Yesaya 49:8 - Eipomek

⁸ Na Allah Yahweh arye na mapu Israel ninye ati nyapsine. “Narye tenyamse talak akunum yalyopura, anggunce moryamnulum ning ara kekepsinirye, melinamsine. Tonda narye tenyamse talak akunum kiplyopura, anggun melibuka lyepnamsine. Winipsinirye, anggunda na amu tam ulamunyeba, narye tuba kalikuka melinamsine. Winipnamsina deice arye, doryanamle talak unamak Israel ninye babye, aning eibuka kel bikikirye, ‘Nun babye dipkoprob lyepropnamsile’ tenen, kel biknamake. Ati na pil donamsina deice arye, yuk mutuku nang arye anggun mutuku nirya alabuka dopropsik ning ara, tamubuka arepnamsine. Winipsinyopura, narye anggun minop talak aik dobuka ulamlumak bukni, aik oldemuk upsukak ara, tamubuka arepsiniba, aik dopmunce amutuku ara pia talibuka unamlume. Aning ara, na tenepse talak akunum uplyopura, winipnamle.”

Yesaya 49:8 Referans Kwoze

2 Korintus 6:2

Anyapsin yupu deiyok ara ani. Ara, Allah yupu noutamak ara, Allah arye Israel ninye ati nyapdeibukba, nabi Yesaya arye sekuk yupu ani. ‘Allah arye nyabuk, “Narye, ‘Aninye melipnamne’ tenen, kanye deipse talak akunum ubukba, anggunce moropnulumba, kekepsirye melipsise. Narye, ‘Ninye lyena talak atia,’ tenyamsi talak akunum ubukba, anggunti melibuka lyepsise,” nyabuk.’ (Yesaya 49:8) Ati, Yesaya arye sekdeibuk yupu nyasilye touk, na Paulus arye anggun Korintus ninye ati nyapsine. ‘Aning nirya ara, yuk talak aryuk tenenamabe’ tenen, kum unamlulume. Wini talak ara, Allah arye kanye delisilye talak akunum upsile. Wini talak ara, Allah arye lyesilye talak akunum usulula ati, adiparyuk dib tenebuka teleb ubuka wininamlume, nyapsine.

Yesaya 42:6

Ati na si Allah Yahweh arye, anti wibuka yukupkina deiyok ara, ani. Ara nara, malye una pia kum diparyuk, diksukumuk ununa ara, ance, ‘Tukwak ninye nirya kel biknamak’ tenen, lak kipdeipnamlama ati, wibuka deipkise. Ati, anda teleb kanye bobuka, diksukumuk upra banamlame. Narye, an taruk talibuka, pia kalikuka melinamkine. Deiyok ara ani. Ara, ‘Na tenena ninye unamak’ tenen, wipdeiamse ninye ati, narye, ‘Wininamlulume, aning ara kum wininamlulume. Winipmunyopura, narye anggunti wininamsine,’ nyapdeipse yupu, ‘Pia diba tenepnamak’ tenen, an dobuka, sik dam dopkwetepnamkine. Anda, mambul pil dopra balaminya ani, deice arye aninye ara, ‘E, dipkoprob nun ni koproba Allah arye nyasilye yupu ara, nong upnamlarya’ tenen, moubuka kel biknamake. Winipminyeba, sik moubuka kel kina ati, ance sik talima pum tam dirina arepnamlyame. Winipmanto ara, lukunyan noutamak ara, ninye arye weisa ubikirye, menekuka bakibuk, yuk ninye awesa dirina eibikirye, teleb bisik balamak touk, ance yuk-yuk mutuku ninye nirya ati, dirina kipdeipnamlame. Ara, ‘Israel yala kum ninye ara, na dirina eibikirye, diba tenepnamniyak’ tenen, dirin deiyoknye erepdeipkine.

Mazmur 69:13

Sik weik kota kibuka asik domikce, bublan wekelbana ati, potokeiamik bisik bublan dam bunyak nang arye nati, yap-yap abuka nalininyake. Tonda, sik ninye kanye wangalamak mek din nang nirya arye, sik mot nyana deice arye, nati malye nyabuka nalininyake.

