Yohanes 1:45 - Eipomek

⁴⁵ Pilipus birye el kwit koprop Nataniel biti, enmoka ani, eipdarikopura, nyabuk. “Nataniel, Allah arye, ‘Wininamlume, aning ara kum wininamlume,’ nyabukba, Musa sekeiyamsuk yupu, el mem yupu noutamak arye, ‘Anye yanamle,’ nyabuka laka nyabuka sekamsuknye bira, nun ap akunum eipdanmabe. Tonda, Allah yupu lak nyalamik nang, sik nabi nang arye, yupu sekamik ning noutamak arye mambulnye nyalamiknye bira, akunum eipdanmabe. Anyapmakin anye bira, ara Yusuf birye deibuk mi Yesus, Nasaret mutukunye biti nyapkine,” Pilipus birye nyabuk.

Yohanes 1:45 Referans Kwoze

Lukas 24:27

Nyabukopura, Musa ap, Allah yupu laka nyalamik nang, Nabi-Nabi nang ap arye el Yesus ati sekamik yupu ara, ayupu arye deiyok koubuka, Allah yupu noutam ulye yupu nirya arye el Yesus ati seklamik yupu dobuka, Yesus arye abitinye nang ati, laka nyapnin banmok.

Mika 5:2

Allah arye ayupu ton nyabuk. Ati anggun Israel ninye ara, Allah el si Yahweh arye namin kipsiliba, anggun mal olan nang arye, tapu koubuka bobisicopura, ikin pil aryuk unamsiyak bukni, anggun ni koproba Allah tenebuk talak akunum dam uplyopura, lyepnamsile. Ara, Israel ninye kan-kan arye, Allah elcuk wel kil tonok wipdeipliba, mi bomlya ani, aminyan talak el mi deipnamle. Tonda, akam kil arye, el mi akunum deiplyopura, el kayapu Israel yala nang, sik wenena ati, yuk pera mutuku ninye arye, tapu koubuka bobinamik mutuku noutam unyak ninye, ninye yupa weik ning nirya ara, Allah arye lyebuka doproplirye, ila tamubuka sik min arye ulamik mutuku uk, yanuka deipliba, tonok kanye bobuka, teleb kibuka unamake.

Matius 2:23

Galilea tam biyukopura, tonok mutuku si Nasaret mutuku binuka ulamik. Nasaret mutuku binuka ulamika ara, sik Allah yupu laka nyalamik nang, nabi nang arye ayupu nyalamik. Ara, “Ninye Lyena Deiyoknye bira, ‘Nasaretnye ulule,’ nyapnamake,” nyalamik. Aning ati ara, Nasaret mutuku binuka ulamikce, sik Allah yupu laka nyalamik nang laka nyalamik touk, Nasaret mutuku binuka ulamik.

Lukas 24:44

Yesus amekin bal dibukopura, ayupu nyabuk. “Na ap, anggun neika ulamuburye, nyalamsise yupu ara, tonap nyapnusine. Yata yupu do nirya, Musa sekamuk yupu ap, Allah yupu laka nyalamik nang, nabi-nabi sekamik yupu ap, Mazmur noutamak sekamik yupu ara, nati sekeiyamnik touk dipkoprop upnamle,” nyabuk.

Yesaya 7:14

Ati, wini talak ara, Allah elcuk apeten kina ning ara, anggun dam pitin kipnamsile. Aning ara ani. Dipkoprop ninye dona kum wel kil tonok arye, mi bomlya ani, sal mi deipnamle. Akunum deiplyopura, ami el si ara, Imanuel nyanamake.

Lukas 4:22

Yesus arye peterenmokura, ayupu kekenmek nang arye, “Se yupu teleb ubuka peterenmasile,” nyabuka ngalukik akarye kanye deibik. Tonda, “Anye bira, Yusuf arye deibuk mi do?” Tenebuka nyanmek.

Zakaria 9:9

Se, Sion mutuku noutam ululum ninye, anggun weik tonun kanye deibuka, kil-kil asa upmunce, unamlulume. Tonda, anggun Yerusalem mutuku ululum ninye nirya ara, weik tonun kanye deibuka, weik yupu deice arye, ‘Telebe,’ nyanamlulume. Anggun elilulume. Anggun ninye deiyoknye, aning nirya bisina ap, tonda pia diksukum una ap, deiyoknye yanmala ati, dilulume. El ayanamlanye bira, ninye unyak touk dipdebuka, diksukum kibuka, yupu lipsisikuka, bokolina deiyoknye ulule. Tonda, ninye lyena deiyok ning boyanmale. Bukni, anye bira, el kanye talima nimalyap asa arye, ulirye, amu tam ulule. Anye bira, winiryuk keledai basam balye deice bukuka yanganmale.

