Saul dibuka deiyok ara ani. Ara, Saul birye Allah ati, “Winipnamne,” nyamuk ning ara dukdongobuka kum winilamukce, batakuk. Aning ara, Allah Yahweh nyamuk yupu ati, dukdongopra kum ulamuka deice arye dibuk. Tonda, Allah Yahweh arye, “Wininamlume, aning ara, pia kum wininamlume,” nyapdeiamuk mem yupu ati ara, Saul birye ayupu kekebuka kum ulamuka deice arye dibuk. Aninguk kum bukni, Saul bira, Allah ati, “Na walwal upnil ning ara, ance lake nyapnilyame, aninguk unamne,” nyabuka, kum moryamuk bukni, elda ninye diamik nang, sik kanya ap, yupu nyana kel nang, sik dam bin morobuk. Elce, ‘Aning winipnamne do, aning winipnamne do?’ tenena kum arye, walwal ulamuk talak ara, amalye pil dobuka ulamaik nang, sik dam binuka, morobuka ati, Allah Yahweh arye Raja Saul el wenen ati, arebukba dibuk. Dibukopura, el pununa ati, Allah Yahweh arye Saul elce Israel nang ati, ninye deiyok kibuka, Raja kiamukce, amutuku nirya talilamuk ning pununa ati, aning nirya dobuka, Isai el mi Daud ati arebuk.
Yesaya 8:19 - Eipomek19 Elce nunti, awinipnamsil ning ara, akunum tenilamsuka anya arye, yata deiyok ati, malye nang dam asilbalyam do? Ara, asing keten nang ap, diplamice nang kanye ati, yupu talilbanyak nang ap, ‘Aminyan yata winipnamsil do?’ tenen, asilbalulum ning ara, malye winilulume. Sik anang arye duknubuka, mur-mur anyak yupu ap, merye nyanyak yupu ap ara, yata ati kekelulum do? Nun kam tuba unyap ninye arye, akunum diamice ninye, kanye arye nyanyak yupu deice arye, aminyan winipnamsil ning ati, dipkoprob kel kiptibye do, kum do? Aning ara, kum winipmanto ati, anggunda yata ati, anggun ni koproba Allah ati, kum asilbalulum do? Gade chapit la |
Yesaya 8:19
28 Referans Kwoze
Yatanye do, asing ketenanye, elda diamice nang kanye ap, isa mikip deice arye yupu sisikinanye ap dam bilirye, “Ance, aning ara winipnutume,” nyabuka moroplinye bira, ‘Anye na mi koproba ulule,’ kum tenenamne. Deiyok ara, na Allah ati, na siuk erepniting bukni, talye isa si ati erenyak deice arye, ninye arye kilapu akunum domice bukni, akilapu batakuka, yuk kilapu ati, ubula yolalamak atonun unyaka ati nyapne. Ati, narye Israel nang kan-kan noutam arye, anang dobuka, bai tam yakdonoknamne. Winipnirye, anang nirya obuka, sirya daknamne.
Aninguk kum bukni, sik dana-dana tam, Allah pia kum bikamik nang arye winilamik touk, Manasye babye, el mapu babye, isa si erena ati, kintinilamikak Ben-Hinom mutuku bukni, weik lu uamukak bobalamukce, el mapu obuka, aisa ati arebukce, uku dongobukba, uku arye amapu dibuk. Manasye el babye, sik asing keten nang pil dolamik atouk ulamuk. Tonda, “Aning winiplulume,” nyalamik nang ati, isa mikip deice arye, ninye kum kupmanto ning winilamik ning ati, ‘Sikce yata nyapnamak do?’ tenen, anang dam binuka asilelamuk. Tonda, “Aning ara, na ton peterebuka lake nyapnululume,” nyabuka morolamuk. Tonda, akunum diamik nang, sik kanye ap, yupu nyana kel kiamik nang arye, pil dolamik ning ara, elce ton, ‘Aning ton patapnile,’ tenebukce, anang ap neika ulamik. Tonda, aminyan winipnamne ning ati, akunum diamik nang ap yupu talamik kam tuba ulamne nang ati, laka nyalamik nang arye, yupu nyalamik ning ara, elce ton ayupu kekelamukce, anang ap neika ulamik. Aning-aning nirya winilamuka deice arye, Allah dam weik malye winilamukak, Allah Yahweh arye elti, ‘Aning ara, na like,’ tenelamukce, anye biti yu weik ulamuk.