Ibrani 12:24

Tonda, Allah danatam, ninye danatam, noutamak ansinilina deiyoknye, Yesus el un dam yanganmalume. Ninye lyena ati, Allah arye, “Winipnamsine,” nyabuka nyalilamsuk yupu, winiryuk ning ara, Yesus ara, ayupu ati ansinilina deiyoknye usulule. ‘Allah ap, ninye tukwak ninye ap, teleb ubuka neika unamak’ tenen, ansinibuka delisulul deiyoknye ara, Yesus uka. Minop talak ulamuknye Habel arye, Allah el si erena ati, kam ning obuka, ining likdeibuk ning ara, mitik telebuk winibuk bukni, Yesus arye nun lyena ati, el ining sakukce biyuk ning ara, pia mambul weik ulule.

Yesaya 61:4

Allah arye Israel ninye ati nyabuk. “Minop talak asik dolamikak bukni, sik mal olan nang arye, ulubuka bataklamikba oldemuk ubukak ara, anggun Israel ninye arye tuba tonap tamubuka donamlume. Tonda ninye ulamik mutuku bukni, kum dayikba ninye kum arye asik oldem mutuku ara, sik Israel nang arye, tuba tonap tamubuka dobikirye amutuku noutam unamake.

Yesaya 58:12

Anggun ulamlum mutuku bukni, yu nang arye dakuka, uku sice kiplomik ning ara, sik mining ninye, Israel ninye arye, tuba tonap tamubuka, anyasik nirya punubuka donamake. Tonda, minop ayukumna uluplobicopura, tuba tonap deibikirye, aning deice uk, anyasik nirya deibuka donamake. Winipmunyopura, yuk nang arye, eibuka kel kibikirye, anggunti nyanamsiyake. ‘Sik Israel ninye ara, cang keil poka dakuka batakamik ap, keil aik daklomik ning ap, unirya tuba tonap tamubuka, aning nirya lipsisikuka, dona kel nang unyake,’ nyanamsiyake. Tonda, anggun asik nirya ap, bisik ap ara, yu nang arye aning nirya daklomik bukni, “Wini talak ara, min arye bisik diksukum yamik touk, Israel ninye arye lipsisikuka yapmakce, ninye unamak aik dana-dana tam donmake,” nyanamsiyake.

Ibrani 5:7

Yesus ara, tukwak mutuku noutamak ulamuk talak ara, elce el dipnamuk ning ati tenebukce, el lyepmantonye Allah ati morobuke. Elce morobuka ara, “Naie, ance melipnilyame,” nyabuka, asing maka deice ap, weik malye nyana ap deice arye morobuke. Morobukce, el Yesus ara, ‘Allah ara, weik mambule anya arye, elti, si kipnirye, el amutamuk pia unamne,’ tenelamukce, talima naminye ulamuka ati, Allah arye, Yesus morobuk yupu kekebukce melilamuk.

Yesaya 51:16

Na Allah arye, ‘Na yupu arepniba kekeplirye, lak nyalbinamleʼ tenen, an Yesaya biti, na yupu dobuka an si pum akunum dongopkise. Tonda, narye anti, tuba kalikinauk ukunune. Winipmanto ara, na taruk pum tam ulyama anya arye, yata ning do nirya anti kum yanuka opkutue. Na Allah ara, im deice tam uamlye ning nirya babye, akunum bibikuka deiamse. Aning atonun, naryuk tukwak mutuku amu tam barina ati, teleb kipdeipsiba, tuba aupnamle. Wininuna ati ara, narye Sion mutuku unyak nang ati, nyapsine. “Anggunda, na mapu koprop, ‘Naʼ tenen, nang ululume,” nyapsine.

Yesaya 44:26

Bukni, na amu tam pil donyak nang, sikce nyanyak yupu ara, narye melipniba dipkoprob nong ulule. Aning atonun, narye wipdeipsiba, na nyanye yupu laka nyana deiyok nang, sik dipkoprob nabi nang ara, anang arye nyanyak yupu ara, narye melipniba dipkoprob nong ulule. Ati, na Allah Yahweh arye, “Yerusalem mutuku ati, minop talak ara, yu nang yanuka obuka sirya dakikba, amutuku batakamik bukni, ila tamubuka ‘Naʼ tenen, ninye tamubuka yakirye, Yerusalem mutuku noutam yanuka unamake,” nyabuka nyalinune. Tonda, “Yehuda tam noutam ulamik mutuku domik aik daklomik ning ara, tuba tonap tamubuka dopnamake,” nyabuka nyalinune. Yehuda mutuku noutam domik aik, yuk nang arye daklomikba, kum danamuk ning ara, naryuk lipsisikuka donamsine,” nyabuka nyalisunune.