Yesaya 9:6

Aning nirya ara, talye ati kum nyanyabe. Aminyan talak, pia telebuk wininamsil ning deiyok ara ani. Ara, Allah arye tenelamsuk touk, wini talak ara, nun lyena ati, sal mi tonok akunum deipmasirake. Allah arye weik mambul mi akunum kintinibuka arepmasile. Nun lyena ati, ami akunum arepmasil mi elda, aminyan talak aning-aning nirya talibuka, nun ninye deiyoknye unamsile. Winibuka daulamepya ani, ninye nirya arye, el si erebikirye, el si ati nyanamak ning ara, ani. Pia Mambulnye ulule. Ninye melina ati, Kanye Talima Kwadina Deiyoknye ulule. Pia Mikip Weiknye Allah ulule. Nun Ni Allah, Pia Kam Unamlanye ulule. Allah ap ninye ap, neika teleb una ati, Ansinilina Deiyoknye ulule. Aning-aning nirya, ninye arye el si tenibuka nyana ati, ayupu nyanamake.

Zakaria 6:12

Imam-imam nang, sik deiyoknye Yosua, el kisok deice amahkota kalupdeipnalam talak ara, elti, ayupu nyapnulyame. Ara, ani. “Allah Yahweh, aning-aning nirya talibuka, deice tam erebuka, im deice malaikat nirya, sik deiyoknye ulule. Elce ayupu nyapkile. “Anggun nirya, moubuka kekeplulume! Winipmanto ara, anye elda, yo taruk atonunye unamle. Anye nepnin balamlya ani, aminyan talak ara, na Allah Yahweh ati, na si eren aik dopnamnile. Ati ara, elda mambul weiknye ulule,” nyapsile.

Yesaya 53:2

Allah el si Yahweh arye tenelamuk touk, el pil dolamuknye bira, miklamle tukwak arye duk teleb ning betekuka palamle atonun ulamuk. Anye bira, urasin telebnye kum ulamuka anya arye, elilamuburye, elti, ‘Anye bira urasin telebnye,’ kum tenelamupu. Anye el nong urasin ara, liknye ulamuka ati, nunce elti, kum dildelamuburye, ‘Se, anye bira, nun kanye deibabe,’ kum tenelamupu.

Yohanes 18:7

Winibikura, Yesus arye tuba tamubuka tonap asipdeyuk. “Yatanye biti, elyanmalum do?” nyabuka asipdeyuk. Nyabukura, sikce, “Kume, Nasaretnye el si ara Yesus ati dilyanmabe,” nyabik.

Yesaya 4:2

Allah arye tenyamuk talak akunum kiplyeura, Allah arye, Yerusalem mutuku noutam winipnamle ning nirya ara, tuba tamubuka, pia teleb kipdeipnamlarya! Tonda, sikce kouamik ning yala-yala nirya ap, yo duk moulamle ning yala nirya ap ara, weik arye paplirye, pia teleb uplye ning ara, duk weik moupnamle. Atalak ara, sik Israel yala nang lyepdoplirye, amutuku noutam kam unamak nang ara, kanye teleb kipnamle. Tonda, sik koun ning weik nong uplyeba, libuka dikirye, ‘Se, wini talak ara, aning nirya ara, pia telebuk usulule,’ tenen, kanye dipnamake.

Kejadian 22:18

Tonda, ance deiplum mi arye deipliba, dadeipdanin balamica ani, pia dodeipdanin binamak nang ati, narye teleb kipdeipnamne. Teleb kipdeipnyopura, anang arye dodeipdanin balamica ani, aminyan deipnamak nang deice arye, mutuku sirya, im sirya nirya, unamak ninye ati, teleb kipdeipnamne. Deiyok ara, narye nyapmakunuba ance, na yupu kekemomce, aninguk winipmalam ati, ayupu nyapkine,” Allah arye, Abraham biti nyabuk.

Markus 6:3

Tonda ayupu ton nyabik. “Kume anye bira, nun mutukunye binye, yo cakuka marikna memelinye, eluk do? Diba de, Maria arye deibuk mi, el akunum atia. El weit yapu, Yakobus ap, Yoses ap, Yudas ap, Simon ap, sik aunyake. Tonda, el weit kilapu babye, nun ap, aunmabe,” nyanmek. Nyabikce, ‘Yesus ati yu weik ubuka ati ara, elda talinye binya’ tenen, elti, lik ubukura, ‘Nun like’ tenen, batakik.

Matius 21:11

“Ayanmalanye el si ara, Yesus. Galilea tam noutamak bukni, Nasaret mutuku arye, Allah yupu lakak nyalulnye, nabi yanmal ani,” nyabik.

