Yesaya 9:6 - Eipomek6 Aning nirya ara, talye ati kum nyanyabe. Aminyan talak, pia telebuk wininamsil ning deiyok ara ani. Ara, Allah arye tenelamsuk touk, wini talak ara, nun lyena ati, sal mi tonok akunum deipmasirake. Allah arye weik mambul mi akunum kintinibuka arepmasile. Nun lyena ati, ami akunum arepmasil mi elda, aminyan talak aning-aning nirya talibuka, nun ninye deiyoknye unamsile. Winibuka daulamepya ani, ninye nirya arye, el si erebikirye, el si ati nyanamak ning ara, ani. Pia Mambulnye ulule. Ninye melina ati, Kanye Talima Kwadina Deiyoknye ulule. Pia Mikip Weiknye Allah ulule. Nun Ni Allah, Pia Kam Unamlanye ulule. Allah ap ninye ap, neika teleb una ati, Ansinilina Deiyoknye ulule. Aning-aning nirya, ninye arye el si tenibuka nyana ati, ayupu nyanamake. Gade chapit la |
Yesaya 9:6
82 Referans Kwoze
Allah Yupu Deiyoknye, el keil deice ap, el baju deice ap ara, el si ton sekeiyamik. Asi ara, ani. Raja nang nirya deice tam ulul Raja. Tonda, weik ninye deiyok nang nirya deice tam ulul Deiyoknye. Asi bitinye sekuka deiamik ning deiyok ara ani. Ara, tukwak mutuku weik ninye deiyok nang, Raja-Raja nang nirya el amutamukiba, sik Weik Ninye Deiyoknye Raja ulirye, sik yuk Raja nang nirya talilule. Aning atonun, sik yuk deiyok nang nirya el amutamukirye, sik Weik Deiyoknye ulirye, sik yuk deiyok nang nirya talilule. Yata deiyok nang nirya, el amutamuk unyak ati, elce sik nirya talilule. Elda weik eitamnye ulule.
Ton kel kibupu ning, ton nyapnusine. Ara, ‘Sikda Pia Dib Koprop Allah, diba tenebuka talipnamake’ tenen, Allah el Mi Koprop Yesus yayukce, kel kina deiyok ning akunum arepsuke. Pia Dib Koprop Allah ap, nun ap, talima dukdongopsukba neika unyabe. Aninguk kume. Allah el Mi Yesus Kristus el bidamnye ap, nun ap, talima dukdongopsukba, neika unyabe. Yesus Kristus elda, Dib Koprop Allah el nong tonok ulule. Tonda, elda, Pia Kam Una Deiyoknye ulule.
Anyapnukin yupu ara, ‘Tilila do, dib do?’ tenen, kum tenepmanto ning. Ara, Allah arye duknyamukbuk, ninye kum kel bikamik bukni, wini talak Allah arye anoutamak weik mambul yupu akunum laka kipdeipsuke. Ara, Allah diksukum ulye touk, nun babye, diksukum una ati, winipnamap deiyok ning ara, ani. Allah ninye nong atonun dayukce ninye eipnamik ati, laka yayuke. Allah El Dib Kanye pil dobuka deice arye, ‘Yesus ara, el dipkoprop Allah El Mi Koprop’ tenen, dib tenebuka, ‘Kel biknamak’ tenen, laka kibuk. Lak kibukura, Allah el im deice pil don nang, malaikat arye eibik. Ninye arye, Yesus el yupu dobuka, ninye mutuku-mutuku nirya ati, amutuku-amutuku nirya binuka peterelamik. Peterelamikbuk, ninye mutuku-mutuku nirya unyak ninye weik arye kekebuka dib tenelamik. Aminyan sirya talak ara, Allah arye Yesus ati, pia teleb kipdeibukce, erebuka im deice bobiyukura, im deice tam ulule.
Aning ara, walwal arye tenelamupu bukni, nun malye winilamupu ning deice arye, elti, yu nang arye olamikba, el nong deice dila weik ulamuk. Nun malye-malye weik ulamupu ning ati, tace ning arye talibuka onmekbuk, el nong deice dila weik ubuk. Aning deice arye, nunti, teleb kipdeipsuke. Nun malye winina ati, ikin ning weik el nong deice deiamikce, wenebika deice arye, nunti lyepdeipsuke. Nun kum winipmanto ning ap, nun malye winilamu ning nirya ap, kum kipdeipsukce, lyepsukce, teleb kipdeipsuke.
