Yesaya 42:10 - Eipomek

¹⁰ Na Allah arye anggun tukwak ninye nirya ati nyapsine. Anggun nirya arye, na Allah Yahweh ati, kanye deibuka, “Nun ni Allah pia teleb ulule,” nyabuka, winiryuk mot deice arye, na si erebuka si kinamnulume. Anggun mutuku sirya, im sirya ululum ninye arye, na Allah ati, mot senamluma deice arye, na si erenamnulume. Aning atonun, anggun weik laut mekwen deice arye, weik mek liya yo wekuka mekwen deice balamlum nang ap, tonda weik laut mekwen kup-kup ulalum nang ap, na Allah ati, mot senamluma deice arye, na si erenamnulume.

Yesaya 42:10 Referans Kwoze

Mazmur 33:3

Tonda kanye lon mot, winiryuk mot aning-aning nirya wibukapmunce, Allah ati si erenamlulume. Mot selamak ning, el si ara kecapi dobuka, weik kel deice arye, teleb kibuka mot nyanamlulume.

Yesaya 42:4

Elda teniltona deice una ap, bulul takana kanye bona ap, pia kumce diksukum kanye uk bobuka, dipkoprob ninguk unamle. El pil min kum sirya dakmalye talak ara, ninye arye elti, yupu kum sektinge. Tonda, elti, kum optinge. Pil diksukumuk dopra balamlya ani, diksukum una deiyok ning akunum teleb kibuka pil doplyopura, pil bataknamle. Weik laut mekwen lilunak unyak ninye ara, ‘Se, elda dan talak nun mutuku yanuka peterenamsil do?’ tenen, elti, pia kanye deibuka dinauk unamake.

Mazmur 40:3

Nara, malye ning arye, bental wetepmana atonun pia ulamnuk bukni, Allah arye dobuka lyepnukce, lake deipnuke. Tonda, ikin weik ulamnuka ati ara, winipmanto ara, weik bental pum wekamsiba, Allah arye dobuka, mutuku yangan keil deice deipnuke. Melibuka lyepnukce, telebak deipnuka ati ara, winipmanto ara, wini talak ara, teleb kat tuku deice, dobuka deipnukba, teleb banune.

Wahyu 5:9

Sik 24 wisi deiyok nang arye, Domba Mi Atonye el si erena ati, winiryuk mot senmekba, kekepse. Sikce mot nyanmek yupu ara, ani. “Anda pia diksukumuk uminya deice arye, an tonok arye asekna mambul ning dobuka, taplaklamak yo pea atonun ning daklobuka, abuku yokeipsutume. Deiyok ara, sik opkikba, an ining biyuka deice arye, ninye ayala-ayala kan-kan nirya arye, ‘Allah el na tenen ninye unamak’ tenen, ninye weika arye deklume. Akunum dekuka lyeplum ninye ara, im sirya, mutuku sirya nirya ap, ninye ayala-ayala nirya ap, ayupu-ayupu nirya ap, weik mutuku nang (negara-negara) nirya ap, noutamak arye ninye weik dekuka lyepluma ati, ancuk abuku yokeipsutume.

Yesaya 49:13

Winipnamaka ati, im ap, tuku ap, mutuku-mutuku nirya ara, anggunce, kanye deipmunce, pia kanye lon mot nyapnamlulume. Wininamluma deiyok ara ani. Ara, Allah arye ‘Na mapu koprop’ tenen, wipdeiamse ninye ara, yu ninye arye obuka sirya dakuka tomobice, ikin piluk aruklamikba, apiluk dolamikce imun kanye bolamika ati, wini talak ara na Allah arye ‘Naʼ tenen, ninye ati teleb kin ning arepnamne. Ati pin-pin kanye bobuka mot nyanamlume.

Wahyu 14:3

Anirya kekepmaseba, sik 144.000 ninye, Domba Mi Atonye birye akunum lyebuk ninye arye winiryuk mot senmek. Winiryuk mot senmekce unmekak ara, Allah el weik bun ning deice bukmokak damak nyanmek. Tonda, sik dumbarye teleb kam unyak ning ap, sik 24 wisi deiyok nang ap asukumuk, Allah el urasin tam tikmeka damak mot senmekba, kekepse. Sik yupa weik 144.000 ninye nirya arye, winiryuk mot senmek bukni, yuk nang nirya arye sik senmek mot, winiryuk ning ara, kel kum bikmanto unmek. Bukni, Domba Mi Atonye birye, sik yupa weik 144.000 ninye, tukwak mutuku noutamak arye akunum lyelamuk ninye, sikcuk amot bikamikce nyanmek.

