Yesaya 40:1 - Eipomek

¹ Nara anggun ni koproba Allah arye nyasunune. Narye ‘Naʼ tenen, ati wiamse ninye ati ara, imun kanye bobuka unyak bukni, ‘Sik nirya ara kanye deibuka, telebuk unamak’ tenen, anggun kanye talima kwadina ati, teleb yupu nyalbinamlyame.

Yesaya 40:1 Referans Kwoze

2 Korintus 1:4

Nun ikin usilye talak noutamak nirya ara, elce kanye talima kwa diprongobuka melisulule. Kanye Talima kwa diprongobuka melisilya deiyok ara, ‘Yuk ninye ton ikin uplye talak ara, na mapu arye anang ati, talima kwa diprongobuka melinamak’ tenen, melisulule. Yuk ninye kanye imun upliba, ‘Yata wiribuka deice arye melipsitibye do?’ tenena kume. Ara, Allah arye nunti, talima kwa diprongobuka melisilya mikip deice aryuk, nunce yuk nang ati melinyabe. Yuk ton kume.

Yesaya 51:12

Allah arye, sik Israel nang ati nyabuk. Nara Allah aunune. Narye ayupu nyapsinirye, anggun kanye talima melipsinirye, teleb unamlume. Naryuk anggun nirya ati, kanye pia teleb kipdeipnamsine. Winipnane ati ara, anggunda, yata ning deiyok ati, tukwak mutuku noutam malye unyak nang ati, ilil usulul do? Tukwak nang nirya ara, dibinauk unamake. Winipmanto ara, talye yo mutmuta, keting tin arye opliba, sesal sepmalye touk, unyaka anya arye, sik talye tukwak nang ati, ilil una kume.

Yesaya 51:3

Ati ara, anggun atalak ululum Israel nang babye, moubuka tenipdenululume. Dipkoprop, na Allah Yahweh arye, anggun Yerusalem weik asik noutam ululum nang ati, aminyan talak anggun talima kwa dipnamsine. Naryuk anggun kanye ara, teleb kipdeipnamsina deice arye, anggun Israel yala nang nirya ap, anggun mal olan nang arye, malye kibuka sung-sunga bultakalamik mutuku nirya ap babye, tuba ton ap teleb kipdeipsiniba, anggun nirya telebuk unamlume. Tonda, naryuk anggun aik oldem ubuk ning nirya ap, anggun wa wina ati tuku ap, anggun mutuku noutam pia malye ubuk tuku ap, mutuku ap nirya ara, tuba ton ap teleb kipdeipnamsine. Ara, anggun oldem nirya ara, minop talak Eden mutuku, pia teleb uamuk touk, teleb kipdeipnamne. Tonda, anggun Israel tam ninye unmeka ara, na Allah Yahweh, na pia teleb wa tuku dam, pia telebak atonun kipdeipnamsine. Winipnyopura, anggun mutuku noutam ara, anggun Israel nang nirya ara, kanye deipmunce, pin-pin asa kanye deiceuk kintinipmunce, ‘Nun ni Allah telebe,’ nyapmunce, kanye lon mot pia nyapnamnulume.

1 Tesalonika 4:18

Unamaba ati ara, ayupu nyalamunce, anggun kanye talima melilanauk winilanamlulume.

Zakaria 1:13

Amalaikat arye nyabukba, Allah Yahweh arye, tamubuka amalaikat ati, pia darapdongobuka, teleb nyan yupu, ‘Kanye deibuka, bico tenepnamleʼ tenen, yupu deice arye nyabuk.

Zakaria 9:9

Se, Sion mutuku noutam ululum ninye, anggun weik tonun kanye deibuka, kil-kil asa upmunce, unamlulume. Tonda, anggun Yerusalem mutuku ululum ninye nirya ara, weik tonun kanye deibuka, weik yupu deice arye, ‘Telebe,’ nyanamlulume. Anggun elilulume. Anggun ninye deiyoknye, aning nirya bisina ap, tonda pia diksukum una ap, deiyoknye yanmala ati, dilulume. El ayanamlanye bira, ninye unyak touk dipdebuka, diksukum kibuka, yupu lipsisikuka, bokolina deiyoknye ulule. Tonda, ninye lyena deiyok ning boyanmale. Bukni, anye bira, el kanye talima nimalyap asa arye, ulirye, amu tam ulule. Anye bira, winiryuk keledai basam balye deice bukuka yanganmale.

