Winimunce, na Allah si deice arye, “Dipkoprob uk unamabe,” nyapmunce, Nun ni koproba Allah, pia kam ulye touk, elce nyapsilye yupu nirya babye, pia dipkoprob uk ulule. Ati nun babye teleb diksukum una ap, tonda tilila yupu nyana ap, kum nyanamabe,” nyabuka, antonun winipmunyopura, yuk mutuku nirya unyak nang arye, anggunti eibuka biksikceura, sikce nati, “Naio, nun ton melipsilyame,” nyabuka moropnamake. Winibuka morobikceura, na Allah arye sik ayuk mutuku nang ati, melibuka teleb kipdeipnamne. Winipnyeba, sikce nati, na si pia erenamniyake. Allah arye nyabuk.
Yesaya 48:1 - Eipomek1 Allah arye nyabuk. Anggunda, anggun apu koproba, Yakub birye deiamsukba, dadeipdanin yangalulumce, ululum ninyeo, anggunda moubuka kekepnamlulume. Yakub birye deiamuk nang ati, narye, ‘Sik si ara, Israel yala nang nyapsina anya arye, ninye arye nyanamsiyake. Tonda, minop talak ara, anggun pununanye Yudah birye deiamukba, dadeipdanin yangalamlum nang ululume. Anggunce, nyalin yupu nyaplum talak ara, ‘Nun ni Allah Yahweh, el si deice arye nyapsiyabe,’ nyanamlume. Tonda, ikin upsiliba, ‘Nun ni Allah arye melipnamsilʼ tenen, anggun Israel nang arye, na si erenululume. Aning nirya winibuka nyalulum bukni, dipkoprob ning ara, anggun kanye deice arye, diba tenebuka kum nyalulume. Talye yupu atonun nyabuka, si bambol deice aryuk, nyaltakalulume. Dipkoprop diksukum ubuka, teleb deice arye, kum nyaltaklulume. Gade chapit la |
Yesaya 48:1
48 Referans Kwoze
Allah an ap yanganmak nang ara, ani. Minop menekuka yanamak nang ara, sik Allah yupu mot nyana kel nang yanamake. Sirya ara, mot nyana ati, kitar atonun ning, el si ara kecapi dobuka, aik dam outam kecapi deice arye, mot nyan nang ton yanmake. Anang dam bukni, ayanganmak nang noutam ara, kilapu ton, ninye kum domikce, urdem ulamik kilapu arye, lelim nyalamle ning, el si ara, rebana bobuka, sik taruk arye, opnin yanganmake.
Ura na bikse. Sik Yerusalem mutuku unyak nang arye, nyanyake. “Kume, pia dipkoprob nyababe. Nun ni Allah Yahweh, dipkoprob tuba kam ulul touk, nunce dipkoprob nyababe. Elce nyasilye yupu, moubuka talibibirye, diksukumuk wininamabe,” nyabuka, talye si bambol deice arye nyanyak bukni, sikce talye yupu aryuk nyanyake. Na kele, sikce nyace touk, pia kum wininyaka ati, tilila yupu uk nyanyake. Allah Yahweh arye, na biti, nabi Yeremia biti nyapnuk.
Aning nirya akunum winipnyopura, amutuku noutam unamak ninye ara, ‘Yatanye birye melipsutuba, nun un ning nirya teleb kipdeipsutu do?’ teninamak talak nirya ara, na Allah pia diksukum yupu nyanunye biti moronamniyake. Narye, ‘Wininamne’ nyanun touk, batakna kumce aninguk wininunye biti moronamniyake. Aning atonun, amutuku unamak ninye arye, yuk nang ati, ‘Wininamsiyabe,’ nyabuka nyalin yupu nyanamak talak nirya ara, na Allah pia diksukum yupu nyanunye, na si deice arye nyalin yupu nyanamake. Wininamaka deiyok ara, minop talak malye ululum ning nirya ara, akunum kum kipdeipsinirye, tuba tonap pia kum teninamne. Aning nirya kum kipreipnirye, bataknamne.” Allah arye Israel ninye ati nyabuk.
