Allah arye anggun mutuku ila tuba tamubuka teleb kipdeipsilyopura, minop talak mek pia kum mutuku kiamicak ara, ninye arye yupu diksukum kibuka lipsisikuka bokolinamake. Tonda, tuku teleb upliba, wa wibuka koubikiba, paplirye, duk moun ning aning-aning nirya papnamle mutuku ara, ninye nirya arye malye winin ning batakuka, diksukumuk unamake.
Yesaya 42:11 - Eipomek11 Ura mok kum celul mutuku, talye pata lo weik ubuk mutuku ululum ninye nirya ap, amutuku noutamak aik dobuka ulamak ninye ap arye, na Allah ati, mot senamluma deice arye, na si erenamnulume. Tonda, Kedar mutuku noutamak, talye balamak ninye arye, na Allah ati, mot nyanamluma deice arye, na si erenamnulume. Anggun nirya arye, nati, ‘Se, nun ni Allah elda pia teleb,’ nyabuka na siuk erebuka mot senamnululume. Tonda, anggun Sela mutuku ululum ninye arye, teleb kanye bobuka, ‘Nun ni Allah elda pia telebe,’ nyabuka mot senamlume. Na si erepmunce, weik mutuku deice arye mot senamnilyame. Gade chapit la |
Yesaya 42:11
21 Referans Kwoze
Tonda Kedar mutuku ninye arye weilamak domba basam ap, kambing basam ap, bobuka anggun dam boyakirye arenamsiake. Tonda Nebayot mutuku ninye arye yim domba basam weinyak ning ara, anggun dam boyanganamsiake. Adomba dopropmunce, nara Allah na si eren talak on ning ati, na arena teleb uka. Akam ning arepsikiba, anggunce, aning obuka uku dongopmunce, na Allah ati, anggun kanye deipmunce, teleb kanye bobuka unamlume. Winipmunyopura, nara Allah na si eren aik, urasin pia teleb aik ara, dirina weik arepneba, teleb uplyopura, ninye nirya eibikirye, ‘Se, Allah el si eren aik ap, Allah el ap ara, pia teleb ulule,’ tenen, sik kanye pia teleb unamake.
Ura, anggun Yehuda tam ululum nang nirya ara, moubuka dipdelulume. Ara, ninye tonoknye ton, wibuka deipyeura, mutuku dup deice tam arye yanamle. Ayanamlanye bira, laka pia teleb yupu boyanuka nyalnyanamle. Anye birye, laka teleb yupu boyanuka nyalyanamle ara, olana kumce, pia kanye teleb ubuka, talima dukulongona ati, yupu boyanamle. Ati ara, ‘Se, anggun Yehuda nango, wini talak anggun Allah si erena ati, weik sum ara, moubuka tenepmunce, asum ara, weik kwalya kwalibuka, Allah ati, si erebuka kinamlume. Tonda, minop talak, ikin weik ulamlum talak noutam arye, anggunce, ‘Allah arye lyepdopsutopura, nunce Allah ati winipnamabe, winipnamabe. El si erebuka kina ati, aning ton, aning ton arenamabe,’ nyapbuka, nyalin yupu deice, nyapdeiamlum ning nirya ara, dipkoprob aninguk winipnamlume. Ilil una kumce, talye lukparabuka, winipnamluma deiyok ara, ani. Atalak arye dipdongobuka, dounamle talak nirya ara, anggun mutuku noutam nirya ara, yu nang ton yakirye, pia kum olyanganamsiake. Ara, Allah arye, anggun mal olan nang ati, akunum obuka, sice bukloplirye, anang nirya kum kipdeipnamla ati, tonoknye babye ton, pia kum unamake. Anggun el ‘Naʼ tenen nang ara, kanye deibuka, telebuk unamlume. Allah arye nyabuk.
Narye wipdeipniba, yupu laka nyanamak nang ara, anggun eipmunce kanye weik deipnamlulume. Anang ati, winibuka tenenamlulume. ‘Se, pia laka teleb yupu boyasice nang ara, sik tukwak bisik yanibuka teleb yupu boyanmasiyaka anya arye, sik yan babye pia telebe tenen, kanye delinyabe,’ tenenamlulume. Aning ara, mutuku-mutuku nirya bakirye, na laka teleb yupu laka nyapre banamake. Tonda, olana kumce, kanye talima dukdongobuka teleb una ati, yupu peterepre banamake. Tonda, ninye lyena yupu boyanamake. Ayupu nyalyanganamak nang arye, anggun Sion mutuku ululum ninye ati, ‘Anggun ni koproba Allah, aning-aning talibuka, weik deiyoknye Raja, Allah aniryuk talisilirye aulule,’ nyabuka nyanamsiyake.