Yesaya 60:1

Allah arye Israel ninye ati nyabuk. Yerusalem mutuku ululum ninyeo, anggunda mikip kipdopmunce, kanye deibuka telebuk unamlume. Anyapmasin ning ara urdem ati kum nyapsine. Allah el weik dirina dobuka anggun deice deipsiliba dirina kipmasile. Allah arye kanye deipsilirye, teleb kilinamsila ati, bukmunce, lak koprop kibuka winipmunyopura, yuk nang nirya arye sik dirina atonun ning, sik lyena ati akunum yanamal ning ara, eipnamake.

Yesaya 12:1

Allah arye, aning nirya akunum winiplyopura, anggun Israel nang arye, mot nyapnamlulume. Anggunce nyanamlum ning ara, ani. “Se, nun ni Allah Yahweh, nunce antibuk, teleb nyapkiyabe. Ara, ikin kanye bobuka ulamupu bukni, ance nun kanye kwa dipsulumce, mikip kipdeipsulume. Minop talak ara, ance nun malye ulampu ning ati, yu upkukba, weik arye wenyamsulume. Bukni atalak ara, ance nunti, yu tenyamsulum ning ara, akunum kum kipmakila ati, kanye deipsilame.

Yesaya 52:9

Ati, Babel mutuku nang arye Yerusalem mutuku aik daklomikba, oldem uamukak arye, kanye deibuka unamlume. Ara, anggun Israel ninye batakamsikba tuba ululum ninye ap, tuba tamubuka yanganamlum ninye ap arye kanye deibuka unamlume. Aning deiyok ara, Allah Yahweh arye el ‘Naʼ tenen, ninye Israel ninye ati, melibuka lyepsiliba kanye delinamake. Babel mutuku ninye arye anggun Yerusalem mutuku umunye Israel ninye talipsik noutam arye lopdeipsiliba talye kanye bobuka telebuk unamlume. Yerusalem mutuku tamubuka arepnamsila atia.

Yesaya 41:27

Kume, nara anggun ni koproba Allah arye, anggun Yerusalem aululum ninye ati laka nyalamsise. Na Allah arye min yuma anggun Sion mutuku ululum ninye ati lak teleb yupu nyalilamsise. Narye, ‘Anggun elilulume, ayanamak ninye ara, akunum dam yanmak atia,’ nyabuka laka nyamsise. Tonda, naryuk, anggun Yerusalem ululum ninye ati, ‘Lak teleb yupu nyapnamle’ tenen, laka teleb yupu nyalbana ati, anye bira naryuk ninye ton wipdeipsirye, anggun dam dopdeipsise.

Yesaya 50:10

“Anggun noutamak noutam ara, yata nang arye Allah Yahweh ati, ‘Se el weik mambulnye’ tenen, el si erelulum do? Tonda Allah arye wipdeibukba, el pil dolulnye nyalul yupu ara, anggun noutamak arye, yata ninye arye ayupu kekebuka diksukumuk ululum do? Yata ninye do nirya, kunukna bisikuk bamunyeba, dirina kum usilye ninye ara, Allah el si Yahweh ati diba tenebuka unamlume. Tonda, ‘Nun ni koproba Allah elcuk melinamsil’ tenen, anggun kanye nirya el deice uk delinamlulume.

Yesaya 3:10

Ati, sik diksukumuk unyak nang ati, nyapnulyame. “Anggunda, kanye deipnululume. Allah arye anggunti, lyepdopnamle. Ara, sik anang teleb kibuka, pil donyaka deice arye, apil donyak ning ara, nong ning ton doropnamaka atia. Pil teleb kibuka dolonyak touk, dekna ning, pia teleb ning dopropnamake.