Amutuku unamlum talak nirya ara, anggunce anggun ni koproba Allah, el si Yahweh ati, ‘Se, elda pia mambule, el siuk erenamabe,’ tenenamlulume. Allah ati el si erebuka, el amu tamuk namin asa arye unamlulume. Tonda, anggunce, ‘Wininamne,’ nyabuka, nyalin yupu deice nyanamlum talak ara, Allah el siuk erebuka, ‘Dipkoprop wininamne,’ nyabuka, nyalin yupu nyanamlume. Yuknye si ton, kum nyanamlume.
Nyabukura, malaikat arye, Yakub biti nyabuk. “Wini talak ara, winiryuk si arepnukine. Wini talak arye dipdongobuka, doryanamle talak ara, an si ati ‘Israel,’ nyanamkiake. Deiyok ara, ance Allah ap, yuk ning ap ati, pia pi dobuka piripdenmalamce, an mikip arye akunum malye kibuka bisipmalama ati, an winiryuk si ara, ‘Israel’ arepmakina ati ara, dorunamle talak ara, asiuk nyanamkiake,” malaikat arye, Yakub biti nyabuk.
Sik yuk nang arye, “Nunda, dipkoprop Yahudi yala ninye, Allah el mapu kopropa unyabe,” nyabuka, talye nyaltakalamak bukni, dipkoprop ara, anang ara, Isa Mutuku Dongonye arye talilulba, el siuk erenyake. Aninye ara, tilila yupu nyana ninyeuk unyaka anya arye, na mikip deice nyapniba, amalye nang arye, sik yan dam gutam tuku dipdongobuka bunamake. Winibicopura, anggun Piladelpia mutuku diba tenelulum ninye ati, “Kume, anggun Piladelpia nang ati ara, dipkoprop Allah weik arye bico tenebuka melisulule,” nyabuka lakak nyapnamake.
Anggun imun kanye dobuka umunye ning ap, ikin usilye ning ap, aning-aning nirya kum dasukba, talye bona utotoa kum ninye umunye ning ap ara, na kel bikamsise. Aning-aning nirya kum talilulum bukni, na kanye ara, anggunda bona uto-uto talin ninye atonun ululume. Sik yuk nang arye, “Nunda, dipkoprop Yahudi yala ninye, Allah el mapu unyabe,” nyabuka talye nyaltakalamak ninye arye, anggun Semirna mutuku diba tenena nang ati, malye yupu weika arye nyasinyak deice arye lululisinyaka ara, na kele. Aning ara, Isa Mutuku Dongonye arye talilulba, el siuk erenyake. Na mapu kum unyake.
Atilila yupu peteren ning ara, pia malye yupu, nyanyak nang peterenyaka deice arye yangasulule. Anang ara, ‘Tilila yupu nyanyaba,’ akunum tenenyak bukni, ‘Aning dauplye, tilila yupu auplibuk, talye kanye bobuka peterenamabe,’ tenenyake. Anang sik kanye tenen ning ara, yan diplamsil atonun ulule. Minop talak, teleb ubuka tenelamik bukni, malye weik winilamik deice arye, wini talak ara, merekuka kum kel biktingce, moubuka kum kel bikinyake. Ati wini talak ara, sik kanye tenena deice arye, ‘Malye ning ani, teleb ning ani’ tenen, moubuka kum biknamake.
Ura, Allah arye ayupu nyabuka deice arye, kel kinyabe. Talye dopdarikce, deiprik mi ara, ami arye deibukba dadeipdanin yangalamik mapu nirya ati, “Allah el mapu kopropa atonun unyake,” kum nyaptibye. Aning kum bukni, Allah arye Abraham ati, “An mi deipnamlame,” nyabuka, nyalilamuk yupu ap, ninye winipmanto kum pil dobuka deice, Sara birye deibuk mi Isak arye, deibukba dadeipdanin, yangalamik ninye ara, “Abraham el mapu kopropa unyake,” nyaptibye. Ati, ‘Ninye tukwak ninye sik bidamang aryuk dopdakirye, sikcuk delinyak mapu ara, Allah el mapu kopropa kum unyake. Bukni, Allah el nyalilamle yupu deice arye, el mapu kopropa kilisulule’ tenen, kel kinyabe.
