“Anggunda moubuka kekepnululume! Anggunce, ‘Se, diksukum winina ara, weik tonun patasululeʼ tenen, moubuka kel biklum nang ati nyapsine. Ara, narye, ‘Aning ara wininamlume, aning ara pia kum wininamlume. Teleb una ara ani,’ nyabuka peterelamsise yupu akunum taliplumce, anggun kanye talima noutam boplumce, aninguk talibuka ululum nang ati nyapsine. Anggunce na yupu kekepnululume! Sik yuk talye unyak nang, tukwak mutuku unyak nang arye, talye-talye yupu nyabuka, nalisinyak yupu ap, nalibuka ik-ik nyasinyak yupu ap, minin yupu nyasinyaka ap nirya babye, ilil una pia kume. Tonda, talye nang arye anggunti ara, ‘Sikda malye unyake. Sikda talye ning ati, diba tenenyake,’ nyapsikirye, malye yupu anggun deice nyasinyak nang ati ara, anggunce, ilil una kumce, ‘Se, yata ning deiyok ati ayupu nyasinyak do?’ tenen, kanye teniltona pia kum unamlume. Atalye nang arye, anggunti, malye yupu nyapnamsiyak bukni, anggunda ilil una ap, mikip mitang una ap ara pia kum unamlume. Deiyok ara, ani.
Yesaya 51:1 - Eipomek1 Allah arye, sik Israel yala nang nirya ati nyabuk. “Anggunda moubuka kekepnululume! Anggunce, ‘Se, diksukum una ara, weik tonun patasululeʼ tenen, moubuka kel biklum nang ati nyapsine. Tonda, anggunce, ‘Se, nun ni koproba Allah Yahweh arye, lobuka lyepsilirye, ‘Teleb una ara ani, teleb bisikuk dobolbanamlume,’ nyabuka, ‘Peteresulul ning ara, pia telebeʼ tenen, patasiliba, moubuka eililulum nang ara, anggun apu yapu nang ati, moubuka tenipdenulume. Winipmanto ara ani. Anggunce tenipdelulume. Ninye arye, ‘Pia teleb keil dobuka, teleb keil aik dopnamapʼ tenen, ‘Teleb keil palina ara, cang mutuku arye palibuka doproptibye do?’ tenen, keil telebak moubuka dipdebibirye, asukumuk teleb keil dobuka, aik donyake. Aning atonun, anggun apu yapu ap, anggun nun yapu ap, tuba ton ap moubuka tinipdenamlume. Sik bitinye ara, mitik tonun, teleb keil palina atonun unrurake. Gade chapit la |
Yesaya 51:1
29 Referans Kwoze
Aning ara, talye ati kume. Deiyok ara, Allah ance, “Aning wininamlume, aning ara, pia kum wininamlume,” nyapdeiamsulum yupu, moubuka kekebikirye, dipkoprob uk wininyak nang ara, ance pia teleb kibuka, yupu lipsisikuka bokeipsimince, ton ap tamubuka, teleb kilinamsilame. Allah ancuk, “Winipnamne,” nyabuka, diksukum ulyama deice arye, nyanamsilam yupu nirya ara, sik talima noutam dipkoprob uk wininyak nang arye, ayupu kekebikirye, pia moubuka talibikirye, aninguk wininamake.
Ura, na kayapo. Anggun nirya arye, ‘Yuk ninye nirya ap, kanye deibuka neika ubibirye, malye winina ap, olana ap, yupu deice walana ap, aning nirya pia kum diparyuk, diksukumuk unamap’ tenen, pia pi dobuka, pirilenamlulume. Malye winina ning nirya, kum batakikirye, diksukumuk kum unyak ninye ara, nun Weik Deiyoknye Allah, el ap neika ansinibuka kum unamake.
Anyapmasin yupu nirya ati ara, ayupu ton nyapnusine. Asum-asum nun nirya arye, ‘Yata teleb ning winiptibyeba, nun diba tenenyap nang nirya arye, kanye deibuka namin asa arye neika unamap do?’ tenen, pia pi dobuka pirilenamlulume. Tonda, anggun nirya arye, ‘Telebuk winibirye, nun kanye talima kwa dipdabiba, nun kanye talima ap, nong ap nirya ara, wisipnamsil’ tenen, pirilenamlulume.