Ati, anggun tenipdelulume! Aning-aning nirya ara, Allah el si Yahweh arye, sik wa wina deiyok nang ati peterliba, weik tonun kel bikinyake. Allah arye, nun tukwak nang ati, ‘Aning ara wininamlume, aning ara pia kum wininamlume. Teleb winin ning ara ani. Malye ning ara ani,’ nyabuka lak nyasulul yupu nirya ara, pia teleb uka. Tonda, Allah arye, ‘Winibuka pil donamlume. Winibuka teleb ubuka dipsukumuk unamlume. Pia kum winipnamlum ning ara, ani,’ nyabuka lak nyasulul yupu nirya ara, weik kel arye peteresulule. Allah Yahweh ara, aning-aning deice tam erebuka, mikip weiknye ulirye, im deice yin talen malaikat nirya, sik deiyoknye ulula anya arye, dipkoprob elce pil donamle ning nirya ara, weik kel arye wininamle! Allah Yahweh arye tenilul ning nirya ara, pia dipkoprob telebuk ulule. Ayupu nirya ara, Allah arye nyapdeibukba, Yesaya kekebukce sekuk.
Anggun ton teneipdelulume. Allah ara, el Mi Kopropa tonokuk ulul bukni, ‘Na mi ara tonoknye anya arye, na tenen kum arepnune,’ tenena kumce, nun lyena ati, arepsuk. Ati, el mi kopropa dobuka, nun lyena ati akunum arepsuka anya arye, yatato ning do nirya, nun patasulu ning nirya bico tenesilirye, el kanye deibukap, talya demuk kum arenamsil do? Kume, nun patasilye ning nirya ara urdem arenamsile.
Ara, Kristus arye, aning-aning nirya deice tam ulirye, aning-aning nirya talibuka daulamlya ani, sikce, ‘Yesus ara, nun like’ tenen, elti, yaninyak ning ap, yaninyak ninye nirya ap ara, obisiblirye, malye kipnamle. Malye kibuka bisiplyoura, malye deiyok nang nirya kum kipdeiplyopura, Allah arye, aning nirya dobuka, Yesus el amu tam deipliba, Yesus arye, aning nirya yanipnamle. Aning nirya akunum winiplya deice arye, Yesus el talilye ning nirya dobuka, el Li Koprop Allah ati arepnamle. Aning nirya ara, el li Allah ati arepnamla anya arye, minopce apil nirya donamle.
Dipkoprob, Israel yala nang, mitik tonun tuba kam unamak nang, Yakub elce deibukba, dadeipdanin banyakce, tuba unamak nang ara, ‘Nun malye ulampu ning batakibirye, Allah el tibuk diba tenenamabeʼ tenebikirye, sik ni koproba Allah ati, ‘Elda mikip weik ululeʼ tenen, ‘Eluk talibibyakarye, el yupu uk kekenamabe,’ tenebikirye, el damuk tamubuka yanamake.
Nyabukce, ayupu ton nyabuk. “Ikin kanye bona kumce, kanye deibuka yuk nang ap neika teleb una ati, deiyok ning aresunune. Sik diba tenena kum, talye tukwak ninye arye, yuk nang ati, tenebuka arye arenyak touk, kum aresunune. Ikin kanye bona kumce, teleb kanye bobuka, teleb una deiyok ning aresunun ning ara, na ninguk aresunune. Aning ati ara, anggunce, ‘Se,’ tenen, ikin kanye bona ap, ilil una ap, ikin kanye bobuka bouku sukuna ap, aning nirya kum unamlulume. Ilil asa kum aniryuk, kanye deibuka telebuk unamlulume.” Yesus arye nyabuk.
Allah arye, el im deice pil don nang malaikat ati, ayupu nyapdeibukba, el amu tam talye pil don nang atonun unyak bukni, el Mi Kopropa ati ara, yupu yuk nyabuke. Allah arye el Mi Kopropa ati, nyabuk yupu ara, asukum deipnusine. Ara, Allah arye nyapdeibukba, Mazmur buku noutamak arye, sekamik yupu ara ani. ‘Anda Allah ulyame. Ance ninye nirya ap, aning-aning nirya ap talibuka, weik deiyoknye unamlam talak ara, an talipnamlam ning ara, pia kum dankunamle. Sirya dakna kum, pia aunamle. Aning-aning nirya talibuka, weik deiyoknye unamlama deiyok ara, pia teleb ubuka diksukumuk unamlama atia. Aning nirya talipmince, pia diksukumuk unamlame.