Yuk-yuk mutuku noutam binuka ulamik talak ara, sik Israel nang arye, sik Peor mutuku nang arye, isa si erelamik ning ati, ‘Nun ni bira, isa si Bahal aulule’ tenen, atalye ning talilamikce, isa Bahal, el siuk erelamik. Tonda, sik yuk-yuk mutuku nang winilamik touk, sik Israel yala nang babye, ‘Akunum diamik nang, sik kanye arye yanuka nunti melipsitinge’ tenen, kam ning obuka, akunum diamik nang ati, arelamikce, anang sik kanye ati, “Melipsululume,” nyabuka morolamik.
Tonda, yuk ninye yupu kekena kumce, anang sik walana unyak nang ap, isa mer ap, diplamak ninye, sik kanye ap, sisiklamak nang unyakak morolbana ap, yupu talina ap, pia meme. Aning atonun, Isa Mutuku Dongonye mikip deice arye, aminyan winipnamle ning laka nyanyak nang dam, bana pia meme. Aning nirya winimunya deice ara, malye ulilalulume. Nara Yahweh, anggun ni Allah arye nyapsine,” nyabuk.
Narye lo arepnyeba, anggun mal olan nang arye yanuka opsikcopura, anggun Yerusalem mutuku nang arye, winipmanto ara, ninye dibikceba, tuku lukuka tuku pum tam arye, yupu nyalamak touk, anggun yupu ara, mitik tonun nyapnamlume. Winipmanto ara, ninye sakuka, tuku pum tam maptingaura, sik yupu nyaptinga babye, yuk nang arye kum kekelamak touk, anggun babye atonun upnamlume. Tonda, winipmanto ara, akunum deibik nang, sik kanye arye yupu mitik tonun nyalamak touk, tonda dimang maka yupu nyalamle touk, yupu nyapdenamlum bukni, yuk nang arye kum kekepmanto upnamake. Anggun anang arye yupu nyapdenamluma ara, moubuka kum kekepnamsiake. Lukunyan noutam arye, mur-mur an yupu nyalamak touk nyanamluma atia.
Na Allah arye, sik Mesir mutuku noutam unyak nang arye, ‘Winipnamabe,’ tenenyak ning nirya ara, kum daneipnamne. Tonda, sik kanye pin-pin asa arye teleb kibuka unamaka babye, kum daneipnyeba, sik talima dakalsakanamle. Sik anang arye, sik si erenyak isa berhala-hala ati, ‘Nun melipsilyame,’ nyabuka moronamake. Tonda, sikce ‘Nun yata wiriptibye doʼ tenen, aning-aning winipmunce, melipsululume,’ nyabuka moronamake. Atonun tonda, sik asing keten nang ati, ‘Laka nyapsilyame,’ nyabuka, ton moronamake. “Tonda ninye kanya ati, laka nyapsilyame,” nyabuka ton moronamake.
Nyabikopura, Saul bira, ‘Yuk nang arye, na urasin eipnicak’ tenen, el ongolamuk baju kwiribukabukce, yuk baju ongobukce, tonok lukunyan noutamak, el ap, ninye bitinye nang ap, neika akil el dam biyik. Biyikce, Saul birye, akil binyak morobuk. “Akilo, na melina ati, akunum diamik nang, sik dib kanye ap, yupu taliplulume. Ara, talye ning ati kum bukni, min arye diamuknye, narye, ‘El si ani,’ nyapnukinanye, el dib kanye yukupminya deice arye, yanule,” nyabuka, Saul birye, akil ati morobuk.
Amutuku noutamak unyak ninye, sik noutamak arye, ninye ton kir dona ati, weik arye kel kinyak ninye ap, neika dukdongobuka winina pia meme. Aning atonun, ninye dibinyak ninye, dib kanye ap, yupu talina ati deiyok ning talibuka pil dolamak ning ara, anggun ton talibuka, kum wininamlulume. Tonda, amem ning pil donyak nang ati, ‘Se, nun ton peterepsitinge’ tenen, asiltona pia meme. Amem ning nirya ara, anggunce neika dukdongobuka, winina pia meme.
Sik pia walwal nang arye, wininyak bukni, dipkoprob Allah, el si Yahweh ulule. Elda kam una deiyoknye ulule. Allah el tonok ara, kam pia ulule. El Allah Yahweh ara, aning-aning talibuka, pia ati, Ninye Deiyoknye Raja unamle. El ap, elce talilul ning nirya ap, pia kume, kum danamle. Pia aupnamle. Tonda, Allah elce, tukwak mutuku ap, tukwak nang ap ati, yu uplyeura, tukwak mutuku nirya ara, weik arye onamle. Tonda, Allah elce, tukwak mutuku unyak nang nirya ati, yu upturye, wenepsutu ura, tukwak mutuku unyak nang nirya ara, darapdongobuka uptinga babye, kum upnamake.