Efesus 1:6

Aning nirya akunum winipsuka ati ara, ninye nirya kel kibicopura, “Se, Allah bico tenepsilirye, el kanye aniryuk melibuka arisilye ning ara, weik mambule. Allah ara, pia teleb ulule,” nyabuka, el si weik arye, erenamake. Allah bico tenepsukce, talyeuk arisilye ning nirya ara, el mi koprop deice arye, arepsuke. Allah arye, el Mi Koprop Yesus ati ara, kanye talima aribuka pia kanye delilule.

Yesaya 54:3

Ton deiyok ara ani. Ara, anggunce ‘Lo tonap tabaknamabe,’ tenepmunyopura, kwanim tam taruk ap, sirik tam taruk ap, yuk-yuk talibuka lipdopmunyeba biknamlule. Winipliba anggunce deipmunyeba, dadeipdanin banamak ninye ara, weik upra bakirye, yuk mutuku unyak ninye ayala-ayala weik, mutuku-mutuku nirya, malye kibikirye, amutuku noutama uk unamake. Tonda, ton tam nang arye, ton tam nang ati, obuka sirya dakikiba, ninye una kumce, bipla pabuk mutuku ara, ‘Naʼ tenen, ninye, Israel yala ninye binuka unamake.

Yesaya 49:19

Minop talak yu nang arye anggunti obuka sirya daksikce, anggun talilamlum ning ap, anggun ulamlum mutuku ap nirya, atu atonun kiplopsikce, ninye nirya dobuka bobinamsike. Bukni wini talak ara, Israel ninye weik yakirye, amutuku yanuka ukiba, ninye pia weik ubikirye langdipnamake. Israel yala ninye ara, pia weik upnin banamaka ati, amutuku tuku ara, mitik tonun ati, langdipnamake. Sik yu weik nang arye, ‘Amutuku ninye nirya obuka sirya dakibirye, sik mutuku talibuka unamap,’ tenebikce, anggun obuka sirya dakamsik nang ara, adiparyuk batakuka bindobikirye, pera mutuku uk binuka unamake.

Yesaya 42:1

Allah el si Yahweh arye nyabuk. Anggun nirya dilulume. Na amu tam ulirye, na mambul pil donamlanye bira, anggun kel bikna ati, erepdeipsine. Narye anye pia melibuka talinamne. Narye anye wibuka deiamsa ati, elti, ara, pia kanye delinamne. Na wiamsinye bira, na Dib Kanye weika arye el deice delinamne. Winipnyopura, elce sik tukwak ninye ayala-ayala nirya ati, diksukum kibuka yupu lipsisikuka bokolinamle. Winiplyopura, sik ikin weik ulamik ning kum kipdeiplirye, ninye weika arye teleb kilinamle. Winipliba, sikda kanye deibuka telebuk unamake.

Yesaya 26:3

Allah ance nyapdeiplum ninguk, ‘Aninguk talibuka unamne,’ teneplirye, talimak deipnirye, moubuka talibuka telebuk uplinye bira, ance anye el talima noutam ara, ilil asa una kumce, teleb kanye deipnirye, tunim nyabuka una deiyok ning areminba, telebuk unyake. Winiminya deiyok ara, sik anang arye, antibuk, teniltona kumce, diba tenekinyaka ati, ance sikti, teleb kililyame.

Mazmur 75:3

Allah arye nyabuk. “Narye akunum tenyamse talak yalyeura, narye anggun dam yanuka, anggun nirya ati, ninye yupu lipsisibuka bokeipnamsine. Ara, narye, ‘Aning wininamlume. Aning ara, pia kum wininamlume,’ nyapdeipsise yupu nyalul touk, diksukum ubuka, yupu bokeipsinirye, wenepnamsine.

Mazmur 2:8

Ance nati moropnunilyame. Moropneminyopura, mutuku-mutuku nirya ap, amutuku noutamak unyak ninye nirya ap ara, narye anti, arepkiniba, talibuka unamlame. Arepkinyopura, mutuku sirya, im sirya, anirya ancuk talinamlame.