Allah arye nyabuk. “Se, anggun Israel yala nang ara, na nyapnusin yupu moubuka kekepnululume! Tonda, anggun apu koproba Yakub birye deiamukba, dadeipdanin yangalamlum nang ara, anggunti yupu nyapsisirye, ‘Naʼ tenen, ati wibuka deipsisa anya arye, na nyapnusin yupu kekepnululume! Nara anggun ni koproba Allah pia ati unune. Pia aununye bira, nauk aunune. Aning-aning min kum uamuk talak ara, na akunum ulamse. Tonda, aning-aning akunum kum uplyopura, na uk tuba kam unamne! Nara aning-aning nirya deiyok kina ap, sirya dakna ap, weik deiyoknye birye, na uk unune. Yuk ning ton pia kum ulule.
Ati Timotiuso, sik kam kili sal arye malye ning patapliba, winilamak ning ati, bita dipdemince, yuk karin ak unamlyame. Amalye ning nirya batakuka, diksukum winin ninguk tenebuka unamlyame. Tonda, Yesus ati diba tenena ap; yuk nang ati bico tenebuka melina ap; malye kanye bona kum arye, yuk nang ap, kanye deibuka, ‘Nimalye arye neika unamabe’ tenena ap; aning nirya ara, tenenauk unamlame. Ara, anuk kum bukni, sik yuk nang, tenepce arye talye nyana kum bukni, sik kanye talima diksukum unyak ninye arye, nun Deiyoknye Yesus ati, diba tenenyak nang ap, ateleb ninguk tenebuka, neiktotouk unamlulume.
Ati ara, anggun Israel ninye nirya ara, tonap tuba tamubuka, na Allah Yahweh damuk yanamlulume. Yamunyopura, anggun pia tuba kamuk unamlum bukni, na dam tamubuka kum yamunyopura, Allah na yu ara, uku dilamle atonun unulula ati, anggun apu koprop, Yusup arye deiamukba, dadeipdanin yangalamik nang, anggun Israel yala ninye nirya, sirya daknamsine. Winipmanto ara, uku dibuka sirya daklamle touk, anggun wenena ati, kum daneipnamsine. Tonda, Betel mutuku unyak nang babye, auku arye diplirye, sirya daknamle. Adinamle uku ara, yatanye birye tangap dongopturye, aninye lyeptu do? Pia kuma ati, ‘Allah arye wenepsilyak’ tenen, nyapsine ati, anggun kanye mouplulume, nyapsine.
Yata nang do nirya, teleb winin ninguk patalyeba, ‘Allah arye nyasilye touk unamabe. Tonda yuk nang ati bico tenebuka melilana uk unamabe,’ tenebikirye, aning atibuk dobolnyak ninye ara, telebuk unamake. Sikce kam una deiyok ning ap, Allah arye, ‘Wininamake,’ tenyamsuk deiyok ning ap dolonamake. Tonda, yuk ninye arye sikti, ‘Se, aninye ara, dipkoprob telebuk unyake,’ tenebikirye, sikti, kanye delinamake. Teleb kibuka una deiyok ning doprobicopura, sik upre banamaka ati, Allah arye ouku cang arye arepliba, pia telebuk upre banamake.
Ninye ton Allah Yahweh el ulye touk, tenebuka kum ukirye, malye winin ninguk talibuka wininyak nang ara, Allah Yahweh arye, ‘Na like,’ tenelirye, anang ati, pia yu ulule. Bukni, ninye ton, ‘Allah el ulye touk uptinye’ tenen, pia pi dobuka, kel bikilulnye bira, Allah elce, ‘Winibuka unamake,’ tenelul touk, ululnye ati ara, pia kanye delilule. Atonun unyak nang ara, Allah arye pia bico tenelule.
Aninye malye ulilalamik bukni, anda Allah el yupu nyasilye touk ubuka, el pil donanye ulyama ati, amalye winin ning nirya dam una meme. Bik-bik abuka yukak balamak atonun, amalye ning batakuka, ‘Pia telebuk winiptinye’ tenen, patapkilyeura, pi dobuka wininalyame. Ara, diksukum una ap, Allah diksukum ulye touk una ap, Allah dib tenena ap, yuk ninye ati bico tenebuka melina ap, ‘Ikin ning aupmanil’ tenena kum arye, batakna kum pia pil dona ap, yuk ninye ati, namin arye una ap, anirya ara, an adiparyuk pia piribuka wininalyame.
