Biblia Todo Logo
Bib sou entènèt

- Piblisite -




Yesaya 53:10 - Eipomek

10 Malye nang arye obik bukni, Allah el si Yahweh arye, minop talak danirye, ‘Anye bira imun kanye bobuka dadipnamle,’ tenelamuk touk, nun pununa ati dipsuke. Tonda Allah Yahweh arye tenelamuk touk, el nong uk dibuka deice arye ninye malye wininyak ning nirya kum kipdeibukce, tukwak ninye sik malye winina ati dibuke. Akunum dibuk bukni, kam buklirye, el unamle talak babye weik malamlirye, elce deipliba dadeipdanin banamak ninye eipnamle. Anye deice arye, Allah Yahweh arye, ‘Wininamne,’ tenelamuk ning nirya, anye pil dopliba, dipkoprob nong upnamle.

Gade chapit la Kopi




Yesaya 53:10
62 Referans Kwoze  

Anggun ton teneipdelulume. Allah ara, el Mi Kopropa tonokuk ulul bukni, ‘Na mi ara tonoknye anya arye, na tenen kum arepnune,’ tenena kumce, nun lyena ati, arepsuk. Ati, el mi kopropa dobuka, nun lyena ati akunum arepsuka anya arye, yatato ning do nirya, nun patasulu ning nirya bico tenesilirye, el kanye deibukap, talya demuk kum arenamsil do? Kume, nun patasilye ning nirya ara urdem arenamsile.


Ara, Allah arye nun lyena ap, yok pununa ap ati, malye winin ning tonok ning babye kum ulamukce, pia diksukum ululnye Yesus ara, Allah arye dobuka, tukwak ninye nun malye winin ning nirya el nong deice deibukba, nun malye ning nirya dobuka kum kipdeipsuke. Ara, nun malye winin ning pununa ati, winipsuke. Winibuka deiyok ara ani. Allah arye utenyamuk, ‘Tukwak ninye nirya, malye winin nang unyak bukni, nara Allah pia diksukum unye touk, Kristus ap aninye ap talima dukdongopniba, Kristus deice arye, aninye diksukum kipdeipnamne,’ tenebukce, Allah arye apil dopsuke. Na Paulus arye nyapsine.


Allah arye nyapdeibukba, Musa arye sekeiyamsuk yupu, mem yupu nirya moubuka talibikirye, diksukum kibuka kum dobolbanyak ninye ara, “Allah arye weneplirye, oplopnamle,” nyalamuk yupu aupmale. Bukni, Kristus arye nun tukwak mutuku ninye ati, el bidamnye nong arepdayukba, yu nang arye obikba, nun malye ulamubu ning lyepnamsuka ati dibuka deice arye, lopdeipsukce lyepsuke. Minop talak ara, mem yupu amu tam ulamububa, amem yupu arye tapu koulamsuk bukni, Yesus arye pil dopsuka deice arye akunum loplopsuke. Anyapmasin yupu ara, talye ati kum nyapsine. Ara, Allah yupu sekamik yupu noutamak aubuk yupu deice arye kel kinyabe. Ayupu ara ani. ‘Wanwanun yo deice deibuka olamak ninye ara, Allah arye aninye ati wibukaplirye, wenebuka oplopnamle.’ (Ulangan 21:23) Aning ati ara, kel kinyabe. Nun malye winina ati, Allah arye talye luparabuka oplopsutu bukni, Kristus wanwanun yo deice obikba, dibuka ara, talye ati kume. Nun malye winina ning pununa ati, dibukce lyepsuke.


Allah arye nyabuk. “Se yu parango, anda bukminyak arye, domba basam weilula deiyoknye ulye touk, Allah na mapu ati, melibuka bobalula deiyoknye bira, na ap neika pil donimnye bukni, an parang arye olbinulyame. Binuka opminyeura, adomba atonun nang, na mapu nirya ara, bai sakikcak arye, mutuku yuk-yuk bibik abuka, bindopnamake. Winipnamak talak ara, na mapu koproba, sik Israel nang nirya ati, wenebuka opnamne.


