Yesaya 6:5 - Eipomek

⁵ Winibukba narye nyapse. ‘Se, bicoe. Nara daopnutuba, diptinye. Aning ara, talye ati kum nyapne. Deiyok ara, pia mambul ning eipman bukni, nara malye yupu nyananye unune. Tonda, na unye mutuku noutam neika unyap ninye nirya babye, malye yupu uk nyapdabirye, malyeuk unyabe. Wininyap bukni, na malinye birye, na asing arye pia mambulnye elinmane. Na malye ning aunilye bukni, aning-aning deice tam ulirye, ninye deiyok talibuka ululnye, Weik Raja akunum eipmane. Ara, aning-aning nirya talilirye, im deice yin talin malaikat nirya, sik weik deiyoknye ulirye, weik erena ap, mikip weik ap ululnye, Allah el si Yahweh akunum eipmana ati, na dipnamne,’ nyapse.

Yesaya 6:5 Referans Kwoze

Yeremia 1:6

Nyapnukba, narye Allah ati tamubuka nyapse. “Diba, na ni Allah Yahweh, anda aning-aning nirya talibuka deice tam, Weik Erena Deiyoknye ulyama anya arye, ance, ‘Winipnamne,’ tenelyam touk winilyame. Bukni, na mambul kanye bopne. Na yupu nyanuna ara, moubuka teniptinirye, kel kum biktinye. Narye pia teleb-teleb kibuka kum nyaptinye. Deiyok ara, nara kamnye koprop ununa ati, na alye unulule,” nyapse.

Keluaran 6:30

Nyapdeipnuk bukni, na Musa birye, Allah el dam tiksirye, tamubuka nyapse. “Se, na ni koproba Yahweh, an akunum biknulume. Nara, mambul yupu teleb kibuka nyapmantonye kum unune. Aning ara, an bikmanilame, yata wiribuka Mesir mutuku ninye deiyoknye Firaun birye, na nyaptinye yupu moubuka kekepnutu do? Kume, ara winipmanto kume. Narye nyaptinya babye, Firaun birye kum kekepnamnile,’ tenepne,” nyapse.

Yesaya 29:13

Aning-aning nirya ati, Pia Mikip Weik ulye deiyoknye Allah arye, na Yesaya biti nyapnuk. Sik Israel nang ara, yupu deice aryuk, na si ereninyake. Bukni, dipkoprob ara, sik kanye talima noutam arye, nati pia moubuka kum teneninyake. Nati, walwal nang unyaka ati, sikda pia pera ninye asik nang atonun unyake. Tonda, sikce talibuka, si erenyak ning ara, talye nang sik kanye aryuk, ‘Aning-aning talibuka, si erenamlume,’ nyanyak ninguk, sik asok deice deilinyak bukni, sik talima noutam ara, nati moubuka kum tenepnikirye, na si dipkoprob kum ereninyake.

Keluaran 4:10

Musa birye, Allah el si Yahweh ati, nyabuk. “Anyapmanilam bukni, na yupu nyana ara, minop talak arye dipdongobuka, wini talak ance ayupu nyapmanilam talak babye, na si bam bol ap, sitang ap, ikin upniliba, yupu teleb kibuka kum nyanune. Ati, yuk nang, na yupu kum kekepnamniyake,” nyabuk.

Yehezkiel 33:31

Dan mutuku do nirya winilamak touk, amutuku unyak nang babye, ‘Mambul weik yupu kekepnuyapʼ tenen, ninye weik tonun bikbik abuka bulubikirye, anang arye, an dam yanuka bunyake. Wininyaka ara, na Allah, na mapu koproba atonun winibikirye, weik tonun an dam yakirye, an yupu nyanamlam ning ara, pia moubuka kekenamake. Amol deice arye kekenyak bukni, ance, “Aning ara, winipnamlume. Aning ara, kum winipnamlume,’ nyabuka, nyapminye ning ara, sikce moubuka talibikirye, kum dobolbanamake. Deiyok ara, sik anang ara, sik si bam bol deice arye, ‘El kanye deipnamsilʼ tenen, kekena teleb yupu nyapnamak bukni, sik talima noutam arye teninamak ning ara, pia yuke. Ara, sikce, ‘Nun tenina deice arye, tilila yupu nyabibiba, yuk nang arye arepsikiba, nun diamuk teleb kipdeipdatibye. Nun dem aryuk, teleb ning dopropnamabe,’ tenenyake.

Keluaran 6:12

Allah arye nyabuk bukni, Musa birye tamubuka, Allah el si Yahweh ati tamubuka nyabuk. “Israel nang na yupu kum kekeniyaka atonun, na pia keil kumnye ununa ati, na yupu ara ikin aryuk nyanuna ati, Firaun babye, el dam talye nyaptinya babye, Firaun birye, na yupu kum kekepnamnile,” nyabuk.’