Bukni, minop talak Allah arye, “Na mapu kopropa, Israel ninye ara, weik ubribanamake,” nyabuk yupu ara, dipkoprop kum suktalipmale. Allah el mapu ara weika arye ton tuba unyake. Bukni, Israel yala ninye arye delilamak mapu nirya ara, nong bol deice ati, Israel ninye unyak bukni, sik kanye talima pum tam ara, Allah el mapu kopropa kum unyake.
Wini talak ara, yuk yupu ton nyapnusine. Anggunce yuk nang ati peterelulum nang ara, anggun bidamang arye anggun bidamang ati, kum peterelalulum do? Ton nang ara, nyalalulume. “Kume, nunda Yahudi yala nang unyabe,” nyabuka ululume. “Nunda Musa sekeiyamsuk yupu talibuka unyaba anya arye, ayupu teleb kibuka talinyaba deice, Allah arye lyepnamsile. Nunda, Allah ap teleb ubuka neika unyaba anya arye, Allah el kanye delisulule,” nyabuka, anggun bidamang kanye erepdamunce kwalilalulume.
Yesus arye ayupu nyabukopura, dukdongobuka ayupu tonap, nyabuk. “Farisi nang ap, Musa sekamuk yupu peterena deiyok nang ap ati, Allah arye wenebuka opnamsila ati, anggun bico,” nyabuk. Nyabukce, ayupu ton dukdongobuka nyabuk. Se, anggun Farisi nang ap, Musa sekamuk yupu peterena deiyok nang ap, Allah arye wenebuka opnamsila ati, anggun bico. Anggun talimak malye ning aupmasilibuk, ‘Teleb nang tenepnamsiyak’ tenen, teleb ning bola deiceuk winilulume. Anggun malye winimunye ning ara, nyapnusine. ‘Allah dib tenebibyeura, Allah arye nun dobuka nun talima talinamsilak binuyabe,’ tenenyak nang ara, anggunce yupu sekeldongolulume. Winiluluma ara, ‘Anggun aik weknuyap’ tenen, buplan dam ninye tikilyangaki bukni, yu upliba, mikip arye buplan tirikildongolamak touk, winilulume. Ara, ‘Allah ati, dib tenebibirye,’ ‘Allah talinamsilak weknuyabe,’ tenenyak ninye ati, yupu sekeldongoluluma ati nyapsine. Anggun babye dib tenebuka kum wekelulume. Tonda, ‘Nun dib tenebuka Allah talinamsiak wekenamabe,’ tenenyak nang ati ara, anggun Farisi nang arye winimunye ning deice arye, aninye ati yupu sekeldongolulume.
Na Allah arye, anggun dam yanamne talak ara, talye ati kume. Anggun wenebuka yupu lipsisikuka bokolina ati yanamne. Tonda, na minopce yanamne talak ara, anggun asing keten nang ap, tonda kil talye-talye mal olan nang ap, tilila yupu nyana nang ap ati, ‘Anggunda dipkoprob malye winilulume,’ nyabuka, weik arye wenepnamsine. Aning atonun, bona utotoa kum nang ati, weik ikin pil arukikiba donyak bukni, dekna mitik tonun arinyak nang ap, youwak kilapu ap, kwaknamne mapu ap ati, sik ning ubula dolonyak nang ap, tonda ninye asik nang ati, deiyok kum upmalibuk, malye yupu sik deice nyanyakce, malye kinyak nang ap nirya ati, na yanirye, ‘Anggun malye weik ululume,’ nyabuka wenepnamsine. Deiyok ara, sik amalye-malye weik wininyak nang arye, nati ilil kum ulule. Sikce, na si kum ereninyaka ati, yanirye sikti, wenebuka oplopnamne. Na Allah Yahweh, im deice yin talin malaikat nirya, sik weik deiyoknye birye nyapsin ning ara, dipkoprob winipnamne, nyapsine. Allah arye Israel ninye ati, nyabuk.