Mazmur 85:8

Nun ni Allah Yahweh, ance nunti, ‘Na weik arye bico tenepsinirye, pia teleb kilinamsilame,’ nyabuka, nyalin yupu deice nyapdeiamsulum ning ara, tuba-tuba winipsutumba, dinamabe’ tenen, moropkine na nio. Tonda, ‘Nun ikin weik usilye noutam arye, ancuk melibuka lyepropnamsilam’ tenen, moropkine.

Nehemia 8:10

Nyabikura, Nehemia birye sik Israel ninye nirya ati, nyabuk. “Anggunda kum engenamlum bukni, pia teleb din ning ap, to ning ap, teleb mek ap, dilbinamlume. Winipmunce, yuk tam nang ara, ateleb dina kum kintinipmace nang ati, dobuka arepnamlume. Arup ara, Nun ni koprop Allah, el si Yahweh, el weik mambul sum upmasile. Ati, wini talak ara, engena kume. Nun ni Yahweh arye, el melisilya deice arye, kanye pin-pin usulule. Ateleb kanye talima arisilya deice arye, mikip kilisulule. Ati ara, asum engena kume,” nyabuk.

Yesaya 61:2

Allah tenibukce wipdeipnuk ning ara, Allah Yahweh arye, ‘Aninye, sikti, lyen talak akunum dam ubuka ati nyalbinamlyame,’ nyapnuke. Ara, imun kanye bonmakirye, engebuka unyak ninye ati, ‘Talima kwa baribuka melinamsile,’ nyabuka laka nyanamlyame. Tonda, anggun mal olan nang ati, ‘Kwang dakanamsile,’ nyabuka laka nyanamlyame. ‘Nyabuka nyalbanamle’ tenen, Allah arye nati wipdeipnuke.

Yehezkiel 16:42

Aning-aning nirya akunum winipyopura, narye anggun malye winilamlum ning wenena ati, yu weik upnuka ara, adiparyuk mitang upnamnile. Akunum wenebuka opsinyopura, wini talak, na tuba tamubuka, talye kanye deipnirye, tunim abuka, namin aryuk unamne. Ati wini talak, narye anggunti, yu upnuk ning ap, ‘Se, sikda, ‘Naʼ tenen nang unyake bukni, yata deiyok ati, yuk talye ning si erenyak do?’ tenen, malye kanye bopsise ning ap, kum dalyeba, aning ton pia kum unamne.

Mazmur 85:3

Aninguk kum bukni, tonda, ance wipdeiamsulum nang arye, malye winilamupu ning ara, namin kipsiminyopura, amalye ning nirya kum kipdeibuka bikisilyame. Nun Israel nang arye, malye ning weik winilamupu ning nirya ara, namin kipsulumce, amalye winin ning ara, kum kipdeipsulume.

Penghotbah 3:4

Tonda, engen talak ap, akutun talak ap, engelamak talak ap, kanye deibuka mot selamap talak ap nirya ara, Allah arye tenelye touk, lo arisiliba wininyabe.

Zakaria 1:17

Nyabukopura, Allah Yahweh arye, ayupu ton dukdongobuka nyabuk. “Ayupu ton, kekepmunce, laka nyapnamlume. Na im deice unyak yin talin malaikat nirya talepsirye, sik deiyoknye unirye nyapsine. Narye talibuka unye mutuku ara, tamubuka pia teleb kipdeipnyopura, amutuku noutam ara, aning yala-yala nirya ap, sik bona ap, sikce talinamak ning ara, weik tonun teleb upnamle. Winipnamna deice arye, sik Yerusalem mutuku noutam unyak nang nirya ara, sik talima kwa dibuka melipnirye, pia teleb kipdeipnamne. Min arye, Sion mutuku wibuka deiamse touk, tuba tonap, ‘Asukumuk kipdopnamne. Amutuku noutam pia unamne,’ nyabuka, nyalin yupu arye nyapdeipnamne.” Allah arye nyabuk.