Yupu nyalamapnye bira, ninye nong atonun dayukce, tukwak mutuku yayukura, nun kan-kan noutamak neika ulamubu. El pia teleb ubuka ulamukba, elilamubu. El pia teleb ulula ara, talye ati kume. Ara Allah el Mi Koprop tonok ululnye bira, el uka. Allah el Mi Koprop ulamukce, el dipkoprop una ap, el dipkoprop yupu nyana ap, el kanye aryuk tukwak ninye ati bico tenebuka, pia melina deiyok ning ap, anye deice weik arye uamuk. Nun ni koprop Allah arye anye bira dopdeipsukba, pia telebuk ulamukak, elilamubu.
Allah morobukopura, el yupu kekenmek nang ati ayupu ton nyabuk. Na ni Allah arye, ‘Na mi Yesus, aning-aning nirya talibuka deiyoknye unamle’ tenen, akunum arepnuke. Ninye nirya tonoknye ton, Allah el Mi Koprop arye, el kanye talima noutamak tenelul ning ara, kum kel biktinge. Allah el Mi Koprop kanye talima ulye ning ara, Allah elcuk kel bikilulue. Ninye nirya tonoknye ton, na ni Allah el kanye talima noutamak tenelul ning ara, kum kel biktinge. Na ni Allah, el talima noutamak ulye ning ara, tukwak ninye ton kum bukni, nauk ara, el Mi Koprop arye kel bikinune. Tonda, ‘Narye peterenunba, na ni ulye ning kel kipnamak’ tenen, wibuka deipse nanguk, na ni Allah arye pataplyeba, tenelul ning kel biktinge.
Aning nyanyaba ara, urdem ati kume. Ara, Allah anda dipkoprob nun ni koproba ulyam bukni, nun apu yapu minop talak ulamdik nang, Abraham ap, Yakub ap, sikce nunti bita kel kum bikamsirike. Bukni, nun ni Allah Yahweh, anda nun ni ulyamce, minop talak arye dipdongobuka, wini talak nirya babye, nunti akunum wipdeipsulumce, lyepromsulumnye, an tonok ulyame.
Allah arye Israel nang ati aning teleb yupu nyabuk. “Anggun malye ululum ning ati, Allah deresilya ara, nun malye winin ning Yesus elcuk namin kipdeipsilya deice arye, nun ap, Allah ap, neika teleb kibuka unamabe. Yesus Kristus arye nun ap, Allah ap, ati teleb kibuka ansinilisulule, Yesus Kristus ara, aning-aning nirya talilul deiyoknye bira, eluk ulule.”
Ara, talye ati kume. Deiyok ara ani. Anggun ni koproba Allah, el si ara Yahweh bira, el tonok ulule. Yuk Allah ton kum ulule. Aning-aning nirya ap, ninye nirya ap, aning-aning nirya ap ara, pia el Allah atonun kum unyake. Allah ara, aning-aning nirya talibuka ululce, aning-aning babye, yuk ninye deiyok nang babye, el amu tamuk unyake. Allah ara, mikip weik deiyoknye ulirye, ninye nirya babye, aning-aning nirya babye, elcuk talilule. Ninye nirya arye elti, ‘Se elda pia mambule,’ tenenyake. Tonda, ninye urasin kum elilulce, kanye talima kum wililule. Tonda, ninye urasin elilulce, ‘Bon ninguk arepnicopura, doproptinye,’ kum tenelule. El kanye talima diksukumnye biti, kanye delilirye, yupu bokolilule. Allah ara, pia telebnye ulule. Allah elda, malye ning tonoknye babye pia kum winilule.
Aminyan yuk talak ara, nun ni Allah pia mambulnye, ara nun Lyena Deiyoknye Yesus Kristus, im deice arye tamubuka dolyanamsil. El dolyanamsila ara, pia teleb ubuka, dirina weik arye yanamle. Men kum dolyanmasilye talak noutamak nirya ara, nun kanye bokoltona kum aryuk, ‘El dipkoprop dolyanamsil’ tenen, kanye pia deibuka, dinauk ubirye unyabe. Ati ara, tukwak mutuku noutamak tuba kam unamap talak ara, pia diksukumuk unamabe.
Allah el kanye aryuk, ‘Aninye ara, Yesus Kristus ap, kanye talima dukdongobuka neika unamake’ tenen, el mapu kipdeipsuke. Yesus Kristus nun kanye noutam pil dosilya deice aryuk, Allah el weik kele arye, pil teleb kibuka dosilye ning ara, moubuka bikinyabe. Kristus elcuk nun malye winin ning kilipsilirye, diksukum un ninye kilisulule. Allah ap, ansinilisulule. Kristus el pil dopsuka deice aryuk, nun malye winin ning kilibuka pununa ato ning punupsukce, nun malye winilamubu noutamak arye, lobuka lyepsukce, Allah el mapu kilisulule.
