Weik asik domikce ulamikak, tonoknye birye kalikuka dinmokba, yanganmoknye biti Yesaya birye nyabuk. Edom tam noutam bukni, Bosra mutuku arye yanganmoknye bira, el ongopmok baju deice ara ining bi bol pipmokba, ining bi upmoke. Anye bira, pia teleb baju ongopmokce, mikip arye yanganmokak, ninye aik kalikmoknye eibukce, asipdeyuk. “Anda yatanye yanganmalam do?” nyabuka asipdeyuk. Nyabuka asipdeyukbuk, ayanganmoknye birye tamubuka nyabuk. “Nara diksukum yupu nyananye yanmane. Nara mikip weiknye ununa anya arye, Allah el ‘Naʼ tenen, ninye nirya ati, sik Lyena Deiyoknye unune. Na mikip weik ununa anya arye, anggun nirya ati lyepsitinye,” nyabuk.
Yesaya 34:6 - Eipomek6 Allah el ninye on parang ya arye, ninye weik akunum oplyopura, aya deice ara, Edom mutuku nang, sik ining ap, meta apuk, weik palipnamle. Winipmanto ara, Allah arena ati, ninye arye kam ulamle ning, domba basam mi ap, kambing basam ap, uniryuk yim domba basam talima ap, obuka sekmakiba, aning arye ining ap, meta ap, sik ya deice palilamle touk, Allah el ya babye, atonun kibuka akunum winipnamle. Deiyok ara, Allah arye, sik Edom tam unyak nang obukce, sik mikip deiyok mutuku, Bosra mutuku nang babye, akunum obuka sirya dakuk. Dipkoprop, Edom tam mutuku unyak nang babye pia weik tonun akunum oplobuke. Gade chapit la |
Yesaya 34:6
25 Referans Kwoze
Anyapmasin yupu ara, talye kum nyaplopmasine. Aning kum bukni, na Allah Yahweh ara, dipkoprob na si deice arye, nyalin yupu akunum nyapmasine. Ara, Edom tam bukni, anggun weik asik domlumce, ‘Nun mutuku weik deiyok anyeʼ tenen, Bosra mutuku asik noutam unyak nang babye, sik nirya ara, kum kipdeipnamnarya. Winipyeura, yuk mutuku nang arye, akota eibiceura, sikce, ‘Se, Allah arye, anang sik wenena ati, obuka malye kibuk ning ara, weik ikin,” nyabuka, malye nyanamake. Ton nang ara, sik amutuku nang ati, nalibuka akutupnamake. Ton nang ara, anggunce, ‘Nun like,’ tenenyak nang ati, “Edom mutuku nang ati, Allah arye subukce, oplobuk touk, anggunti, opsuturye, bataksutue,” nyabuka, sik deice malye yupu nyabuka supnamsiake. Winipniba, ninye arye akutunamake. Tonda, sik anang si deice ara, sulamak nang atonun unamake. Edom mutuku noutam domik asik nirya ara, uluplobikceba, asik oldem upnamle. Tonda, aminyan talak babye, anyasik nirya, tamubuka tonap, lipsisikuka pia kum donamake. Narye malye kibuka bataknamnak nirya ara, pia kum danamle.” Allah arye sik Edom tam ulamik nang ati, nyabuk.
