Yesaya 49:1 - Eipomek

¹ Allah arye, ninye lyena ati, el melin pil donamuknye wipdeibukba, anye birye nyabuk. “Se, anggun pera mutuku dana-dana ululum ninye ap, laut mekwen noutam sekdongamuk mutuku kon ululum ninye ap, nirya arye, na yupu uk, moubuka kekeplulume. Ara, sik min kum deiamnirik talak arye, akunum Allah Yahweh arye, wipdeipnukce nyapnuke. Tonda, na nin mun pum tam, tuba bomnuk talak arye, akunum wipdeiamnukce, na si sisibuka yukupnuke.

Yesaya 49:1 Referans Kwoze

Yeremia 1:5

‘Yeremia, an nin mun pum tam, min kum kintinip deiamkise talak ap, tonda, an nin birye kum deiamkuk talak arye, na Allah arye anti, ‘Doryanamle talak ara, narye wininamne ning, anye Yeremia biti, laka nyaipneba, daunamak ninye ayala-yala nirya ati, na yupu laka nyananye, nabi unamle’ tenen, akunum kintinipkisirye anti wipdeiamkise,’ nyabukce, Allah arye na Yeremia biti nyapnuke,” nyabuk.

Galatia 1:15

Winibuka daulamse bukni, atalak noutamak ara aning kum tenelamsibuk, Allah ara na nin deipnuk talak arye, ‘Anye bira na ning,’ tenyamnukce, wipdeipnuke. Winipnuka anya arye, elce bico tenyamnukce, el kanye aniryuk yukupnukce, lyepnuke. Tonda, Allah arye nati, ‘Anye bira, na yupu dobuka, Yahudi yala kum ninye ati peterelbinamle’ tenen, el mi kopropa Yesus pil dopnuka deice arye, winiryuk kanye talima arepnuke. Winipnuk ati, el mi kopropa Yesus arye winilul ning ara, laka nyalamnukce, na talima noutamak arye pil dolamnukba, na winilamse ning deice arye laka kipdeipnuk. Winipnukopura, narye, ‘Se, yatato pil donamne do? Tonda, yatato yupu peterenamne do?’ tenen, yuk nang dam binuka kum asilamse.

Yesaya 44:2

Ara, nara Allah, na si Yahweh arye an nin min kum deiamkuk talak arye, mun pum tam tuba ulamlumbuk, kintinp deiamkisirye wiamkise. Winyamkisa ati, tuba melikunune. Ati, ance nati ilil una kume. Israel anda, ‘Na amu tam ulirye, na pil donanye unamle’ tenen, akunum wibuka kintinip deiamkise.

Yesaya 49:5

Allah Yahweh arye, na min kum deiamnirik talak arye, ‘Na pil donamle’ tenen, wepdeiamnuke. Ara, Allah kanye deiamnukce, ‘Na pil melilamnuknye birye, na mapu Israel ninye nirya bulupdeipliba, sik nirya tamubuka na damuk yanamak’ tenen wiamnuke. Allah Yahweh arye, ‘Na pil melinamnilnye, ninye arye el si erenamak’ tenen, weik si sisibuka wepdeiamnuke. Na mambul pil donuna ara, Allah el mikip deice aryuk meliniliba apil donune. Ati, elda na melibuka mikip kilina deiyoknye unulule.

Lukas 1:31

Allah melipkilya deice arye sal mi bominya ani, aminyan talak ami deipminyopura, el si ara, Yesus nyapnamlyame.

1 Peterus 1:20

Allah arye, aning-aning nirya min kum kwepdeiamuk talak ara, ‘Yesus arye ninye lyepnamle’ tenen, akunum wibuka deibuk bukni, winira sirya talak ara, anggun lyena ati akunum lakak arepsukbuk, kel kibape.