Hakim-Hakim 6:22

Winibukba, Gideon birye aning eibuka deice arye, moubuka bikuk. Ara, ‘E, na dam yanmonye bira, Allah el si Yahweh, el pil donanye malaikat yanmoe,’ tenebuk. Utenebukce, ilil ubukba, Gideon birye Allah Yahweh ati nyabuk. “Se, na ni koproba, anda aning-aning deice tam talibuka, Erebuka Weik Deiyoknye umince, an tenelyam touk winilyame. An pil donanye, malaikat akunum epranmanamce, el urasin eipmanu ati, na ilil upnilba, ‘Dipnun do?’ tenen, ilil upnile,” nyabuk.

Keluaran 33:20

Nyabukce, ayupu ton nyabuk. “Na dirina ap, na teleb unun ning ap, eipnalam bukni, na urasin ara, ance lakoprop kum eipnutume. Ara, talye ati kume. Deiyok ara, na urasin lakoprop kibuka eipnutunye bira, yata wiribuka kam tuba uptu do? Kume, anye bira dibina uka,” Allah arye nyabuk.

Hakim-Hakim 13:22

Akunum tenebuka, kel kibukopura, Manoa birye el kil ati nyabuk. “Se akilo tuba, nunce Allah el nong eipmanama ati, wini talak dipkoprob dipnaname,” nyabuk.

Yeremia 51:57

Winipnamne talak ara, sik Babel mutuku noutam ara, ninye deiyok nang nirya talibuka unyak nang ap, weik kel bikin ning talibuka unyak nang ap, sik mutuku talina ati, ninye deiyok kibuka, Gubenur nang nirya ap, sik amu tam pil melibuka donyak deiyok nang ap, sik mutuku yin talin nang nirya ap, akunum opnyeura, tonap kam kum buknamake. Dibinauk upnamake. Winipmanto ara, ninye arye, kanye wangalamak yu mek arebikceba, yuk nang dibikirye, kanye nirya wangabikceba, malamak touk, winipnamake. Babel mutuku nang babye winipnamake. Yu mek dibikceba, anang mapmapcak ara, pia bukmanto kum arye malamak touk, sik Babel mutuku nang nirya opnyeura, dibinauk upnamake Aning nirya ara, na Allah arye, tukwak mutuku nirya talibuka, ninye deiyoknye Raja unune. Tonda, nara Allah Yahweh arye, im deice unyak yin talin malaikat nirya ara, sik deiyoknye ununa ati, nara mikip weiknye unirye, ayupu akunum nyapmasine. Ati, aning nirya ara, dipkoprob nong upnamlarya, nyapsine.” Allah arye nyabuk.

Yesaya 33:17

Allah arye nyapdeibukba nabi Yesaya birye nyabuk. Yuk dotalak yanamlanye bira, elce ninye deiyoknye ululba, el weik dirina ap, urasin pia teleb unamle ning ap, laka kipdeipsilyopura, eipnamlume. Tonda amutuku nirya teleb kipdeipliba, pia pera mutuku dana-dana nirya elinamlume.

Habakuk 3:16

“Na Habakuk birye, ance nyapnulum yupu, akunum kekepna arye, kanye talima pum tam arye, duk-duk apmanile. Tonda, na ilil ati, na si bam bol dam birbir apmanile. Winipmanilarye, na yok ara, kupmititing apmanil ati, tonok sukumuk tikmana arye, sirim talipnilarye, yok kum kum dakmanile. Pia ikin kanye bobuka unman bukni, ance amambul yupu nyapmanilam ning ati ara, talye tunim abuka, dinauk unamne. Ara, nun mal olan nang arye, nun mutuku noutam yanuka opsicopura, ance ‘Winipnamne,’ nyapmasilam touk, amalye nang, sik Kasdim mutuku ninye ati, ance wenebuka opnalam talak ara, ‘Dan talak yanamle do?’ tenen, dinauk unamne.”

Keluaran 24:10

Welebiyikce dinmikba, Israel nang sik deiyoknye Allah, el yan amu tam ara, teleb keil pala deice tikmokba, el dirina ara, im kalum dalamla atonun winipmokba eibik.

Bilangan 17:12

Aning nirya Musa birye, akunum winibukopura, sik Israel ninye ara, ilil pia weik ubukba, sikce tamubuka Musa biti nyabik. “Se, Allah arye, ayupu nyapdeipmasila ara, nunda dipkoprob ikin ning dobukabibirye, dipnauk unamabe. Allah arye, nun nirya wenebuka opnamsil do?” nyabik.