Nabi Sefanya arye, ayupu nyabuk. Allah Yahweh aning-aning nirya talilirye, weik tonun erebuka, Pia Mikip Weik Deiyoknye ulule. Elce, ‘Tukwak mutuku unyak nang nirya ati, sik wininyak ning ara, teleb do, malye do?’ tenen, dipdesilirye, wenepnamsil talak, akunum dam upmala ati, anggun tukwak nang nirya arye, kekeplulume! Ara, Allah Yahweh, el dam yamunce, yupu nyana pia kumce, pia tunim abuka unamlume. El Allah arye, tukwak nang nirya, yupu bokeipnamle sum, akunum dam upmala ati, elce tenyamukce, akunum wiamuk nang nirya ati, akunum kintinip deipmale. Ara, winipmanto ara, ninye arye, ‘Allah ati, si erenamap’ tenen, sikce talye kam un ning, domba basam do, kambing basam do, obikirye, uku dongolamak touk, Allah arye anggun Israel yala ninye ati, atonun winipnamsile. Allah arye, ‘Anang ara, ‘Naʼ tenen, nang unyaka ati, na si erena ati, wenebuka opnirye, sirya daknamne,’ akunum tenebuka ati, aning ara, adiparyuk winipnamsil ati, anggunda, Allah el dam yamunce, tunim abuka unamlume. Ara, sik malye-malye weik wininyak nang ara, Allah arye sikti, weneplirye, opnamla ati, akunum kintinipmale.
Winipmunyopura, sik amutuku yin talin nang nirya ara, adiparyuk obuka, sirya daknamlume! Min talak ara, weik yim sapi basam, mikip weik ulamle touk ulamik bukni, wini talak ara, ayin nang nirya opmunce, anang nirya ara, kum kipdeipnamlume. Ura, sik Babel mutuku yin talin nang nirya ara, bicoe! Sik wenebuka ona sum, akunum dam upmala ati, anggunce adiparyuk opmunce, kum daneipnamlume!
Nyabuka asipdeyukbuk, ayanganmoknye birye tamubuka nyabuk. “Nara anggur tapu duk dakuka mek purunmangu sukum unmace nang, sik baju deice ining bi, bol pilamle touk, nara malye-malye winin nang weik onmanu talak ara, na baju deice ara ining bol pipmanile. Amalye nang onmanu talak ara, yuk pera mutuku nang ton kum melipmanunge. Na aryuk amalye nang obukapnurye sirya dakmane. Ati aining bol pipmanil ning ara, anggur mek ining bi kume. Ara, ninye ining bol pipmanile. Ara, ninye mutuku-mutuku nirya malye winiceba, na yu unulul ninye nirya ati, obuka yaniptapmanba, sik ining ara aupmanil atia. Sik ining weik unmoa anya arye, na baju nirya ining bol pipmanile,” nyabuk.
Winipmanto ara, ninye arye mek weik tonun dibikiba, mitika nun ton kum dipmanto upliba bataklamaka touk, Allah babye, el ninye on ya ara, im noutam ap, im deice ap, wamlye ning akunum obuka, sirya daklyopura, aminyan talak Edom mutuku ton yanuka, amutuku unyak nang ton, obuka sirya daknamle. ‘Edom mutuku nang wenebuka opnirye, kum kipdeipnamneʼ tenen, Allah minop talak akunum kintinip deiamuk ning ara, atalak sik deice uk yaliba dopropnamke.
Tonda, Allah arye melilamukba, sik sapi basam ap, kambing basam ap, moum yung mek weik aubukba, dololamikce dilamik. Tonda, domba basam ap, kambing ap, nong weik ning areamukba, obuka tup diamuk dilamik. Ton ning ara, Basan mutuku domba yim ning, pia teleb ning ton areamukba, obuka dilamik. Tonda jagung atonun din ning, gandum ap, tonda anggur mek teleb ninguk, areamukba dobuka dilamik.
Aya ara, akunum kitibuka deipse ning, narye atam nang nirya opnamne. Tonda, narye aya ara, akunum kitibuka deipse ati, aya dopropnyopura, el si ara perereng ablirye, mile daklamle atonun upnamle. Na kayapu nirya, wenen ning yanamle ning ati, anggunda teleb kanye kum bobuka unamlume. Minop talak ara, anggun malye winilamlum ning ati, winipmanto ara, talye yo taruk arye bokuka wenepsise bukni, anggunda, ‘Deiyok aning ara, mambul kume, dauplye,’ tenelamlumce, bikamlumcuk, ulamlume. Aning deice arye, moubuka kum bikamlume.
