nyabukopura, mambul kanye bobukce, nyabuk. “Na dipkoprop nyapsine. Anggun kan-kan noutamak bukni, tonoknye birye, ‘Nun ni Yesus ara, malye ninye arye opnamak’ tenen, ninye yupu delilbinamnile,” nyabuk.

Matius 26:42

Nyabukce, ila tamubuka mitikto pera biyukce, min talak Allah moronmok touk, tonap moronmok. “Na ni Allah, na ikin kanye upnil ning ara, ance ‘El kum obikcopura, na tenelamse ning kum uptue,’ tenepniminyopura, sik yu nang arye winipnamniyaka ara, dawinipninyake. Narye patapnilaba, tenenman ninguk kume. An min arye tenelamnulum touk winipnunilyame,” nyabuka, Yesus arye Allah ati moronmok.

Yesaya 38:15

Bukni, naryuk yata yupu nyaptinyeba, Allah arye kekepnutu do? Dipkoprop na kanye imun uk dinilye ning nirya ara, Allah elcuk aning nirya dobuka, nati arepnuka anya arye, yata yupu nyaptinyeba kekepnuturye kwetepnutu do? Kume, na yupu ton kum nyaptinye. Na kanye talima noutam ara, kanye imun weik ulamsiba, kanye se tenelamse anya arye, lukunyan nirya teleb ubuka kum maptinye. Tonda, bereknopura, ikin aryuk kanupdongobuka aryuk banune.

Ibrani 2:14

Elce, “Na mapu,” nyabuk ninye ara, tukwak ninye unyakba, nong kalina ap, ining ap, ululba unyaba anya arye, Yesus el babye, ninye nong atonun dayukce, nun kan-kan ulamuk. Ninye nong dayukce ulamuka deiyok ara ani. Ara, Yesus arye, ‘Ninye lyena ati, na dipnyopura, adeice arye, ninye dipna deiyok ning talibuka mikip ululnye, Isa Mutuku Dongonye biti, malye kipnirye oplopnamne’ tenen, Yesus arye ninye atonun dayuk.

Lukas 22:44

El opnamik ning ati, kanye imun upmokce, malye kanye bobuka, mikip arye Allah moronmokura, el nong mek bongobukce, mek tuku deice sakanmok ning ara, ninye opdakceura, ining weik balamle touk, nong mek weik bongobukce sakanmok.

Yohanes 18:37

Nyabukura, Pilatus arye, “Ayupu nyapmalam ati, anda ninye deiyoknye, Raja ulyame,” nyabuk. Nyabukba, Yesus arye, “Pilatus ance, ‘Anda Rajanye, weik ninye deiyoknye ulyame,’ nyapmanilam yupu ara, dib nyaplame. ‘Weik ninye deiyoknye, Raja unamne’ tenen, tukwak mutuku yase. Adeiyok ati deipnike. ‘Dipkoprop yupu nyanamne’ tenen, tukwak mutuku yase. Dipkoprop yupu kekebuka talinyak ninye ara, na yupu kekebuka diba teneninyake.” Yesus arye nyabuk.

Lukas 22:53

Asum-asum nirya, Allah ati arilulum aik dam peterelamsi bukni, kum tomamnulume. Ara, Allah arye tenyamnuk touk, winipnula ati, isa el mikip deice pil donmasil talak aryuk winipnamanulume.” Yesus arye el tomolyanmek nang ati nyabuk.

Mazmur 88:3

Ati ara, narye an dam yanuka morokinye talak nirya ara, ‘Na morokinye yupu ara, ancuk kekenamnilam’ tenen, moropkine. Diba, ‘Narye morokinye talak nirya ara, an amul arye moubuka kekenamnilam’ tenen, moropkine na nio!

Yesaya 53:3

Utenelamuburye, elti, lik ulamsukba, ninye nirya arye lululilamuburye, el dam batakuka yuk sukumuk ulamupu. Anye bira, ikin ning weik el nong deice delilamikba, imun kanye bobuka ulamuk. Ati, ninye arye yuk nang ati, ‘Nun like’ tenen, urasin tamubuka meilolamak touk, tonoknye babye, elti, kum elilamik. Atonun, nun babye elti, ‘Telebnye aulule’ tenen, kanye kum delilamupu. El ti ara, ‘Elda talinye binya arye, dauplye,’ tenelamupu.

1 Timotius 1:15

Anyapnukin yupu ara, pia dipkoprop yupu anya arye, ninye mutuku-mutuku nirya, adiparyuk ayupu dib teneptinge. Ayupu ara, ani. Yesus Kristus tukwak mutuku yayuka deiyok ara, yuk kume, malye un nang lyena ati yayuke. Malye un ninye weik aunyak bukni, pia weik malinye bira na ulamse, nyapkine.

Yohanes 11:41

Nyabuka ati ara, aunmek nang arye, Lazarus weibuka keil deiya buplan dam tirikdongamik keil doprobik. Doprobikba, Yesus arye kisok erebuka im deice tam dipdeyukce, el li Allah ati nyabuk. “Naio, ance akunum kekepmanilama ati, telebe nyapkine.

Matius 11:25

Yesus arye, ayupu nirya nyabukopura, el li Allah ati moronmaka deice arye ayupu nyabuk. “Naie, anda im deice ap, tukwak mutuku nirya ap, talyamlumce, aning nirya deice tam weik deiyoknye ulyama ati, narye anti, ‘Telebe,’ nyabuka an si erepkine. Tonda, an nyasiminye yupu noutamak ning ara, kel bikna kanam nang ap, weik kel nang ap ati, deiyok dunulul bukni, mitik mapu atonun unyakce, talima mitang arye unyak nang ati, deiyok noutamak ning ara laka kibuka laka nyasilyame.

Mazmur 6:3

Na nio, ikin kanye bobuka ununa ati, nara pia mitang unmanila ati, na nio weik tonun bicoe tenepnutumce, melipnutum’ tenen, moropkine. Se na ni Allah Yahweh, na pia weik nakina talipmanilce, na nong nirya mitang upmanilba, balbalung apnilce, ilil weik upnila ati, ‘Ancuk kwetepnutumce, mikip kipdeipnutum’ tenen, moropkine.

Matius 11:26

Diba na ni, winiminye ning ara, ance, ‘Wininamne,’ tenyamuk touk wininmala ati, aning arye an talima kanye deilikulule. Ati telebe nyapkine.” Yesus Allah morona deice arye ayupu nyabuk.

Matius 26:45

Eibukopura, el mapu ati nyabuk. “Anggun tuba manauk unmalum do? Akunuma. Yu nang arye, na dobuka bobinuniyak talak akunum uple. Dipdelulume, nara Ninye Mi Koprop Atonunye bira, na ona ati, ninye akunum yupu delilbinmala anya arye, elce inibuka yu nang arepnunile.