Allah arye el mapu koproba, anggun Israel nang ati, yu uplye ati, uapnamsile. Ara, weik uku buk dilamle touk, yu weik upliba, anggunti wenepnamsilarya. Elce anang wenebuka opnamle ati, ‘Aninye opnunʼ tenen, el taruk erebuka, akunum kintinibuk. Winiplye talak ara, mutuku-mutuku nirya luluknamle. Tonda, sik anang opliba dipnamak nang, sik tuku luknamakak ara, talye bisik lilunak donokamikiba, nirya lyulamlirye, tong weik welenamle. Winiplye babye, Allah arye sik anang, sik wenena ati, ‘Adekna,’ kum tenepnamle. Elce sik malye wininyak ati, weik yu uplyeba, tuba wenenauk unamlarya.
Yesaya 9:12 - Eipomek12 Deiyok ara, Allah Yahweh aning-aning nirya eitam erebuka, mikip weik ululnye birye, im deice tam unyak yin talin malaikat nirya, sik deiyoknye ulule. Winibuka ululnye birye, Israel nang, sik deice ikin weik ning deibukce, wenebuka babye, sikce, ‘Se aikin deipsil ning ara, pia mambule,’ kum tenebik. Tonda, sik malye winilamik ning ati, ‘Se, nun malye winin ning batakuka, nun ni koproba Allah Yahweh, el damuk tamubuka binuka, el siuk erenamabe,’ kum tenebik. Gade chapit la |
Yesaya 9:12
25 Referans Kwoze
Atalak aryuk, sik Pilistin yala nang arye, Yehuda mutuku keting kumulban tam mutuku pia mambul weik asik dolamik ning ap, tonda, iknapnye tam bukni, mek pia kum sukum ap warikilyayik. Sik warikilyayikce, ninye obikce, malye kibuka doprobik mutuku ara, Bet-Semes mutuku ap, Ayalon mutuku ap, Gederot mutuku ap, tonda weik asik dolamik mutuku, Sokho mutuku ap, Timna mutuku ap, Gomso mutuku ap, tonda awinilye mutuku dam dolamik mitik asik ap nirya, ninye obuka, alubuka doprobikce, yanuka ulamik.
Sik yuk mutuku nang, wenebuka opnalama deiyok ara ani. Ara, an ‘Naʼ tenen, nang, nun apu koproba Yakub birye deiamukba, dadeipdanin yangalamupu Israel yala nang ati, sik yuk-yuk mutuku nang arye, akunum olyangalamsikce, sice buklopmasiake na nio. Tonda, nun Israel nang ulamupu mutuku-mutuku nirya, akunum malye kipdeipmasiakba, atalak ara, nun mutuku koproba, oldemuk ulule.
Atalakuk, Edom mutuku taleamuk Raja arye, mutuku si Elat mutuku uamuk ning yanuka, obuka sirya dakukce, amutuku ulamik ninye ara, yakdonokukba, sikda amutuku batakuka, bai sakuka yukak bindobik. Winibukce, anyasik ap, amutuku tuku ap ara, tamubuka eluk doprobuk. Winibukopura, Edom mutuku ulamik ninye yayikce, amutuku yanuka talibikce, amutuku ulamik. Ayana talibuka ulamik ninye ara, wini talak babye, tuba aunyake.
Allah an weik yu ara, doprapmince, an si kum kel bikamkik nang, yuk-yuk mutuku nang, sik deiceuk deipnalyame. Tonda, an yu weik upkilye ning ara, an si pia kum erekinyak nang, sik deiceuk, deipnalyame. Deiyok ara ani. Aning ara, sikce, an mapu koproba, Yakub birye deibukba, dadeipdanin yangalamupu nang obuka, akunum kum kipmanto kipsik. Tonda, anang arye nun unyap mutuku babye, sikce yatu obuka, sice buklopsika ati, moropkine na nio.” Nabi Yeremia birye, Allah ati nyabuka morobuk.
Anggunce, ‘Se, nun ap, nun talinyap bona ap, duknuptibyeura, sik nun olan mutuku yu nang arye, ubula kum dopropsitinge. Nunda ninye olanak bipyeba, nun ton kum opnamsiake. Tonda, nun ton tomopsikiriye, tapu koubuka, kum bobinamsiyake,’ tenepmalum do? Kume, aning winipsilye babye, Allah arye anggunti, ‘Se, anggunda bicoʼ tenen, kum lyepropnamsile. Tuba wenenauk wininamsile. Ura, Allah arye sik Israel nang ati, ikin ning weika arye, sik nong deice deipnamle bukni, akunum winiplyopura, elce, ‘Yo, akunumaʼ tenen, el yu ara, min kum upnamle. Elce tuba yu upliba, el taruk erebuka, anggun Israel yala nang ati, tuba wenenamsile.