Anye bira, elce tukwak ninye ati, bico tenena deiyok ning ap, melina ap, lyena deiyok ning ap, weik arye kanye ulamuk deice arye, teleb ning weik areamsukce, teleb kililamsukba, nun nirya dololamubu deice arye telebuk unyabe. Elce pia teleb ning arilamsukce, teleb kililamsuk touk, wini talak babye, pia tuba aresulule.
Asipdeyukba, malaikat arye tamubuka Maria ati nyabuk. “Allah El Dib Kanye an nong deice deipkilirye, Allah el mikip ara, kanya atonun an nong deice unamkile. Winipnamkila deice arye, mi bominya ani, aminyan talak, malye winin ning tonoknye babye, pia kum wininamle mi deipnamlama ati, ninye nirya arye, ‘Ami ara, Allah el Mi Koprop,’ tenebuka nyanamake.
Na ni Allah, ance elti, melipminya deice arye, elce talinamle ninye arye, diksukum teleb winin ninguk, pia ati upra banamake. Tonda, nun mutuku noutamak pil donamap ning nirya ara, ‘Awala-awala nirya mapbabiba, pia telebuk upra balamlya ani, sirya dakna talak babye, tuba telebuk unamsil’ tenen, moropkine.
‘Malye winipnyap’ tenen, anggun kanye talima moubuka umunyak arye melibuka dildanamlulume. Tonda, Allah El Dib Kanye arye, ‘Sik talima melipdakirye dinamak’ tenen, melin nang atonun kipsuk akarye, wibuka deipsuk nang ara, anggunce sikti, sik talima moubuka kalekuka dinamlulume. Allah el mi koprop dibukura, el ining banmok deice arye, Allah dekuka deibuk ninye ara, domba weilamak nang arye sik domba weilamak touk, Allah el diba tenebuka talinyak nang ati, melibuka weinamlulume. Anang ati moubuka dimunce, melinamlulume.
Allah arye, ‘Ninye nirya, olana kum arye, teleb kanye bobuka, yuk ninye ap, neika teleb unamak’ tenen, teleb una ati deiyok ning arisululnye ulula anya arye, elcuk melisilyeba, yuk ninye ap teleb ubuka neika unamabe. Allah arye, “Na ap, ninye ap, teleb ubuka neika unamabe,” nyabuka nyalilamsuk yupu, ninye lyena yupu ara, Yesus el ining biyuka deice arye, sirya dakuka ansinipdeipsuke. Yesus obikba dibuk bukni, Allah arye Yesus tamubuka kam bukdeibukba, Yesus ara, kam tuba ulule. Allah arye nun lyena ati, nyalilamsuk yupu ara, kume kum danamle. Aning ara, pia aunamle. Winipmanto ara, sik domba weina deiyok nang arye, sik domba ati, teleb-teleb kibuka weilamak touk, Yesus arye nun diba tenenyap ninye ati, pia teleb kibuka melibuka kalikisulule.
Malye nang arye obik bukni, Allah el si Yahweh arye, minop talak danirye, ‘Anye bira imun kanye bobuka dadipnamle,’ tenelamuk touk, nun pununa ati dipsuke. Tonda Allah Yahweh arye tenelamuk touk, el nong uk dibuka deice arye ninye malye wininyak ning nirya kum kipdeibukce, tukwak ninye sik malye winina ati dibuke. Akunum dibuk bukni, kam buklirye, el unamle talak babye weik malamlirye, elce deipliba dadeipdanin banamak ninye eipnamle. Anye deice arye, Allah Yahweh arye, ‘Wininamne,’ tenelamuk ning nirya, anye pil dopliba, dipkoprob nong upnamle.
Allah el si Yahweh arye tenelamuk touk, el pil dolamuknye bira, miklamle tukwak arye duk teleb ning betekuka palamle atonun ulamuk. Anye bira, urasin telebnye kum ulamuka anya arye, elilamuburye, elti, ‘Anye bira urasin telebnye,’ kum tenelamupu. Anye el nong urasin ara, liknye ulamuka ati, nunce elti, kum dildelamuburye, ‘Se, anye bira, nun kanye deibabe,’ kum tenelamupu.
Nun peterenyap yupu ara, ani. Allah ap, ninye ap insinibuka teleb una ati deiyok yupu ani. “Ara, Allah arye tukwak ninye nirya, sik malye wininyak ning ati, ‘Namin kibuka kum daneipnirye, ila tamubuka ton kum tenepnirye, sik malye ning ati kum wenebuka opnamne’ tenen, Kristus dopdeipsukba, Yesus arye el ninye lyena pil dopsuka deice arye, Allah arye ninye mutuku-mutuku nirya ap, el ap ansinibuka neika teleb ulisulule.” Ayupu nirya laka nyabuka laka peterelbana ati, Allah arye nun wibuka deipsukbuk, apil talibuka donyabe.