Ibrani 8:6

Allah ap, ninye ap dana-dana ansinilina deiyok nang, sik tukwak ninye arye pil donyak ning ap, sik pil don aik ap ara, winipmanto ning, kukia atonun ulul bukni, Yesus el pil ara, pia dipkoprop ning, weik mambul ning pil dolule. Aning atonun, Allah arye, “Na ap, ninye ap neika una ati, wininamlulume. Winipmunyopura, narye anggun melina ati winibuka wininamsine,” nyabuka, minop talak arye nyalilamuk yupu ara, mitik teleb ulamuk bukni, wini talak kintinipsuk nyalin yupu ara, weik mambul yupu ulule. Yesus ara, ayupu winiryuk nyalin yupu ati, Ansinilina Weik Deiyoknye ulule. Tonda, Allah arye winiryuk nyalin yupu nyapsuk ning ati, “Wininamsine,” nyabuka, nyalilamuk ning deiyok yupu ara, weik mambul ulule. Bukni, minop talak nyabuk ning ara, el deiyok yupu mitik mambuluk ulamuk.

Matius 26:28

“Anggur mek arepnusina ara, na ining atonun ulula ati, dobuka diplulume. Aminyan na ining atonun nyapmasina ara, lak nyapnusine. Ara, Allah min arye nyalilamsuk touk, ‘Ninye weik arye lyepnirye talinamne,’ tenelamuk touk, dipkoprop na opnikceba, na ining saknamle. Na ining saknamla ara, talya ati kume. Ara na ining deice, ninye mutuku-mutuku nirya, sik malye winilamikce ning ap, malye tenelamikce ning ap ati, kum daneipniba, Allah arye sik malye ning namin kiplirye, na ining deice arye ninye weike lyeplirye, sik kanye talima pia talinamle,” Yesus arye nyabuk.

Yesaya 51:3

Ati ara, anggun atalak ululum Israel nang babye, moubuka tenipdenululume. Dipkoprop, na Allah Yahweh arye, anggun Yerusalem weik asik noutam ululum nang ati, aminyan talak anggun talima kwa dipnamsine. Naryuk anggun kanye ara, teleb kipdeipnamsina deice arye, anggun Israel yala nang nirya ap, anggun mal olan nang arye, malye kibuka sung-sunga bultakalamik mutuku nirya ap babye, tuba ton ap teleb kipdeipsiniba, anggun nirya telebuk unamlume. Tonda, naryuk anggun aik oldem ubuk ning nirya ap, anggun wa wina ati tuku ap, anggun mutuku noutam pia malye ubuk tuku ap, mutuku ap nirya ara, tuba ton ap teleb kipdeipnamsine. Ara, anggun oldem nirya ara, minop talak Eden mutuku, pia teleb uamuk touk, teleb kipdeipnamne. Tonda, anggun Israel tam ninye unmeka ara, na Allah Yahweh, na pia teleb wa tuku dam, pia telebak atonun kipdeipnamsine. Winipnyopura, anggun mutuku noutam ara, anggun Israel nang nirya ara, kanye deipmunce, pin-pin asa kanye deiceuk kintinipmunce, ‘Nun ni Allah telebe,’ nyapmunce, kanye lon mot pia nyapnamnulume.

2 Samuel 7:13

Winipnyopura, anye birye, na aik dopnamnile. Anyaik dopnilyopura, Israel nang arye, anyaik pum bisik, na si erepnamniake. Tonda an deipnalam mi, el talinamle mutuku ara, narye yuk talak nirya, pia una ati, mikip kipnamne. Winipniba, yuk yala nang arye, elti, kum bisibuka opnamake.

Yesaya 27:3

Na Allah arye na anggur wa pia ati kalikinamne. Atalak-atalak nirya, mek dikinamne. Narye na anggur wa ati, keting noutam babye, lukunyan babye, kalikinauk unune. Kalikiniba, yuk nang arye, awa ati kum yanuka malye kum kipdeipnamake.

Yesaya 41:10

Ati ara, narye nyapsise. Anggunda ilil una meme. Nara anggun dam unirye, pia melinamsine. Nara, anggun ni koproba Allah ununa ati, anggun kanye teniltona kum unamlume, Imun kanye bobuka kum unamlume. Nara anggun ni Allah unirye melinamsine. Na aryuk mikip arenamsine. Tonda nara, malye ning tonok ning babye ton kum ununye birye, na sirik taruk deice arye, pia talinamsine. Winibuka melipsinya deice arye, aning-aning nirya malye kum kipnamsine.

