Yesaya 6:1 - Eipomek1 Ura ninye deiyoknye, el si Raja Uzia dibuk keting tamun noutam ara, lengdar mapsa deice arye, Allah eipse. Eipse talak ara, dinmasiba, Allah ara, ninye deiyok nang bulamak ning, weik bun ning deice bukmok. Bukmokak, el cang baju ongopmok ning arye, Allah el si eren aik pum tam nirya ara, langdipmok. Gade chapit la |
Yesaya 6:1
38 Referans Kwoze
Teleb kam ulul ning tonok arye, akaru makau emas ning, sik tekbarye malaikat ati arebukba sik amalaikat dobuka talibikba, Allah el si erena ati, Teleb Aik noutamak ara, tulum weik welebuk. Atulum ara, Allah el im deice tam si erena aik pum tam binuka langdibuk. Atulum ara, urdem tulum kum bukni, Allah el pia teleb ulye ap, el mikip weik ulye ap deice arye atulum welebuka, ubukba anyaik langdibuk. Atulum arye anyaik langdibukura, anyaik wekmanto kum ubik. Anyaik kum wekmanto talak ara, sik tekbarye malaikat arye, tekbarye kanye imun bona deiyok ning talipmek ning bokuka, tukwak ninye ati arilamika ani, aikin ning arin talak sirya min kum dakamik talak noutamak nirya ara, aTeleb Aik wekmanto kum unamake. Aning nirya ara, na Yohanes arye eipse.
“Wininmok ning anyuk, tuba dinmasiba, ninye deiyok nang bun ning, pia teleb ning ton, yanuka ubukba, eipse. Tuba dinmase talak ara, pia minop talak donirye, Kam Ulamuka ani, Pia Tuba Kam Unamle Deiyoknye yayukce, abun ning deipmeka noutamak arye, tonok ning deice yanuka bukuk. Ayanuka bukuknye bira, el ongopmok baju ap, el potong ap ara, pia teleb ning kurulamle touk ubuk. Ara, ngarye maka potong, pia kurulamle touk ubuk. El ninye deiyok nang bun ning deice, bukmokak ara, uku buk atonun ning, labum-labum abuka pakanmokak eipse. Tonda, el yanuka bukmok ning amu tam ara, el yuk arye balamle ning, yan serek el si roda ton uamuk. Ayan serek ara, yan sirya ara, uku buk labum-labum abuka, pakanmokak eipse.
Yesus arye ayupu nyabukopura, ayupu tonap nyabuk. Na Ninye Mi Koprop Atonunye ap, na im deice pil donyak nang, malaikat ap, im deice arye yanamap talak ara, im deice ning nirya ulye touk, na babye urasin teleb una ap, na nong dirina weik una ap winipnamne. Winipnilyopura, weik ninye deiyok nang bulamak ning atonun ning deice buknirye, ninye mutuku-mutuku nirya unyak ninye ati bokuka deipnamne. Aning deice bunamne talak ara, na ning nirya ara, im alip ning ulye touk, pia telebuk upnamle.
Minop talak arye dipdongobuka, wini talak noutamak nirya arye, nun tukwak ninye arye, Allah el urasin pia kum elilamubu. Bukni, nun ni Allah, el ulyak ululnye, el Mi Koprop, Allah ap neika ururaknye bira, Yesus arye Allah el ulul ning laka elilule. Yesus el ulamuk ning ap, yupu nyalamuk ning ap deice arye, Allah el ulul ning lak kibuka laka nyalamsuke.
Na Allah Yahweh im deice bukuka ununye birye nyapsine. “Winipmanto ara, tukwak mutuku ninye deiyok nang arye, weik bun ning deice bukikirye, yupu bokolilamak touk, nara, im deiceuk, pia bukuka unune. Im deice ununa anya arye, tukwak mutuku ara, yan dikdik sena ati delilamak touk, unune. Ati, yata wiribuka aik doptumba, anyaik pum tam dikdik sebuka uptinye do?”