Tonda, nun apu yapu ara, Israel yala ninye arye delilamikba dadeipdanin, yangalamik nang ara, weik mambul nang ulamik. Tonda, ninye lyena ati, Allah arye wibuka dopkwetepsuknye, Kristus el deiamrik nang bitinye babye, sik apu yapu ara, Israel yala ninyeuk ulamik. Anirya ati ara, sik Israel ninye ara, talye ninye kum unyake, nyapmasine. Aning atonun Kristus babye, talinye kum ulule. Elda, aning-aning nirya talibuka deice tam Weik Deiyoknye kibuka ulule. Elda, dipkoprop Allah ulule. ‘El si ara, pia erenauk unamap’ tenen, Amin nyapsine.
Pia diksukumuk upra banmalya ani, adeice arye, nun unamap mutuku ap, nun talibuka wininamap ning ap, wa wibuka kounamap ning nirya ap ara, paplirye moulamlya ani, nong pia telebuk upra balyopura, amutuku noutamak unamak ninye nirya babye, telebuk unamake. Tonda, elce ninye deiyok talibuka unamle ning nirya, telebuk upra banmalyopura, ‘Elce talinamle ninye nirya babye, pia telebuk unamak’ tenen, moropkine.
Ati ara, wini talak ara nun Israel nang arye malye winilamububa, ance pil weik dolamsulumce, lyelolamsulum ning ara, ‘Aning ara mambul kume. Aning ara, daopnyake’ tenen, kum bataknamsilyame. Malye winilamupu buk, ance ikin ning delilamsulum ning ara, tuba tenenamsilyame. Ara, nun wini talak unyap nang ikin usilye ning ap, nun ninye deiyok talibuka ulamik Raja nang ati, ikin ulamuk ning ap, nun yupu bokolina deiyok nang ati, ikin ulamik ning ap, an si eren aik pum tam pil dona deiyok nang ap ati, ikin ulamik ning ap, an yupu lak nyana deiyok nang ati, ikin ulamuk ning ap, nun apu yapu ati ikin ulamuk ning ap, tuba tenenamsilyame. Ura an mapu nirya ati, ikin ulamuk ning nirya ara, ‘Aning nirya ara mambul kume,’ kum tenenamsilyame. Sik Asyur mutuku ninye deiyok nang arye, nunti talibuka, ikin ning nun nong deice delilamsikce, anirye dipdongobuka, wini talak babye ikin usulul ning ati, ‘Aning ara ikin kum tenenamsilyam’ tenen, morokinyabe. Nun ni Allah, anda mikip weiknye ulyame. Tonda, anda aning-aning deice tam ululnye ulyame. Tonda, yuk weik ning aupmalebuk, anda weik mambulnye tonok ulyame. Yuk ning nirya ara, mitik mambul uka. Ance bico tenelamsulum deice arye, “Bico tenesununa anya arye, winibuka wininamsine,” nyapdeiamsulum ning nirya ara, dipkoprob winilyame. Tonok ning babye kum batakasilyame. Ance pia tuba melisilyame. Ati nun ikin usulul ning ara, tenepsimince, melinamsilame na nio.
“Israel nango, anggun yata wiribuka talak tonap, daumunce, ‘Allah el dam tamubuka binamap do, kum do?’ tenen, tuba walwal usulul do? Anggunda, na nyapsise yupu moubuka kum taliplume. Winipmanto ara, tonoknye birye deibuk kilmu, el li koprop ati, tilila yupu nyaplirye, batakuka malye mutuku balamle atouk ululume. Bukni, nara Allah Yahweh arye, tukwak mutuku noutamak ara, winiryuk ning kintinibuka kwepdeipnamne. Ara, tuba tamubuka tonap, lo ton arepnyopura, Israel ninye ayala-yala nirya arye, tuba tonap, na dam tamubuka yakirye, nati kanye deibuka, telebuk unamake. Na talibuka, na siuk erepnamniake.” Allah arye sik Israel ninye ati nyabuk.
Allah ance nyapdeiplum ninguk, ‘Aninguk talibuka unamne,’ teneplirye, talimak deipnirye, moubuka talibuka telebuk uplinye bira, ance anye el talima noutam ara, ilil asa una kumce, teleb kanye deipnirye, tunim nyabuka una deiyok ning areminba, telebuk unyake. Winiminya deiyok ara, sik anang arye, antibuk, teniltona kumce, diba tenekinyaka ati, ance sikti, teleb kililyame.