Tonda, Allah pia bico tenyamsuk ati, nun min kum deipsik talak arye, minop talak Allah arye, winibuka tenyamsuke. Ara, ‘Anang ara, na mapu kopropba unamak’ tenen, ‘Yesus Kristus pil dopnamle deice arye, kwangnanamsine,’ tenyamsukce, wepdeipsuke. Winipsuka ara, el kanye aniryuk talima ariyamsukce, nunti kanye deiamsuke.


Ayupu nyapmasina ara, talye kum nyapsine. Deiyok ara, ani. Nun kele, Kristus dibuk bukni, Allah arye akunum kam bukeibukba, pia kam unamla anya arye, aminyan talak ila tuba tonap kum dipnamle. Ninye dipna deiyok ning ara, Kristus ati kum malye uptue. Ati, nun kele, Kristus pia kam unamle touk, nun babye Kristus ap kanye talima dukdongobuka pia kam unamabe.


El kanye aryuk el nong ap, el kam una ap, ninye malye winina ati talye arepsuk. Ninye mutuku-mutuku nirya, sik malye wininyak ning dobuka, el nong deice deipdayuk. Winibuka ati, na Allah arye, elti, erepdeipniba, pia weik mambulnye unamle. Mikip weik nang ap, weik mambul pil donyak nang ap ati, ninye nirya si erelamak touk, el tibuk, el si erebuka kinamake. Tonda, mikip nang arye, yuk mutuku nang ati obisibikirye, sik talilamikce ning dalubuka dololamak touk, na Allah arye elti, pia teleb ning weika tonun arenamne. Elda telebnye ulamukba, el ap ulamik nang arye elti, ‘Elda malye wininanye,’ nyabuka, el nong deice malye yupu nyalilamike. Elda, ‘Allah arye malye wininyak ninye, namin kipnamle’ tenen, morolamuk. Morolamukce, sik malye wininyak ning ara, el nong deice dobuka deipdayuk. Ati, na Allah arye na pil donanye biti, dekna arepneba, weik mambulnye unamle. Ninye nirya arye el tibuk kinamake.


Minop talak dipse bukni, wini talak ara, kam unye touk, pia kam unamne. Nara, pia Kam Una Deiyoknye ununa ati ara, aminyan doryanamle talak babye, pia kamuk unamne. Nara, Ninye Dibina deiyok ning ap, akunum diamice ninye unyakak ap, talibuka una deiyoknye ununa anya arye, aning nirya ara talibuka unune.


Allah arye nunti, dalubuka opsutu bukni, nun opsutu ning nirya ara, Yesus Kristus arye dobuka, el nong deice deipdayukce, wanwanun yo deice delil bisukce dibuk. Nun malye un ning ati dipsuk ning ara, talye ati kume. Ara, sik yupa ninye malye un ning kum teneptingce, kum pataptu touk, nun babye, malye ning patana ap, malye winina ap, pia kum arye, ‘Diksukumuk unamak’ tenen, dibukce lyepsuke. Sikce Yesus ati obikak, dibuk deice arye, nunti akunum teleb ubuka deipsuke.


Aninguk kum bukni, yata ninye do nirya, malye una deiyok ning arye, sik kanye talima talilulba, malyeuk wininyak ninye ara, Allah arye aninye ati kanye pia kum delinamle ning, kum winipmanto unyake. Ati aninye ara, Allah arye kum kanye delinamle.


Domon yupu nyapnusin ara, pia dipkoprop ulule. Yakong duk tonok, tukwak deice sakuka poulbilirye, kum lyuplyopura, tonok dukuk pia unamle. Bukni, lyupliba dawamlya ani, aminyan talak betekliba, paplirye, duk pia weik moupnamle.