Aning atonun, yata nang do nirya arye, im noutam ulul ning ara, keting ap, wala ap, tonda kurya ap ati, ‘Aning arye melinamsiakʼ tenen, aning si erenyake. Aning ati, si erenyak nang nirya ara, wenebuka opnirye, sirya daknamne. Anang ara, kat ning arye, aik duma lu kibuka donyak ning deice tam arye welebuka, im noutam ulul ning ati, si erenyake. Anang babye, obuka sirya daknamne. Tonda, yuk yala nang bukni, sikce, na Allah ati, ‘Naio an siuk erenyabe,’ nyabuka, nyalin yupu nyapnik bukni, talye nyaltakna ati, sikce talye isa si, Milkom isa si ap, tabakuka erenyak nang nirya babye, opnirye, pia kum daneipnamne.
Dipkoprob, na Allah arye, na mikip sirik tam taruk eibikirye, anggunti nyalin yupu deice arye, akunum nyapdeipsise. Ara, na taruk mikip weik erebuka, ilil nyalin yupu nyapsinirye, dipkoprob aning winipnamne. Ayupu ara, ani. “Narye lo kum arepnyopura, sik pera mutuku unyak yu nang arye yanuka, anggun Israel nang arye, akunum koululum gandum ara, ubula dobuka, kum dipnamake. Tonda, lo arepniba, anggun ikin kanye bobuka, pil dolamluma ani, nong kiplum anggur duk dobuka, anggur din mek kintinibuka, ‘Naʼ tenen deiamlum mek ara, yuk pera mutuku yin talen nang arye yanuka, aning dobuka dibikirye, sirya kum dakanamake. Aning ara, kum winipnamsiyake, nyapsine.
Aning ara urdem ati kum nyapsine. Israel ninye ara, asum-asum nirya na siuk erebikirye, ‘Allah arye, aning wininamlume, aning ara kum wininamlulume,’ nyapdeipsuk ninguk, ‘Nun ton kel biknamabe,’ nyanyake. Sikce, ‘Nunda telebuk kibuka ubirye, Allah tenelye ning ara kel biktibye’ tenenyak ninye mitik anun unyak bukni, yuk ninye nirya ara, dipkoprob aning atonun kum unyake. Israel ninye arye talye urdemuk unyake. Sikce na nyalamse yupu akunum batakanye. Sikce nyaninyake, “Kume, nun kanye deibibirye Allah si erenamabe. Tonda, Allah arye ‘Wininamlulume, aning ara kum wininamlulume,’ nyapdeiamsulum ning ara, tuba tenenamabe. Allah ati moropmabibuk, diksukum kibuka yupu lipsisikuka bokeipnamsile,” nyanyak bukni, aning ara dipkoprob kum wininyake. Tenepce aniryuk tilila yupu uk nyanyake. Dipkoprop sik kanye aryuk malye unyake.
Dipkoprop, na Allah Yahweh arye akunum nyapsine. Pia teleb koprop diksukum yupu uk nyapmasina ati, kume kum danamle. Na nyapsinye yupu ara, dipkoprob unamle. Na aryuk nyasunun ati, na nyapsise yupu ara, tuba tonap tamubuka kum doropnamne. Ati, ninye mutuku-mutuku nirya arye, na dam yanuka, gutam tuku dipdongobikirye, natibuk si erenamniyake.”
Teleb ubuka ukiba eibikirye, aninye nirya tonok-tonok, ‘Nara Allah el tamnye unune’ tenen, na siuk nyanamake. Ton nang ara, ‘Yakub el yalanye unune,’ tenebikcopura, sik aninye ara Yakub ance deipminba, dadeipdanin banamak ninye tam uk kilyanganamake. Winibicopura, anang sikce seknamaka ara, ‘Nara, Allah Yahweh el tamnye unune,’ tenebuka, sik taruk deice arye sekenamake. Tonda sikce sik bidamang ati, ‘Nara Allah el tamnye, el tenenanye unune,’ tenen, Israel si nyanamake.
Tonda, anggunce Allah ati, ‘Allah ance, pia ninye dopman kum pil dopminyopura, nun tukwak mutuku noutam unyap nang nirya arye, kanye lopsiliba, kil-kil asa unyabe,’ nyabuka, mot nyanamlume. Tonda anda, Pia Mikip Weiknye ulyama ati, anti, ‘Nun lik,’ tenekinyak nang nirya ara, ‘Se, Allah arye, nun malye wininyap ning ati, wenebuka opsilyak’ tenen, ilil weik upliba, banyake.