Allah arye, “Aning ara, wininamlume. Aning ara, pia kum wininamlume,” nyapdeipsuk yupu moubuka talibikirye, aninguk wininyak nang ati ara, Allah arye anggun dam yana, melibuka lyelosulule. Ara talye ati kum bukni, ‘Allah el pia teleb ulul ning ap, mikip weik winilul ning ap, nun mutuku noutam arye laka kipdeipsilyeba, ninye nirya eibikirye, el Allah ati biknamak’ tenen, moropkine na nio.
Sik amutuku unamak ninye nirya arye, ayana talipnamsilanye, ninye deiyoknye Raja ati, si erebikiba, pia aunamle. Tonda, ayanamlanye, el si tuba auplyeba, el tibuk, “Nun deiyoknye ani,” nyabuka, elti, si pia erenamake. Keting sinarya aupnamle talak nirya ara, el tibuk kinamake. Aninye deiyoknye, pia teleb unamla deice arye, mutuku-mutuku nirya unyak ninye, ayala-ayala nirya ara, telebuk ulilulba, weika arye tabakikirye, teleb wininamake. Elce, tukwak mutuku noutamak unyak ninye nirya ati, teleb kililirye, melilamliba, tukwak mutuku ninye nirya arye, “Diba, elda pia telebnye ulule,” nyabuka, elti, si pia erenamake.
Ninye si Asaf birye, aMazmur mot yupu sekuk. Asaf birye sekuk yupu ara, ani. Aning-aning nirya deice tam erebuka, Pia Weik Mikipnye, Allah, el si Yahweh, elce tukwak mutuku sirya, im sirya nirya unyak nang ati, “Na damuk yalulume,” nyabuka, yukulule. Ara, keting panalyangan tam arye dipdongobuka, otam keting kumulban tam unyak nang nirya babye, ninye tukwak nang nirya ati, “Na dam yalulume,” nyabuka, yukulule.
Yesaya birye nyabuk. Na ap, Allah Yahweh arye arelamnukba, deipse mapu ap ati, Allah Yahweh elce weik mambul si akunum arepsuke. Asi moubuka tenebibya deice arye, Allah Yahweh arye, wininamsil ning nirya ara, moubuka kel biktibye. Tonda, Allah Yahweh arye aning-aning nirya talibuka, deice tam ulirye, im deice yin talin malaikat, sik weik deiyoknye ulule. El si ap, mikip ap ara, Sion mutuku deice arepsukba, ulule.
Aning nirya ara, talye ati kum nyapsine. Deiyok ara ani. Ara, na Allah Yahweh arye, ayupu nyapsina anya arye, nong dipkoprob upnamlarya. Winipnamsina ara, ani. Narye anggun Yerusalem mutuku nang ap, amutuku nirya ap ati, tuba tamubuka pia teleb kipdeipnyopura, aning-aning nirya ara, yamubuka arepnamsine. Winipnamsin ning ara, winipmanto yupu nyapsine. Ara, weik mek pia celona kumce, mek mikip arye balamle atonun, narye anggun ati, aning-aning nirya weik tonun arenamsine. Tonda, yuk-yuk mutuku nang, yala-yala nirya ara, pia teleb bona weik tonun, Yerusalem mutuku dam boyanuka arenamsiyake. Winipnamaka ara, mitik tonun kuma. Weik mek oplirye, mikip arye pia balamle atonun, anggun dekna weik ning yala-yala nirya boyanuka, Yerusalem mutuku dam boyanuka arenamsiyake. Winipmanto ton ning ara, mapu el lin irina deice moubuka bulamakba, kanye deibuka unyaka atonun, anggun babye atonun unamlume. Tonda, mapu iribukabikirye, moum arebikiba, bouplirye, kanye delilamak atonun, narye anggunti atonun winipnamsine. Kilapu arye, sik mitik mapu dobuka sik keil deice deibikirye, lulukulongokiba, sik mapu kanye delilamak touk, narye anggun tibuk atonun winipsinirye, kanye deibuka telebuk unamlume.
Ara ani. Aning nirya akunum winibikura, Daud birye deibukba, dadeipdanin yangalamik nang arye, pia teleb ulamlinye deiyoknye, erepdeipnamake. Allah arye, anggun Yudea tam ululum nang ati, weik arye bico tenesulule ati, el teleb kanye deice aryuk, pia diksukum ululnye erepdeiplyeba, anye bira, sik ninye deiyoknye Raja kibuka unamle. El anye birye, el mutuku nang nirya ati, bico teniplirye, pia moubuka talipnamle. El anye bira, diksukum winin ninguk talibuka, pil donamle. Tonda, sik kum bukni, minop arye teleb piluk talibuka doplirye, ninye yupu ara, diksukum kibuka bokeipnamle! Allah arye nyapdeipnukba kekepsirye, na nabi Yesaya birye nyapne.