Lukas 1:15

Deiyok ara ami neplyopura, mambul pil dolamlye ati, Allah arye anye biti kanye pia delinamle. Ami neplyopura, anggur mek kanye wangalamak mek ap, yuk talye kanye wangalamak mek ap, pia kum dinamle. Tonda, el winiryuk deiplye talak anirye, do unamle talak nirya ara, Allah El Dib Kanye ami el talima wekuka, langdiplirye, pia puto weik areplyopura Allah El Dib Kanye arye anye pia talinamle.

Ibrani 12:25

Na kayapo, anggun kan-kan bukni, ton ninye arye, wini talak mambul yupu nyasilinye ati, ‘Nun like’ tenen, el ap, el nyasilye yupu ap, ati batakuka, ‘Kum kekebicak’ tenen, moubuka kalekelanamlulume. Ura, teneipdelulume. Minop talak ara, sik deiyoknye, talye tukwaknye birye, “Winina meme. Anggun kanye mouplulume,” nyalamukba, sik kum kekelamik ninye ara, kum lyepdanmanto ulamikba, Allah arye sik kum kekelamik ninye wenebuka oltakalamuk. Wini talak ara, im deice ululnye birye, nun nirya ati, “Winina meme. Anggun kanye mouplulume,” nyabuka wenesulula anya arye, sik minop talak ulamik ninye kum lyepdanmanto ulamika ati, wini talak arye mambul yupu nyasilinye batakipyopura, nun yata wiriptibya deice arye, lyepdatibye do? Kume, aning ara, kum winipmanto. Wini talak im deice arye nyasilinye batakipyopura, dipkoprop Allah arye aninye wenebuka oplopnamle. Aning ara, kum namin kipnamle.

Yohanes 10:36

Anang ati, “Na mapu,” nyabuka anya arye, Allah arye, ‘Na kanye delinunye’ tenen, kanye deibukce, wipdeiamuknye, tukwak mutuku dopdeipnuknye ati ara, “Allah el Mi Koprop,” kum nyapdatinye do? Ati narye, “Allah el Mi Koprop unune,” nyapmanu deice arye, anggunce, “Allah el si yanipmalame,” nyanmanuluma ara, yata deiyok ati do?

Zefanya 2:11

Ati ara, na Allah Yahweh arye, sik Pilistin mutuku unyak nang ati, yu arye wenepnyopura, sikda ilil pia weik unamle. Tukwak mutuku, im sirya, mutuku sirya nirya, noutam unyak nang arye, talye isa ati, ‘Nun ni koproba,’ nyabuka, si erenyak talye ning ap, isa-isa nirya ara, na Allah arye obuka, sirya daknirye, malye kiplopnamne. Winipnyopura, tukwak mutuku sirya, im sirya nirya, weik laut kup-kup unyak nang ap, laut mekwen noutam arye, antanap dongobuk mitik mutuku, pulau-pulau deice unyak nang nirya ara, Allah Yahweh dam ngangkanudongobikirye, kutam tuku dipdongobuka, na Allah ati, si erenamniake. Ara, sik nirya, mutuku yuk-yuk daunyak touk, sik talibuka unyak mutuku noutam aryuk, na Allah siuk, erenamniake.

Yesaya 60:9

Kume, ara mekwen deice balamle weik mek liya yo, Tarsis mutuku ninye arye talibuka balamak mek liya yo, narye nyapsiba akunum kintinibuka deiamika ati, Israel ninye sik mapu libuka boyanganamake. Ara, pia pera mutuku, mekwen dana-dana tam sekdongamuk mutuku noutam, unyak Israel ninye ara, Tarsis mutuku talinyak mek liya yo wekikirye, Israel mutuku tamubuka boyanganmaka ara, anggun nirya dilulume. Tonda, dekna weik ning emas ap, perak ap dobuka, boyanganmaka ara anggun nirya dipdelulume. Wininmaka deiyok ara, ani. Ara, anggun si erelulum Allah, anggun ni koproba Allah el si Yahweh ati arenamake. Tonda Israel ninye pia kalikuka melilulnye, Pia Teleb Una deiyoknye, na Allah Yahweh, na si erena ati, boyanganmaka ara anggun dipdelulume. Wininamaka deiyok ara, ani. Ara, na Allah arye, anggun Israel ninye ati, pia teleb kipdeipsiniba, eibikirye, ‘Se, aning ara mambul weike’ tenen, sik si erebuka arelbana ati, aning boyakirye, nati arenamniake.