Kum binmanto wamliba, tonokak uk bulamikce ninye ara, kanye deibukabikirye rusa basam im kurukuka balamak touk wininamake. Luba danamliba yupu kum talamice ninye ara, kanye deibuka mot senamake. Winibikirye, pin-pin kanye bobuka ubikirye, mot senamak ning ara, urdem ati kume. Ara, mok cena kumce, pata mutuku noutamak, Allah arye mek arepliba, mek oplirye banamle. Ninye una kumak babye, mek pu dobuka banamle.
Ura, Allah Yahweh arye na Yesaya dam yanuka nyapnuke. “Winipmanto ara, talye pil domikce nang arye, tonok keting tamun deice arye pil dolamak talak atonun, wini talak babye, tonok keting tamun lo noutam aryuk, Arab tam aunyak nang, Kedar mutuku unyak nang, sikce talikirye, kanye delinyak ning nirya ara, adiparyuk kum kipdopnamle. Yuk nang arye, sik Arab tam talilamik ning eililamikce, ‘Se, sikda weik mambul nang unyakeʼ tenen, nyalamik ning nirya ara, kum danamlarya, nyapsine.
Allah arye, na nabi Yesaya biti nyapnuk yupu ara, sik Moab mutuku nang ati, nyabuk. Anggun Moab ululum nang ara, kekeplulume! Sik ‘Yudea tam nang arye melipsitingeʼ tenen, anggunce, Sela mutuku arye, dekna arena ati, domba basam mapu weika arye dopdeipmunyeba, ninye pia kum, mutuku kata bisik boyakirye, Yehuda tam noutam bukni, Sion mutuku deice, Yerusalem weik asik talibuka, ulamice deiyok nang dam yanuka, arepnamake.
Asipdeyukura, Allah el si Yahweh arye, nyabuk. “Kume, aning ara, talye ati kume. An mun pum tam ara, ninye yala bitinye, sik ninye deiyok nang unmarake. Deipminyeura, anang bitinye ara, sikce deipriceba, dadeipdanin balamica ani, yala yuk-yuk unamak ninye babye, bokuka yuk-yukak unamake. Tonye birye deipnamle yala nang ara, mikip weik unamak bukni, tonye birye deipnamle yala ninye ara, mikip kume, binan asa unamake. Min yubuka deipnamalam mi arye, aminyan deipnalam mi ati, el amu tam bukuka, el melinanye bitonun unamle. Aminyan deipnalam mi ara, el du koproba deice tam deiyoknye atonun unamle.” Allah arye Ribka biti, ayupu laka nyabuk.
Min talak ara, anggun Edom tam nang arye, yuk-yuk mutuku nang ati, ilil una pia kumce mikip asa arye, ‘Sik mal olyangamabe,’ nyabuka, yu yupu nyaplumba, sik yuk-yuk mutuku nang arye, ilil weik ulamukba, sik nong nirya sirim talilamuke. Tonda, sik Edom tam nang arye, sik kanye tenina deice arye, ‘Nunda pia teleb nang unyabe,’ tenepdaluma arye, anggun kanye talima deiplumce, talye yupu uk nyalamlume. Winibuka maknya kintinilamlum bukni, wini talak ara, anggunce yuk nang ati, ilil upsilirye, ‘Yuk mutuku nang arye, yanuka opsikcakʼ tenen, keil deiya damuk duknulbinamlume. Tonda, ‘Nunda amutuku kon deice tam unmaba ati, nun mal olan nang ara, amutuku deice kum welebuka opsitinge,’ teneplum bukni, na Allah arye anggun bobuka, amu tamuk dipnamsine. Wini talak ara, anggunda keil deiya pum dungnubuka unmalume. Tonda, mutuku deice arye lopdakuka, pera noutam unmalum bukni, pia amu tamuk kipnamsine. Anggunce weik mutuku kon weleptumce, seng-seng alamle maka, Raja wali maka, el aik pia cang yo deice dolamle touk, doptuma babye, adomunye buk, na Allah Yahweh arye dobuka, anggunda amu tamuk dopkwetepnamsine. Aning nirya ara, na Allah Yahweh arye nyapmasina ati, dipkoprob nong upnamle!”