Aning kum bukni, pia malye weik winibuk ning ara ani. Ara, mesba dobuka kintinip deiamikak ara, Manasye birye, el mi koproba obuka, isa si erena ati, yanuka uku dongamuk. Tonda, Manasye elcuk, doyanamle talak winipnamle ning ati, isa mikip deice arye, aning laka nyan ninye wibuka delina ap, apil donak ati, kintinilina ap, tonda diamne nang, sik kanye arye, yupu sisikin nang ap, yupu ara, el ulamle ninye, on ning ati, kir don pil ap, “Do talak winipnamle ning laka nyapsilyame,” nyabuka, moron nang ap, malye ulamik nang nirya ati, ‘Neika ubirye, na ton biknamneʼ tenen, memepdeiamuk. Winyamukce, Manasye elda, Allah el dam pia malye ulamuk. Adeice arye, Allah Yahweh arye, el Manasye biti, ‘Na dam kum yatue,’ tenelamukce, yu weik el deice delilamuk.
Sik anang arye, asilbiyik bukni, Allah Yahweh el im deice pil donanye malaikat dopdeibukba, elce nabi Elia, Tisbe mutukunye biti, el dam binuka nyabuk. Malaikat arye nyabuk yupu ara, ani. Nabi Elia anda binulyame. Ara, Samaria mutuku arye, Ekron mutuku asilbinmak nang dam binulyame. Ara, ninye deiyoknye Raja Ahasia, elda Samaria mutuku talibuknye birye, wipdeipmalba, yanganmak nang ap, epdanamlume. Epdamunyopura, nyapnamlamle. “Sik Israel mutuku noutam ara, ‘Dipkoprop Allah ton kum ulul do? Allah kum ulule,’ tenemunye deice arye, Ekron mutuku ninye arye, si erenyak isa, el si Bahal-Zebub dam asilbilum do? Yata deiyok ati, aisa dam bilumce, ‘Nun deiyoknye Raja Ahasia dipnamle do, kum do?’ nyabuka, asilbinmalum do?
Ura, Raja Yosia birye, kum daneibuk ning ara ani. Allah el yupu minop buku noutam arye, ayupu nirya, ‘Wininamlume,’ nyapdeiamukba sekeiamik yupu awamuk touk winibuk. Abuku ara, Allah el si Yahweh, el si eren aik pum tam deiamik bukni, wangamikba, Allah el aik pum tam pil dona deiyoknye imam Hilkia birye eibukce, abuku dobuka Yosia biti arebuk. Arebukba, abuku eibuka kel bikukce, isa si erelamik nang nirya yakuka dopkwetebuk. Ara, ‘Yata wiripnamap do? Yata wiripnamsil do?’ tenen, isa mer ati morolamik deiyok nang ap, tonda akunum diamik nang, sik kanye asilena deiyok nang ap, kir dona deiyok nang ap, ‘Nun ni’ tenen, kat ning dobuka memebuka sik aik pum tam delilamikce si erelamik ning nirya ap, yakuka dopkwetebukce, sik bon ning nirya ap, isa urasin atonun memebuka delilamik ning nirya ap, dobuka uku dongobukba dibukce kum dayuk. Winilamikak ara, Yehuda yala ninye ulamik mutuku nirya ap, weik asik Yerusalem noutam nirya ap, aning nirya kum daneibukce, dalubuka donokuk.
Allah el yupu laka nyalamik nang ara, talye nang arye, “Ayupu sekelulum,” nyalamika deice arye, kum seklamik bukni, minop talak unamik nang kan-kan noutamak arye, tilila yupu laka nyalamik nang ton ulamik touk, anggun wini talak ululum ninye noutamak babye, tilila yupu peterena nang, dipkoprop unamake. Anang arye, malye ulisulul yupu, duknubuka peternamsiake. Sikce, “Kume, Yesus Kristus ara, urtalinye ulule,” nyabuka, nun Weik Deiyoknye, aning-aning nirya talibuka lyeklobuka upnamlanye, Yesus ati, batakuka yanipnamake. Ayupu ara, pia malye yupu upmalya babye, ayupu babye nyanamake. Yesus arye, ‘Aninye babye lyepnamne’ tenen, dekuk bukni, anang arye Yesus batakuka, amalye yupu nyabikcopura, ayupu nyabikca deice arye, Allah arye sik ati minopce weneplirye, opnamle. Aning ati ara, deiyok sikca.