Yesaya 55:6

Allah el si Yahweh, el dam anyuk adiparyuk tamubuka yanululume. Ara, el tuba upliba din ning din talakuk, el dam yatume. Aning atonun, anggun dam awinilul talak aryuk, elti, ‘Naio, melipsilyame,’ nyabuka, ‘Allah ati yukupnamnulum’ tenen, nyapsine.

Yesaya 57:13

Bukni, anggunce akunum batakmanuluma ati, anggunce, ‘Se, yatanye birye, melibuka lyepsetu do? Yata mikip arye melipsutu do?’ tenen, yupu weik arye malye nyabuka ngalukmunce, morolulum talak ara, anggun taruk arye, isa urasin atonun kibuka, memebuka deipmunce, si erelulum ning aryuk lyelonamsinyake! Sik aisa nirya ara, ninye si mikip, like tonok yukubikca deice arye, aning nirya kum danamle. Tonda, kumanya mitik aryuk, aning bobuka bilirye, kum danamle. Bukni, yata nang do nirya, ‘Allah elcuk nun melibuka lyepropnamsil’ tenen, na amu tam yanuka duknubuka unamak nang ara, dipkoprob amutuku talibuka unamake. Tonda, narye arepsinyeba, anggun dam unamak nang ati arepyeba, anggun ‘Naʼ tenen mutuku kon, apia teleb lek sukum, Sion mutuku doprobikirye, asukumuk unamake.

Yesaya 58:5

Anggun teneipdelulume. Anggun din dina kumce si tebuka umunye talak nirya ara, anggunce, ‘Nun ti kekeplirye arepnamsil’ tenen, ululum bukni, anggun malyeuk winiluluma deice arye, anggunce anggun bidamnye atibuk imun kanye bolilalulume. Na tenepmase ning ara, ‘Teleb ning ara, tonok sum aryuk, na amu tamukirye, telebuk unamake. Yuk talak nirya ara talye urdemuk unamak,’ tenelamsise do? Aning pia kume. Kum yanuka doplirye maning loklamle touk, anggun kisok kanupdongobuka, kwelalulume. Tonda, malye baju kitibuka mutuku deice mapmunce, uku sice butbuta dobuka anggun kisok ap, nong deice ap delilalulume. Winilulum ning ara, ara ‘Din dina kumce si tebuka umunye talak ara, Allah arye telebe tenepnamsil’ tenen winilulum do? Anggunce, ‘Din dina kumce si tebuka una ara, dipkoprob ning ani,’ tenebuka winilulum do? Winimunye ning ara, nong bol deice ninguk winilulum bukni, anggun talima noutam ara malyeuk ulildalalume. Talye-talye uk winimunye ning ara, ‘Allah Yahweh eipsilirye, kanye deipnamsil’ tenen, winilulum do? Anggunda ‘Aning ara telebe,’ tenelulum bukni, nara aning atonun kum tenenune. Na Allah Yahweh arye, anggun winilulum ning ati, kanye kum delisunune.

Yesaya 61:2

Allah tenibukce wipdeipnuk ning ara, Allah Yahweh arye, ‘Aninye, sikti, lyen talak akunum dam ubuka ati nyalbinamlyame,’ nyapnuke. Ara, imun kanye bonmakirye, engebuka unyak ninye ati, ‘Talima kwa baribuka melinamsile,’ nyabuka laka nyanamlyame. Tonda, anggun mal olan nang ati, ‘Kwang dakanamsile,’ nyabuka laka nyanamlyame. ‘Nyabuka nyalbanamle’ tenen, Allah arye nati wipdeipnuke.

Yesaya 65:9

Yakub birye deibukba dadeipdanin yangalamik ninye nirya kum bukni, sik noutamak arye, Yehuda yala ninye yupa mitik anun aryuk lyepnirye teleb ulinamne. Yehuda yala ninye arye deibikcopura, dadeipdanin banamak ninye noutam arye, dopropnamne ninye ara, na talinye mutuku arepneba, talibuka unamake. Narye wipdeipnamne ninye arye, na si tuba-tuba erenamniyake, Winibuka erelamnikce ninye uk amutuku talibuka unamake.