Deiyok ara ani. Ara, an Allah Yahweh arye, nun Israel nang ati, weik tonun bico tenesimince, “Winibuka teleb kilinamsine,” nyalin yupu deice nyapdeipsulum touk, dipkoprob winipnamsilame. Winipmanto ara, tukwak mutuku, eitam dukdongobuka, dua kan-kan ara, ‘El cang ara, yata wiribuka ulul do?’ tenen, pia kum kiklipdenmanto ulula atonun, anda weik tonun bico tenesilyam ning ara, nukman kumto ulule. Tonda, winipmanto ara, ‘El cang ara, yata barye do?’ tenen, tukwak mutuku arye dipdongobuka, im dup tam ara, meter arye kiklipman kumto ulamle touk, ance, nun Israel nang ati, batakna kumce, pia weik tonun bico tenesimince, melinauk wininamsilam ning babye, pia nukman kumto ulule. Atonun, an Allah arye nunti, “Winibuka melinamsine,” nyabuka, nyapdeipsulum touk, aninguk tenibuka, batakna kumce, pia melinauk winilnamsilam ning ara, pia nukman kumto ulule. Winipmanto ara, tukwak mutuku arye dipdongobuka, deice tam im dup noutam ara, dua balamlak, ‘El cang ara, yata barye meter ulul do?’ tenen, kiklipman kumto atonun, anda batakna kumce, nunti, pia melinamsilam ning ara, kiklipman kumto ulule.
“Malye winin ning nirya ati, ‘Nun like’ tenen, malye kilamice ninye ati ara, weik ninye deiyok ning arepniba, na weik deiyoknye buna ning deice ara, na ap, sik ap, neika bunamabe. Aning ara, narye malye winin ning nirya ati malye kipsirye, na Ni Kopropa Allah, el deiyoknye ulul ati bulul sukum deice, el ap neika bunyam touk ati, nyapsine. Aning ara, narye malye winin ning nirya ati malye kipsirye, na ni Allah el deiyoknye ulul ati bululak deice, el ap neika bunyame. Anggunce malye winin ning batakmunce, diksukumuk upmunyopura, na ni ap neika bunyam touk, anggun ap, na ap, neika bunamtibye nyapsine.
Ninye yu deice arye, mal olalamaka ara, Allah arye, ‘Akunuma,’ teneplye talak ara, yupu sekelule. Tonda ninye sik olan yin ap, mal ap nirya lakuka, batakalule. Tonda ninye ona ati, ketelinyak yo tace nirya, kau kibuka celtakalule. Tonda, ‘Mal dobikiba, na nong deice yanuka biknilyak’ tenen, lelilongon ting aning babye, dobuka uku dongolule. Allah ara, Pia Mikip Weiknye ulula atia.
Aning nirya eipse ning ara, anyapnusin ning ton eipse. Allah el weik bun ning deice bukmokce, el sirik taruk deice weik mambul buku talipmokak, eipse. Abuku dana-dana nirya ara, sekna ninguk ubukba eipse. Tonda, abuku gum-gum bisik deice ara, ‘Abuku talye nang arye mangkau asa eibicak’ tenen, urasin ara yo cang atonun bukni, buku gum-gum deice taplakdongamukak, eipse.
El tonok ara, kum diptue, pia kamuk unamle. El ulya ara, ninye tukwak ninye kum binmanto ak, weik dirina noutam ulule. Yata mutuku ninye do nirya, el nong pia kum elilamik, tonda, pia kum eiptinge. Na Paulus arye nyapmakine. Na pia patanulul ning ara, ninye mutuku-mutuku nirya, el siuk pia erenamake. Tonda, el weik mikip arye aning-aning nirya ap, ninye nirya ap, talibuka unamle. ‘Aning ara, dipkoprop upnamle’ tenen, Amin nyapne. Na Paulus arye sekeibkine.
