Yesaya 59:4 - Eipomek4 Tonda, anggunce yuk nang ati derelalulumce, ninye deiyok nang, yupu lilsisikin nang dam bimunce, sikti, ‘Yupu kekesumunce, yupu bokuka lipsisik deipnusulume,’ nyabuka morolulum bukni, dipkoprob ning ati kume. Anggun kan-kan arye tonoknye babye, diksukum un ning ati, ayupu nyabuka kum morolulume. Anggun nirya arye, yupu lipsisikina deiyok nang dam bimunce, tilila yupu ap, minin yupu apuk, nyalulume. Yupu bokolina deiyok nang dam bimunce, ‘Aning ara, malye upmake,’ nyabuka, binuka nyalulum bukni, ara dipkoprob yupu kum nyalulume. Aning kum bukni, anggunce, ‘Kume, nunce anang deice ikin ning deibipyopura, malye un ning ton tabakuka winipnamapca,’ tenelulume. Anggunce ayupu sisikinmamunya deice arye, ‘Aning-aning ton winipnin banamabe,’ tenepmunce, yuk malye wini ning ton tenemunce, aninguk talibuka ululume. Gade chapit la |
Yesaya 59:4
36 Referans Kwoze
Tonda anggunce, ‘Teleb kanye uk bobuka telebuk wininamap’ tenen, anggunce anggun bidamnye atibuk, nyaldalulum yupu ara, ‘Akunuma,’ tenena kume. Anggunce nyaldalulum yupu ara ani. ‘Kume, anyaik ara, Allah Yahweh el si eren aik anya arye, nunda anyaik wekenyapa anya arye, malye ning ton, nun dam yanuka ikin kum upnamsile,’ nyaldalulum bukni, tilila yupu uk nyalulume. Anyaik wekmunya babye, malyeuk winipmunyopura, Allah arye wenepnamsile ati, nyapsine.
Yata ninye do nirya, sikce talye bona utotoa weik talina kum ninye ati, ikin ning dobuka, sik nong deiceuk, delilulum ninye nirya ati, sikda bicoe. Allah arye anggunti, weik tonun wenepnamsile. Lukunyan mapnukce talak arye, ‘Ninye yuk nang ati, ikin pil dipnamabe,’ nyabuka, yupu talenmaca ani, bereklyopura, beren tam talak ara, adiparyuk asisikmakce touk, ikin ning dobuka, sik bona utotoa kum ninye, nong deice delinyake. Ara, sik anang arye, deiyok koubuka, yupu mikip arye talipmaca deice arye, wininyake. Sikda weik deiyok nang unyaka anya arye, talye-talye daunyak ninye nirya ati, ikin ning weik, sik nong deice dobuka delinyake.
Allah arye nyabuk. “Ati, na Allah Pia Telebnye, anggun nirya talisununye birye, nyapsine. Anggunce na nyasinye yupu ati, ‘Nun like,’ nyabuka bataklumce, anggun mining winin ning atibuk, tenebuka ululume. Tonda, anggunce talye bona utotoa talina kum ninye ati, yaniltamunce, ikin ning sik nong deice delimunce, tilila yupu uk nyalulume.
Sik malye wininyak ninye ara, sik tenen ning, pia kum winipmacopura, sik aik pia moubuka kum manyake. Wininyaka deiyok ara, sik anang ara, lukunyan babye, keting noutam babye, beren tam babye nirya ara, sik kwit capu dib tenena nang ati, ‘Malye kipdeiptibye’ tenen, pia epra banyakce unyake. Ara, sik anang ara, yuk nang ati, malye kum kibuka deipmace talak ara, sik anang ara pia wi kum talilule.
Allah elce eililamsuka ati, teleb diksukum winin nang, tonok babye panabuka tiklirye, Allah el mapu anggun malye ning kum danalina ap, kanye tamubuka, teleb kilina ap, pil dopmantonye pia kum ubuka anya arye, elce, ‘Se yata ati do?’ tenen, malye kanye bobukce, ‘Na bidamnye aryuk, aning lipsisikuka dopnirye, tuba tamubuka, teleb kipdeipnamne,’ tenebuk. Utenebuka deice arye, Allah ara, mikip weiknye ulula anya arye, el mikip aryuk, el mapu koproba ati, obuka sirya dakik nang ati, malye kiplobuk. Ara, elce, ‘Na mapu koproba sikti, lyepdopnamne,’ tenebukce, sik mal olan nang ati, obuka kum kipdeibuk. El pia diksukum ulya deice arye, melibukabukce, el mapu lyepdobuk.