Na weit yapu atonun ninyeo, Yesus Kristus arye nati, ‘Diksukumuk ubuka, wininamle,’ tenepnuk ning nirya, dipkoprop min kum sirya dakse bukni, tonok mambul wininun ning ara, nyapnusine. ‘Ara, minop winilamse ning ara, batakukapsirye, aning tuba’ tenena kum bukni, aminyan nati winipnamnil ning ap, narye winipnamne ning ap, anyuk tenebuka unune.
Aninguk tenebuka, kum unamlum bukni, weik mambul ning ara, Allah arye, ‘Wininamake,’ tenen, nyasilye touk, diksukum winina ap lyepsilirye, nun kanye talima talibuka unamsil ning ap, im deice welepnamlum ning ap, aninguk minopce tenepmunce, pia moubuka talipmunyopura, yuk yala ning nirya babye, elce dipkoprob arenamsile.
Sik kanye deibuka, telebuk winin nang ara, ani. Ara, Allah arye, “Diksukumuk wininamlulume,” nyasilye yupu ati, ‘Aninguk winiptibye’ tenen, pia patalul nang ara, sik kanye talima noutamak diksukum winin ning, pataplye ning nirya, Allah arye tuba melibuka arenamle. Ati ara, sik kanye deibuka, telebuk unyaka atonun, aminyan talak babye, apia unamake.
Na yupu ara duknubuka kum nyanune. Tonda kunuknak arye duknubuka kum nyanune. Tonda na wiamse ninye Israel ninye ati, ‘Talya urdemuk dibuka banamak’ tenen, kum nyanune. Nara, dipkoprob Allah Yahweh ununa anya arye, ‘Diksukum koprop uk teleb kibuka unamak’ tenen, dipkoprob yupu uk nyalinune.” Allah arye nyabuk.
Aning nirya laka nyapmasin touk, teleb kibuka wininyak ninye arye, ‘Nun ni koproba Allah, el siuk erenamabe,’ tenebuka diksukumuk wininyake. ‘Allah el si erenamap’ tenen, el dam yanganamake. Nun apu koproba Yakub birye deibukba, dadeipdanin yangalamik Israel yala ninye nirya ara, Allah ance aninye ati, pia melibuka kaliklamlume. Diksukum wininyak ninye aniryuk, ‘Nun Allah dam yanuka ubirye, el siuk erenamabe,’ tenebuka, unyak ninye uk, Allah el siuk erenamake.
Se, anggun amutuku noutam ululum nang kan-kan arye, anggun kanye amu tam kibuka ululum nango, anggun adiparyuk, Allah Yahweh el dam tamubuka yalulume. Tonda Allah arye, ‘Aning ara, wininamlume, bukni aning ara, pia kum wininamlume,’ nyabuk ning, talibuka winilulum nang ara, tamubuka Allah dam yamunce, Allah elce tenelul touk, winipnamlume. Tonda, ‘Atalak ara, nun ni Allah arye, yata nyapnamsil do?’ tenen, Allah dam tamubuka yamumce, moubuka kekedenamlume. Ara, kanye lamapdongobuka, Allah dam yamunce, kanye erelana kum aryuk, namin kanye bonamlume. Tonda, Allah arye, ‘Wininamlume, wininamlume. Diksukum winin ning ara, ani, aninguk talibuka, telebuk wininamlume,’ nyabuka laka nyapdeiamsuk yupu kekebuka, aninguk talibuka, telebuk wininamlume. Winipmunyopura, Allah Yahweh el yu, ‘Anggun Israel nang deice deipnamsin,’ tenebuk sum ara, anggun telebuk winilulum nang deice, ‘Bico tenepsuturye, wenen ning kum arepnamsil do? Arepnamsil do?’ tenena atia. Bukni, el kanye ara, nun walwale.