Ati ara, narye sik wenena ap, ona ap ati, parang ya kintinipniba, parang ya yu arye, mele dangdanganamle. Aya bopnamne ning ara, ‘Allah ara, nun like,’ tenenyak ninye ara, wenebuka ona ati, kintinibuka deipnamne. Sik malye nang arye nati, malye winilamnik touk, sikti wenebuka, yupu lipsisikuka bokeipnirye, oplopnamne.
“Yonatan bira, mikip dobuka, mal bobiyukce, mikip weik nang ton oplomuk. Aning atouk, Saul el ninye olamak ning, parang ya arye dobuka, ninye tup weik arye, seklobukba dibik ati, el parang ya babye, urdemuk kum bobinmoka ara, talye dem kum bobuka yayuke. Elce ton ninye obuk. Ati, Saul ap, el mi Yonatan ap arye, ninye weik oplopdik.” Daud birye nyabuka, mot deice arye, weibuka sebuk.
Diba, nun ni Allah, ance Edom mutuku ulamik ninye, sik malye winilamik ning ati, luba kina kume. Pia teninamlyame. Sik Edom mutuku ninye arye, pia malye ulamik ning ara, kum luba kinamlame. Ara, sik Edom yala ninye arye, Yerusalem mutuku noutamak dobuka ulamupu aik, uku dongopnuyik talak, malye nyanmek ning ara ani. “Anyaik nirya batakana kume. Asik-asik nirya dakuka bataknulame. Daknin banmamunya ani, aning nirya babye batakana kume, akunum nirya daklopnamlume,” nyapdeiamuk. “Anyaik-anyaik nirya ara, dakuka uluplobibiba, keil pala deice deibik ning ara, lakak upnamle. Anyaik nirya dakuka uluplobibiba, aik oldem upnamle,” nyalamik. Nyabikba, aik deiya deibuka domupu ning nirya dakuka uluplobik. Winibika ati, aning ara, Allah ance pia kum luba kinamlame. Nun ni Allah, anda awinibik ning ati, weik arye wenenamlyame.
Kanye talima kat ulamsuka deice arye, malye weik ulamluma ati, narye obuka sirya dakanamsine. Wenebuka opnamsina deiyok ara ani. Ara, narye anggunti yukulamsise talak nirya ara, anggunce na yupu kum kekelamnulumce, bataklamnulume. Aning ati narye anggunti, yupu nyalilamsise talak nirya ara, anggunce na yupu kum kekelamnulume. Narye, ‘Aning ara mem ning ati, winina meme,’ nyapdeiamsise ning ara, tuba winilulume. Aning atonun, narye, ‘Aning ara na like,’ nyabuka laka nyalamsise ning ara, anggunce tuba winilulume. Winilamluma deice arye, narye nyalamse yupu mitik kililamnulumce, anggun bidamang winin ning atibuk weik kepropnin, balamlumce, nati yanibuka malyeuk kilalume. Ati, narye nyapniba, yuk pera mutuku yu ninye arye, sik nirya obuka sirya dakanamake.”
Narye sik yuk pera mutuku mal olan nang ati, lo arepnirye, dopdeipniba, ninye una kum, pia kata ubuk mutuku kon deice ara, yanibuka banmakirye, ‘Naʼ tenen nang ati olyanamake. Narye sik mal olan nang dopdeipniba, amutuku nirya ara, yanuka malye kipdeipnamsiake. Winipniba, ninye tonok nang babye, teleb ton kum unamle. Winipmanto ara, na Allah Yahweh arye, na ninye on ya dobuka, Israel nang unyak mutuku noutam nirya, omutuku sirya, atam sirya, anoutam nirya babye, Israel nang weik tonun obuka, sirya dakanamake! Ninye tonoknye babye, talye kanye bobuka, kum unamake.