Nyabukopura, ayupu ton dukdongobuka nyabuk. “Atalak ara, aweik deiyoknye birye, im sirya, mutuku sirya nirya talinamle bukni, atalak noutamak ara, Allah aning-aning nirya, pia talibuka im deice ululnye birye, yuk weik Deiyoknye erepdeipnamle. Anye birye talinamle ning nirya ara, el Kerajaan nyalamak ning, pia aupnamle. El ti ara, yuk mutuku ninye nirya arye, talibuka el obuka malye kum kiptinge. Tonda, elce talinamle mutuku ap, ninye ap, yuk deiyok nang arye kum taliptinge. Aweik Deiyoknye birye, yuk ninye deiyok nang ap, yuk mutuku nirya ap, malye kipnamle. Bukni, yuk mutuku nang arye, elti, kum malye kipnamake. Elda pia tuba unamle.”
Pia teleb ning, ayala-yala nirya dobuka, na si eren aik punubuka donamnulumak boyacopura, atalak ara, na si eren aik winiryuk dopnamlum ning ara, urasin pia teleb unamle. Minop talak, na si erena ati, domik aik ara, mitik teleb aik domik bukni, aminyan talak dopnamlum aik ara, pia teleb unamle. Tonda, na si eren aik dopnamlumak ara, narye anggunti, pia teleb kipdeipnamsine. Ara, anggun olan ninye nirya ara, kum kipdeipniba, anggun nirya ara, talye kanye bobuka, telebuk unamlume. Yuk ninye ap, olana ap, yupu deice walana ap, pia kum unamlume. Ara, narye na mapu koprop, anggun Israel ninye nirya ati, telebuk kipdeipsiniba, kanye deibuka unamlume. Ayupu ara, na Allah Yahweh, aning-aning nirya talibuka, im deice yin talin malaikat nirya, sik weik deiyoknye birye, nyapsine. Narye anggunti, ayupu akunum nyapdeipsine anya arye, dipkoprob nong upnamle nyapne.” Allah arye nyabuk.
An deipmin mapu ap, ance dipminbuk, dadeipdanin banamak nang ap, na damak pia unamake. Aning atouk, an talipnalam mutuku ap, talinalam nang ap, an mapu nirya talinamak ning nirya ap, narye mikip arepnibuk, keting tamun weik arye talipnamake. Winilaminya, ance deipnalam mi arye, an taliplum mutuku, elce anti punubuka, aning nirya talinamle. Ance dipminbuk, dadeipdanin banamak nang nirya ara, an yala nang ati, ‘Weik ninye deiyok nang unamak’ tenen, pia ereipnamne.” Allah arye nabi Natan ati, laka nyabuk. Laka nyabukce, “Anda, Raja Daud laka nyalbilyame,” nyabuk.
Yoab birye yin talen ati, ninye deiyok nang, bitinye omuka ati, amalye ning kwang dakna ati dengna ara, na tam nang deice ikin ning yanganamsutue. Bukni, wini talak ara, ance anye, Yoab biti opminyopura, Yoab ap, elce deipliba, dadeipdanin banamak nang ap, sik deiceuk, ikin ning yaliba, pia dolonamake. Bukni, Yoab opminyopura, na ni koproba Daud elce deipsukba, dadeipdanin banamap nang arye, ninye deiyok kibuka talinamap ninye ap, mutuku ap ara, Allah arye teleb kilinamsile. Winipsiliba, nun wininamap ning nirya ara, weik upnin banamsile. Tonda, nun oldana ati, yu nang arye, nun dam kum yanganamsiyake.” Raja Salomo birye, Benaya biti nyabuk.
Ati ara, an ni koproba Allah, el si Yahweh ati, ‘Elda pia telebe,’ nyapne. Allah arye, kanye deiamkukce, anti ‘Israel ninye sik weik deiyoknye kipnamle’ tenen, wibuka deiamkukba, Israel ninye talilyame. Allah el si Yahweh arye, winibuka ara talye ati kume. Ara, Yahweh arye Israel ninye ati, bico tenelamukce, tuba tenelul deice arye, an wipdeikukba Israel ninye sik ninye deiyoknye Raja akunum ulyame. Wipdeipkukce, ‘Anye wininamle,’ tenyamkuka ara, ‘Israel ninye, sik melina ati, dipkoprob ninguk pil dopra, sik wininamak touk teleb ubuka yupu bokolina ati, teleb upnin banalame,’ tenepkukce, wipdeikuke.” Syeba mutuku deiyok kil arye, Raja Salomo biti nyabuk.