Sikda wininamak bukni, nara ninye deiyoknye Raja arye, na ni koproba Allah anti, kanye deibuka, an si pia erenamkine. Sik tilila yupu nyanyak ninye ara, Allah arye, sik si bam bol tunipdongopliba, yupu kum nyapmanto unamake. Bukni, yata ninye do nirya, “Nun winibuka unamabe,” nyabuka, nyalin yupu nyanamak talak ara, ayupu nyanamake. “Allah el si deice arye, nyalin yupu nyanyaba ati ara, dipkoprob diba tenenamsilyame,” nyanamake. Allah atibuk diba tenebikirye, pin-pin upliba, teleb kanye deibuka, Allah el si pia erenamake. Daud birye ayupu nirya nyabuka, mot sekuk.
Sik Asyur tam arye, Samaria mutuku noutam yanuka ulamik ninye asik nang ara, min arye talibuka, si erepnin yangalamik isa ning ara, abuku sekmap talak babye, tuba talibuka, isa si erenyake. Adeice arye, sikda Allah Yahweh ati, el si teleb ubuka kum erenyake. Aninguk kum bukni, sik min arye, isa si erelamik ning, tuba talibuka si erenyake. Tonda, Allah Yahweh arye, Yakub si ati, “An si ara, Yakub nyalamkik bukni, narye, an winiryuk si Israel nyapkine,” nyabuka nyapdeiamuknye, el Yakub birye deibukba, dadeipdanin yangalamik ninye ati, Allah arye, “Anggunda, aning wininamlume, aning ara, pia kum wininamlume,” nyapdeiamuk yupu ap, “Na si erebuka kina ati, pil donamlum ning ara, aninguk winibuka-winibuka, apil donamlume,” nyapdeiamuk yupu ap nirya ara, sik Asyur tam arye yanuka, Samaria mutuku noutam yanuka ulamik ninye arye, aning nirya kum talibuka unyake.
Ati ara, Israel ninye nirya ara, sik yuk teleb touk unamake anya arye, Yakub el deipkirikdop nang nirya ara, kanye deibuka, telebuk unamake. Malye nang arye sikti, yanuka kum opnamake. Amutuku ara, din ning weik aupnamle. Ara, mok purwu im deice arye saklirye, sik unak teleb kipdeipliba, gandum ap, anggur mek ap, weik unamle. Sik mutuku noutamak ara, telebuk unamake.
Winibuka anggun unalum talak nirya ara, anggun ni koproba Allah ati, ‘Elda pia mambule’ tenen, el siuk erenamlulume. Allah ati, el amu tam ulamunce, el pil donamlulume. El tibuk, ilil tenebuka, eluk talibuka ulamunce, anggun kanye talima, el deiceuk delinamlulume. Anggun nyalin yupu nyanamlum talak ara, Allah el siuk nyanamlume. Ati, anggun kanye lamapdongobuka arye, el amu tam unamlulume.
Sik unamakak nirya ara, mek weik upnamle ati ara, adeice arye mek weika arye kwebuka dinamake. Ati ara, sik yala ning kounamaka nirya ara, mek dikilina ap winibikceba, pia teleb ubuka paplirye, duk moupnamle. Tonda sik talipnamalanye bira, ninye deiyok Raja ara, mikip weik arye talipliba, sik nirya mikip weik ap, teleb ap, unamake. Minop talak weik deiyoknye, el si Agag, elce taleamuka ara, mitik mambul bukni, Israel ninye sik talipnamle deiyoknye Raja ara, weik mambul mikipnye unamle. Winipnamla ati ara, el ap, sik Israel ninye ap arye talibuka unamak ning nirya ara, yuk mutuku ninye nirya arye, ‘Se, sikda pia telebe,’ nyabuka si erenamake.
Nyabukce, ayupu tonap dukdongobuka nyabuk. “Anggunce tilila yupu nyapnya deice arye, ‘Yuk nang arye, dib tenepnamniyak’ tenen, ‘Allah el si deice, dipkoprob yupu nyapkine,’ pia kum nyanamlulume. Na Allah si deice tabakuka, tilila yupu nyapmunyopura, ara na si malye ubuka deilina ati, aning ara, winina meme, nyapsine. Na si talye kum nyaltakanamlulume. Nara Yahweh, anggun ni Allah unirye nyapsine,” Allah arye nyabuk.
