Winipmanto, kilapu arye sik mapu ati melibuka kaliklamak atonun, sikti, mikip unyak ninye mutuku-mutuku nirya ap, pera mutuku ninye deiyok kibuka talinyak nang Raja-Raja nang ap nirya arye, kalikuka melinamsiyake. Winipsikirye, sik pia teleb talinyak ning aning-aning nirya, anggun Israel ninye patasilye talak nirya ara, dekna kum, talye urdemuk arelyanganamsiake. Winbicopura, atalak ara, anggunce na si kel biknamnulume. Anggunce nati, ‘Diba elda nun Lyena Deiyoknye usulule. Elda Allah Yahweh, elcuk ulule,’ tenebuka kel biknamanulume. Tonda, ‘Nunda Yakub birye deibukba, dadeipdanin yangalamupu ninye, Israel ninye ara, Allah Pia Mikip Weiknye birye kalikuka melisulul,’ tenen, kel bikinamnulume.
Yesaya 43:3 - Eipomek3 Aning nyapmasina ara, urdem ati kum nyapsine. Deiyok ara, Israel ninye anggun ni koproba Allah, na si Yahweh unune. Israel ninye, anggun kalikuka melina deiyoknye, Pia Telebnye birye, anggunti lyepnamsina ati nyapsine. Israel ninye anggun Lyena Deiyoknye unune. Anggun malye winilulum ning ati, wenebuka oplopsitinye bukni, amalye umunye ning pununa ati, Mesir mutuku ulamik ninye ap, Etiopia mutuku ulamik ninye ap, Syeba mutuku ulamik ninye ap ara wenebuka oplopse. Winipsirye, anggun Israel ninye ati lopdeipsise. Gade chapit la |
Yesaya 43:3
29 Referans Kwoze
Narye anggun Israel ninye obuka yanilongolamsik nang ati, opnyopura, sik mining mamun arye sik mining mamun uk obuka dilanamake. Winipmanto ara, obuka dilanmakirye, sik mining ininguk obuka dilakiba, kanye walwal kinamle. Narye winipnyopura, ninye mutuku-mutuku nirya ara, kel biknamake. Ara, ‘Allah Yahweh arye sik Israel ninye, Lyena Deiyoknye bira, el aulule’ tenen, kel kipnamniake. Tonda, Israel ninye sik malye wininyak ning ati, Allah arye wenebuka oploptu bukni, ‘Sik pununa ati, aninye akunum dekuka lyepsuke’ tenen, kel kipnamake. Nara, aning-aning talibuka deice tam Pia Mikip Weik Allah unirye, Israel ninye ati, pia kalikuka melinunye, Pia Telebnye unune. Winipniba, Israel yala ninye arye na si ereninyake. Na Allah unune. Israel ninye sik malye wininyak ning nirya kum Kilina Deiyoknye bira na aunune. Ninye mutuku-mutuku nirya aning kel kipnamaka ati nyapsine. Allah arye nyabuk.
Ninye ton, tuba-tuba pia malye winin uk tenebuka winipra banyak ninye ara, Allah Yahweh arye, amalye ning talibuka wininyak ninye nirya ati, weik arye weneplirye opnamle. Ara, winipnamle deiyok ara, malye wininyak ninye nirya oplirye, teleb diksukumuk unyak ninye nirya ati, teleb kipdeiplirye lyepnamle.
Anggun talye ning si erelulum ninye ara, yupu talipmunce, dotalak wininamle ning laka nyapnamnulume. Tonda anggunce anggun bidamang ati asipdanamlume. Ara, ‘Dotalak winipnamle ning ati, min yuma talak yatanye birye nyapdeiamsuk do? Minop talak arye yatanye birye nyapdeiamsuk do?’ nyabuka asipdanamlume. Ayupu ara, na Allah Yahweh arye, nyapdeiamsise. Diksukum koprop telebuk ulirye, ninye lyelula deiyoknye bira, yuknye ton kum ulule, na Allah tonok unune.”