Anyapmap mutuku-amutuku nang nirya arye, akunum kel bikamika anya arye, sikce laka nyanyake. Ara, nunce anggun dam yapubuk, kanye deibuka yukulamsulum ning ap, Allah yupu kekebuka dololamlum ning ap laka nyanyake. Sikce laka nyasinyak yupu ara, ani. Ara, “Sik Tesalonika ninye arye, ‘Allah el ara, pia dipkoprop Kam Unanye, el tonoka’ tenen, diba tenebikirye, ‘Eluk talibuka, el piluk donamape’ tenen, sik mem ning isa si erebuka, talyamik ning nirya ara, akunum batakik.” Yuk nang arye nyabuka laka nyaninyake.
Ura, yuk talak ara, sik Yahudi nang bulubuka Allah morolamikak binmabu talak arye, yuk nang arye, ‘Akil nun pil talye donamsil’ tenen, yo bok deice arye dekamik kil tonok bisik noutamak eibupu. Akil ara, tonok isa talyamuka, isa el mikip deice arye aminyan winipnamuk ning ati lak lelamuk. Akil arye yuk nang ati, “Amenyan talak winipnamsile,” nyabuka laka nyalamuka ati, anang arye yo bok weik areamikba, akil el talyamik nang arye dekna weik dololamik.
Sik akunum diamik nang ara, akunum dibika anya arye, tamubuka kum kam buknamake. Sik akunum dipmak nang ara, sik kanye tenenanye ara, ton ap kum kam unamake. Aning deiyok ara, sik anang ati, Allah ance weneplumce, akunum obuka kum kipdeiplume. Aninguk kum bukni, yuk-yuk nang arye, amalye wininyak nang tuba teninyaka ara, ance sik teninyak ning ara, ance kum kipdeipmala anya arye, anang ton ap tuba kum teninamake.
“Ara, anggunce nati, ‘Mesir mutuku ninye arye melipsiting, tenen, morolbitibye do?’ kum nyamnulum bukni, anggun dem aryuk morolbilume. Tonda, Mesir mutuku ninye deiyoknye Firaun birye, ‘Melibuka kalikinamsil’ tenen, el dam morolbilume. Anggunce, ‘Se, Asyur mutuku ninye arye olyanamsiyaka ati, yata wiriptibye do?’ teneplumce, ‘Mesir mutuku noutam duknulbipyeba, yu nang arye kum eipnamsiyak’ tenen, duknulbilume. Anggunda, ‘Allah arye melibuka lyepnamsil,’ tenepmatum bukni, na batakuka anggunce, Firaun dam nyalbiluma deice arye, anggun malye uplume.
Na Allah Yahweh arye nyapsine. “Israel ninye sikce na si ereninyaknye bira, pia diksukum pia Teleb Unanye unune. Narye anggun kwepdeiamsisirye, pia kalikuka melisunune. Anya arye, anggun Israel ninye dorupnin banamlum talak nirya ati, yata ati na asilyanmanulum do? Anggunce nati, ‘Aning ton winipsilyame, apil ton dopsilyame,’ nyabuka kum nyanamnululume. Anggunda na mapu ululuma anya arye, narye anggunti pil dosunun ning ara, nati, ‘Yata ati do?’ nyabuka, kum asipdenamnululume.
Anggun Babel mutuku nang ara, minop anggun wel talak arye, anggun tukwak mutuku kel bikna deice arye, sang yupu do, asing len nang arye nyalamak yupu do, kir don nang arye, ninye olamak ning do, aning-aning aupmalaya babye, aning arye kum melipdanmanto kum upnamsile. Anggun mutuku noutam talye ning talibikirye, malye-malye unyak nang arye, anggun pia teleb yupu ap, pia teleb pil ap, dobikca deice arye, yuk nang eibikirye, ilil upliba, sik yok sirim talipnamla babye, ato ning talibuka, pil dona deice arye, ayanamsil ikin ning ara, yupu kum sekmanto unamlume. Dipkoprop anggun nong deice yanamle!
Anggun Babel mutuku nang ara, yata wiribuka talak arye, anggun mutuku kel pia weik nang ap, asing len nang ap ati, ‘Se, aminyan talak ara, yata wiripnamsil do?’ nyabuka, asina uk ululum bukni, sik anang arye kum melipsikiba, anggunda lik upsiliba, ‘Daupmalye,’ kum tenelulume. Anggun mutuku kel nang arye, anggun dam ayupu uk tuba-tuba nyalyangasinyaka deice arye, anggunda lik weik akunum usulule. Bukni, anggun mutuku nang arye, ‘Aminyan winipnamsil ning biknamapʼ tenen, im noutam ulye ning nirya moubuka eibikirye, tenilenyake. Aning atonun, sikce im noutam kurya tikinyak ning babye eibuka, ‘Kel biknuyapʼ tenen, pirilenyake. Tonda, winiryuk wala panabuka tikilyalye ning eibikirye, winibikca deice, sikce, ‘Aning-aning winipnamsile. Aminyan winipnamsil ning ara, ani,’ nyabuka, anggun dam lak nyanyake. Winibuka unyaka anya arye, anggunce winipmunyeba, alaka nyapsikce nang diamuk, dotalak anggun deice yaliba, dopropnamlum ikin ning nirya ara, sikce, ‘Aning-aning yanamsile,’ nyabuka, lak kibuka lak nyanamsiyake.