Anggun malye winilulum ning ara, ani. Ninye olulumba, anggun taruk deice ara, ining bol pisulule. Tonda, anggunce malye un ning weik tonun winilama anya arye, anggun taruk duk nirya ara, akunum malye kipdeipdanmalume. Tonda, anggunce tilila yupu ap, minin yupu ap, tuba-tuba nyaltakalulume. Anggun nyamunye deice arye, yum yupu dobuka nyalulume. Adeice arye, anggunda lik tenebuka winimunyeba, Allah arye deresulule.
Mikip kum nang nirya ara, tonok isin atonun unyaka ati, sikce pia kum lyepsitinge. Atonun, sik pia mambul weik nang babye, sikce kum lyepsitinga ati, sik bidamang lengdar deice arye, elilamak ning atonun unyake. Talye bona utotoa talina kum nang babye, weik nang babye, sik nirya ara, mambul nang kume. Winipmanto ara, bona dobuka, ‘El ikin ara yata barye kilo do?’ tenen, timbangan deice deibikcopura, sik ikin ara, pia mitik diamuk ulule. Sik tukwak nang ara, weik mambul nang kume. Diba, talye bona utotoa kum nang babye, weik bona talin nang babye, sik nirya ara, mambul kum ati, winipmanto ara, ‘Ikin ulul do?’ tenen, timbangan deice deiptibya babye, sik ikin ara, pia kume. Sik nirya ara, tonok isin atonun unyaka ati, sikce kum melibuka lyepsitinge.
Allah arye, na nabi Yeremia biti nyapnuk. Yeremiao, anda weik asik dobuka, ulyam mutuku, Yerusalem mutuku noutam nirya ara, bisikak obinuka, ayanuka kipmince, dipdebuka binulyame! Tonda, amutuku noutam nirya, an asing arye dipdemince, ‘Amutuku nang ara, winibuka unyakeʼ tenen, biknalyame. Ninye bulubuka wekenyakak nirya, dipdeminyak arye, Allah ati, pia diba tenebuka, diksukum winina ap, dip yupu nyana ap, winilamlinye birye, tonok babye aulul do, kum do?’ tenen, dipdenulyame. ‘'Amutuku noutam, dipdenin baminyebuk, atonye tonok ton aulyamlyak, eipminyopura, laka nyapnamnilyame. Diksukum winina ap, dip yupu nyana ap, winilinye birye, Yerusalem mutuku unyak nang nirya arye, malye-malye weik wininyak ning ara, na Allah arye, kum wenepnamsine. Sik malye winin ning biknirye, kum kipdeipnamne.
Sik amalye unyak nang ara, ‘Nunda weik bona talibuka ubibirye, deiyok-deiyok nang unamabe’ tenen, tilila yupu nyana ap, duknubuka malye una ap arye ulamik bukni, aning nirya ara, dipkoprob nong pia kum upnamle ning ati, diba tenelamik. Ati ara, aminyan talak ara, sik dekna dopropkamak ning babye, nong pia kum upnamle ninguk dopropnamake.
Adomon yupu nyapmasina deiyok ara ani. Anggur wa deiyoknye bira, Allah aning-aning nirya talibuka ulye deiyoknye, Allah Yahweh ulule. Allah Yahweh ara, aning-aning nirya talilirye, im deice yin talin malaikat nirya, sik weik deiyoknye ulule. El anggur wa ara, Israel yala ninye unyake. Tonda, teleb wa tuku ati kanye delilul ning ara, sik Yehuda yala ninye unyake. Israel ninye ap, Yehuda yala ninye ap, ‘Teleb kibuka unyak do?’ tenen, dililamuk bukni, aninye nirya ara, olanauk ulamik. ‘Diksukumuk unyak do?’ tenen, dililamuk bukni, ton nang arye, ton tam nang ati, ikin ning weik, sik nong deice delilamikce, malye nyabuka, ngaluklamikba, kekelamuk. Ati, Allah arye aninye nirya ati, malye kanye bolamuk.
Ton nang ara, tilila yupu uk, tuba-tuba talye nyaltakanyake. Aning wininyaka ara, winipmanto nyapnusine. Ara, talye yupu weik nyanyak nang ara, ninye arye tuku deice ban ning, el si gerobak, ikin ning gerobak pum tam libikirye, tapu kirikuka libuka, bobalamak touk wininyake. Sikce tilila yupu nyakirye, malye un ninguk tuba-tuba wininyak nang ara, bicoe! Sik nong deice ara, pia ikin ning, cakman tenepmanto kum kanye, ikin ning upnamle!
