Yesaya 42:5 - Eipomek

⁵ Nara Allah na si Yahweh unune. Narye nyapkine. Im ap, im noutamak ulul ning ap, im deice ap nirya ara, naryuk kwepdeipse. Tonda, naryuk, tukwak im sirya, mutuku sirya nirya ap, tukwak mutuku ulul ning ap, tuku deice arye butukuka palamle ning aning-aning nirya ara, narye kwepdeipse. Na aryuk tukwak ninye ara, anggun isin aresunune. Areneba kam unyake. Tonda, anggun dib kanye babye, naryuk anggun talima noutam dongosunune.

Yesaya 42:5 Referans Kwoze

Yesaya 40:22

Na Allah ara, im deice weik bun ning deice bukamsirye, tukwak mutuku nirya bola urasin atonun kibuka kwepdeipsirye, elinune. Tukwak mutuku kwepdeipsirye, tukwak ninye ton kwepdeibuka deipseba, sikce deibikba, dadeipdanin yangalamik ninye nirya ara, pia mitike. Talye kwising atonun unyake. Ninye arye pala baju dobuka, mitik tonun lelilongolamak touk, nara Allah arye, im deice ap, im deice ulul ning nirya ap, kwepdeibuka tonok talak aniryuk deipse. Ninye arye, ‘Cang kain bol arye, doltakna tenda aik unamap’ tenen, pala kain dobuka delilamak touk, na Allah arye, im deice ulul ning nirya, kanam asa aniryuk kwepdeipse.

Yesaya 45:12

Na Allah arye, tukwak mutuku, mutuku-mutuku nirya kwepdeipsirye, ‘Amutuku noutam ara ninye unamak’ tenen, tukwak ninye ayala-ayala nirya kwepdeipse. Tonda im deice ap, im noutam ulul ning nirya babye, naryuk, kwepdeipsirye, kurya nirya na tenepse touk deipseba tikilule.”

Zakaria 12:1

Sik Israel nang ati, Allah Yahweh arye “Winipnamsine,” nyapdeibuk yupu ara ani. Allah Yahweh elcuk im ap, tuku ap kwepdeibuknye biryuk, aning-aning nirya taleamukce, ninye ap kwepdeibuka ati, sik talima pum tam ulamle kanye ton dongopdeibuk. Allah arye nyabuk yupu ara, ani.

Yeremia 10:12

Allah el mikip weik deice arye, tukwak mutuku nirya kwepdeibuk. Allah el weik kel deice arye, tukwak mutuku ara, urasin teleb kipdeibuk. Tonda, el weik kel deice arye, tukwak mutuku nirya, teleb kipdeibukce, asukum kat kipdeibukba, asukumuk unamle. Kum long-long apnamle. Tonda, Allah arye, weik deiyok ning noutam nirya, weik kel bikamuknye birye, im alip tam ap, im noutam ulye ning nirya ap, kintinibuka, teleb kipdeibuk.

Yesaya 48:13

Na mikip weik taruk arye, tukwak mutuku amu tam ara, mutuku yuk ning keil deiamse, aning nirya baribuka talipse. Na mikip weik sirik taruk arye, im noutam ap, im deice tam ap, ulye ning nirya ara, naryuk lilibuka deiamse. Tonda, im deice tam awamuk ning nirya babye, narye yukupnirye, sik si, si sibuka, ‘Yalulume!’ nyaptinyopura, sik adiparyuk bikbik abuka yakirye, ‘Yata nyapnusil do?’ tenen, kintinibikirye, tunim abuka tikinyake.

Yesaya 44:24

Ura, na Allah Yahweh arye, anggun nin yapu min kum deiamsik talak arye, mun pum tam tuba ulamlum talak, kintinip deibuka wiamsise. Winyamsisa ati, tuba melisunune. Nara, anggun Lyena Deiyoknye usunune. Na Allah Yahweh arye aning-aning nirya kwepdeiamse. Winilamsirye, naryuk im deice ulul ning nirya kwepdeibuka lilipdeiamse. Aning atonun, naryuk tukwak mutuku noutam ulul ning nirya babye, kwepdeibuka lilipdeiamse. Yuk nang arye ton kum meliamnike. Na aryuk apil dolamse.

Yeremia 32:17

Na nio, anda Allah Yahweh, aning-aning nirya talibuka, deice tam erebuka, pia mikip weik ulyama ati, an tenelalam touk, adiparyuk winilyame. Ati, Allah an mikip weik taruk deice arye, im noutam ap, mutuku sirya, im sirya nirya ap, kwepdeiplume. Yata ning nirya do, tonok ning babye, an ikin upkiliba, kum winipmanto ning ton, pia kum ukulule. Anda, pia mikip weik ulyamnye biti, aning-aning nirya ara, kanam aryuk pil dopra ulyame.