Narye anggunti, “Winipnamlume, aning ara, kum wininamlume,” nyapdeipmasin yupu, mem yupu nirya ara, moubuka talipmunce, unamlume. Tonoknye babye, kum bataknamlume. Tonda, yuk talye ning nirya ati, ‘Nun ni koprobaʼ tenen, si kum erenamlume. Atonun, yuk ninye arye, sik si erenyak ning si nirya ara, sik si ton, pia kum sinamlume. ‘Aning arye melipsitingʼ tenen, kum yukunamlume. Na Allah Yahweh arye nyapsine.
Nun nirya ara, Allah ance, ‘Aning ara, weik malye ning anya arye, na walwale,’ tenesiminye ning atonun wininyabe. Tonda, nunce, ‘Teleb unyap ning ani’ tenen, teleb winin ning winiptibya babye, dipkoprob weik malye ninguk unyabe. Nunda, pia weik malye ning baju deice bol pipliba, bataklamaka atonun, nunda malye ninye uk unyaba anya arye, malyeuk usulule. Tonda, weik kumanya yalirye, pubuka dopliba kolulamle yo bok dakuka bobalamle touk unyabe. Ara, nun minopce malye ulamepya ani, wisi dapyopura, dibinyabe. Ara, nun bidamang malye wininyaba deice arye winisulule.
Bukni, wini talak Allah Yahweh arye anggunti, nyapnamasil yupu ara, moubuka kekepnamlume! Ara, anggun Yehuda mutuku noutam ulamlum bukni, amutuku batakuka, Mesir mutuku yanuka, tuba asukum ululum nang ati nyapsine. Na Allah Yahweh arye, na pia mikip weik unilye si deice arye, nyalin yupu nyapsine. Se, anggun Israel yala nang, Yehuda mutuku ulamlum nang bukni, wini talak ara Mesir mutuku akunum ululum nang ara, wini talak arye dipdongobuka, do upnamle talak nirya ara, anggun si bambol arye, na pia teleb si ton, pia kum nyanamlume. Ara anggunce, ‘Nyalin yupu nyapnuyapʼ tenepmunye talak ara, na si deice arye, nyalin yupu ton kum nyanamlume. Anggunce, ‘Allah Yahweh dipkoprob kam pia ulula atonun, winipnamne,’ nyapdeiamuk yupu tonap pia kum nyanamlume.
Nyapmasiba, amalaikat elce tamubuka, nati nyapnuke. “Aseken ning ap, koupdongamuk buku noutam sekamuk ning ara, amutuku noutam nirya winipnamle ning ati, sekuk. Ara, amutuku malye unyak nang nirya ati, malye yupu nyabuka, sulongon yupu, Allah elcuk sekuka deiamuk. Ayupu ara, talye ati kum ulule. Tonok kwalin tam yupu ton, sekuka deiamuk ning ara, dan mutuku do nirya, Allah el ‘Naʼ tenen, mutuku noutam unyak nang arye, ubula donyak nang ara, Allah elcuk, anang obuka, kum kipdeipnamle. Amutuku noutam ara, pia kum unamake. Aseken ning sirik tam ara, ayupu sekdeibuk. Aning atouk ara, dan mutuku do nirya, Allah el ‘Naʼ tenen mutuku noutam unyak nang arye, ninye yupu bokolin talak ara, sikce tilila yupu nyanyak nang ara, ‘Allah el si deice arye, dip yupu uk, nyapsine,’ nyanyak bukni, sik tenina deice arye, tilila yupu uk, nyanyake. Allah elcuk, anang obuka, kum kipdeipnamle. Amutuku noutam ara, pia kum unamake. Aning-aning nirya ara, abuku deice sekeiamuk ning aulye touk, dipkoprob winipnamle.