Ati ara, se, na mapu koprop atonun ululum nango! Anggun nirya ara, na nyapnusin yupu moubuka kekenamnulume! Tonda, narye wibuka akwamsise nang, ‘Naʼ tenen, nang ara, anggun moubuka kekepnululume! Anggunce na moubuka kekepnamnulum ning deiyok ara, ani. Ara, narye anggun nirya ati, ‘Aning wininamlume, aning ara, pia kum wininamlume,’ nyabuka, lak peterenamsine. Tonda, narye, ‘Diksukum una ning ara, ani. Pia teleb una ara, ani, malye ning ani,’ nyabuka, lak peterepnamsin yupu ara, ninye mutuku sirya, im sirya nirya ati melipnamne. Winipmanto ara, narye nyapnusin yupu ara, tukwak nang mutuku sirya, im sirya nirya unyak nang ati ara, sik weisa atonun upnamle. Aning kekebuka kel kibikirye, ‘E, teleb winin ning ara ani,’ tenen, moubuka kel biknamnyake. Na yupu arye anang nirya ara, dirina upliba dirina deiceuk, teleb unamake.
Allah arye ninye lyena ati, “Sikda teleb ninye unyake,” nyabuka, diksukum kilisilya deiyok ning ara, moubuka kum kel kiyamika anya arye, sikce, ‘Nun diksukum kilina ati, nun bidamang aryuk piripdebirye, pil weik donamape’ tenen, talye pil weik dolamik. Winibuka pirilamika deice arye, diksukum una deiyok ning, Allah arye akunum kintinipsuk ning ara, yaniltalamikce talyauk ulamik. Adeice arye, Allah el amu tam kum ulamika ati, el kanye aniryuk diksukum una deiyok ning arisilye ning ara, kum dololamik.
Akunum wekuk ati, nabi Asarya birye, ‘Ninye deiyoknye Raja Asa abataknamneʼ tenen, biyuk. Biyukce nyabuk, “Se na deiyoknye Asa ap, Yehuda mutuku noutam unyak nang nirya ap, tonda Benyamin yala nang nirya ap ati, nyapsine! Moubuka kekeplulume! Allah Yahweh anggun dam usulule. Atonun, anggun babye el dam ululume. Ati, anggunce Allah Yahweh ati, El nyasilye yupu nirya adiparyuk moubuka dolonamabe, aninguk talinamabe ati, melipsilyame nyabuka moropmunyeura, elce anggun dam yanuka melisiliba, el ap neika unamlume. Bukni, anggunce elti, kum kekepmunyakarye, batakmunyeura, elce anggunti melina kumce, batakanamsile.
Talye-talye ulamikce, malye weik ap, ikin weik ning dololamikce, sik atalak ulamik nang nirya, malye kanye bobuka ulamikce, sik deiyoknye Allah si Yahweh, Israel nang wibuka kalekuka melilamuknye Allah ati, Melipsilyame nyabuka morobik. Sik Israel nang nirya arye, Kume, Allah elce nyasilye yupu moubuka talibibirye, el tonok ati si erenamabe tenelamikce, Melipsilyame nyabuka morobik. Morobikura, adiparyuk morobik touk, Allah Yahweh arye, yanuka melilamuk.
Allah arye nyabuk. Anggunda, anggun apu koproba, Yakub birye deiamsukba, dadeipdanin yangalulumce, ululum ninyeo, anggunda moubuka kekepnamlulume. Yakub birye deiamuk nang ati, narye, ‘Sik si ara, Israel yala nang nyapsina anya arye, ninye arye nyanamsiyake. Tonda, minop talak ara, anggun pununanye Yudah birye deiamukba, dadeipdanin yangalamlum nang ululume. Anggunce, nyalin yupu nyaplum talak ara, ‘Nun ni Allah Yahweh, el si deice arye nyapsiyabe,’ nyanamlume. Tonda, ikin upsiliba, ‘Nun ni Allah arye melipnamsilʼ tenen, anggun Israel nang arye, na si erenululume. Aning nirya winibuka nyalulum bukni, dipkoprob ning ara, anggun kanye deice arye, diba tenebuka kum nyalulume. Talye yupu atonun nyabuka, si bambol deice aryuk, nyaltakalulume. Dipkoprop diksukum ubuka, teleb deice arye, kum nyaltaklulume.