Yesaya 45:18

Na Allah Yahweh arye nyapsine. “Allah naryuk im babye, im deice ulul ning babye kwepdeipse. Nara Allah tonok unune. Winipsirye, tukwak kwepdeipsiba pia darabuka abukuk. Atukwak mutuku, mutuku-mutuku nirya kwepdeipsa ara, ‘Talya urdemuk aunamle’ tenen, kum kwepdeipse. Aning kum bukni, ‘Aning-aning ayala-yala nirya unamle’ tenen, kwepdeipse. Winipsinye bira, Allah na tonok unune. Yuknye ton kum ulule nyapne.

Mazmur 33:6

Allah Yahweh arye, el kanye aniryuk, yupu nyapdeibukba, adiparyuk, im deice ap, im noutamak ulul ning nirya ap, kwepdeibuk. Im noutamak ulul ning nirya ara, keting ap, wala ap, kurya ap nirya ara, Allah Yahweh arye, ‘Kwepdeipnune,’ tenebukce, yupu nyapdeibukba, adiparyuk, laka ubuk.

Ayub 33:4

Nara, Allah el Lek Dip Kanye arye, akunum kintinip deipnuke. Tonda, winipnukba, weik arye erebuka, aning-aning nirya talibuka, mikip weik ulya deiyoknye Allah ara elcuk, el mikip weik isin arye, na nong noutam isin arepnuka deice arye, kam unune.

Rasul 17:25

Kam una ap, isin una ap, yata ning do nirya, aubuk ning nirya, elcuk ninye tukwak ninye ati aresulule. Ati, aning-aning nirya kum patalye touk ninye arye donyak pil nirya babye, Allah el pia kum patalule.

Ayub 12:10

Kam unyak ning yala-yala nirya ara, Allah el mikip deice pil doplirye, melipliba, kam unyake. Tonda, Allah el mikip weik deice aryuk, kam un ning aresilyeba, nun tukwak mutuku noutam unyap nang nirya babye, kam unyabe. Aning nirya ara, Allah aryuka!

Yesaya 40:12

Anggun teneipdelulume. Yatanye birye laut mekwen nirya, el taruk deice yating pulula kibuka biksiting do? Tonda, yatanye birye, tonok taruk aniryuk im deice deibuka, ‘El pala ara ani’ tenen, dekturye, nyapsutu do? Atonun yatanye birye tukwak im sirya, mutuku sirya nirya, tuku ap, tuku butbuta ap dobuka, mitik kiklilen makau pum tam dongoptu do? Yatanye birye mutuku-mutuku bukuk ning nirya ap, mutuku kon ap, dopropturye, ‘El ikin ara yata barye do?’ tenen, timbangan deice kiklibuka dektu do? Kume, Allah elcuk aning nirya winilule, yuk nang ton kume.

Mazmur 136:6

Tonda, elcuk, tukwak mutuku, im sirya, mutuku sirya nirya kwepdeibukce, aning nirya dobuka, weik laut mek kwen uamukak deice tam deibukba, asukumuk tuba aulule. Allah Yahweh arye, nun Israel nang ati, “Pia bico tenesinirye, tuba-tuba melinamsine. Pia telebuk kilinamsine,” nyalin yupu deice arye nyapsuka ati, aning ara, pia kum bataknamsile. Anirya ara, nun nirya arye el tibuk, si erebuka kina ati, ‘Naio nunce anti, pia telebe, nyabkiabe,’ nyanamabe.

Amos 9:6

Tonda, na Allah Yahweh na asik ara, pia im noutam dopse. Winipsirye, tukwak mutuku ton kintinibuka deipsopura, na unye asik atonun ara, anyaik ayukumna yo ara, tukwak mutuku deice kintinibuka deipse. Tonda, weik laut mekwen deibuk ninguk, yupu nyapdeipnyopura, amekwen ton dopropnirye, yuk mutuku tam nirya dikiltakanune. Aning nirya wininuna deiyoknye bira, na si Allah Yahweh unune.” Allah arye nyabuk.

Kejadian 2:7

Atalak noutam arye, Weik Deiyoknye Allah, el si Yahweh arye, tukwak mikamuk tuku doprobukce, tuku pinibuka, ninye nong tonok kwepdeibukce, el u pum bisik si pito pubukba, isin ubuk. Winibuka deice arye, anye kam una deiyok ning arebukba, isin wekukce, kam bukuk.