Zefanya 2:11

Ati ara, na Allah Yahweh arye, sik Pilistin mutuku unyak nang ati, yu arye wenepnyopura, sikda ilil pia weik unamle. Tukwak mutuku, im sirya, mutuku sirya nirya, noutam unyak nang arye, talye isa ati, ‘Nun ni koproba,’ nyabuka, si erenyak talye ning ap, isa-isa nirya ara, na Allah arye obuka, sirya daknirye, malye kiplopnamne. Winipnyopura, tukwak mutuku sirya, im sirya nirya, weik laut kup-kup unyak nang ap, laut mekwen noutam arye, antanap dongobuk mitik mutuku, pulau-pulau deice unyak nang nirya ara, Allah Yahweh dam ngangkanudongobikirye, kutam tuku dipdongobuka, na Allah ati, si erenamniake. Ara, sik nirya, mutuku yuk-yuk daunyak touk, sik talibuka unyak mutuku noutam aryuk, na Allah siuk, erenamniake.

Yesaya 65:14

Dipkoprop na si tuba erepnikirye, na amu tam pil dobuka unyak ninye ara, na si erebikirye kanye deibuka unamake. Bukni, anggun malye-malyeuk ululum ninye ara, engelamunce, imun kanye bobuka unamlume. Tonda, kanye talima pia uk dilamsiliba, ikin kanye bopmunce, engenamlume.”

Yesaya 60:9

Kume, ara mekwen deice balamle weik mek liya yo, Tarsis mutuku ninye arye talibuka balamak mek liya yo, narye nyapsiba akunum kintinibuka deiamika ati, Israel ninye sik mapu libuka boyanganamake. Ara, pia pera mutuku, mekwen dana-dana tam sekdongamuk mutuku noutam, unyak Israel ninye ara, Tarsis mutuku talinyak mek liya yo wekikirye, Israel mutuku tamubuka boyanganmaka ara, anggun nirya dilulume. Tonda, dekna weik ning emas ap, perak ap dobuka, boyanganmaka ara anggun nirya dipdelulume. Wininmaka deiyok ara, ani. Ara, anggun si erelulum Allah, anggun ni koproba Allah el si Yahweh ati arenamake. Tonda Israel ninye pia kalikuka melilulnye, Pia Teleb Una deiyoknye, na Allah Yahweh, na si erena ati, boyanganmaka ara anggun dipdelulume. Wininamaka deiyok ara, ani. Ara, na Allah arye, anggun Israel ninye ati, pia teleb kipdeipsiniba, eibikirye, ‘Se, aning ara mambul weike’ tenen, sik si erebuka arelbana ati, aning boyakirye, nati arenamniake.

Yesaya 51:5

Narye anggunda, ‘Naʼ tenen, nang ati, anggun mal olan nang dam, narye lobuka lyepdopnamsina ati, kintinip deiamse ning ara, akunum dam uple. Minop yanamle! Tonda, narye ninye mutuku sirya, im sirya nirya ati, malye kipnamne ning ara, akunum yanmanto upmala. Dam akunum uple. Ati ara, sik weik laut mekwen lilundam unyak nang ara, ‘Se, Allah arye, dan talak yanuka melibuka lepnamsil do?’ tenen, kalikuka dinauk uninyake. Sikda, ‘Se, Allah el mikip weiknye biryuk, el taruk mikip arye pil doplirye, lyepnamsilʼ tenen, kalikuka dinauk unamake.

Yesaya 49:6

Allah arye, el amu tam pil melibuka dolulunye, nati nyapnuke. “Na mi anda weik mambul pil dopnamnilam bukni, ‘Aning mitik uplyak’ tenen, weik ikin ning ton nyapnukine. Ara, Israel ninye, sik apu koproba Yakub birye deiamukba dadeipdanin yangalamik ninye ara, yuk pera mutuku yu nang arye, obuka sirya dakikce, tapu koubuka sik mutuku tamubuka bobinamike. Winilamik bukni, ance pil donmaminya ani, aninye tuba tonap, dekenamnululume. Yuk nang arye Israel yala ninye weik tonun, bobinamikba, kum danin balamikba, na Allah arye kalikuka melilamsiba, tuba kam unyak ninye ara, an pil dominya deice arye, aninye dobuka weik tonun, na dam ila tamubuka boyanganamnilyame. Na Allah arye, anti, dirina kina deiyoknye kipdeipkiniba, ance Yahudi yala kum ninye ara kunuknak atonun unyak bukni, anggunce, sik talima dirin kilinamlume. Winipnamluma deice arye, na dirina ara Yahudi yala kum ninye sik deice arepneba, moubuka tenebikirye, nati kel kipnamake. Na dirina sik arepneba, adirina eibikirye, sik kanye deipnamaka deice arye, sikce ninye mutuku-mutuku nirya ap, mutuku sirya im sirya daunyak ninye ap, peterebikiba, kekebuka kel kibikirye, sik malye unyak ning batakicopura, narye ninye weik lyepnamne.” Allah arye nyabuk.