Yesaya 59:3

Anggun malye winilulum ning ara, ani. Ninye olulumba, anggun taruk deice ara, ining bol pisulule. Tonda, anggunce malye un ning weik tonun winilama anya arye, anggun taruk duk nirya ara, akunum malye kipdeipdanmalume. Tonda, anggunce tilila yupu ap, minin yupu ap, tuba-tuba nyaltakalulume. Anggun nyamunye deice arye, yum yupu dobuka nyalulume. Adeice arye, anggunda lik tenebuka winimunyeba, Allah arye deresulule.

Yesaya 64:6

Nun nirya ara, Allah ance, ‘Aning ara, weik malye ning anya arye, na walwale,’ tenesiminye ning atonun wininyabe. Tonda, nunce, ‘Teleb unyap ning ani’ tenen, teleb winin ning winiptibya babye, dipkoprob weik malye ninguk unyabe. Nunda, pia weik malye ning baju deice bol pipliba, bataklamaka atonun, nunda malye ninye uk unyaba anya arye, malyeuk usulule. Tonda, weik kumanya yalirye, pubuka dopliba kolulamle yo bok dakuka bobalamle touk unyabe. Ara, nun minopce malye ulamepya ani, wisi dapyopura, dibinyabe. Ara, nun bidamang malye wininyaba deice arye winisulule.

Yehezkiel 12:2

“Se Yeheskiel, anda ninye koproba aryuk, deipkiknye ulyame. Anda malye unyak nang kan-kan noutam arye ulyame. Ara, sik Israel nang arye, na Allah ati, moubuka kum teninyakce, na yupu tuba-tuba yaninyake. An ap, anang ap, neika ululume. Ati, sik Israel nang ara, asing aulul bukni, sik moubuka kum elinyake. Atonun, sik amul aulul bukni, pia moubuka kum kekenyake.

Daniel 9:20

Na malye winilamse ning ap, Israel ninye nirya, sik malye winilamik ning nirya ap ati, ‘Allah Yahweh arye, nun malye winin ning nirya kum daneipnamsilirye, nunti namin kibuka, lyepdopnamsil’ tenen, moronmase. Tonda, Allah wibukabukce, pia teleb kipdeibuk mutuku, Yerusalem mutuku ara, malye nang arye uluplopsik ning ara, ‘Allah arye punuabuka, tamubuka telebuk kipdeipnamsil’ tenen, moronmase. Aning nirya, tuba moronmase talak ara, malaikat el si Gabriel birye, na dam yayuk.

Kejadian 32:31

Aning nirya akunum winibukura, berekuk ati, Peniel mutuku batakuka bisik banmok. Bisik banmok talak ara, el yan camdipdanin banmok. Deiyok ara, malaikat arye, Yakub el keil yok, yok dukulongolamlak, talepmok arye, kotoklobukba, uk weik dinmoka ati, atalak arye doryanamle talak nirya ara, pia camdipdanin balamok.

Keluaran 3:6

Nyabukce, Allah arye Musa biti, ayupu ton nyabuk. “Nara, an apu yapu Abraham ap, Isak ap, Yakub ap ati, sik melipnin yangalamsinye bira, na akunume.” Nyabukura, Musa arye, ‘Se’ tenen, el urasin lelipdobuk. Winibuka deiyok ara, ‘Kume Allah ara, na ilil’ tenen, ‘Kum eiptinye’ tenen, lelipdobuk. El ilil weik ubuk.

Mazmur 24:10

Weik Ninye Deiyoknye, weik mambul winilul Raja nyapmanye bira, ‘Yatanye do?’ tenena meme. Ara, nun ni koproba Allah Yahweh, im deice unyak yin talin nang, sik malaikat nirya ap, aning-aning nirya ap, elcuk aning nirya talibuka, deice tam ulule. Elda weik mambul weik ulirye, nun ni Weik Deiyoknye Raja ulirye, talisulule. Raja Daud mot nyana deice arye nyabuk.

Yesaya 24:16

Mutuku sirya, im sirya tam arye, Allah el pia teleb ulul ning ap, mikip pil dolul ning ap ati, yuk-yuk mutuku nang arye, el si sibuka erebikceura, nun Yudea mutuku noutam unyabuk, Allah elce talibuka usulul Israel nang arye kekenamabe. Allah ara, malye un ning tonok ning babye kum ulirye, pia Teleb Diksukum Ulinye ulula ati, dopera mutuku nang arye, el si erenamake. Winipnamak bukni, na Yesaya bira, weik ikin kanye bopnirye, ngalukuka tuba engenamne. Malye kanye bobuka engenamabe, bol malye bopnamnarya! Ara talye ati kume. Deiyok ara, anggun tenena arye tilila yupu nyakirye, yuk nang ati malye weik nyabuka uanyake. Dipkoprob, sik malye unyak nang arye, tuba-tuba tilila yupu nyabica deice arye, yukupdobikcak arye, yuk nang ati malyeuk kilinyake.