Atalak ara, ikin weik ning upnamle ati, anggun nirya ara, Israel yala nang bukni, danoutam arye bokuka, sik Manasye yala nang ap, Efraim yala nang ap, tuba olanauk winilamik. Winilamik bukni, aninguk kume. Sik Efraim yala nang ap, Manasye yala nang ap, sik bitinye neika keprobikura, sik Yehuda yala nang ati olbinamik. Winilamika babye, Allah el yu tuba ubukba, sik anang ati tuba wenebukce, atalak babye ‘Tuba ton ap wenepnamne,’ tenelirye, kintinilule.
Ati ara, Allah Yahweh arye, amutuku ulamik wel nang nirya ap, amutuku noutam ulamik youwak kilapu ap, amutuku ulamik kwaknamne mapu ap nirya ara, Allah arye, ‘Se, sikda na bico ati, amutuku nang kum wenepnamne,’ kum tenebuk. Akum bukni, sik nirya ati talye wenebuk. Winibuk ning ara, talye ati kuma. Deiyok ara, sik atalak ulamik Israel nang nirya ara, malye winin ninguk talibuka ulamikce, Allah ati kum tenelamik. Elce, ‘Aning wininamlume, aning ara, pia kum wininamlume,’ nyapdeibuk yupu nirya ara, kekena kumce, yaniltalamik. Tonda, sik nirya ara, talye-talye yupu ap, deiyok ton una kum yupu ap, talye nyalamik. Ati, Allah bico kum tenebukce, el yu ubukba, anang nirya ati wenebuk. Allah arye, sik Israel nang ati, ikin ning weika arye, sik nong deice deiamuk bukni, narye, ‘Yo, akununaʼ tenen, el yu ara, kum bapdongamuk. Elce tuba yu ubukba, el taruk mikip arye, Israel yala nang ati, tuba wenelamuk.
Wininyap bukni, min talak ara, Babel mutuku talebuka deiyoknye, Raja Nebukadnesar birye, ‘Israel nang opnirye, sik mutuku alubuka dopropnamneʼ tenen, nun Israel nang unyap mutuku, mal olyangalamsuk talak ara, nunce nyabupu. ‘Kume, sik Babel mutuku yin nang ap, Siria mutuku yin nang ap arye, nun atam unyap nang nirya, ‘Opsicakʼ tenena ati, nun ilil weik upsile. ‘Ati, anang sik dam arye, bai sakuka bibirye, omutuku weik asik domika, Yerusalem mutuku binuka daunamabe,’ tenebuburye, yanuka Yerusalem mutuku damuk unyabe. Winibupu ati, wini talak babye, asukumuk tuba awininmabe.” Sik Rekbah yala nang arye, na Yeremia biti, ayupu laka nyapnike.
Winibikcopura, atalak aryuk, na sikti, yu weik upnamnile. Winipniliba, sikti, bataknamne. Tonda, sik dam, na memepropnirye, sikti, melibuka kum kaliknyopura, yuk nang arye, Israel ninye obuka malye kipnamake. Tonda, weik mambul ning ap, ikin weik ning ap, tuba sik dam anyuk upliba, kanye imun ning, anggun dam deipnamsile. Ikin weik uplye talak ara, winipliba, sikce nyapnamake, ‘Se, weik mambul ning, nun dam usilye ning ara, nun ni koproba Allah ara, nun dam ton kum ulula ati, ikin weik usulul do? Dipkoprop Allah arye bataksuka ati, ikin usulule,’ nyabuka, malye nyabuka engenamake.”
Winibikceura, sik abitinye yala nang neika kipdobikirye, sik Pilistin nang olbana ati, keting kumulban tam neika mal pibinamake. Tonda, sik bitinye yala nang arye, otam keting panalyangan tam unyak nang ara, sik talilamikce bona nirya ara, binuka alubuka dopropnamake. Israel yala nang ap, Yehuda yala nang ap, sikce Edom mutuku unyak nang ap, Moab mutuku unyak nang ap, binuka opnamake. Winibikceba, Amon yala nang nirya ara, sik abitinye yala nang, sik amu tamuk unamake.