Yesaya 44:23

“Ura, im deice ulul ning nirya ap, tukwak mutuku noutam ulul ning nirya ap ara, na Allah Yahweh arye apil nirya dolamse ati, na si erebuka kinamnululume. Aning atonun, mutuku-mutuku nirya ap, yo palpal ap, talye palamle yo ap nirya ara, kanye deibuka mot sepmunce, na si erenamnulume. Wininamluma deiyok ara, na Allah Yahweh arye, Yakub yala ninye nirya ara, akunum lobuka lyelamse. Akunum lyelamsisa ati, na si erenamnulume. Na teleb kibuka dirina weik unilye ning ara, Israel ninye noutam lak kilinune.” Allah arye nyabuk.

Mazmur 150:6

Tonda, Allah elce kwepdeiamukba, tukwak mutuku noutamak kam ulul ning ayala-yala nirya arye, Allah Yahweh el tibuk kanye deibuka, kibuka erebikirye, el siuk erenamake. Nun ni koprop Allah, el si Yahweh ati, “Anda pia teleb ulyame,” nyabuka, el siuk erenamabe. Akunuma. ‘Tukwak mutuku noutamak kam ulul ning nirya arye, Allah ati, “Telebe,” nyapnamak’ tenen, Haleluya nyapne. Na Sisinanye Raja Daud arye, akunuma nyapne.

Mazmur 97:1

Allah Yahweh arye, aning-aning nirya talibuka, deice tam Pia Mikip Weiknye ulule. Ati ara, tukwak mutuku, im sirya, mutuku sirya, unyak ninye yuk-yuk nirya ara, kanye deibuka unamlume. Tonda, weik laut mekwen noutam bukni, mekwen dana-dana tam mutuku noutam unyak nang babye, kanye deipmunce, kil-kil asa unamlume.

Mazmur 96:11

Im deice ap, im noutamak ulul ning ap, tukwak mutuku-mutuku nirya ulul ning ap, ninye nirya ap arye, kanye deibuka unamlume. Tonda, weik pala laut mekwen deibukak babye, laut mekwen noutamak ulul ning nirya arye, Allah atibuk, yupu weik deice arye nyapmunce, el si erenamlulume.

1 Tawarikh 16:32

Aning atonun, weik laut mekwen deibuk sukum babye, alaut mekwen noutam ulul ning nirya babye, aning nirya ara, Allah atibuk weik yupu nyapmunce si erebuka kinamlume! Aning atonun, mutmuta palamle mutuku ulamle ning nirya babye, ninye arye wa wibuka koulamak ning dam palye ning babye, aning yuk-yuk ning nirya arye, weik yupu deice arye nyabuka, Allah ati si erebikirye kinamake!

Keluaran 15:1

Allah arye, Mesir mutuku yin talin nang obukopura, Musa ap, Israel ninye ap, Allah el si Yahweh ati, kanye deibuka, elti teleb nyan mot senmek. Sik nyabuka senmik mot yupu ara, ani. Nun ni koproba Allah, el si Yahweh ati, el si erebuka mot nyanamabe. Allah el mikip weik kiplirye, aning-aning deice tam ulula ati, el si erebuka mot nyanamabe. Mesir mutuku yin talin nang ap, sik kuda deice bukuka balamik kuda ap, Allah arye dobuka, weik laut mekwen noutamak dopkwetebukba, mekwen arye dibuk. Diprobukba, sik nirya dibik.

Keluaran 20:11

“Na Allah arye nyapne. Na sum deice pil kum donamluma deiyok ara ani. Ara, like nakub barye sum deice arye, narye im ap, tuku ap, laut mekwen ap, aning noutamak ulamle ning ayala-yala nirya ap kwepdeipse. Winipsa ati, like tekbarye sum ara, na dikdik semse. Winipsa ati ara, Na Yahweh arye asum ati, teleb kipdeipsirye, ‘Asum ara ‘Naʼ tenen, weik mambul sum,’ nyabuka asum wibuka yuk deipse,” Allah el si Yahweh arye nyabuk.