Kejadian 49:10

Weik ninye deiyok nang arye, kwalin kama talibikirye, sik yan dana-dana deibikirye, akama noutam tuku dipdongobuka talibikirye, ninye nirya ati yupu bokolinyake. Winilamak touk an ap, ance deipminyeba dadeipdanin balamikca ani, do unamak ninye, Yehuda yala ninye noutam arye, ninye deiyok kibice nang babye tuba wininamake. Ninye deiyok nang kina ati talilamak kama ara, an yala nang arye pia talinamake. Yehuda yala nang arye akama pia talilyamica ani, aminyan sirya talak ara, akama pia talinamlanye bira, ninye deiyoknye yalyopura, akama ara el ning anya arye, el bidamnye dopropnamle.

Kejadian 3:15

Winilaminyeba, narye nyapdeipniba, an ap, akil ap, ‘Pia lik,’ tenilanamdume. Elce deipliba, dadeipdanin banamak mapu ap, ance deipminyeba, dadeipdanin balamica ani, banamak mapu ap, doyanamle talak noutamak nirya, ‘Pia lik,’ tenilanamake. Ninye nirya arye, an kisok teikuka onamkiake. Ance ninye yan dumu kisok si tobuka onamlame,” nyabuk.

Rasul 22:8

Nyapnukura, ila tamubuka asipdese. “Se, naio, anda yatanye do?” nyabuka asipdese. Asipdesibuk, elce tamubuka nyabuk. “An ikin ning delinilyamnye bira, na Nasaret mutuku ulamsinye, na Yesus uka unune,” nyapnuk.

Rasul 10:38

Allah arye Yesus Nasaret mutukunye, akunum wipdeibuka ati, ‘Na piluk donamle’ tenen, el mikip ap, Allah El Dib Kanye ap, Yesus nong deice deibukura, Yesus arye pia teleb piluk dopra balamuk. Dopra balamuk akarye, Isa Mutuku Dongonye kouke pum tam weklamukak ulamik ninye weik kwetelilamuk. Aninye weik kwetelilamuk deiyok ara, Allah ap, Yesus ap, sik neiktoto ulamrik arye, Allah el mikip el nong deice deiamuk arye aninye kwetelamuk.

Yohanes 21:2

Asum ara, sik neika unmek nang ara, Simon Peterus ap, Tomas (tonda Didimus nyalamiknye) ap, Galilea tam bukni, Kana mutukunye Nataniel ap, Zebedeus el mapu ap, yuk bitinye nang ap, sik nirya neika unmek.

Lukas 2:4

Aninye nirya biyik touk, Yusuf babye, Daud yalanye anya arye, Galilea tam ulamuk mutuku Nasaret batakuka, Yudea noutamak Daud yala deiyok kouna ati, Betlehem mutuku biyuk.

Markus 14:67

Yayukopura, Peterus uku peikinmokbuk, akil arye Peterus dinmokce, el urasin ati bita maka meilenmok. Bita maka meilenmokce, ‘Anye bira, Nasaret mutuku nang arye deiamiknye, Yesus ara, el melinanye, akunuma,’ tenebukce ayupu nyabuk. “An ap, aNasaretnye ap, neika ulamrurume,” nyabuk.

Matius 13:55

“Anye bira, ara nun mutukunye birye, Yusuf elce deibuk mi do? Anye bira yo cakuka marikna memebuka dolinye koprop ulule. Diba de, nun makal kil Maria arye deibuk mi ara, el akunum atia. El weit kopropa capu ara, Yakobus ap, Yoses ap, Yudas ap, Simon ap, sik amutuku unyake.

Rasul 26:9

Ara, menopa arye na babye, aning dib tenebuka darabuka ulamse. Ara, Nasaret mutuku deiamiknye, Yesus, el si erelamik ning ap, el peterelamuk yupu ap, el mapu ap, elti, winilamik ning nirya ap ati, ‘Na winilamtinye ning nirya arye, aning yaniptinirye, kum kipdeiptinye,’ tenelamse.

Rasul 3:6

Dinmok anyak, Peterus arye ayupu nyabuk. “Geil uang atouk bukni, dekna pia weik ning perak ap, emas ap ara, pia nun ton kum upmasil bukni, aupmanil ning ara, arepnukine. Nasaret nang arye deiyamiknye Yesus Kristus, el si mikip arye, tikuka bilyame, nyapkine,” nyabuk.