Bulyayukopura, Allah im deice arye ayupu nyapdeibuk. “Anye bira, na Mi Koprop ulule. Narye elti, pia bico tenenuna anya arye, elti, na kanye pia deilinune,” Allah arye nyabuk. Nyabukopura, Allah El Dib Kanye arye, Yesus talima noutam nyapdeibukba, Yesus ara ninye pia kum ulamik mutuku, pata mutuku noutamak biyuk.


Nyabukce ayupu ton nyabuk. “Aning-aning nirya min kum kwepdeiamse talak arye, ‘Sirya talak ara, aning winipnamle,’ nyabuka laka nyapdeiamse. Tonda, minop talak arye do unamle talak ati, ‘Aminyan talak ara aning ton wininamle’ tenen, moubuka tenelamsirye kintinip deiamse ning ara, laka nyapdeiamse. Ati na tenepsirye ‘Aning ara winipnamle,’ nyapdeiamse ning ara, ton kum bataknamne. Anirya tenelamse touk dukdongopnamle. Tonda, na kanye deipsirye, ‘Winipnamne’ tenyamse ning ara, adiparyuk dipkoprob nong upnamle, kum bataknamne.”


Allah el si Yahweh arye nyabuk. Anggun nirya dilulume. Na amu tam ulirye, na mambul pil donamlanye bira, anggun kel bikna ati, erepdeipsine. Narye anye pia melibuka talinamne. Narye anye wibuka deiamsa ati, elti, ara, pia kanye delinamne. Na wiamsinye bira, na Dib Kanye weika arye el deice delinamne. Winipnyopura, elce sik tukwak ninye ayala-ayala nirya ati, diksukum kibuka yupu lipsisikuka bokolinamle. Winiplyopura, sik ikin weik ulamik ning kum kipdeiplirye, ninye weika arye teleb kilinamle. Winipliba, sikda kanye deibuka telebuk unamake.


Sik minop talak pil dolamik ning ara, mitik mambul pil, nong bol deice ning uk, mitik teleb winilamik bukni, Kristus el bidamang ining deice arye, nun kanye talima dipkoprop teleb kilisilya ara, mambul weik ulule. Kristus ara, pia diksukumuk ulamukba, Allah El Dib Kanye, pia aunamlanye bira, el mikip melyamuka deice arye, Yesus arye Allah ati, el bidamang el nong kopropa arepdayuk. Nun kanye talima noutamak, malye ning usilya deice arye, malye winibirye dibinyabe. Ati, Kristus el ining deice arye, nun kanye talima noutamak malye ning dipsuka deiyok ara ani. Ara, ‘Tukwak ninye arye, Pia Kam Una Deiyoknye Allah, el amu tam ubikirye, el pil donamak’ tenen, pil dopsuke.


Ura, yuk tukwak ninye bukni, Allah ap, ninye ap ansinilina deiyok nang pil dolamak nang arye winilamak touk, Yesus ara, aning atonun kum ulule. Sikda, ‘Allah arye nun malye wininyap ning kum daneipnamsile’ tenen, kam ulamle ning obuka, Allah el kanye namin kina ati, asum-asum nirya obuka arilyanganyake. Ara minyuma ara, sik babye malye wininyak ning ap, aminyan ara, yuk nang malye wininyak ning ap, ‘Allah arye kum kipdeipnusil’ tenen, kam ning obuka, asum-asum nirya arilyanganyake. Bukni, Yesus ara, aning atonun pia kum winilule. Yesus arye, tukwak ninye nirya, sik malye winin ning kum kilina ati, el babye, el bidamang nong dobuka, Allah ati arepdayukba, sik malye nang arye el Yesus obika deice arye, tonok talak deice aryuk akunum lyepsukce teleb kipdeipsuke. Nun malye winin ning kum danalina ara akunum sirya daksukce pil dopsuke.


