Yesaya 49:4 - Eipomek

⁴ Nyapnuk bukni, narye tamubuka, elti, nyapse. “Na kanye ara, talye piluk donmanibuk, na mikip kum danilirye, mitang upnamnile. Pil ara weik donamne bukni, ‘Nong ara kum danamnil do?’ tenenune. Aning ara na kanye aryuk utenyamse bukni, na kele, Allah Yahweh arye el tenelye touk dipkoprob upnamnile. Tonda, na pil donya atonun, Allah arye dekna arenamnile.”

Yesaya 49:4 Referans Kwoze

Yesaya 35:4

Atonun, sik kanye bokoltoliba, teniltoce ninye ati, “Ilil una kumce, kanye talima moubuka unamlume,” nyabuka laka nyanamlulume. “Anggun ilil una meme. Anggun ni Allah, yu weik uplirye, ‘Na tenena ninye malye winililamlum ning ati, kwang daknamsine,’ tenen, yalirye, el mikip deice arye, nun mal olan nang nirya obuka sirya daklirye, nunti lyepnamsile,” nyabuka laka nyanamlulume.

Galatia 4:11

Se, narye anggunti ilil upmanil ning ara, ‘Yuk bisik kirikuka banmaka anya arye, na Galatia mutuku ninye ati peterebuka pil dolamse ning nirya ara, urdem ati pil dolamse do? Apil dolamsa ara, nong kum upnamle do?’ tenen, ilil upmanil ati, nyapsine.

2 Korintus 12:15

Aning ati ara, na aupmanil ning nirya kiklipdenyopura, anggun melina ati arepsitinya babye, telebuka. Aninguk kum bukni, anggun melina ati, pil weik dolamni bukni, na mikip nirya kum danutu ababye, ‘Aning telebuka’ tenen, kanye deiptinye. Narye anggunti weik tonun tonap talima melipnilyopura, anggunce nati bico tenelulum ning ara, mitik kipnin banmanil do?

2 Korintus 2:15

Tonda, nun ap, Kristus ap, talima dukdongobuka ubirye, el yupu peterebibya deice arye, Allah arye kanye delisulule. Allah arye tong teleb ning kekeplirye, kanye deililul touk, Kristus arye, nun dib tenenyap ninye dobuka el Li Koprop Allah ati ariliba, Allah arye nunti kanye delisulule. Bukni, Yesus el teleb yupu peterenyaba deice arye, daunyak ninye kekenyak bukni, sik kanye yuk-yuk tenenyake. Ton ninye ara, kam unamake. Ton ninye ara, dipnamake.

Matius 23:37

Ura, anggun Yerusalem mutuku ululum ninyeo, Allah yupu laka nyabuka peterenyak nang, narye nabi-nabi weike anggun dam dolkwetelamsise bukni, anggunce anabi sik nong deice keil dobuka ona ap, tonda, talye oltakana ap ulalume. Narye anggun Yerusalem mutuku ululum ninye ati, ‘Ayam el mapu irilamle atonunuk, na wiamse ninye kalikuka melinamsin’ tenen, patanululba, anggunti tuba tenesunun bukni, anggunce, ‘Anye Yesus ara, nun like’ tenen, tuba batakanululume.

Matius 17:17

Nyabukura, Yesus ayupu kekebukce, atikmek nang nirya ati lik ubukba, ayupu nyabuk. “Anggun atalak umunye ninye ara, dib kum tenelulum ninye anya arye, pia malye winilulume. Na lik ati, ‘Yata barye talak arye anggun dam tuba unamne do?’ Tonda, ‘Teleb unamak do?’ tenen, batakna kumce, yata barye talak arye pia dinamsin do? Ati, isa talyamuk mi ara, dobuka na dam boyalulume,” Yesus arye nyabuk.