Rasul 2:22

Nyabukura, ton ayupu nyabuk. Na kayapu, ayupu kekeplulume. Allah arye Nasaretnye Yesus dipkoprop wipdeibuk ning ara, laka anyapsuke. Ara, Allah el mikip aryuk Yesus melyamukbuk, Yesus el mambul pil ap, ninye kum winipmanto pil ap, dolamuk ning ap, ‘Dipkoprop Allah arye pil donmasile, tenepnamnyaka’ tenen, laka nyan ning deibuk ning adeice arye, akunum bikamubu. Ara, ‘Allah arye Yesus dipkoprop wibuka dopdeipsuke’ tenen, kel kebupu. Allah arye el mikip Yesus deice aribukba, Yesus el winilamuk ning nirya deice arye, ‘Allah dipkoprop Yesus wipdeipsuka ara, sik dib tenepnamak’ tenen, Allah lak akarye, lak nyapsuke. Anirya, anggun babye akunum kel kilulume.

Yohanes 19:19

Pilatus arye nyabukura, yo lakase deice ayupu sekuka, Yesus el kisok deice tam, pakuk dakdeibik. Ayupu ara ani. ‘Yesus ara Nasaret mutukunye. Yahudi yala nang sik weik ninye deiyoknye Rajanye,’ nyabuka, ayo lakase deice sekdeibik.

Yohanes 18:5

Asipdeyukura, sikce, “Nasaretnye, el si ara Yesus ati, dilyanmabe,” nyabikura, Yesus arye, “Na aunmane,” nyabuk. (Ayupu nyabuk talak ara, Yudas, ninye yupu laka nyalbinmoknye babye, anang ap asukumuk tikmok.)

Yohanes 6:42

Yu ubukba nyanmek. “Anye bira, Yusuf arye deibuk mi kum ulul do? Kume, elda anye binyuka. El li koprop ap, el lin koprop ap, ara nun kele. Ati ara, yata wiribuka, ‘Nara, im deice arye tukwak mutuku yase,’ nyapsutu do? Talye nyanmasile,” nyabik.

Lukas 3:23

Yesus deiyok koubuka peterepra balamuk talak ara, keting tamun yupu tonok kepdonye, taku barye akunum ubuk. Yesus el li bira, Yusuf tenelamik. Yesus el yok pununa nang si ara, ani. Yusuf el li si ara, Heli. Heli el li si ara, Matat.

Matius 10:3

Pilipus ap, Bartolomeus ap, Tomas ap, ton amutuku talyamik nang, Roma nang pajak yo bok arena ati bulubuka delilamuknye, Matius ap wibuka deiyamuk. Tonye bira, Alpeus el mi Yakobus ap, Tadeus ap,

Lukas 2:48

El li ap, el lin ap, eiprikce lukdanuka yukuproprikura, Maria arye ayupu ton nyabuk. “Amio, anda nunti yata ati winipsulum do? An ni ap, na ap, ‘Se, nun mi dan unmal do?’ tenen, nun kanye imun upsuk ati ekinyame,” nyabuk.

Yohanes 1:44

Ura, Pilipus nyalamiknye, el ap, Anderias ap, Peterus ap, sik nirya ara, mutuku si Betsaida mutuku ninye ulamik.

Yohanes 6:5

Yesus ap, el mapu ap, amutuku deice bukmek talak ara, amutuku yanmek ninye yupa weik el dam yanganmekba, Yesus arye eibuk. Eibukce, Pilipus ati nyabuk. “Pilipuso, dan mutuku arye dina weik dektibirye, ayanganmak nang ati areptibye do?” nyabuka asipdeyuk.

Yohanes 6:7

Yesus arye nyabukba, Pilipus arye tamubuka nyabuk. “Kume, naio. Aninye ara, yupa weik wekmaka anya arye, mince wala pin barye talak arye pil dopmatibyeura, nun dekna ati, yo bok weik arepmasitinga babye, adeice arye dina weik kum dektibye bukni, dina weik dektibya babye, suktuba aninye nirya kum diptinge,” nyabuk.

Yohanes 12:21

Sik Yunani yala nang arye, Pilipus el dam yayik. Pilipus ara, Galilea tam noutamak bukni, mutuku si Betsaida mutukunye ulamuk. El babye Yerusalem mutuku unmokak, sik Yunani yala nang yayikce, nyabik. “Amio, Yesus nyalamaknye bira, ‘Nun ap epdatibye’ tenen, patasila, ati moropkiyape,” nyabik.

Yohanes 14:8

Nyabukura, Pilipus arye nyabuk. “Se, Naio, an Ni Koprop Allah laka kipdeipsutumba, eiptibyopura, ‘Aning ara akunuma,’ teneptibye,” nyabuk.

Lukas 18:37

Asipdeyukura, yuk nang arye, “Yesus Nasaret mutukunye yanganmale,” nyabik.