Yesaya 57:19

Narye Israel nang nirya, asukum unyak nang babye, pia otam mutuku noutam unyak nang babye nirya ara, narye tuba tonap teleb kipdeipyeba, tenina kum aryuk, talye tunim abuka, pia teleb unamake. Nara, Allah Yahweh arye ayupu nyapmasina ati, aning nirya ara dipkoprob nong upnamle,’ nyapsine. Na mapu koprop nirya ara, narye kwetepnirye, pia teleb kipdeipnamsine.

Yesaya 55:3

Se, na Allah arye wipdeiamse ninye nirya anggunda, na dam anyuk yamunce, na yupu moubuka kekenamlulume. Na dam yamunce, kekepnumunyopura, narye anggunti dipkoprob pia kam un ning arepsiniba, anggun dib kanye ara pia kam unamlume. Anggun apu koproba Raja Daud biti, ‘Bico tenepkinirye, pia melinamkine,’ nyapdeiamse ning ara, anggun Israel ninye ati bico unilya ati, batakna kumce, pia dipkoprob aninguk wininamsine. Awininamsin ning ara, min kum, kum danmanto ning pia aunamle. Kum bataknamsine.

Yesaya 46:3

Ati, Yakub birye deibukba, dadeidanen balulum ninye, Israel ninye ara, anggun tuba kam aunmalum ninye ara, “Na yupu uk moubuka kekepnululume. Anggunda na mapu koprop ati nyapsine. Ara, anggun apu yapu arye anggun min kum deiamsik talak arye, narye meliamsa ati nyapsine. Anggun deipsik talak arye dipdongobuka, wini talak nirya ara, narye tuba kalikuka melisinirye, talisunune.

Yesaya 44:24

Ura, na Allah Yahweh arye, anggun nin yapu min kum deiamsik talak arye, mun pum tam tuba ulamlum talak, kintinip deibuka wiamsise. Winyamsisa ati, tuba melisunune. Nara, anggun Lyena Deiyoknye usunune. Na Allah Yahweh arye aning-aning nirya kwepdeiamse. Winilamsirye, naryuk im deice ulul ning nirya kwepdeibuka lilipdeiamse. Aning atonun, naryuk tukwak mutuku noutam ulul ning nirya babye, kwepdeibuka lilipdeiamse. Yuk nang arye ton kum meliamnike. Na aryuk apil dolamse.

Efesus 2:17

Kristus yayukce, Allah el laka teleb yupu, ninye lyen yupu peterelamsuke. Ninye yala nirya ap, Allah ap, kanye dukdongobuka neiktoto teleb una ati, el yupu peterelamsukba, anggun pia bai tam ulalumce, Allah damak ara, pia pera atonun ninye ulalumbuk, anggun babye, kekelamlume. Aning atonun, nun Yahudi yala ninye Allah dam ara, miningdam ton unyap ninye babye, ayupu ton kekelamubu.

Yesaya 51:5

Narye anggunda, ‘Naʼ tenen, nang ati, anggun mal olan nang dam, narye lobuka lyepdopnamsina ati, kintinip deiamse ning ara, akunum dam uple. Minop yanamle! Tonda, narye ninye mutuku sirya, im sirya nirya ati, malye kipnamne ning ara, akunum yanmanto upmala. Dam akunum uple. Ati ara, sik weik laut mekwen lilundam unyak nang ara, ‘Se, Allah arye, dan talak yanuka melibuka lepnamsil do?’ tenen, kalikuka dinauk uninyake. Sikda, ‘Se, Allah el mikip weiknye biryuk, el taruk mikip arye pil doplirye, lyepnamsilʼ tenen, kalikuka dinauk unamake.