Ati ara, se, sik deiyok-deiyok nang nirya ara, bicoe! Anggun nirya ara, engepmunce, uku diplyeba, sice buklopmalyak, tuku deice mapra engenamlume. Winipmanto ara, Allah el domba basam atonun nang, talibuka weilulum nango, Allah el tenebuk sum, akunum kiplyopura, anggun nirya ara, wenebuka opnamsilca. Akumopura, ton nang ara, anggun ulamlum mutuku noutam arye, yakuka donoksiliba, yuk pera sukumuk, sakuka bindopnamlume. Winipmanto ara, kira tuku arye dobuka, teleb uka bikirye deibikiba, urasin pia teleb mek makau memamikiba, tukwak sakuka poulbilirye, colamle touk ubuka, wenepsilirye opnamsile. Ati ara, anggun nirya malye nyabuka, tukwak mabuka ninikmunce, ngalukuka engenamlume.
Winipnamalum bukni, na Allah Yahweh arye, anggun nirya ati nyapsine. Nara Allah, pia deice tam erebuka, aning-aning nirya talibuka, Pia Mikip Weik Deiyoknye unune. Nara im deice unyak yin talin malaikat nirya, sik deiyoknye unune. Ayanamle talak ara, ‘Na Allah ati, ‘Nun lik,’ teneninyak nang nirya ara, wenepnirye, obuka sirya daknamne’ tenen, na akunum tenyamse talak, mambul weik talak akunum dam uple. Atalak noutam ara, mutuku sirya, im sirya nirya unyak nang arye, ‘Allah ara, nun lik’ tenen, na yupu yaninyak nang nirya ati, na yu weik upnuka deice arye, anang nirya wenebuka opnamna ati, sik nirya ati, kwang daknamnarya! Nara Allah, na ninye on ya arye dobuka, anang wenena ati, onmanya ani, sik ining pia weik banamle. Na ya arye sik ining dinmalya ani, akunum winiplirye boupnamle. Winipnamla deiyok ara, ani. Awinipmanto ara, nati akunum diba tenebuka bikamnik nang arye, ining ning obikirye, na si erena ati, aning boyanuka, uku dongolbalamak touk, anang olan talak ara, na Allah ati, ‘Nun lik,’ tenenyak nang nirya, akunum opnyopura, na Allah arye, ‘E, akunuma, na kanye deipne,’ tenepnamnarya! Ati atalak noutam ara, nara Allah Yahweh, pia deice tam erebuka, aning-aning nirya talibuka, Pia Mikip Weik Deiyoknye unune. Nara im deice unyak yin talin malaikat nirya, sik deiyoknye unune. Ati, na Allah ati, ‘Nun lik,’ teneninyak nang ara, utam dabu tam binamuk mek, el si ara Efrat mek dam, amutuku noutam, yin talin nang yupa pia weik tonun opnamaka ati, narye, ‘E, akunuma, na kanye deipne,’ nyapnamnarya!
Nara, Allah Yahweh arye, im deice yin talin malaikat nirya ara, sik deiyoknye ununa ati, mikip weiknye unune. Narye, anggun Edom tam ululum nang ati, ayupu nyapsine. Edom tam bukni, weik asik Teman mutuku unyak nang arye, moubuka kum tenebikirye weik kel deice nyapmanto yupu ara, akunum kum ubukba, min nyanyaka ara yata ati do? Tonda, ‘Moubuka tenebikirye, namin aryuk pil donamabeʼ tenen, teleb un yupu uk nyanyak deiyok nang ara, sik mutuku tuba kum unyak do? Sik weik kel bikamika deice arye nyalamik yupu nirya ara, akunum kum upmal do?