Se an ni Allah, an weik tonun, aning-aning nirya talibuka, nun ninye deiyoknye ulyam ning ara, pia aunalame. Aning ara, pia kum, kum datue. Ance ninye deiyoknye kina ati, emas kama dopmince, nun ninye tukwak nang ati, yupu lipsisikuka bokeipsimince, ‘Wininamlume,’ nyabuka, yupu nyasilyam ning ara, pia telebuk ulule. Ninye yupu lipsisikuka bokolina ati, ance, ‘Na kwit’ tenen, tenebuka arye, kum nyasilyame. Pia dipkoprob yupu uk nyapsimince, yupu lipsisikuka bokolisilyame.
Tonda, “Daud ance deipminba, dadeipdanin banamak nang arye, an taliplum ning nirya, sikce pia talinamake,” nyabuka, nyalin yupu ton nyapdeiamlume. Tonda, “Daud an ap, ance deipnalam nang ap nirya ara, ninye deiyok nang bun ning deice, bukikirye, amutuku ninye nirya, pia talinamake. Ara, doryanamle talak nirya ara, yuk yala nang arye, Israel yala ninye ara, kum talinamake. Akunuma nyana ati, Selah,” nyapne.
Winipmanto ning ara, mikip weik nang arye, urasin teleb deiyating moubuka delilamak touk, el pil donamle ning ap, wininamle ning ap ara, diksukumuk wininamle. Tonda, ninye deiyok nang Raja nang arye, pia teleb namin baju, cang ning arye, deiyok deice deibuka koulongolamak touk, anye birye, ‘Wininamne, winibuka melipnamsine,’ nyabuka, nyasilye yupu nirya ara, pia dipkoprob ninguk winipnamsile. Tonok ning babye, kum bataknamle.
Allah arye nyapdeibukba, nabi Yesaya birye sekeipsuk. Pia dipkoprob aminyan yanamle ninye deiyoknye bira, el malye winin ning tonok babye kum winilirye, elce nyanamsil yupu nirya ara, dipkoprob ninguk nyanamsile. Ninye deiyoknye ulirye, ninye mutuku-mutuku nirya talinamsila ara, diksukumuk wininamle. Tonda el amu tam ubikirye, ninye yupu lipsisikuka bokolina ati, nyanamak nang nirya babye, dipkoprob ninguk nyanamake. Ninye wininyak touk dipkoprob yupu uk lipsisikuka bokolinamake.
Ara talye ati kuma. Deiyok ara, Yerusalem mutuku arye, tonda, Sion mutuku deice ap arye, ninye mitik tonun ton lyepliba, anang arye amutuku noutam arye banamake. Aning ara, Allah Yahweh elcuk apil donamle. Allah ara, aning-aning deice tam erebuka mikip weik ulirye, im deice malaikat nirya sik deiyoknye ulirye, el pia pi deibuka, mikip weik deice arye, elce, ‘Aning winipnamne,’ tenyamlye ning nirya, dipkoprob pil dopnamle. Allah arye nyabuka anya arye, aning nirya, dipkoprob nong upnamle!
Winibukba, pia minop talak donirye, Kam Ulamuka ani, Pia Tuba Kam Unamle Deiyoknye, abukmoknye birye, el anye bira, Ninye Mi Atonunye ati, weik mambul ning weik arebuk. Elti arebuk ning ara, ani. Ara, ‘El mikip weik arye, aning-aning nirya talinamle’ tenen, deiyok ning ap, weik dirina ap arebuk. Tonda, ninye im sirya, mutuku sirya nirya ap, aminyan winipnamle ning nirya ap, ‘Elcuk tenelye touk unamle’ tenen, deiyok ning ton arebuk. Tonda, anyarepnya deice arye, ninye ayala-ayala nirya ap, yupu yuk-yuk nyanyak nang nirya ap, tonda im sirya, mutuku sirya nirya unyak ninye nirya arye, ‘El siuk erenamak’ tenen, adeiyok ning ton dobuka, Ninye Mi Atonunye biti arebuk. Tonda, el anye mikip weik arye talinamle ning ap, talibuka pia unamle ning ap nirya ara, ninye yuk nang arye, pia kum kum kipdeipnamake. Elce aning nirya talinamla ara, apia unamle.” Daniel birye nyabuk.
Piblisite