Ayupu Atonun ton ani. ‘Allah ati diba tenepnirye, el deiceuk na kanye delinamne, nyabuk.’ (Yesaya 8:17) Tonda ayupu nyabuk ani. ‘Na ap, Allah arye areamnuk mapu sik ap, neika unyabe, nyabuk.’ (Yesaya 8:18)


Ara, minop talak ulamik Yahudi ninye arye, ‘Allah nun malye winin ning namin kipsilirye, nun moronyap yupu kekenamsil’ tenen, Allah el si erena ati, kam ning obuka arena ap, nintong teleb ning dobuka, uku dongona ap, ulamika atonun, Kristus arye nunti, bico tenebuka kanye talima arepsukce, elcuk el bidamnye nong, Allah ati aribukce, nun yok pununa ati dibukura, Allah arye, kanye deibuk. Yesus arye, kanye talima arepsukce, bico tenesilye touk, anggunce yuk ninye nirya ati, bico tenebuka melilanauk unamlulume.


Tonda, minop talak Allah arye, ninye lyena ati, ‘Kristus deice arye, ninye lyen ning kintinipnamne’ tenen, kanye deibuka akunum tenyamuk bukni, aning nirya duknyamuk arye, ninye nirya kum bikamik. Bukni, wini talak ara, akunum laka kipdeipsuke. Allah arye, ‘Winipnamne,’ tenyamuk ning nirya ati, kanye deiyamuk ati, akunum winipsuke.


Wini talibuka unamle talak ara, Israel ninye ara, sik apu kopropa Yakup arye deiamukura, dadeipdanin banyak ninye nirya, pia talibuka unamle. Pia kum bataknamle. Elce talinamle ning ara pia talibuka unamla anya arye min kum winipmanto unamle,” Gabriel arye nyabuk.


Peterus arye ayupu tuba nyanmok talak ara, sik amutuku dup unmek bukni, dua arye siktikmek mutuku nirya palibuka lelipdongobukura, adua kan-kan arye, Allah arye ayupu nyabuk. “Aunmalanye bira, na Mi Koprop ulula ati, elti, na kanye pia delinune. Anggun nirya ara el yupu pia moubuka kekenamlulume,” Allah arye nyabuk.


Deiyok ara, anggun ni Allah Yahweh arye, aning-aning talibuka, eitam erebuka, Pia Mikip Weik Deiyoknye unirye, anggun kan-kan noutam arye, pia kalikuka melinamsine. Anggun mal olan nang ap, ikin ning yanuka, ikin usulul ning nirya ara, naryuk obuka, sirya dakanune. Anggun dobuka, deice tam erebuka, tupa teleb kipdeipkamsene. Tonda, anggun Israel yala nang ara, na amu tam ululumba, na Allah arye anggunti, kanye deipsinirye, na kanye kil-kil deice arye, teleb kipdeipnamsine. Tonda, na Allah arye, anggun nirya ati, kanye delisununa ati, anggun wini talak, ikin usulul ning ap, minop talak kum dasuk ning ara, na Allah arye anggunti, ila tamubuka, teleb kipdeipsinirye, winiryuk kam un ning arenamsine. Anggun Israel nang ara, na mapu koproba ululuma ati, anggunti tenepsinirye, teleb kanye deibuka, weik yupu deice arye, kanye kil-kil mot ton nyanamne. Allah arye nyabuk.


Nabi Mika birye, Allah ati nyabuk. Se, na ni Allah. An uminye Allah atonun, ton pia kum ulule. An tonok ulyame. Ati, Allah Yahweh ance wipdeiamsulum ninye, mitik anun sirya tuba aunmab ninye ara, nun malye wininyap ning nirya, namin kipsimince, lyepsilyame. Anda ninye tukwak nang ati, pia ton kum deresilyame. Nun malye wininyap ning dekna ati, adiparyuk wenebuka opsutum bukni, aning kum winimince, nunti tamubuka bico tenesimince, melibuka lyesilyame. Ance ninye ati, weik arye bico tenesilyame. Ance nun tukwak ninye ati, kanye delisilyame. Winibuka ulyamnye ati, moropkine.