Yesaya 45:22

“Anggun tukwak mutuku, mutuku-mutuku nirya ululum ninye, anggun malye ululum ning nirya batakuka, na dam anyuk yanganamnulume. Winipmunyopura, narye anggunti lyelonamsine. Winipnamlum nyapmasina ara, urdem ati kume. Deiyok ara, na ununa atonunye bira, yuk Allah ton, kum ulule.

Yesaya 42:12

Tonda, weik laut mekwen kup-kup ululum ninye, anggun nirya arye, ‘Nun ni Allah elda pia telebe. Elda dirin ap, si Weik Erenanye ap ulule,’ nyabuka, mot senamnululume. Ninye mutuku-mutuku nirya arye, na Allah ati, ‘Telebe,’ nyabuka, mot nyabikirye, si erebuka, na si erenamniyake.

Yesaya 41:1

Allah arye nyabuk. Na nyasinye yupu kekebukapmunce, pia darabuka unamlume. Se, anggun dana-dana tam, laut mekwen arye sekdongobuk mutuku umunye ninye nirya, tonda anggun yuk-yuk mutuku winimunye, ninye ayala-ayala nirya ara, mikip kum ulamlum bukni, narye anggun mikip, ila tuba tonap arepnamsine. Ati, anggun nirya ara yamunyeba, na ap yupu talipnamabe. Yupu awapsilyopura, anggunce nyapnamnulume. Yupu lipsisikuka bokolina deice, bulubukapbibirye, yupu talipnamabe. ‘Weik mambul pil dolulnye bira, yatanye do?’ nyabuka, yupu talinamabe.

Yesaya 9:6

Aning nirya ara, talye ati kum nyanyabe. Aminyan talak, pia telebuk wininamsil ning deiyok ara ani. Ara, Allah arye tenelamsuk touk, wini talak ara, nun lyena ati, sal mi tonok akunum deipmasirake. Allah arye weik mambul mi akunum kintinibuka arepmasile. Nun lyena ati, ami akunum arepmasil mi elda, aminyan talak aning-aning nirya talibuka, nun ninye deiyoknye unamsile. Winibuka daulamepya ani, ninye nirya arye, el si erebikirye, el si ati nyanamak ning ara, ani. Pia Mambulnye ulule. Ninye melina ati, Kanye Talima Kwadina Deiyoknye ulule. Pia Mikip Weiknye Allah ulule. Nun Ni Allah, Pia Kam Unamlanye ulule. Allah ap ninye ap, neika teleb una ati, Ansinilina Deiyoknye ulule. Aning-aning nirya, ninye arye el si tenibuka nyana ati, ayupu nyanamake.

Yesaya 66:19

Na Allah arye abulubuka deipnamne nang ara, unamak noutam ara, ‘Na mikip kel biknamakʼ tenen ati, ton lak kilin ning kintinibuka deipnamsine. Winipniba, anggun anang kan-kan arye, ton nang kum oplopniba, tuba kam unamak nang ara, wibuka deipnyopura, sik anang nirya arye, na yupu ap, na unye ning ap ati, bobikirye, aning nirya min kum kekelamik nang dam binuka, lak nyalbinamake. Dopdeipniba, lak nyalbikcopura, na pia teleb unye ning ap, mikip weik arye pil dolamse ning ap, na weik eren unun ning ap nirya ara, sikce eibikirye, kekebuka kel biknamake. Ara, narye dopdeipnamne nang arye, sik dana-dana tam unyak nang dam binuka, na pia teleb unye ning nirya lak nyalbinamake. Sik nyalbinamakak ara, ani. Ara, Tarsis mutuku ap, Pul mutuku ap, Lud mutuku ap, Mesek mutuku ap, Rosh mutuku ap, Tubal mutuku ap, Yawan mutuku ap, Spanyol mutuku ap, Yunani mutuku ap, binuka lak nyalbinamake. Amutuku-amutuku nirya unyak nang dam lak nyabikiba, na pia teleb unye ning ap, na mikip weik unilye ning ap ara, kekebikirye, moubuka kel biknamake.