Yehezkiel 3:19

Bukni, sik malye un ninye ati ara, anda moubuka kalikdanamlyame. Amalye unyak ninye ati, “Se, na kayapu, anggunce tuba malye ulamunye ani, Allah arye anggun malye umunya ati, wenebuka opnamsil,” nyabuka, sikti, melibuka peterepmince, wenepminyopura, teleb uka. Wenepminye bukni, sikce an yupu kum kekebikirye, batakikcopura, narye sikti, wenebuka opnamne. ‘Sik malye ning bataktingopura, kamuk uptinge,’ bukni, kumopura, dipnauk upnamake. Winibuka dipnamak bukni, an tonok ara, kam unalame. Ara, urdem ati kume. Narye nyapkinye touk, amalye unyak ninye ati, kalikmince, ‘Allah arye opsilyak’ tenen, akunum wenepminyopura, ayupu nyanamlama deice arye, lyepdanamlame. Ara, narye, ‘Winipnalame,’ nyalikinye yupu uk kekebuka, unamlama ati ara, kum dipnalame.

Yesaya 65:23

Sikce, pil donamak ning ayala-yala nirya ara, nong uk unamle. Sik amutuku ukirye delinamak mapu nirya ara, deiyok kum upmalibuk, talye karin arye mitik talak ton kum dibinamake. Tonda, yuk pera mutuku ninye arye, kum olyanganamake. Ara, na Allah Yahweh arye, sik ap, sikce deibikiba dadeipdanin banamak ninye ap ati, sik dam unirye, pia telebuk kilinamne.”

Yesaya 62:11

Na Allah Yahweh arye, “Im sirya, mutuku sirya, ara tukwak mutuku sirya, im sirya nirya, unyak nang nirya ara, ‘Ayupu kekepnamakʼ tenen, ayupu nyapdeipse. Anggun nirya ara, Sion mutuku unyak nang, ara Yudea tam nang nirya ati dilulume! Anggun lyena deiyoknye, Allah akunum yanmasile! Nara, menekuka yanamanba aminyan ara, na mapu koproba, min arye yuk pera mutuku bobinamik bukni, winida narye akunum lyepdopsi Israel nang, melibuka yanganmake! Sik Sion mutuku unyak nang nirya ati, ayupu lak nyapnamlume,” nyapsine.

Yesaya 40:10

Anggun nirya ara adilulume! Aning-aning deice tam ulirye, Weik Erena Deiyoknye Allah ara, elce, ‘Winipnamne,’ tenelye touk winilule anya arye, el mikip weik deice arye yanmale. El taruk koproba mikip deice arye, im sirya, mutuku sirya nirya unyak ninye ati, malye kibuka talinamle. El taruk mikip deice arye malye kibukce, talinamle ning ap, ninye ap ara, boyanmale. Tonda, el mining mapu, sik dengna ati arenamle ning babye, talibuka boyanmale. Aning-aning nirya menekuka yanganmal buk, el Allah ara aminyan yanganmale.

Ibrani 12:2

Nun diba tenenyap ning deiyok kouna ap, ansinibuka sirya dakna ap, deiyoknye Yesus ati, diba tenebuka talibibirye, pia tenenauk unamabe. Yesus ara, ‘Allah arye nati erepdeipnilirye, pia teleb ulinamnile’ tenenauk ulamuka anya arye, ‘Se, wanwanun yo deice ninye onyaka ara, alye una asa opnamaka ara, na like,’ kum tenebuke. Kum tenebukce, wanwanun yo deice obik talak ara, uk weik dinmokce, ikin weik unmoka babye, kum batakuke. Aminyan talak, kam bukuka im deice biyukce, Allah el weik Ninye Deiyoknye bunak, sirik taruk tam bulbiyuk. Yesus arye, ‘Allah el taruk sirik tam bulbinamna ara, pia telebe,’ tenyamukce, aninguk tenebuka deice arye, kanye deibukce, ‘Wanwanun yo deice opnamniyaka ara, na like anya arye, bataknamne’ tenen, pia kum tenelamuk.