Nara Allah, aning-aning nirya deice tam erebuka ununye birye, nyapsine. Tonda, aning-aning nirya deice tam ununa ati, na siuk weik tonun ereninyaknye birye, nyapsine. Nara min talak akunum kam ulamsirye, aminyan doyanamle talak babye, na pia Kam Una Deiyoknye unune. Na ap, na si ap, Pia Teleb, Lek Ululnye unune. Nara, pia weik erenak, im deice unune. Na ununak ara, dipkoprob malye ning tonok babye kum ulula ati, pia teleb kurunak unune. Bukni, nara yata nang do nirya, sik talima amu tam kibikirye, sikce, ‘Se, nun malye unyap ning ati, alye dakdanuka unyaba ati, aning nirya batakabe,’ tenebikirye, talima erena kumce, malye kanye bobuka, sik kanye talima namin unyak nang ap, neika unamne. Na ap, sik epdanuka neika unamap deiyok ara, narye sik malye kanye bobuka talima lamapdongobuka unyak nang ara, mikip arepnyeba, sik kanye deipnamake. Tonda, sikce, ‘Se, nun malye unyap ning ati, alye dakdanuka unyaba ati, aning nirya batakabe,’ tenebikirye, engenyak nang ati, sik talima kwa dipnyeba, sikce kanye deibuka teleb unamake. Sik ato unyak nang, sik dam ara, na aunamne, nyapsine.
Abuku sekamuk ning deiyok ara, Yehuda yala ninye ap, Yerusalem mutuku ulamik ninye ap arye, winilamik ning ati, Allah arye el yupu lak lena deiyoknye, nabi Yesaya biti, nyabuk. Yesaya el li bira, el si Amos. Anyabuk ning ara, Yesaya lengdar malamuk ning ap, Allah arye el talima pum tam yupu nyalilamuk ning ap ati, Yesaya birye sekuk. Atalak ara, Yehuda yala ninye, sik ninye deiyok nang, sik si ara Uzia ap, Yotam ap, Ahaz ap, Hizkia ap, ulamik talak noutam, Allah arye Yesaya el talima pum tam, laka len yupu nyalilamukba, ayupu nirya kekelamukce seklamuk. Ayupu ara, Yehuda yala ninye ulamik ning ap, aminyan talak winipnamuk ning ap ati seklamuk.
Winilula ati ara, Musa ap, na ap nun neika epdanimirye, yupu sisikinyame. El ti ara, narye yupu laka nyalinune. Musa biti, domona yupu ning ton kum nyalinune. Tonda, yuk nang nirya kum bukni, na yupu tanmanye talak ara, Musa el uk ara, na nong urasin kum dilinulul bukni, kanye dem ara, elinulule. Aning nirya ati ara, anggunce Musa elti, malye yupu nyapmarum ning ara, yata ati ilil kum upmasil do? Yata deiyok ati, el deice malye yupu nyarumunya arye yanirurum do? Musa ara, na pil dolulnye ulula atia, nyabuka, Allah el si Yahweh arye, Harun ap, Miryam ap ati wenebuk.
Sik nirya arye Allah el urasin tam bukni, el si erena ati, tuku deice gutam tuku dipdongobikirye, el si weik arye erenyake. Amambul bun ning deice bululnye Allah ara, pia kamuk unamle. El pia min kum kum danamle. Sik 24 deiyok nang arye, sik kisok deice koupdongamik emas ning kwiribuka el bun dam tuku deice deibikirye, ayupu nyanyake.
Ura, na Yeheskiel birye mapmasirye, lengdar deice atonun dinmasiba, Kerub bitinye, sik pol otam atam arye dukdongamdik ning bukni, sik Kerub bitinye, sik kisok deice belebuka lak uamuk ning eipse. Ara, pia urasin teleb dekna weik keil, el si ara, batu nilam, aning arye pia teleb ninye bun ning, memepdeibik ning, el si tahkta urasin atonun ning, lak ubukba, narye eipse.
Ara, atalak ara, keting tamun yupa weik, yupa tonok kepdopnye pamubarye (tiga puluh tahun 30) ubuk. Dumu wala arye, like pamu sum (tanggal 5) ubuk sum ara, Atalak ara, Babel mutuku ninye deiyoknye, Sisinanye Nebukadnesar ap, el yin talin nang ap arye, Israel ninye tongobuka tapu koubikce, Babel mutuku bobinamsikba, daulamua ani, keting tamun pamubarye, akunum kibukopura, mek si Kebar mek lelun unmase. Ara, na Yehezkiel ap, Babel mutuku nang arye, yuk Israel ninye bobuka delilbalamik ninye ap, Kebar mek lilunak unmapu. Atalak ara, Allah arye, im deice bublan kukibukba, weik mambul ning ton, laka kipsukba, narye eipse.