Gabriel birye nyabuk yupu ara, ani. Allah arye anggun Israel ninye ati, tekbarye tujuhpuluh kali, tekbarye talak (490) ton, lo tabakuka arepnamsile. Anyarepnamle ning deiyok ara, ani. Ara, Allah el ‘Naʼ tenen, ninye, Israel ninye ap, tonda, Yerusalem mutuku noutamak unyak nang ap arye, ‘Sik malye wininyak ning nirya bataknamak’ tenen, lo arepnamsile. Ara, sik malye-malye wininyakce, Allah el yupu yanibuka batakanyak ning ara, batakikirye, ‘Tamubuka, Allah dam tamubuka yanamak’ tenen, lo arepnamsile. Winibicopura, Allah el ‘Naʼ tenen, mutuku, Yerusalem mutuku ara, malye winilongolamice ning nirya, kum kipdeibuka, teleb kipdeipnamle. Atalak ara, sik malye winilamak ning nirya, kum daneipnamsile. Winibuka lyepsilirye, pia diksukum winin ninguk arenamsile. Adiksukum winina ara, pia kum kum danamle. Tonda, Allah arye arelamukba, ninye arye lengdar deice elilamak ning ap, Allah el yupu laka len nang, nabi-nabi nang arye, aminyan talak winipnamuk ning ap, winipnamle ning ap, laka nyanyak yupu ap, nong lak upnamle. Tonda, Allah el Pia Teleb Lengna Aik kintinibikirye, teleb ubuka dopnamake.


Minop talak, narye na pil donanye Yakub biti areamsibuk, elce deibukba, dadeipdanin balamik ninye ulamik mutuku uk pia ati binuka unamake. Ara, sik apu yapu ulamik mutuku uk, binuka unamake. Sikce deibikiba, dadeipdanin banamak ninye nirya babye, amutuku uk talibuka pia aunamake. Ara, wini talak ululum ninye ap, aminyan talak sik mapu ap, tonda sik mapu arye deipdanin, banamak mapu ap, doyanamle talak deibikiba, dadeipdanin banamak ninye nirya ap, sik nirya amutuku noutamuk teleb ubuka unamake. Unamak talak ara, Daud el yalanye birye, ninye deiyok kibuka aninye pia talinamle. Sik Sisinanye el tonok unamle.


Nyapminyopura, an Yeheskiel birye, sikti, ayupu ton tabakuka nyapnalame. “Na Allah ara, dipkoprob pia kam unune. Aning ara, dip ulamle touk, adeice arye, adipkoprop yupu ton nyapsine. Na Allah Yahweh, aning-aning nirya talibuka, deice tam erebuka, mikip weik ununye birye nyapsine. Sik malye wininyak nang ara, sik tuba malyeuk unyak talak aryuk, dekenyak nang ara, na kanye kum delinune. Kanye teleb unulul ning ara, ‘Sik malye unyak nang arye, sik malye winin ning ara, bataktingirye, tamubuka na dam yakirye, teleb aryuk ubikirye, kam unamakʼ tenen, kanye deibuka teninune. Ati ara, “Se, anggun Israel yala nango, anggun tuba malye winilulum ning ara, adiparyuk batakmunce, tamubuka na damuk yalulume! Yata ning deiyok ati, malye winipmunye deice aryuk, anggunda dipnamlum do?” nyabuka laka nyapnalame.


Aminyan talak nirya ara, narye sikti, kanye deipnirye, teleb kipdeipnamne. Tonda, narye sikti, batakna pia kumce, ‘Amutuku noutamuk, pia teleb unamakʼ tenen, kintinip deipyeba, telebuk wininamake. Aning akunum nyapdeipsina ati, aning ara, pia kum bataknamne. Na nyasinye touk, dipkoprob pia wininamsinarya! Na kanye tenen ning ap, na talima ap deice arye, nyalin yupu arye nyapsine. Aning nirya ara, dipkoprob winipnamsine!