Nun ni Allah arye nyapdeibukura, Yesus Kristus pil dopsuka deice arye, nun Lyena Deiyoknye Allah el tonokuk ulule. Allah yuknye ton kum ulule. El tonokuk ulule. Aning ati ara, el si weik arye erenamabe. Allah elda mikip pia weik ulirye, aning-aning nirya, Talena Deiyoknye ulule. Elda, pia teleb, dirina weik Sisinanye, Raja atonun ulule. Aning-aning nirya min kweipdeibuk talak arye, aning nirya, Talena Deiyoknye ulamuka ani, wini talak tuba ulirye, aminyan yanamle talak nirya babye, pia unamle. Ati, dipkoprop el siuk erebuka unamabe. ‘Aning nirya winipnamle’ tenen, “Amin” nyapne. Telebe, na Yudas arye, asukumuk deipne.
Allah arye nyabuk. Nara anggun ni bira, Allah Yahweh unune. Anggunda, Mesir mutuku noutam, ikin pia weik ulalum bukni, narye lyebuka, boyanamsisirye, pia telebak yanuka deipsise. Ati ara, anggunce, ‘Allah ton yuk ulule,’ tenebuka kum unamlulume. Yuk talye ning ayala-ayala nirya ati, si kum erenamlulume. Nara, anggun ni Allah ara, na tonok unirye lyesunune. Anggunce yuk talye ning ati, ‘Nun Lyena Deiyoknye aulule,’ nyabuka, pia kum nyanamlulume. Lyena Deiyoknye bira, na uka. Allah arye nyabuk.
Tonda nyalulume. “Anyasululum yupu ara, nun lik ati, yuk tam yupu ton nyanamsululume. Nun Israel ninye ap, Yehuda ninye ap, talibuka usilinye Allah ara, Pia Teleb uk Ulinye birye, wenepnamsil yupu ara, tonap kum nyanamsululume.” Anggun Yehuda yala ninye ap, Israel yala ninye ap arye, Allah na yupu lak lena nang ati nyalulume. Allah arye nyabuk.
Ninye ton teleb un ninguk, talibuka unyak ninye ara, ikin ning sik dam ton kum yanamle bukni, ikin ning sik dam akunum yalyopura, Allah arye sik ikin unamake noutamak arye lyepnamle. Bukni, ninye ton yu ninguk tenebuka unyak ninye, imun kanye sik dam yangalye talak ara, ‘Se’ tenen, malye kanye bobuka unamake. Ikin ning teleb unyak ninye, sik nong deice yanmanto uplye ning ara, sik malye winin ninguk talibuka unyak ninye ara, sik nong deice yanamle.
Anggun apu koproba Yakub birye deibukba, dadeipdanin yangalamik ninye, anggunda el yala nang ara, anggun ilil una meme. Yuk yala ninye arye anggunti, ‘Sik Israel ninye ara, mitik ap, mikip kum ap unyaka anya arye, sikda, talye kwising ap, kuluma ap atonun ninye unyake. Sikda mambule pia kume,’ nyabuka nalinamsiyake. Nyapsica babye, aning tenena meme. Deiyok ara, nara Allah Yahweh arye nyapsine. Narye anggun Lyena Deiyoknye unune. Nara Allah Pia Telebnye unirye Israel ninye ati, lyelona ap, kalikuka melina ap deiyoknye usunune.
Keting tamun winilye akunum ubukura, Allah Yahweh arye, Asdod mutuku ulamik nang ati, yanuka yupu ton nyabuk. Ara, “Na amu tam pil donanye, nabi Yesaya bira, keting tamun winilye deice arye, baju ap, yan sendal ap, ongona kumce, talye nong bananguk balamuk. Winibuka balamuk ning ara, ninye dinmanakuk, Yesaya bira balamuk. Ara, Mesir mutuku nang ap, Sudan mutuku nang ap ati, weik ikin ning upnamle ning, ara Asyur mutuku Raja birye, sikti, aminyan talak winipnamuk ning ati, narye nyapdeipsiba, nabi Yesaya birye lakakiamsuke.
Musa biyukopura, Firaun el pil dona deiyok nang arye nyabik. “Yata talak arye, anye bira nun noutamak arye, pena youlamle atonun winipnamsil do? Nunce elti, lik weik upsile. Ati ara, Israel ninye ara, ance batakminba, dabinamake. Dabikirye sik Allah, el si Yahweh ati, el si erepnin banamake. Yahweh arye, nun amutuku nirya opmasilba, pia malye upmasil ning ara, kum elilyam do? Kanye imun upsil ning ara, an kum tenepmalam arye do?” nyabik.