Ibrani 1:2

Winilamuk bukni, wini talak ara nun sirya talak unyaba noutamak ara, Allah arye nunti, el Mi Kopropa deice arye, nyasulule. Allah arye el Mi Kopropa ati, ‘Aning-aning nirya dobuka arepniba, weik ninye deiyoknye ulirye, aning nirya pia talinamle’ tenen, wibuka deibuk. Tonda, Allah arye im ap, tukwak mutuku ap, aning-aning nirya ap, elce nyapdeibukba, el Mi Kopropa pil dobuka deice arye kintinipdeiyamuk.

Yesaya 40:28

Anggunda yata ati bita kel kum kilulum do? Anggunda yata ati kum kekeplum do? Anggunda yata ati walwal asa ululum do? Nara Allah, na si Yahweh unune. Nara Kam Pia unune. Minop talak arye dipdongobuka, doryanamle talak ara, pia aunamne. Mutuku sirya ap, im sirya ap, anoutamak mutuku nirya kwepdeipsa deiyoknye bira, na uka. Nara Allah ara mikip kum upniliba dikdik sena ton kumnye unune. Weik mambul pil donun bukni, ikin kum upnutuba, dikdik kum senune. Tonda, narye weik mambul ning nong noutam ning nirya akunum kel kiamse ning nirya ara, talye tukwak ninye nirya arye, pia dipkoprob kum teneptinge. Tonda na kel kipse ning sik ton bita kel kum biktinge.

Ayub 34:14

Allah elce nun ninye noutam dongopsukba, kam usulul kanye ap, isin dongopsukba, isin eresulul ning ap, tamubuka doropsutopura, nun kam unyap ning yala-yala nirya ara, adiparyuk diptibye. Nunda elce kwepdeipsuka ati, tamubuka tuku atonun danamsile.

Ayub 27:3

Na dipkoprob nyapne. Allah el Pia Teleb, Lek Dip Kanye arye, na isin arepnuka deice arye, kam tuba unune. Na nong kam tuba unamne talak nirya ara, na si bambol deice arye tilila yupu ton kum nyanamne. Tonda, na si tang deice arye, talye yupu ton kum nyanamne.

Daniel 5:23

Anda, Allah im deice ululnye dinmakukak arye, malya kibuka kanye erepdalumce, Allah ati, ‘Na like’ tenen, yaniltalamlume. Winilamlumce, Allah el si eren aik pum tam, deiamikbuk, boyanamik ning, emas arye memebuka deiamik mek makau ara, ance nyaplumba, an mutuku talibuka unyak deiyok ninye ap, an kilapu ap, an tam kili sal ap, sik nirya ara, amakau arye anggur mek kwebuka dinmalume. Winipmalumce, anggun si erelulum minop kwemdina ning, emas ap, perak ap, tembaga ap, yuk kat ning yo ap, keil ap kintinibuka deiamik ning, Isa Mutuku Dongonye urasin atonun ning ara, sik si nyabuka erepmalumce, mot nyanmalum talak ara, ‘Allah dinmasile,’ tenepmalume. Anggunce, Isa Mutuku Dongonye si erelulum minop kwemdina ning ara, asing arye, ton kum elinyake. Tonda, amul arye kum kekebuka, kel bikinyake. Allah aniryuk, dibin ning babye, kam un ning babye, elcuk, ‘Wininamak’ tenen, kintinibuka deibuknye ulul bukni, atalak ara, ance Allah ati, telebe nyabuka, si kum erepmalume. Tonda, Allah aryuk an kam unamlam ning nirya ara, kintinibuka delikulule. Awinikilye ning nirya ara, ance moubuka kum kel kilaluma ati nyapkine.

Rasul 17:24

Ura, mutuku sirya im sirya nirya ap, aubuk ning nirya ap, minop arye kintinipdeibuk Allah ara, elcuk alip tam nirya ap, tukwak tam nirya ap, talibuka ulule. Allah si erena ati, ninye sik taruk deice arye talibuka donyak aik pum tam nirya ara, pia kum ulule.

Kejadian 1:1

Aning-aning nirya kum uamuk talak ara, Allah arye im ap, tuku ap kwepdeibuk.