Deiyok ara, Yahweh arye wipdeiamsuk nang, el ‘Naʼ tenen nang ara, kanye deibuka unyabe. Tonda, yata nang do nirya, sikce sik bidamang kanye erelana kumce, sik talima namin asa ukirye, ‘Allah aryuk melipsutue,’ tenenyak nang ati, Allah arye teleb kilisululce, nun ikin usulul noutam ara, lobuka lyelosulule.


Aning nirya ati, kanye kum delilule bukni, Allah Yahweh, elce kanye delilul ning ara ani. Ara, yata nang do nirya ara, Allah arye, “Aning wininamlume, aning ara, pia kum wininamlulume,” nyapdeiamsuk yupu moubuka kekebikirye, el tonok ilil uplyeba, diksukumuk wininyak nang ati, Allah arye, kanye deililule. Anang ara, Allah arye, “Weik bico tenesinirye, pia teleb kilinamsine,” nyabuka, nyalin yupu deice arye nyadeipyamsuk yupu nirya, moubuka kekebikirye, Allah elcuk lyelonamsile,’ tenenyak nang ati, Allah arye kanye delilule. Yuk nang ap, yuk ning ap ati, kume.


Tonda narye, ‘El tibuk pia bico tenebuka melinamne,’ nyapdeamsi touk, tuba-tuba melipniba, mikip arye unamle. Tonda, na Allah arye, Daud biti, ‘Wininamkine,’ nyalilamse yupu nirya ara, dipkoprob pia wininamle ati, aning ara, kum kum danamle.”


Sik amutuku unamak ninye nirya arye, ayana talipnamsilanye, ninye deiyoknye Raja ati, si erebikiba, pia aunamle. Tonda, ayanamlanye, el si tuba auplyeba, el tibuk, “Nun deiyoknye ani,” nyabuka, elti, si pia erenamake. Keting sinarya aupnamle talak nirya ara, el tibuk kinamake. Aninye deiyoknye, pia teleb unamla deice arye, mutuku-mutuku nirya unyak ninye, ayala-ayala nirya ara, telebuk ulilulba, weika arye tabakikirye, teleb wininamake. Elce, tukwak mutuku noutamak unyak ninye nirya ati, teleb kililirye, melilamliba, tukwak mutuku ninye nirya arye, “Diba, elda pia telebnye ulule,” nyabuka, elti, si pia erenamake.


Nunce deibibyeba, dadeipdanin banamak mapu babye, “Nun ni koproba Allah arye, melibuka winilamsuk ning ani,” nyabuka laka nyanamabe. Winibipyopura, Allah an siuk erebikirye, sikce ton mapu deibikcopura, dadeipdanin, upre banamak ninye nirya babye, an siuk erenamkiyake.


Anirya ara, tuba tenebirye, anggunti Allah morosenyabe. Allah morosinyaba ara, ani. Ara, Allah arye anggunti, ‘Wininamake, wininamake,’ tenyamsuk touk, pia diksukumuk winibicopura, Allah arye anggunti, nyapnamle. Ara, “Anang ati ara, na kanye deipsine. Yukuamse talak arye, ‘Wininamake,’ tenyamse touk, akunum wininyake,” nyabuka, ‘Teleb ulinamsil’ tenen, nunce anggunti, Allah morosenyabe. Tonda, Allah arye anggunti, melipsilyopura, anggunce, ‘Teleb pil donamap’ tenen, tenelulum ning ap, dib tenemunye deice arye, winilamlum ning ap, anirya ara, ‘Allah el mikip deice arye, anggun winin ning nirya nong updeipnamsil’ tenen, Allah anggunti morosenyabe. Na Paulus arye nyapsine.