Aning nyapmasin yupu ara, talye ati kum nyapsine. Deiyok ara, nara Allah Yahweh, anggun ni koproba Allah unune. Nara pia teleb, pia etekdopnye, leknye unune. Ati anggunce moubuka kalikilanauk umunyopura, ‘Nunda, Allah el ninguk unyabeʼ tenen, unamlume. Nara, pia teleb, etekdopnye, leknye ununa ati, anggun babye, ‘Naʼ tenen, nang ululuma ati, anggunce malye una pia kum aryuk, pia teleb kibuka umunce, etekdop lek nang unamlume.
Winibuka, elce amutuku nirya talinamle talak noutamak ara, keting wekelban tam, mutuku si Tarsis mutuku noutamak, ninye deiyok talibuka unyak ninye ap, laut mekwen noutamak bukni, mekwen deibuka, sekdongobuk mutuku unyak ninye nirya, el dam yakirye, elda ninye deiyoknye Raja unamla ati, sik talibuka unyak teleb ning nirya dobuka, el dam yanuka arelyanganamake. Tonda, keting yangan tam, Arab mutuku ap, Etiopia mutuku ap, ninye deiyok kibuka, Raja talilamik nang nirya arye, nun mutuku talipnamsil Raja atibuk, si erekirye, teleb ning bobuka, el dam arelyanganamake.
Amesba ap, weik cang keil iknamak ap dobuka deipnamaka ara, Allah Yahweh aning-aning nirya talibuka deice tam erebuka, mikip weik ululnye bira, im deice yin talin malaikat nirya talilulnye bira, Mesir mutuku noutam ulyeba, ‘Allah el siuk ernamabeʼ tenen, lakakilina ati dobuka deipnamake. Winipnamaka ati, Mesir mutuku nang ati, yuk mutuku nang arye yanuka, ikin ning deibikirye, ‘Anang obibyak arye, talipnamapʼ tenebica babye, Mesir mutuku nang arye Allah ati, ‘Se, nun dam yanuka melipsilyame!’ nyabuka morobiceura, Allah elce ninye ton dopdeiplyeba, yanuka sik mal olan nang nirya ara oplirye, melibuka lyepdopnamle.
Nara Allah Yahweh unune. Na si koprop ara Yahweh unune. Na mikip weik ap, weik dirina ap, pia mambul ning ap ununa ati, ninye arye na si erenamnika ara, yuk nang ton pia kum arepmanto! Ninye nirya arye, na si erepniting bukni, sik bidamnye taruk arye memenyakce, isa si erenyaka ara, pia na like. Na siuk erepniting ning ara, Isa Mutuku Dongonye ati kum areptinge. Winibicopura, narye ‘Dauaplye’ tenen, kum namin kiptinye.
“Na Allah Yahweh arye, anggun Israel ninye ati nyapsine. Israel ninye sikce na si ereninyaknye bira, pia diksukum pia Teleb koprop Unanye unune. Narye anggun kwepdeiamsisirye, tuba kalikuka melisunune. Mesir mutuku ninye wa wiamikirye libuka delinyak ning ap, tonda, Etiopia mutuku ninye sik dekna ati, kintinibuka delinyak ning ap, Syeba mutuku ninye sik cang arye nenyak ninye, sik bon-bona ap weik tonun arelyanganamsiake. Amutuku nang ap, sik talinyak ning nirya ara, anggun dam boyakiba anggun diamuk dopropnamlume. Winipmunce, sik aninye ara taruk balye tam bisik dobuka tapu koubikiba, sikda anggun Israel ninye uk dobolyanamsiake. Sik anang nirya anggun dam yakirye, anggun si erena ati, urasin kanupdongopnamake. Sikce, ‘Allah el tonok ulirye, sik Israel ninye pia melilul’ tenen, kel bikikirye, ‘Sikce nun kum onamsil,’ tenena ati, moronamsiake. ‘Israel nang arye si erenyak Allah ara, pia dipkopropnye ulule. Yuk Allah ton kum ulule,’ nyanamake.” Allah arye nyabuk.
Allah arye nun Israel ninye ati lyesulula ara, urdem ati kume. Allah arye nyapsuke. “Dipkoprop Israel ninye ara, na mapu unyake. Sikda, ‘Naʼ tenen, ninye unyake. ‘Anang ara na mapu koproba anya arye, sikce nati kum yaninamniyake,’ tenelamukce nyapdeiamsuke. Allah arye utenelamuka ati, ‘Nara, sik Lyena Deiyoknye unamne,’ tenebukce nyalin yupu nyapdeipsuke.