Yesaya 37:16

“Se, Nun ni Allah Yahweh, anda aning-aning nirya deice tam erebuka umince, pia mikip weiknye uminye birye, im deice yin talin malaikat nirya ara, sik deiyoknye ulyame. Nun Israel nang nirya ara, Allah an mapu ubirye, an siuk erekinyabe. Tonda, na nie, anda Peti Perjanjian bublan deice malaikat urasin atonun ning, el si Kerub, bitinye puturubuka deibubak, deice tam ara, bukmince tuba asukumuk ulyame. Nun ni Allah, an tonok aryuk erebuka uminyeba, atukwak mutuku ninye deiyok kibuka talinyak nang nirya ara, an amu tamuk unyake. Allah ance im ap, tukwak ap wepdeiplumce talilyame. Mutuku sirya im sirya nirya talinyaka deiyok nang ara, an amu tamuk unyake. An tonok ulyame.

Yesaya 40:26

Wini talak ara, anggunce im deice erebuka dipdemunce, moubuka tenepnululume. Moubuka tenepmunce kel biknamlulume! Yatanye birye keting ap, wala ap, kurya nirya ap kwepdeibukba, im deice ulul do? Im deice ulul ning nirya kwepdeibuknye, elcuk kurya ap, keting ap, wala ap, im deice ulul ning nirya ap ara, kwepdeibukce, sik tonok-tonok, si yuk-yuk arebukce, sik si yuk-yuk sisibuka yukulule. Kurya im deice ulul ning yupa nirya ara, kum nukmanto ulule. Bukni, Allah na si Yahweh ara, na mikip weik deice arye aning nirya talibuka ununa anya arye, tonok ning babye kume, kum datue. Aning nirya tuba awamlye touk, pia unamle.

Yesaya 57:16

Ayupu nyapmasina ara, talye ati kume. Deiyok ara ani. Ara, narye na mapu, anggun dam ati, “Anggunda pia malye ululum nang,” nyabuka, pia ati kum wenepnamsine. Tonda, narye sik malye unyak ning ati, tuba-tuba yu upnilyeba, anggunti kum wanamsine. Deiyok ara, ‘Na yu tuba upnilyeura, anggunti pia wenepsinirye, ikin ning anggun deice pia deipsinyopura, na mapu anggun imun kanye bobuka, talima daksaknul’ tenen, tuba tonap kum wanamsine. Narye anggun nirya ara, memepdeiamsak umunya ati, aminyan talak naryuk, anggunti, kanye tonap teleb kipdeipnamsine.

Yeremia 27:5

“Yuknye kume. Na Allah aryuk, na mikip weik talibuka unye ning ap, tonda na mikip weik unilye taruk ap deice arye, tukwak mutuku ubuk ning nirya kwepdeiamse. Tonda, tukwak mutuku nirya unyak nang ap, tonda tukwak mutuku noutam kam ulye ning yala-yala nirya ap ara, naryuk kwepdeipse. Akwepdeipse ning nirya ara, na kanye aryuk, yatanye biti do, ‘Anye bira mikip weik deiyok ning arepkinun,’ tenepninye bira, narye atenepnye touk arenune.

Yeremia 38:16

Ayupu nyabukopura, Raja Zedeikia kekebukce, mur-mur alamak yupu atonun arye, Yeremia biti nyabuk. “Kume, na dipkoprob nyapkine. Nun ni koproba Allah, Kam Una Deiyoknye birye, nun bitinye kam una deiyok ning ap, isin ap areamsukba, kam unyame. Elda, pia kam unamle ati, el si deice arye nyapkine. Allah arye, anti nyapdeipkuk yupu, laka nyapniminyopura, narye anti, kum opnamkine. Tonda, narye, ‘Yuk nang arye, anye bira wenebuka optinge’ tenen, kum nyapnamne. Narye anti, yuk nang kum arepnamkine,” nyabuk.

Yehezkiel 18:4

Dipkoprop na nyasinye yupu ara, moubuka kekepmunce, biklulume. Ninye nong ap, ninye kam una ap nirya ara, narye tenenun ninguk unyake. Wisi nang babye, sikce deipmakce mapu, mitik mapu nirya babye, ‘Naʼ tenen, ninguk unyake. Tonda, malye upmace ninye tonok ara, dipnamake. Yuk ninye ton kume.

Mazmur 96:5

Ninye mutuku-mutuku nirya arye, sik bidamang taruk arye, puturubuka delilamak ning memepdeibikirye, ‘Nun ni ani,’ tenen, aning talibuka, elti, si erenyake. Tukwak mutuku talibuka, si erenyak isa mer nirya ara, talye aulul ning, urasin atonun, ubuka deibikirye, si erenyake. Bukni, nun ni koprop Allah Yahweh arye, im deice ulul ning nirya kwepdeiamuke.