Ara, talye ati kuma. Deiyok ara, amutuku noutam ninye deiyok kibuka taleamikce, ulamik nang arye, sik taleamik nang talye bisikuk bobuka balamik. Winilamika ati, adeice arye, sik taleamikba, sik yupu kekelamik nang ara, kanye windung-wandung abuka, boktobuk arye, bokwang-wangap danuka yuk-yuk kililamikce, malye winin bisikuk balamik.
Allah arye nyabuk. Sik amutuku noutam talibuka ulamik ninye deiyok nang, sik yupu bokolina deiyok nang arye, na mapu Israel nang ati, anggunce, “Aning-aning winiplulume,” nyabuka, pil dipmunyakarye, anang dipkoprob wininyak touk, yupu kum bokolilulume. Deiyok kum upmalibuk, sik nong deice, ikin ning dobuka delilulumce, malye weik ululume. Ati anggun babye, ikin ning weik dolonamlume.
Winipmanto ara, nunda mi bomupu ani, mi deilin talak kibukba, mi deiya uk dibuka, uk dilamle touk upsuke. Bukni, mapu ara, kum deibupe. Talye dei bukun ninguk kibupe. Ati, nunce yuk tukwak mutuku unyak nang, nun mal olan nang ton, kum obuka sirya dakupu. Tonda, mapu weik ton kum deibupeba, yuk mutuku sirya, im sirya nirya, binuka kum ulamik, ton kum unyake.
Anggunda teleb kanye bobuka dilamunce, ayupu nyanululume. “Kume, nun ap, Mesir mutuku ninye ap, akunum yupu talipdabirye, tonok ansinipnamaba ati, yuk pera mutuku yu weik nang arye, obuka sirya kum daknamsiyake. Yuk nang yupa weik tonun nun dam olyasitinga babye, obuka sirya kum daksitinge.” Anggunce utenelulume. ‘Nunda, talye tilila ati nyan yupu ap, tenebuka arye weik yupu ap, Mesir mutuku ninye ap, duknubuka nyapdapu yupu deice arye, telebuk unamabe. Sik Asyur mutuku yu nang arye, kum opsitinge,’ tenelulume. Utenebuka nyamunya ati, ayupu nyapnusine.
Pia kanye deibuka teleb unamaka deiyok ara, ani. Ara, ninye yuk nang ap ati, ikin ning bobuka, sik deice deilinyak nang ap, anang ati, ‘Anggunda talye nanguk ululume,’ nyabuka, yap-yap anyak nang ap ara, Allah arye, anang kum kipdeipnamle. Yata nang do nirya, ‘E, adiparyuk malye winin ninguk talibuka wininamabe’ tenen, wininyak nang babye, Allah arye, anang kum kipdeiplyeba, kam kum unamake. Allah arye anang nirya ara, obuka sirya daknamle.
Winibuka sekenamlulume. Amutuku ninye ara, kekena kumce, Allah ati malye kibuka, bisina uk unyak ninye anya arye, sikda talye kanye bobuka, Allah arye, ‘Winiplulume,’ nyabuka, peteresilye yupu kekebuka kum unyake. Aninye ara, tilila yupu uk nyalanyake. Tonda, na Allah Yahweh arye, ‘Winiplulume,’ nyaptinya babye, na yupu pia kum kekeninyake.
Tonda anggunce, ‘Wininamabe,’ tenelulum ning nirya ara, talye-talye urdemuk winilulume. Anggunce winimunye ning nirya ara, nong kum upnamle. ‘Wininamabe,’ tenelamlum ning nirya ara, ninye arye maning tuplobikiba, kel-kel alamle touk, upnamle. Maning kel-kel alamle ning uku dinibikiba, uku arye dibuka uku sice kilamle touk, anggun babye atonun winipnamsile. Anggun mining isin mikip aryuk, uku disuturye, dibuka sirya daksutue atonun, anggun wininamlum ning deice arye, anggun bidamnye nong uk kum kipdeipdanamlume.
Awininyak nang ara, mining uku sice dobuka dilamak touk wininyake. Aninye ara, sik walwal tenenyak deice arye, sikce sik mining ati malye winililanyake. Ati, kum melipdatinge. ‘Ayo tonok deice arye na taruk deice talibuka pil donun ning ara, tilila yupu nyalinulule,’ kum tenenyake. Ati, aninye ara ‘Talya ninguk si erenyaba,’ kum tenenyake.