Atalak akunum kiplyopura, anggunce nyapnamlulume. “Nun nirya arye, Allah el tibuk, telebe,” nyabuka, el siuk erepnuyabe! Tonda, ‘Elcuk melibuka lyedopnamsilʼ tenen, el tibuk morobibyakarye, el siuk erenamabe. Tonda, Allah el mikip weik arye, mambul pil dolul ning nirya ara, ‘Yuk mutuku nang nirya kekepnamakʼ tenen, aning laka nyalbinamlulume. Tonda, “Nun ni koproba Allah, mambul weiknye ulula ati, el pia teleb siuk, pia telebe,” nyabuka, erenamabe. Ati ayupu nyabuka, laka nyalbinamlume.
Duknubikce, pia ilil weik ubukba, nyanmek. “Se, nun mambul weik upsile. ‘Anggun amutuku kon ap, weik keil nirya ap, nun nong deice sakuka, singnipsutumce, opsutum’ tenen, moropseabe. Ara talye ati kume. Deiyok ara, weik Ninye Deiyoknye, bun ning deice bululnye, Allah arye eipsilirye, wenepsilyak ati ara, nun minopce sakuka opsutumce, siknipsutume,” nyabuka moropseabe. Tonda, ‘Domba Mi Atonye, yu weik upliba, weika arye wenebuka opnamsile’ tenen, ati ara, anggun amutuku kon ap, weik keil nirya ap, “Nun nong deice sakuka singnipsutumce opsutume,” nyabuka moropseyabe.
Raja Uzia akunum dibukopura, amutuku ulamik nang arye, sik Raja-Raja nang dipnaba, weilamik mutuku uk binuka weibik. Ara, el apu Raja Daud, el mutuku noutamuk weibik. Tonda, Raja Uzia akunum dibukba, weibikopura, Uzia el mi koproba Yotam birye, el li punubukce, Yehuda mutuku ulamik ninye, sik deiyoknye kibuka taleamuk.
Abukmok ning deice bukmoknye el urasin ap, el nong ap ara, dekna weik keil mil ap, mirin ap, silye keil el si ara yaspis ap, tonda sardis ap atonun upmokba, eipse. El bukmokak dana-dana tam nirya ara, mile paralamle atonun ning deipmokak el urasin ara, yo bok imbik maka ulamle touk ubukce, sukup-sukup abukba, eipse.
Aning nirya eipsopura, aning ton eipse. Ara, weik ninye deiyoknye kurun ning deice bunlulak eipse. Ara, pia weik kurun bun ning ap, aning deice bukmoknye ap eipse. Anye laka ubukba, im ap, im noutamak ulul ning nirya ap, tukwak ap, tukwak mutuku noutamak ulul ning nirya ap, aweik deiyoknye dam kum yanmanto ati ara, aning nirya kum dayukba eipse.
Ayupu nyabukura, Mikha birye tamubuka nyabuk, Ati ara na nyapnusin yupu, moubuka kekepnururume! Dipkoprop yupu nyapmakine. Ati Allah Yahweh arye nyapdeipmakil yupu ara, moubuka kekeplyame. Aning-aning nirya deice tam ulirye, elcuk talilulnye, el si Allah Yahweh, el im deice arye mambul bunak bukmokba, el pil don yin talin nang malaikat nirya ara, el taruk kwanim tam ap, sirik tam ap, bukikce tikmekak eipse.
Winipmok talak ara, Allah el weik dirina til weik dang-dang alamle ning ara, kisikdakuka, yukak binmok. Ara, minop talak, Pia Teleb Lek Aik pum tam, Peti Perjanjian deiamik deice tam, Kerub urasin atonun ning, bitinye puturubuka deibik ning deice arye, Allah el dirina uamukak ara, kisikdakuka, Allah el si eren aik bai tam wekelbana ati, bisik bublan botopdeiamikak, asukum binuka tikuk. Winibukopura, adua ara, Allah el si eren aik pum tam nirya langdibuk. Tonda, anyaik bai tam bukni, anyaik dam ara, Allah el teleb una ap, mikip ap, lak kilin ning, el weik dirina ara, weik ubukba, anyaik dam nirya ara libukba, til weik upmok ning ara, langdibukba, eipse.
Piblisite