Roma 10:21

Bukni, nabi Yesaya birye Israel yala ninye ati, ayupu sekeibuk. “Na Allah arye anggun Israel ninye ati nyapsine. ‘Aninye ara na mapu unyakba, narye melipnamne’ tenelamsirye, ‘Na dam yanamak’ tenen, na taruk anggun dam yangalisunun bukni, anggunda ilil pia kum kanye weik ninye umunce, na yupu kekena kumce, nati yaniltanauk unululume.” Allah arye nyabuk. (Yesaya 65:2) Aning ati, na Paulus birye nyapsine. Israel ninye arye, Allah el yupu kekenyak bukni, tuba-tuba ilil pia kum kanye ubikirye, yaniltanauk unyake.

Yohanes 1:11

Kanye pum tam Dirina Arina Deiyoknye birye, ‘Aninye ara, na tenen, ninye yala unamak’ tenyamuk ninye kan-kan, Israel ninye sik dam yanuka ulamuk bukni, aninye arye elti, kanye deibuka dib tenebuka kum dololamik. El ti, ‘Nun lik’ tenen, bataklamik.

Lukas 24:26

Ninye weik lyeplirye, sik kanye talima talinamlanye, Kristus ara, elti, Allah arye utenebuk. Ara, ‘Sik malye nang arye el nong deice ikin ning weik deibiki bukni, donmalya ani, diplirye, kam bukuka pia teleb dirinak im deice welepnamle,’ tenyamuk ning ara, kum tenepmalumce nyapmanurum do?” nyabuk.

Yesaya 65:2

Bukni, ‘Na tenena ninye unamak’ tenen, wiamse ninye, sik Israel ninye ati, ‘Narye sikti, melinamsine’ tenen, na taruk yangalilamseba, sikda talima kat ninye anya arye, na yupu kum kekepmanto ulamnike. Sikda, mandipna kanye bobuka malye-malyeuk unyakce, sikce ‘Wininamabe,’ tenenyak ninguk wininyaka anya arye, malye weik unyake.

Imamat 26:20

Winipnyopura, anggun mikip aryuk, pil domunce, wa wibuka koulenamlum bukni, anggun pil talyeuk donamlume. Ati ara, anggunce wa wibuka kounamlum tuku noutam nirya ara, teleb kibuka, nong ton pia kum unamsile. Aning atonun ton, yo duk moulamle yo yala yuk-yuk ning nirya babye, papnamle bukni, duk ton pia kum mounamle. Yo duk yuk-yuk ning nirya, kum libuka dinamlume.

Pilipi 2:16

Ayupu nirya nyapmasin touk, Allah el kam una deiyok yupu talibuka, dipkoprop moubuka kekemunce, telebuk utumopura, ‘Na talyeuk pil kum dolamse, nong lakak upnamle’ tenen, aminyan ara, na weik kanye deipnamsine. Ara, Kristus arye, ninye mutuku-mutuku nirya ati, yupu bokeiplirye, wenebuka opnamle talak ara, na weik kanye deipnamsine ati, nyapsine.

Amsal 29:26

Tonda, ninye nirya pia weik arye, ‘Aninye deiyok nang arye ton melipsitinge’ tenen, tukwak mutuku talibuka ninye deiyok nang, pemerintah nang sik urasin ati pataliba enyake. Anang sik damuk morolbanyake. Bukni, dipkoprop, ‘Pia telebuk unamne’ tenen, pataliba ululnye bira, ‘Na ni koprop Allah Yahweh, elcuk melinamnile’ tenen, Allah el damuk ulirye, el tibuk pia moronamle. Allah aryuk anye biti, teleb ulinamle. Teleb ubuka una deiyok ning ara Allah Yahweh elcuk aresulule.

Yesaya 25:1

Se, na ni koproba Allah Yahweh, narye antibuk, an si erepkinirye, anti si erekunune. Tonda, antibuk, ‘Telebe,’ nyabuka, an siuk erekunune. Deiyok ara, Allah ance min talak arye, ‘Apil dopnamle,’ tenyamlum touk, aninguk ninye winipman kum pil, ance akunum dolyame. Allah ance, ‘Aning ara, winipnamne. Aning ton winipnamne,’ tenyamlum touk, dipkoprob winilyame. Ance pil dolyam ning ara, pia ilil weik ning pil dolyama anya arye, aning nirya ara, pia ati unamle. Tonok babye, min kum kum datue. Aning ebuka kel bikisirye, pia weik tonun si erenamkine.