Anggun Moab mutuku noutam ululum nang ara, anggun ululum mutuku nirya ara, adiparyuk batakuka, bai sakuka bindopnamlume. Tonda, namin asa tunim abuka, keil bukamuk mutuku dup arye, yalma maka arye, duk deipnamlya ati, kot dam tiklamle yo taruk deice arye, aik labuka doplirye, duk delilamle touk, anggun babye namin asa, tunim abuka duknulbinamlume. Akeil bukuka pum noutam dabinuka ulamunyebuk, anggun mal olan nang arye, yanuka kum tomopnamsiaka ati, na Allah Yahweh arye, akunum nyapdeipsine.
Anggun nirya moubuka kekepnululume! Anggun mutuku deiyok dam, weik luak ululum nang ati, narye wenebuka opnamsine. Aning atonun, anggun mutuku kon deice, weik pala keil deice ululum nang babye, narye wenebuka opnamsine. Min talak ara, anggunce, “Kume nunda, pia mikip weik unyaba ati, yuk nang arye yanuka, kum opsitinge. Tonda, ‘Nun mal olan nang yanuka opsicakʼ tenen, cang keil poka dobupe ning ara, yuk nang arye yanuka, ulubikirye, wekuka kum opsitinge,” nyabuka, maknya kintibuka kwalilamlum bukni, na Allah arye, anggun nirya ati, malye kipsinirye, wenebuka opnamsine.
Anyapmasina ara talye ati kume. Deiyok ara, narye winiryuk ning ton winipnamsina ati nyapsine. Ati, aning pil dopneba, anggunce moubuka tenipmunce kum eipnamlum do? Otalak ara, apil akunum deiyok koubuka pil donmane. Narye mek kumak ati, ninye kum unyak mutuku, pata mutuku noutam bisik yapdeipnamsine. Tonda mek kumce talye bukamlye mutuku noutam ara, mek arepneba, mek pu dobuka banamle. Ati anggunda ‘Kabul do?’ tenen, bita kel kum bikmalum do?
Anggun Edom tam nang ara, ‘Nunda pia teleb nang unyabeʼ tenen, tilila yupu nyalamluma deice arye, akunum kanye erebuka, maknya kintinililalulume. Ara, anggun weik asik, weik keil mutuku kon deice dobuka deiplumce, mikip kipdeiplume. Winibuka deiamluma ati ara, anggunce, ‘Yo, nunda, yata mutuku nang arye, nunti opsikirye, nun mutuku kon deice unyabak arye dobuka, utam lu mutuku tuku deice deipsiting do? Kume aning ara, kum winipmanto,’ tenemunce, pia maknya kintinibuka, kwalilulume.
Ninye ton weik yupu arye nyanamle. Ninye kumak, pata mutuku noutamak arye, Allah el si Yahweh arye yanamle bisik ara, teleb ubuka yalinamlume. Nun ni Allah yanamla ati, kwalin bisik nirya ara, diksukum kibuka yalinamlulume. El yanamle bisik ara malye uamlyak nirya, diksukum teleb kibuka yalinamlulume.
Mot sena deice arye, Allah el tibuk, si erenamabe. Ara, Allah elcuk, nun ninye arye kum winipmanto ning weik winilula ati, elce pil dolul ning nirya ara, pia telebe. Tukwak mutuku im sirya, mutuku sirya nirya unyak nang ara, Allah el mikip weik arye, pia teleb pil dolul ning kekenamaka ati, ayupu laka nyalbinamlulume.
“Bukni, narye Raja Nebukadnesar biti nyapne. Kume, anda, ‘Aminyan talakʼ tenena kume. Adiparyuk, sik Hasor mutuku unyak nang ati, minop olbinulyame! Sik Hasor mutuku nang ara, sik namin asa arye, talye kanye deibuka unyake. Tonda, sikce domik weik asik ara, keil poka ton kum domika ati, caknam aryuk, sik mutuku wekmince, opnamtume. Tonda, sik melipmanto nang ara, dam kum unyake. Sik Hasor mutuku ara, yukakuk ulule. Tonda, sik mutuku wekna ati, bisik bublan kat ning, besi arye deibuka, kum domikce, pia kum lelibika ati, caknam aryuk olbitume.
Piblisite