Ara, mitik tonun kume! Narye lo arepnyeura, yu nang arye, anggun mutuku nang nirya obikiba, anggun mutuku deice nirya ara, ninye nong bulubuka deiplopnamake. Tonda, mutuku kon deice ap, anggun mutuku mek balamle ak ap, mutuku amu tam, lu mutuku nirya ap, mek sukum ap nirya ara, ninye on parang ya arye, sik tam nang obikirye, deibikiba, sik anang nong diamuk langdipnamlarya! Anggun ululum mutuku-mutuku nirya ara, narye obuka, sirya daknyopura, pia asik oldemuk upnamle. Aminyan talak babye, ninye ton amutuku noutam, pia kum yanuka unamake. Anggun mince dolamlum weik asik noutam ara, ninye ton tuba kum unamake. Tunim anauk upnamlarya! Aning nirya winipnamne deice arye, anggun Edom mutuku nang arye, ‘Se, dipkoprob elda, Allah Yahweh ulule. Elda tonokaʼ tenen, biknamnulume.
Ara, anggun kwang dakna ati, winipnamsine. Anggun Edom mutuku nang arye, Israel yala nang talilamik ning nirya ati, ‘Kume nuncuk aning alubuka dopropbibirye, nuncuk aning talibibyakarye, kanye deibuka unamabe,’ tenelamlume. Aning nirya ara, na Allah arye, anggun Israel nang ap, Yehuda yala nang ati, bokuka arepsirye, ‘Aning ara, sikcuk pia talinamake. Amutuku ara, sik ning diamuk unamleʼ tenen, arepse. Bukni, anggun Edom mutuku nang arye, na mapu Israel nang, sik mutuku alubuka doproplumba, akunum tunim anauk ubukopura, anggunce kanye deiamlume. Ati, Israel nang ap, sik mutuku ap, pia tunim anauk uamuk touk, narye anggun Edom mutuku nang ati, wenebuka opsinyopura, anggun babye, anggun mutuku noutam babye, pia kum kipdeipsinyopura, asik oldemuk upnamle. Tunim abuka, oldemuk upnamlarya! Narye, kum kipdeipsiniba, tunim anauk upsilyopura, Seir mutuku noutam ap, Edom mutuku noutam ap, unyak nang nirya arye, ‘Se, dipkoprob Allah Yahweh ara, eluk Pia Mikip Weik Deiyoknye ululaʼ tenen, na siuk Yahweh biknamake.
Allah el si Yahweh arye, ayupu nyabuk. Sik Edom mutuku ninye arye, tuba-tuba weik arye malye wininyaka ati, dipkoprob narye, sik amutuku ninye ati, wenebuka opnamne. Minop talak, sik malye winilamik ning ara, namin kiamsirye, minopce wenebuka kum oplopse bukni, wini talak ara, sik malye winin ning weik wininyaka ati, aninye opnamne. Aninye ati opnamne ning ara, pia dipkoprob kum bataknamne. Deiyok ara, sik Edom mutuku ninye arye, sik mining yala nang, na mapu Israel nang, weik arye olamika ati, kwang dakuka opnamne. Ara, sik kayapu koprop ati, bico tenena kum arye, Israel ninye atibuk mal pilamikce olamika ati, sik Edom ninye wenebuka opnamne. Edom nang arye Israel ninye ati, kum namin kilamikce, pia yu ulamukba, tuba-tuba tenipna arye, olyangalamik ning ati, opnamne.
Dipkoprop, anggunce na si erena ati pil donauk umumnya babye, na Allah arye sik wenena ati, kanye imun ning dopdeipnyeba, anggun mutuku asik dobuka umumnya noutam ara, ikin ning yanamsile. Winipnyopura, anggun amutuku noutam ululum nang nirya arye, kanye imun kanye bobuka, ‘Se’ tenen, malye nyabuka engenamlume. Tonda, anggun mutuku weik asik ara, mesba deice ining barilamle touk, anggun wenen ning arepsinyopura, anggun anyasik noutam nirya ara, ining weik aupnamle.
Piblisite