Diba, na Allah arye, na taruk mikip arye, dopkwetepniba, sik unyak mutuku noutam nirya ara, ninye weik tonun obuka kum daneipnamne. Winipniba, kam ulye ning ap, yo ap, aning-aning nirya kum kipdeipnyopura, sik mutuku ara, oldemuk upnamle. Ara, iknapye tam (arah selatan), mek ap, ninye ap pia kumak arye, asukum arye dipdongobuka, dabu tam (arah utara), asukum arye dipdongobuka, Ribla mutuku dam ap, anoutam mutuku nirya ara, aning-aning nirya kum kipdeipnyopura, anggun Israel yala nang nirya ara, nati, ‘Se, elda dipkoprob Allah Yahweh ulule. El mikip ara, pia weik ululnye ati, elce nyalye touk, dipkoprobuk winilule,’ tenen, moubuka kel biknamake.
Anggunce malye kipdeipnulum deice arye, yu upnuka ati, min talak ara, na adiparyuk anggun wenena ati, deiyok koubuka wenelamsise. Tonda, narye anggunti, pia teleb ning ap, tuku ap, anggun deice dobuka, deiamsise ning nirya ara, adiparyuk tamubuka dopropse. Aning winipsa deice arye, lo arepsiba, adiparyuk, sik Pilistin nang arye, yanuka opsikce, anggunce taleamlum tuku ton, ubula doprobik. Sik Pilistin nang ara, anggun Israel yala ululum nang arye, talye yolana ap pia malye-malye una ap, eibika ati, ‘Se, sikda nun lik,’ tenebikce, anggun malye weik ululuma ati, sikda alye dakdayik. Anggun Israel nang arye, pia malye umunce, dukna atonun umunye ning nirya ara, na Allah arye, anggun bobuka, anggun mal olan nang taruk deice deipsinyeba, sik Pilistin nang arye, ‘Winipnuyabe,’ tenelamik ning nirya ara, talye luparabuka winibike.
Allah arye nyapdeibukba, nabi Yesaya birye sekeipsuk. ‘Yuk mutuku nang arye olyanamsiyak talak, nun melibuka lyepnamsiyak’ tenen, Mesir mutuku nang dam morolbanyak nang ara, pia bicoe. Sikce utenenyake. ‘Se, Mesir mutuku yin talin nang ara, yuk ninye olana ati kuda basam deice bukikirye, minopce bikbik abuka bana ati, mikip dobuka banyaka anya arye, sikda weik mambule. Tonda, se, Mesir mutuku yin talin nang pia weik tonun unyake. Sik kuda tuku deice libuka banyak ning ara weik mambule,’ tenenyake. Bukni, winibuka tenenyak nang ara, Allah Yahweh aning-aning nirya talibuka deice tam ulirye, Pia Diksukumuk ulirye Israel ninye melibuka kalikilinye biti, ‘Nun ton melipsilyame,’ nyabuka kum moroninyake. Winibuka unyak ara, walwal arye wininyake, nyapsine. Allah arye nyabuk.
‘Israel ninye wenena ati, ikin ning arepnyopura, sik malye winin ning bataktingce, teleb wininamak do?’ tenyamsirye, anggun wenena ning, weik arye arelamsise bukni, anggun malye winin ning tuba kum batakalulume. Ati, anggun mutuku noutamak, asik dobuka ululum ninye nirya ara, asilen ning arenamsine. Winipmanto ara, wa win nang arye, ‘Gandum duk saklirye, bulubuka ‘Naʼ tenen, deipnamap’ tenen, malye ning wibuka donokolbalamak touk, malye ning weik winimunye ninye nirya, wibuka opnamsine. Anggunda talye ninye kume, na mapu ululum bukni, anggun wenena ati, kanye imun weik ning, anggun nong deice delinamsine. Deiyok ara, anggun malye winin ning batakuka, teleb kum winiluluma ati, wini talak dipkoprob wenepsinirye, obuka sirya daknamsine.”
Sik Israel nang arye, maknya kintinibuka kwalinyaka ara, akunum lak upliba, nong ulule. Sikda malyeuk wininyake. Winipmanto ara, ninye yupu bokolin talak ara, tonoknye tiklirye, yuknye biti, ‘El malye ulamlye ning ara ani, ani,’ nyabuka, laka nyalamle touk, sik kwalinauk unyak deice arye, malye kililanyake. Sik kwalina uk unyakce, malyeuk unyak ning nong upliba, lak ulul bukni, sikce na Allah ati ton, ‘Nun ni birye melibuka lyepsutu do?’ tenen, kum elyanganinyake. Tonda, ‘Allah arye yata nyapnamsil do?’ tenen, na dam tamubuka kum yanganyake.