Min talak anggunce malye weik ulamlumce, anggun kanye ara, ‘Kume, yuk nang arye ton kum eibuka biksitinge,’ tenelamlume. Tonda anggunce, ‘Nunda kel weik nang unyaba anya arye, aning-aning nirya akunum kel bikamubuʼ tenen, ulamluma deice arye, malye bisikuk binmalume. Tonda, anggunce tenilamluma ara, ‘Nunda pia teleb, mikip weik unyaba anya arye, nunda Allah atonun unyabe. Yuk nang babye, yuk Allah babye, nun atonun kum ulule. Nun diamuk pia teleb unyaba,’ tenelamlume.
Malye un yupu kum nyaplirye, diksukum yupu uk nyalulnye bira, nun dam ton kum ulule. Ati, yatanye do nirya, sikce, “Malye kum wininune. Diksukumuk wininuna,” nyabuka nyalalulnye bira, nun tam unyap nang arye, anye el deiceuk malye un ning dobuka deibibiba, elti, malye kilinyabe. Allah Yahweh arye, amalye weik wininyap ning ara, akunum eililule. Elce diliba, diksukum teleb winin ning ap, ninye yupu lipsisikuka bokolin ning ap ton, kum eililamunce, el kanye teleb kum ulamlirye, malye kanye bobuk.
Nun pia malye weik wininyap bukni, nun noutamak arye anti ‘Se, na nio yanuka melipsilyame,’ nyabuka, tonoknye babye kum morokinyabe. Tonda nunce anti ‘Naio, talye lukparabuka opsutum bukni, bico tenepsutumce, lyepsutum’ tenen, kanye deipkibirye kum morokinyabe. Nunce anti pia kum morokenyaba anya arye, ance nunti, ‘Lik’ tenen, duknubuka donga karikisilyame. Tonda, nun malye-malye weik unyaba deice arye, bataksimince, ‘Dauplye, aninye ara, malyeuk daunamak’ tenen, batakasiminba, malye winin ninguk upra banyabe.
Se, anggun Moab mutuku noutam ululum nango! Anggunda, adiparyuk moubuka teniplulume. Min talak anggunce, ‘Kume, nunda mikip kibibirye, nun weik bona talin nang unyaba ati, nunda telebuk unamabe,’ tenelamlum. Bukni, dipkoprob nyapsine. Wini talak ara, angguncuk, anggun mal olan nang arye yanuka opnamsiake. Winipsikcopura, anggun mal olan nang aryuk, obukapsikirye, anggun si erelulum isa, el si Kamos ap, anggun pil don nang ati, imam-imam nang ap, tonda yuk yala ninye deiyok nang nirya ap, isa Kamos ati melilamik nang ap nirya ara, Moab mutuku noutam arye bobuka, anggun wenena ati, pia yuk mutuku bobinamsiake. Winipnamsiaka deiyok ara, anggunce, talye ning ati, ‘Nun ni koproba arye, lyenamsile,’ nyabuka, isa ati, diba tenyamluma ati winipnamsiake.
Allah el si Yahweh arye, nabi Hosea biti laka nyabukba, Hosea birye sekuk. Se, anggun Israel ninye ara, Allah Yahweh arye nyalisilye ninguk, moubuka kekepnululume. Nun amutuku ninye malye wininyap ning ara, Allah elcuk kel bikisilirye, nyasulule. Allah arye nyapdeibuk yupu ara, nun ton moubuka kum kekenyaba ati ara, kum dobolbanyaba ati, Allah el winilye ning kum bikinyabe. Tuba walwal ninyeuk unyabe. Tonda, nunce yuk nang ap, teleb kibuka neika kum unyabe. Bico kum tenelamyap deice arye, amutuku unyap ninye ara, nun min arye domupu kilapu ara, deiyok kum uamuk bukni, nun talye kanye bobuka, akilapu batakibirye, yuk kilapu dolonyabe. Tonda, Allah ap, el winilul ning ap ati, moubuka kum bikinyabe.
Bukni, dipkoprob sik talima noutam arye, pia malyeuk unyak nang ara, aning tenina kumce, sik talima noutam ara, pia malye winina deiyok ning akunum wekuka langdibukba, malyeuk wininyake. Winipmanto ara, kilapu arye, mi bomikca ani, ‘Mi deipnun’ tenen, mi deiya weik tonunuk dilamle touk, amalye winin nang ara, ‘Malye-malyeuk winipnuyap,’ tenen, akunum kintinibuka unyake. Winipmanto ara, kilapu mi bolamak touk, amalye winin nang ara, malye winina deiyok ning, sik talima noutam weklirye, langdilule. Winipmanto ton, kilapu arye, mi bomikca ani, aminyan talak mapu delilamak touk, amalye unyak nang arye, tilila yupu nyabuka wininyake.
Piblisite