Dipdelulume! Babel mutuku ap, Babel noutam unyak nang ap ati moubuka tenepmunce, dilinamlulume! ‘Asyur mutuku nang ara, mambul nang unyake tenena kume. Deiyok ara, Babel mutuku nang aryuk, ‘Kume, sik Tirus mutuku nang ap, sik mutuku ara, obuka batakibirye, sice buklopnamabe,’ tenebikce, Babel mutuku nang arye, Tirus mutuku nang, sik weik asik dobuka, weik keil poka dobuka antanapdongamika nirya ulubuka sirya dakik. Tonda, Babel mutuku nang arye, ‘Tirus mutuku wekuka obuka sirya daknamapʼ tenen, weik cang keil aik dobuka deipnin balamikce, warikuka kaliklamik ani, sik Babel yin nang arye, Tirus mutuku ninye deiyok nang ulamik aik nirya ara, dakuka batakikce, sik bona deiamik ning nirya ara, alubuka doprobik. Sikce Tirus mutuku ara, akunum dakuka uluplobikba, amutuku ara talye asik ol dem batakik.
Yesaya 39:1 - Eipomek1 Allah arye Raja Hizkia biti kwetebukba, daulamuka ani, aminyan talak ara, Babel mutuku talibuka ulamuka deiyoknye, el si Baladan, elce deiamuknye, Merodak, elce ninye deiyok talibuka Rajanye ulamuk. El Merodak birye, ninye wibuka dopdeibukba, sikce Raja Hizkia dam biyik. Deiyok ara, yuk nang arye, “Raja Hizkia el kanye imun uk dilamuk ning ara, akunum lopmale,” nyabuka, lak nyabikba kekebuk. Ayupu nyabikba kekebukopura, teleb aren ning dekna ap, surat ap sekuka kintinibuka dopdeibukba, anang arye Raja Hizkia dam bobiyik. Gade chapit la |
Yesaya 39:1
11 Referans Kwoze
Atalak ara, Allah arye anggun Israel nang lyepropsilyeura, anggun Israel nang arye, Raja Babel biti nyabuka nalipnalume. “Babel mutuku taleamuk malinye bira, akunum sakmale! Raja birye nunti, yu ubukba, kwalibuka erepdayukce, nun deice ikin ning delilamsuk bukni, aning nirya ara, aminyan talak ton, pia kum upnamle. Elce tonap, ikin kum deipnamsile.
Atalak ara, yuk mutuku-mutuku daunyak nang nirya arye, Babel mutuku weik asik domik ning ati, ‘Se, anyasik ara, dipkoprob pia telebuk ulule,’ tenenyake. ‘Mutuku-mutuku yuk ara, mitik teleb bukni, Babel mutuku tonok ara, pia urasin teleb mutuku ulule,’ tenenyake. Tonda, sik Kasdim mutuku unyak nang arye, Babel weik asik donyak ning ati, ‘Se, anyasik ara, urasin pia teleb mutuku ululeʼ tenen, kanye delinyake. Bukni, na Allah arye, Babel mutuku nirya obuka bataknamne. Ara, winipmanto, min talak narye Sodom mutuku ap, Gomora mutuku ap obuka, sice buklopse touk, winipnamne.
Bukni, Babel mutuku taleamuk deiyoknye birye, el amu tam nang wibuka dopdeibukba, Hizkia el uk dilamukba, dipmanto ulamuk ning ati, ‘Allah arye kam bukdeiamuk ning ara, bikilin ning arebuk ning ati, asipnamapʼ tenen, yayik. Anang arye, asina ati yayik talak ara, Allah arye Hizkia ati, ‘Elce nati dipkoprob diba tenenulul do? Dipkoprop yupu nyapnamle do, kum do? Elce, ‘Na mikip aryuk teleb unune,’ nyapnamle do? ‘Allah kwetepnuka deice arye, teleb unune,’ nyapnamle do? ‘El talima pum tam ara, yatato tenelulce nyapnamle do?’ tenena ati ara, Allah arye tia ati, Raja Hizkia ati kum wenebukce, ‘Dauplye,’ tenebuk.
Winibuk talak ara, dana-dana tam ulamik nang yupa weik, Yerusalem mutuku yangalamikce, Allah Yahweh el si erena ati, teleb aren ning arelyangana ap, tonda Yehuda tam taleamuknye Raja Hizkia biti, dekna don ning, dekna weik ning, boyangana ap winilamik. Winilamikce, atalak arye dipdongobuka, otalak nirya ara, sik dana-dana tam nang nirya arye, Raja Hizkia biti, ‘Elda telebe,’ tenelamikce, si erelamik.
Winibukopura, Raja Daud birye nyabuk, “Nahas elda, na ka koprop ulamuka ati, min talak ara, nun pia teleb ubuka, neika dukdongobuka, ulamnumunye ati, wini talak ara, na adiparyuk, Nahas el mi Raja Hanun bira, ‘Na ka kopropʼ tenen, elti, telebuk tenenamlarya. Eli ap, na ap, teleb ulamnumu touk, na ap, Hanun ap, pia teleb kibuka, neiktoto dukdongobuka unamnam ca,” nyabuk. Nyabuk ning ara, Raja Daud birye, ninye ton wipdeibukba, Hanun el li koprop Nahas, Amon mutuku taleamuka ani, dipmokba weipmik talak, el kanye kwadina ati, melina nang ton dopdeibukura, Amon yala nang ulamik mutuku noutam bukni, Raja Hanun dam biyik.
Kekebuk ning ara, ninye deiyoknye, Raja Tou arye, el mi Yoram wibuka deibukce, “Raja Daud birye, Raja Hadadezer obisibuka ati, “Teleb winipmalum,” nyalbinulyame. Tonda, Raja Hadadezer, elce Damasyik mutuku taleamuk ning nirya ara, an Raja Daud birye, akunum obisipmumu ati, pia weik arye telebe. “Na ni koproba, Raja Tou arye nyaipmakile,” nyabuka, “Lak nyalbinamalume,” nyabuka dopdeibuk. Dopdeibukura, Daud dam binuka, ayupu nyapdeibukba, lak nyalbiyuk. Raja Tou arye, ayupu nyapdeibuk deiyok ara, minop talak ara, Raja Hadadezer arye, Raja Tou ap, elce taleamok nang ap ati, olanauk ulamdika ati, teleb kanye deibukce, ayupu dopdeibuk. Tonda, Raja Tou el mi Yoram birye, Daud el menenga arena ati, kat dekna weik ning, emas ap, perak ap, perunggu ap, aning nirya bobuka, ninye deiyoknye Raja Daud, el dam boyanuka arebuk.
Bukni, atalak noutam ara, Hizkia el kanye erena deice arye, Allah ati, “Se, ance bico tenepniminye deice arye, an kanye aryuk, kam bukeipmanilama ati, telebe,” nyabuka, kum nyabuk. Ati ara, Allah arye el Hizkia ap, tonda Yehuda tam mutuku noutam ulamik nang ap, Yerusalem weik asik noutam ulamik nang ati, yu ubukba wabukce, sik nong deice ikin ning deibuk.