Yesaya 7:14

Ati, wini talak ara, Allah elcuk apeten kina ning ara, anggun dam pitin kipnamsile. Aning ara ani. Dipkoprop ninye dona kum wel kil tonok arye, mi bomlya ani, sal mi deipnamle. Akunum deiplyopura, ami el si ara, Imanuel nyanamake.

Mazmur 22:10

Na nin mun pum bomnuk talak arye, dipdongobuka melilamnulume. Ati na deipnukba, nepse talak babye, na winin ning nirya, an deice aryuk winilamsa ani, wini babye wininamne ati, anda na deiyoknye Allah ulyame. Narye an siuk, pia erenamkine.

Yesaya 11:11

Aning nirya lakak upnamle talak ara, Allah ara, aning-aning nirya talibuka, mikip weik ululnye birye, el taruk bibiklirye, tupa ton ap bitinye talak deice, Israel yala nang taliplirye, el mapu koproba lyeplirye, sik dana-dana tam unamakak arye, sik mutuku tamubuka bobanamle. Ara, Asyur mutuku ap, Mesir mutuku ap, Patros mutuku noutam ap, Sudan mutuku ap, Elam mutuku ap, Babel mutuku ap, Hamat mutuku ap, tonda weik laut mekwen lilun ap, daunyak mutuku, pia lowak ap, tuba ton aunamak Israel nang ara, tamubuka, sik mutuku koproba, noutam bobanamle.

Yesaya 24:15

Aning ati ara, anggun keting palanyangan tam ululum nang nirya babye, Allah Yahweh ati, si erelulumce, ‘Naio, anda pia telebe nyabuka, el siuk erenamlulume. Aning atonun, weik laut mekwen lilun tam ululum nang babye, Israel nang kalikuka melilul nye, anggun ni Allah el si Yahweh atibuk, ‘Anda pia telebe, pia mikip weik mambul pil dolyame,’ nyabuka, el siuk erenamlulume.

Yesaya 33:13

Allah arye nyabuk. Anggun pia yukak ululum ninye babye, anggun dam ululum ninye babye, na Allah arye winipnamne ning ara, nyapnusine. Ati ara, ayupu moubuka kekepmunce, ‘Se, Allah ara, dipkoprob pia mambul mikip weiknye ulule,’ nyabuka na si erenamnulume.

Yesaya 45:3

Na Allah arye, dekna weik ning, yuk duknubuka deiamik ning nirya ara, anti lak kipdeipkiniba, dolonamlame. Winipkiniba, ance, ‘Na mikip kel biknimince, dipkoprob Allah Yahweh ara, Israel ninye talibuka ulule’ tenen, kel biknamlame. Aning kel kipmince, ‘Allah arye na sisibuka, wipdeipnuk,’ tenen, kel biknamlame.” Allah arye Raja Kores biti nyabuk.

Yesaya 49:12

Winipnyopura, na mapu ara pera mutuku arye, Yerusalem mutuku uk tamubuka yanganamake. Ara, outam arye yanganamake. Tonda, keting kulamle tam arye yanganamake. Tonda eitam arye, mutuku si Sinim mutuku arye Yerusalem mutuku tamubuka yanganamake.

Yesaya 52:13

Allah Yahweh arye, nyapsine. Dipkoprop, na pil donamlanye birye, pia weik kel bikna deice arye, mambul pil dopliba, nong upnamle. Nong uplyopura, ninye weik tonun eibikirye, elti, si erelinamake. Narye, ‘Elda, aning-aning nirya deice tam ulirye, ninye deiyoknye pia unamle’ tenen, elti, si erepdeipniba weiknye kipdeipnamne.