Mazmur 65:5

Ati ara, Allah ance, ‘Na si eren aik dam yanganamak’ tenen, wipdeipsulum ninye nirya ara, pia weik arye, kanye deibuka unamake. ‘Na dam yakirye, na siuk erebuka unamak’ tenen, akunum welisilyam ninye nirya, nun an dam yabirye, aning-aning nirya, kintinip deipsulum ninguk, talibuka ubirye, weik kanye deibuka unamabe. Ara, Allah an si eren aik, an uminyak, pia teleb sukum yanuka unamabe. Ati nun nirya arye, pin-pin kanye bobuka unamabe.

Mazmur 72:10

Winibuka, elce amutuku nirya talinamle talak noutamak ara, keting wekelban tam, mutuku si Tarsis mutuku noutamak, ninye deiyok talibuka unyak ninye ap, laut mekwen noutamak bukni, mekwen deibuka, sekdongobuk mutuku unyak ninye nirya, el dam yakirye, elda ninye deiyoknye Raja unamla ati, sik talibuka unyak teleb ning nirya dobuka, el dam yanuka arelyanganamake. Tonda, keting yangan tam, Arab mutuku ap, Etiopia mutuku ap, ninye deiyok kibuka, Raja talilamik nang nirya arye, nun mutuku talipnamsil Raja atibuk, si erekirye, teleb ning bobuka, el dam arelyanganamake.

Yesaya 11:11

Aning nirya lakak upnamle talak ara, Allah ara, aning-aning nirya talibuka, mikip weik ululnye birye, el taruk bibiklirye, tupa ton ap bitinye talak deice, Israel yala nang taliplirye, el mapu koproba lyeplirye, sik dana-dana tam unamakak arye, sik mutuku tamubuka bobanamle. Ara, Asyur mutuku ap, Mesir mutuku ap, Patros mutuku noutam ap, Sudan mutuku ap, Elam mutuku ap, Babel mutuku ap, Hamat mutuku ap, tonda weik laut mekwen lilun ap, daunyak mutuku, pia lowak ap, tuba ton aunamak Israel nang ara, tamubuka, sik mutuku koproba, noutam bobanamle.

Yesaya 12:5

Mot sena deice arye, Allah el tibuk, si erenamabe. Ara, Allah elcuk, nun ninye arye kum winipmanto ning weik winilula ati, elce pil dolul ning nirya ara, pia telebe. Tukwak mutuku im sirya, mutuku sirya nirya unyak nang ara, Allah el mikip weik arye, pia teleb pil dolul ning kekenamaka ati, ayupu laka nyalbinamlulume.

Yesaya 48:20

Ati ara, anggun Israel yala nang ara, Babel mutuku arye batakuka, bikbik abuka bimunce, yuk-yuk mutuku nirya binuka unamlume. Anggun nirya ara, Kasdim mutuku batakuka, bikbik abuka bindopnamlume. Narye nyapnusin yupu ara, boyanuka, weik yupu deice arye, ayupu nyabuka, dana-dana tam nirya banamlume. Anggun kanye pin-pin deice arye, “Ayupu nyapnamlume. Ara ani. Nun ni Allah Yahweh arye, el amu tam pil donanye Yakub, elce deiamukba, dadeipdanin yangalamikce deiamik nang, Israel nang ara, akunum lobukaplirye lyepdopnamal atia!” nyabuka ayupu weik tonun nyapnamlume.

Yesaya 60:6

Aning atonun, Midian mutuku ap, Efa mutuku ap arye, boyanganamak unta basam nirya, arebikiba, dopropmunce, anggun mutuku nirya ara, sikcuk yanuka langdipnamake. Tonda Syeba tam unyak ninye nirya arye, pia dekna teleb ning emas ap, pia nintong teleb un ning, el si ara kemenyan ap, anggun dam boyanganamake. Aning-aning boyanganamak talak ara, Allah arye weik mambul pil dobuk ning ati, sik aninye nirya arye, ‘Allah elda pia mambul ulule. Elda telebe,’ nyabuka, si erebikirye sik dam anyuk aning boyanamsiake.

Yesaya 62:11

Na Allah Yahweh arye, “Im sirya, mutuku sirya, ara tukwak mutuku sirya, im sirya nirya, unyak nang nirya ara, ‘Ayupu kekepnamakʼ tenen, ayupu nyapdeipse. Anggun nirya ara, Sion mutuku unyak nang, ara Yudea tam nang nirya ati dilulume! Anggun lyena deiyoknye, Allah akunum yanmasile! Nara, menekuka yanamanba aminyan ara, na mapu koproba, min arye yuk pera mutuku bobinamik bukni, winida narye akunum lyepdopsi Israel nang, melibuka yanganmake! Sik Sion mutuku unyak nang nirya ati, ayupu lak nyapnamlume,” nyapsine.