Diba, nun ni Allah, anda nun Israel ninye ati, pia melibuka kalikisilyamnye ulyame. Tonda, yu ninye arye nunti, opmanto usinyak talak ara, melibuka lyesilyame. ‘Allah elcuk winisulule,’ tenekinyabe. Bukni, yata deiyok ati, ance kum kekelamsiyak nang atonun upnamsilam do? Winipmanto ara, ninye asik nang, tia yanuka tonok lukunyan yanuka mapmaca, adiparyuk balamak nang atonun upnamsilam do? Tonda, yuk mutuku ninye asik nang arye, nun mutuku tikilyanabica ani, adiparyuk tamubuka, bisik balamak nang atonun upnamsilam do?
Nyabukopura, Allah arye, tamubuka nyabuk. Ati ara, an kel biknulyame. Na teninun ning ara, anggun Israel nang dam nyapnamne. Ton ap, narye sik dam nyapdeipniba, sik nirya arye biknamake. Ara, na mikip weik ununa ap, mikip weik arye pil donun ning nirya ap, peterepniba bikikirye, sikce, ‘Se, Allah ara, dipkoprob el si koproba ara, Yahweh ulule. Allah ara, Yahweh eluk ulule,’ tenebikirye, biknamake.” Allah arye nyapdeibukba, nabi Yeremia birye, kekebuka sekuk.
Tonda, Israel nang kan-kan noutam ara, na ap, na si ap ara, pia teleb, lek unun ning ara, laka kipdeipnamna deice arye, moubuka biknamniake. Minop talak, Israel nang malye ulamik deice arye, na ap, na si ap ati, malye kipdeipnik bukni, aminyan talak, Gog tam nirya akunum obuka sirya daknyopura, na ap, na lek si ap ara, ton ap malye kum kipdeipnamniyake. Aninguk kum bukni, winipnyeba, yata mutuku nang do nirya, sikce, ‘Se, Israel yala nang, sik si erenyak Allah, el si Yahweh ara, dipkoprob pia leknye ulule. El Yahweh ara, aning-aning nirya talibuka, deice tam erebuka, pia mikip weiknye ulule. El ap, sik Israel nang ap neika unyakeʼ tenen, na si moubuka biknamniake.
Na Allah Yahweh arye nyapsine. “Se, na mapu anggun Israel ninye nirya ati, minop talak, ‘Na mapu’ tenen, wibuka meliamsise bukni, wini talak ara, anggun malye winiluluma ati, batakukapsisirye, Etiopia mutuku ninye ati, wenebuka oplopse touk, anggun Israel ninye babye, wenebuka opnamsine. Tonda, anggun tenipdelulume. Anggun Israel ninye ara, Mesir mutuku noutam, imun kanye bobuka ulamlum noutam arye, lyemsisirye, kum boyanamsise do? Mesir mutuku noutam arye, anggun bobuka, teleb mutuku kum bobinamsise do? Tonda, Pilistin ninye, Kaftor mutuku ulamikba melibuka boyase. Atonun, Aram mutuku nang ara, Kir mutuku noutam arye dobuka boyase. Ara, na mapu Israel ninye, anggun Mesir mutuku ulamlumba, dobuka boyanamsise touk winipse.”
Se, Sion mutuku noutam ululum ninye, anggun weik tonun kanye deibuka, kil-kil asa upmunce, unamlulume. Tonda, anggun Yerusalem mutuku ululum ninye nirya ara, weik tonun kanye deibuka, weik yupu deice arye, ‘Telebe,’ nyanamlulume. Anggun elilulume. Anggun ninye deiyoknye, aning nirya bisina ap, tonda pia diksukum una ap, deiyoknye yanmala ati, dilulume. El ayanamlanye bira, ninye unyak touk dipdebuka, diksukum kibuka, yupu lipsisikuka, bokolina deiyoknye ulule. Tonda, ninye lyena deiyok ning boyanmale. Bukni, anye bira, el kanye talima nimalyap asa arye, ulirye, amu tam ulule. Anye bira, winiryuk keledai basam balye deice bukuka yanganmale.
Piblisite