Nara Allah arye, winipnamna ati ara, yata nang do nirya, sik dam yakirye, ‘Kume, Babel mutuku ninye deiyok kibuka talibuknye biti, el yupu kekena kume,’ nyabuka, nyamsiak nang nirya ara, sik arye ayupu nyapsitinga babye, sik yupu pia kum kekenamlume. Ara, nabi-nabi nang do, tonda yata talye nang do, amutuku deiyok talibuka unamak nang do, aminyan upnamle ning kum uplye talak, laka nyana deiyok nang, nabi nang arye do, lengdar deice arye eibikirye, laka nyanyak nang do, asing kwa nang arye do, sikce, “Nunda lengdar deice arye nyapdeipmasile,” nyanyak nang do, sik nyapnamak yupu pia kum kekenamlume. Tonda, “Laka kin ning deice arye bikmap ning ara ani,” nyanamak yupu ap, tukwak mutuku sambala mikip deice arye pil dolye ning ap, tonda isa mikip deice arye pil dolye ning ap, adeice arye nyapnamak yupu nirya ara, anggun pia kum kekenamlume.
Winipnye talak ara, talye ning bukni, anggunce, “Nun ni,” nyabuka, anggun taruk arye kintinibuka deipmunce, isa si erelulum ning nirya ara, kum kipdeipnamne. Tonda, mutuku ati, “Asukum ara, memak,” nyabuka, kintinibikirye isa si erelulumak nirya ara, kum kipdeipnamne. Tonda, anggunce isa si erena ati, cang yo ikuka delilulumak nirya ara, dakuka uluplopnirye, kum kilinamsine. Winipnyopura, aminyan dorunamle talak noutam ara, tuba tonap talye ning ati, “Nun ni Isa el siuk erenamabe,” pia kum nyanamlulume. Anggun taruk arye kintinibuka delilulum ning ati, si kum erenamlulume. Aning ayala-ayala nirya, kum kipdeipnamna ati nyapsine.
Sik amutuku noutamak unyak ninye arye, malye ubuka wininyak ning ara, nyapnusine. Sik amutuku unyak ninye arye, Isa Mutuku Dongonye si erena ati unyakce, sik mapu nirya ara, sal mapu ap, kilmapu ap nirya obuka, uku dongolbanyake. Sik amutuku noutamak unyak ninye arye, malye winilamak touk, anggun Israel ninye, pia kum wininamlulume. Tonda, sikce ninye derelamice ninye, sik kanya ap, neika yupu talibuka ulamak ninye ap, neika dukdongobuka pia kum unamlulume. Tonda, sik amutuku ninye arye, ninye kir don merye talibikce, ninye ati, ‘Nun like’ tenebuka, unyak ninye ap, neika yupu talibuka kum unamlulume. Tonda sik amutuku nang arye, mem ninguk talibikirye, ‘Aminyan talak winipnamle ning ara, eibibirye, kel kibuka laka nyanamap’ tenen, mem pil dolamak ning ara, anggun Israel ninye arye, pia kum wininamlulume. Aminyan talak unamlumak nirya ara, amutuku noutamak unyak ninye arye, pia malye winilamak ning, anggunce talibuka, pia kum wininamlulume.
Allah arye aning-aning bisik arye, Saul biti, ‘Winiplyame,’ nyabuka lak kum lebuk. Ati ara, Saul birye, el amu tam melin nangak, nyabuk. “Akunum diamik nang, sik dib kanye ap, yupu nyalanyak kil tonok dipdemunce, eipmunyopura, ‘El mutuku ani,’ nyabuka, laka nyapnumunyopura, narye, akil dam binirye, yupu talipnaname. Akil ati, ‘Yata wiriptinye do?’ nyabuka asipdenamne,” Saul birye nyapdeibuk. Nyabukbuk, el melin nang arye, Saul biti tamubuka nyabik. “Naio, akunum diamik nang, sik kanye ap, yupu nyalanyak kil ara, mutuku si Endor mutuku ulule,” nyabik.