Winibuka winilamse talak ara, ton mutuku ninye ara, mek pia patalamukce, sik nong ara, mitanguk ulamik. Winilamuka ati, ‘Se, mek diptibye’ tenen, ton mutuku nang arye, ton mutuku binuka dipdeyik bukni, pia kum boubuk. Sik mek pia tuba patanauk ulamuk. Aning nirya ara, narye anggun wenena ati, ikin ning arelamsise bukni, anggunda tuba tamubuka, na dam pia kum dobolyanganulume. Na Allah Yahweh arye nyapsine.
Aning atonun, narye anggun wa wibuka koulamlumba, bok siliklamuk ning deice nirya ara, wakaba amulamukba, lyulsaklamuk. Tonda, anggun wa wibuka koulamlum ning bok nirya ara, kouluna arelamsiba, koululamukce, kum danalamuk. Tonda, mikip weik buppu kumanya arelamsiba, akumanya arye, wa wibuka koulamlum ning nirya ara, malye kipdeiamse talak ara, koulupnaba dina ton kum ulamlume. Tonda, anggun anggur tapu duk ap, yo duk si ara, yo duk ap, zaitun yo duk ap nirya ara, narye sul kwising arelamsiba yangalamikce, aning nirya yanuka dipna arye, sirya kum danalilamik. Winibuka ikin ning arelamsiba, winilamsika babye, anggun adiparyuk, na dam ton, tamubuka kum yanamnulume. Na Allah Yahweh arye nyapsine.
Tonda, narye Mesir mutuku ninye ati, deiyok ning arelamse touk, anggun babye naryuk, uk dina deiyok ning arepnamsine. Tonda, kam nang nirya ara, mal oldanmaca noutam, narye sik obuka, bataknamne. Tonda, aning atonun sik kuda basam babye dopropnamne. Tonda, sik doltakne aik noutam nirya ara, opmace nang, sik tong aryuk weleplirye, tong welepnamle ning ara, anggun kam tuba unmace nang, sik u pum bisik weksiliba, atong kekepnalume. Winipsilya babye, anggunce tamubuka, na dam ton, kum yanamlume. Na Allah Yahweh arye nyapsine.
Anggun kan-kan arye dopropsirye, ton tam nang ara, oplopse. Ara, Sodom mutuku ap, Gomora mutuku ap, malye weik winilamik ninye oplomse touk, anggun Israel yala ninye babye, weik arye opsise. Winibuka wenebuka olamsisirye, Israel ninye mitik anun bataksise. Winipmanto ara, uku yo dapmakiba, uku dinmalya ani, sirika batakliba, lukuka delilamak touk, narye anggun Israel yala nang ara, mitik anunuk lyepromsise. Winibuka lyepromsise bukni, anggunce tamubuka, na dam ton kum yangalamlume. Na Allah Yahweh arye nyapsine.
Tonda yata nang do nirya, sikce, ‘Se, nun ni Allah arye, yata yupu nyapnamsil do?’ Tonda, ‘Nai ance nunti, kalikuka melinamsilamʼ tenen, na dam ton yanuka, kum moroninyake. Tonda, sik anang arye, ‘Se, nun yata wiripnamap do? Teleb ning ara, aning do, aning do?’ tenen, na Allah ati, tuba kum asininyak nang nirya babye, wenebuka opnirye, sirya dakuka, kum daneipnamne. Ara, sik anang nirya ara, na Allah ati, melibuka kum dobolyanganinyakce, akunum bataknika ati, opnirye pia kum daneipnamne. Tonda, ‘Allah arye, yata yupu nyapsiliryeba, aninguk talebuka dobolyanganamap do?’ tenen, na dam yanuka, na yupu kum kekenenyake. Wininyaka ati, anang nirya opnirye, pia kum kipdeipnamne.
Aweik asik donyakak unyak nang nirya ara, Allah arye do, ninye arye do, ‘Aning ara, wininamlume Aning ara, pia kum wininamlume,’ nyabuka, wenena yupu nyaptinga babye, amutuku ninye arye, ayupu pia kum kekenyake. Atonun, Allah arye, ‘Aning ara, malye wininmaluma ati, aning ara, pia bataknulume,’ nyaptua babye, mandipna ubikirye, ‘Dauplye,’ tenen, pia kum kekebikirye, kum bikmanto unyake. Tonda, amutuku noutam unyak nang ara, sik kanye nirya dobuka, Allah el deice pia kum delinyake. Tonda, sikce, ‘Allah Yahweh aryuk, melibuka lyepropnamsileʼ tenen, diba kum tenenyaka ati, elti kum moronyake. Tonda, sikce, ‘Nun si erenyap Allah, el dam ton tamubuka yanamabe,’ pia kum tenenyake.
Piblisite