Yesaya 40:27

Ati ara, anggun Israel yala ninye ara, yata deiyok ati imun kanye upsiliba teniltolulum do? Anggun apu koproba Yakub birye deibukba, dadeipdanin, yangalamlum ninye ara, yata deiyok ati, anggun talima pum tam arye teniltona uk usilirye, ‘Se, nun yata wiripnamap do? Nun ikin usilye ning ara, nun ni koproba Allah arye kum disulul do?’ nyabuka, malye nyabuka engelulum do? Tonda, anggunce, ‘Se, nun imun usilye ning nirya ara Allah el si Yahweh arye bita kel kum bikisulul do? Nun patapsil ning ara, Allah kum eipsilirye bita kel kum bikisulul do?’ neika bukuka malye yupu nyanululum ning ara, yata deiyok ati do? moubuka kum tenelulumce, amalye yupu nyanululum do?

Yesaya 57:21

Ati, sik malye un ninguk talibuka unyak nang ara, teleb kanye bobuka, tunim abuka kum unamake. Sikda imun kanye bobikirye, ikin asa pia unamake.” Allah arye, sik Israel yala nang ati, nyabuk.

Yesaya 59:18

Allah elce, ‘Sik mal olan nang arye, malye wininyak ning ara, sik amalye wininyaka atonun, tamubuka kwang daknamne,’ teneplirye, sik dam yanuka kwang daklirye, dekna arepnamle. Ati, yata nang do nirya, sikce, ‘Allah ara, nun likeʼ tenen, el ulye ning batakanyak nang ati, yu weik deice arye, anang wenebuka opnamale. Tonda aning atouk, anggun weik laut mekwen deibukak, lilundam unyak pera mutuku nang ati ara, sik nirya arye, malye winilamik ning ati, elce wenebuka opnamlarya.

Yesaya 61:10

Nabi Yesaya birye nyabuk. Aminyan talak ara, Yerusalem mutuku unyak ninye arye nyanamake. ‘Nunda Allah Yahweh atibuk weik tonun kanye delinyabe,’ nyanamake. Tonda, ‘Nun ni Allah ati, nun kanye teleb usiliba, pin-pin kanye bonyabe,’ nyanamake. Ninye arye teleb cang baju ongolamak touk, Allah arye diksukum una deiyok ning weik tonun arisiliba, telebuk unamabe. Tonda, baju ongolamak touk, Allah arye ninye lyen ning arenamsile. Arenamsila ati, winipmanto ning ara, sal arye kil dopnulye talak ara, el kisok deice kweirya teleb ning kibuka yangalamle touk, Allah arye Israel ninye ati, pia teleb ulinamsile. Atonun, sal dopnun tenebice kilapu arye, dekna weik ning, emas ap, perak ap, dekna weik keil ap, sik nong deice karaklamak touk, Allah arye Israel ninye ati pia teleb ulinamsile.

1 Raja-Raja 19:10

Asibukba, Elia birye tamubuka Allah ati nyabuk. “Na ni Allah an si Yahweh ulyame. Anda mikip weiknye umince, aning-aning nirya deice tam ulyame. Nara, asum-asum nirya an nyapdeamlum yupu uk talibuka unirye, pia pi dobuka an pil ati mikip aryuk donune. Bukni, an mapu Israel ninye ara, ance, ‘Aning wininamlume, winipmunyopura, narye kalikuka melinamsine,’ nyapdeipsulum yupu akunum yaniplobikce, malye winin ninguk wininyake. Tonda, sikce an si erena ati, kam ning obuka, telebe nyabuka, arelyangalamkikce, pala keil lelebuka yangapdeiamik ning ara, akunum daklomike. Tonda an yupu nyapdeipminba lak nyanyak nang, nabi-nabi nang nirya ara, yayikce bobuka akunum obuka sirya dakik. Winipnin yangalamika ani, wini talak ara na tonok unune. Bukni, sikce natibuk ‘Opnamap’ tenen, kalikininyake,” nyabuk.