Elda, aning-aning nirya ap, ninye nirya ap taliplirye, ninye deiyoknye pia aunamle. Elce aning-aning nirya, talibuka unamle talak ara, kum kumdanamle. Tonda, elce, ‘Allah ap, ninye ap, teleb ubuka neika unamak’ tenen, ansinilina deiyok kibuka unamsilnye bira, pia aunamle. Aning babye, kum kumdanamle. Minop talak ninye deiyoknye, Raja Daud birye taleamuk mutuku ap, ninye ap ara, el dem arye, pia taliplirye, ninye deiyoknye pia aunamle. Raja Daud ninye deiyoknye una ati, weik mambul bun ning deice bulamuk touk, anye babye, aning deice pia abunamle. Raja Daud birye taleamuk mutuku ap, ninye ap nirya ara, ayanamlanye, el si mikip deice arye, aning-aning nirya pia talinamle. Elce pia teleb kibuka, yupu lipsisikuka bokolinamsile. Tonda, el malye winin ning tonok babye kum winilirye, pia diksukumuk unamla deice arye, amutuku nirya ap, amutuku unamak ninye nirya ap, teleb arye talinamle. Elda ninye deiyoknye kiplirye, talinamle ning nirya ara, pia aunamle. Wini talak ap, yuk sum nirya ap, pia ati unamle. Elce pia teleb unamle ning nirya, sirya dakmanto kum unamle. Aning nirya ara, talye ati kum winipnamle. Allah Yahweh ara, aning-aning nirya talilirye, im deice yin talin malaikat nirya, sik weik deiyoknye ulule. Allah Yahweh, aning-aning nirya talibuka, deice tam ulirye, Weik Erenanye birye, pia pi dobuka, el mikip weik deice aniryuk, aning nirya dipkoprob pil dolya deice arye unamle. Allah arye nyapdeibukba, Yesaya birye sekeibuke.


Tonap, arup arye dukdongobuka nyapsin ning ara, dipkoprob pia ati aupnamle. Allah nara, Pia Telebnye ununa deice arye, ayupu nyapsine. Narye Daud biti, ‘Wininamkin,’ nyabuka, nyalin yupu deice nyalilamse ning ara, talye kum nyaplomse. Anyalamse ning ara, tuba tenenamne.


Na ni Allah, ance elti, melipminya deice arye, elce talinamle ninye arye, diksukum teleb winin ninguk, pia ati upra banamake. Tonda, nun mutuku noutamak pil donamap ning nirya ara, ‘Awala-awala nirya mapbabiba, pia telebuk upra balamlya ani, sirya dakna talak babye, tuba telebuk unamsil’ tenen, moropkine.


Winipminba, aninye sik aik dobuka, unyak mutuku nirya ara, oldemuk uplirye, bipla papnamle. Amutuku noutamak ara, aik ap, ninye ap, ton pia kum unamake.


Aning ara, talye ati kum nyapne. An Allah arye, Raja dam yaminyopura, pia teleb ning boyanuka, weik tonun tuba-tuba areniminye ning ati, nyapne. Winipminyopura, ‘Anye bira, Raja aulule’ tenen, lak nyana ati bikilin ning, el si mahkota, dekna weik ning, el si emas arye, memebik topi, aninye deiyoknye, el kisok deice akunum deiplume.


An oldan ninye ati, obuka bisipnalam talak ara, ance talilyamba, an amu tam unyak ninye nirya ara, sik kanye teniltona kum diparyuk, an dam yakirye, an ap, sik ap, neika ansinibuka, yuk mutuku ninye ati, olbinamlume. Winipmanto ara, lukunyan talak kurya dei sakuka, mutmuta deice palilamle atonun, asum-asum nirya, an amu tam unyak yin talin kam nang arye, ‘Nun ni ap, neika malye nang ati olbinamap’ tenen, an damak tuba-tuba yanganamake. Na Allah arye melisinirye, an amu tam, yin talin nang ap, an ap mikip kipdeipsiniba, an oldan ninye ati, mal olbinamlume.