Bisik banmoka ani, bisik noutam bayukopura, atalak ara, Elisa el melinanye Gehazi bira, ‘Yata deiyok ati Elisa bira, Aram mutukunye birye boyanmo ning ara, batakuka bil do? El kanam arye binmala adano. Teleb ning ara, na deiyoknye Elisa birye, Naaman boyanmo ning weik arye, dopropmatue. Ati ara, aning ara, naryuk doproptinye,’ tenebuk. Dipkoprop Allah kam ulye touk, na dib yupu nyapne. Aminyan bikbik abuka dobolbinirye, ‘Naaman bobanmal ning ara, doyanamne,’ tenebukce biyuk.
Nun Israel nang nirya ara, ninye yupa weik bulubuka yabirye, nun ni Allah ati, “Anda pia telebuk ulyame,” nyabuka, el si erebuka, kinamabe. Si erebibirye, nun apu Yakub birye deibukba, deipdanin yangalamlum Israel nang ara, anggun babye, Israel yala nang koproba ululuma ati, anggunce, nun ni Yahweh ati, “Anda pia telebuk ulyame,” nyabuka, el si erenamlume.
Allah arye, sik Israel yala nang nirya ati nyabuk. “Anggunda moubuka kekepnululume! Anggunce, ‘Se, diksukum una ara, weik tonun patasululeʼ tenen, moubuka kel biklum nang ati nyapsine. Tonda, anggunce, ‘Se, nun ni koproba Allah Yahweh arye, lobuka lyepsilirye, ‘Teleb una ara ani, teleb bisikuk dobolbanamlume,’ nyabuka, ‘Peteresulul ning ara, pia telebeʼ tenen, patasiliba, moubuka eililulum nang ara, anggun apu yapu nang ati, moubuka tenipdenulume. Winipmanto ara ani. Anggunce tenipdelulume. Ninye arye, ‘Pia teleb keil dobuka, teleb keil aik dopnamapʼ tenen, ‘Teleb keil palina ara, cang mutuku arye palibuka doproptibye do?’ tenen, keil telebak moubuka dipdebibirye, asukumuk teleb keil dobuka, aik donyake. Aning atonun, anggun apu yapu ap, anggun nun yapu ap, tuba ton ap moubuka tinipdenamlume. Sik bitinye ara, mitik tonun, teleb keil palina atonun unrurake.
Ati ara, winipmanto yupu nong noutam deiyok ning ara, ani. Ara, anggun apu koproba Abraham biti tenipdelulume. Tonda, anggun nun Sarah ton tenipdelulume. Abraham birye, anggun Israel yala nang deiamsuke. Aning atonun Sarah birye, anggun deiamsuke. Abraham ati tenipdenamlum ning deiyok ara, ani. Minop talak ara, na Allah arye Abraham biti wipdeipse talak ara, mi ton tonok babye min kum deiamuk. Mi kum deiamuk bukni, narye elti, wipdeiamsirye, pia teleb kipdeipsirye, mi arekiseba, elce deibukba, aminyan talak ara, ami arye ton deiamukba, dadeipdanin yangalamika ani, adeice arye, mapu pia weik deiamikba, wini talak ara, anggun Israel yala nang yupa weik tonun akunum ululume. Aning nirya ara, narya.
Anggun Israel ninye arye, ayupu nyanmanulum touk, nyana kume. Yata kili sal do nirya, anggun malye winilulum ning atonun, winibikcopura, Allah Yahweh elce, sik ato kili sal nirya ati, kum supnamle do? Allah arye, sik aninye ara, malye winipmakca babye, aninye ati, ‘Dauplye’ tenen, ‘Kum wenepnamne’ tenen, talye namin kipnamsil do? Kume, aning ara, kum winipmanto. Tonda, Allah arye ‘Dotalak winipnamne,’ tenelul ning ara, ton kum luba kilule. Tonda, anggun malye winilulum kili sal nirya ara, teleb kibuka diksukumuk uptumopura, narye nyanmasin yupu ati, ‘E, Mika birye dipkoprob teleb yupu peteresulule’ tenen, moubuka kel bikamtume. Allah elce diksukum telebuk ubuka wininyak nang ati, nyalul yupu nirya ara, sik aninye ati, teleb yupu uk nyalilule. Ayupu nyalilul ning ara, anggunce moubuka kum bikamlum do?
Piblisite