Anang arye Yohanes ati asipdeyik sum bukni, mapmeka, anyuku sum ara, Yesus arye Yohanes el dam yanganmokba, Yohanes eibukce, nyabuk. “Ninye mutuku-mutuku nirya, sik malye winin ning kum kilina ap, ‘Sik kum dipnamak’ tenen, pununa ap deiyoknye, Allah arena ati Domba Mi Atonunye bira, ayanmal atia.


Ton deiyok ara ani. Ara, anggunce ‘Lo tonap tabaknamabe,’ tenepmunyopura, kwanim tam taruk ap, sirik tam taruk ap, yuk-yuk talibuka lipdopmunyeba biknamlule. Winipliba anggunce deipmunyeba, dadeipdanin banamak ninye ara, weik upra bakirye, yuk mutuku unyak ninye ayala-ayala weik, mutuku-mutuku nirya, malye kibikirye, amutuku noutama uk unamake. Tonda, ton tam nang arye, ton tam nang ati, obuka sirya dakikiba, ninye una kumce, bipla pabuk mutuku ara, ‘Naʼ tenen, ninye, Israel yala ninye binuka unamake.


‘Pia unamle,’ nyalin yupu nyapsinyopura, anggun Israel ninye arye deipmunyeba, dadeipdanin banamak ninye nirya ati, yuk pera mutuku nang nirya arye, kel kibikirye, winilinamake. Narye anggunti,teleb kipdeipsinyopura, yuk ninye mutuku-mutuku nirya eipsikirye, ‘Se, Israel ninye ara, Allah Yahweh arye dipkoprob teleb kililule,’ nyanamsiyake.” Allah arye Israel ninye ati nyapdeibukba, nabi Yesaya birye sekdeibuk.


Dipkoprob nyapsine. Narye winiryuk im kwepdeipnamne ning ap, tonda, winiryuk tukwak mutuku kwepdeipnamne ning ap, aning kwepdeipniba, pia aupnamle touk, ‘Naʼ tenen, nang, sik Israel nang, sik ap, sik si ap, anggunce deipmunba dadeipdanin binamak nang ap, nirya ara, na dam pia aunamlume. Anggunda, min kum kum danamlume! Na Allah Yahweh arye, ayupu nyapmasina anya arye, aning ara dipkoprob winipnyopda, nong upnamlarya!


Tonda, sapi basam yim winiryuk nepmalye ning tonok ap, domba basam yim tonok ap, tonda yim domba mi keting tamun tonok kiamuk ning ap, kintinibuk. Akam ning nirya ara, ‘Allah si erepnun tenen, aning nirya boyanuka arebukba, imam nang arye uku dabik.


Dotalak unamak ninye arye, sikce deipnamak mapu ati, “Nun ni koproba Allah arye, pia diksukum ubuka, ninye winipmanto kum pil dolamsuk ning ara ani,” nyabuka, laka nyanamake. Winipnamaka deice arye, sikce deibikceba, dadeipdanin banamak mapu nirya babye, sik nirya arye, Allah el siuk erenamake.


Nyapnuk bukni, narye tamubuka, elti, nyapse. “Na kanye ara, talye piluk donmanibuk, na mikip kum danilirye, mitang upnamnile. Pil ara weik donamne bukni, ‘Nong ara kum danamnil do?’ tenenune. Aning ara na kanye aryuk utenyamse bukni, na kele, Allah Yahweh arye el tenelye touk dipkoprob upnamnile. Tonda, na pil donya atonun, Allah arye dekna arenamnile.”


Na winipnaman deice arye, Allah el si weik arye erebikirye, kibuka si erenamaka anya arye, Allah arye nati pia teleb kipdeipniliba, na si babye weik arye erenamake. Allah arye anirya winipnamala ara, adiparyuk minopce winipnamale.” Yesus arye nyabuk.


Swiv nou:

Piblisite


Piblisite