Yesaya 33:2 - Eipomek

² Nun ni koproba Allah Yahweh ance bico tenepsimince, melinamsilame. Anda asum-asum nirya, pia talibuka usimince melibuka kalikinamsilame. Beren tam babye, sintam babye, atalak-atalak nirya, ‘Nun imun kanye usilye talak ancuk melibuka lyepnamsilam’ tenen, moropkiyabe. ‘Ancuk, dan talak arye lyepnamsilam do?’ tenen, dinauk unamabe.

Yesaya 33:2 Referans Kwoze

Yesaya 59:16

Allah elce eililamsuka ati, teleb diksukum winin nang, tonok babye panabuka tiklirye, Allah el mapu anggun malye ning kum danalina ap, kanye tamubuka, teleb kilina ap, pil dopmantonye pia kum ubuka anya arye, elce, ‘Se yata ati do?’ tenen, malye kanye bobukce, ‘Na bidamnye aryuk, aning lipsisikuka dopnirye, tuba tamubuka, teleb kipdeipnamne,’ tenebuk. Utenebuka deice arye, Allah ara, mikip weiknye ulula anya arye, el mikip aryuk, el mapu koproba ati, obuka sirya dakik nang ati, malye kiplobuk. Ara, elce, ‘Na mapu koproba sikti, lyepdopnamne,’ tenebukce, sik mal olan nang ati, obuka kum kipdeibuk. El pia diksukum ulya deice arye, melibukabukce, el mapu lyepdobuk.

Yesaya 25:9

Atalak ara, nunda el ‘Naʼ tenen, nang arye, “Anggun nirya dilulume! Dipkoprop Allah Yahweh, elda nun ni koproba Allah ulule. El siuk erenyabe. Minop talak arye, dipdongobuka atalak noutam babye, nunce, ‘Se, Allah atibuk, dan talak yalirye, nunda lepnamsil do?’ tenen, pia dinauk ulamupu bukni, wini talak ara, akunum yale! Dib Koprop el atibuk, ‘Dan talak melilyanamsil do?’ tenen, dilamupu. Bukni, wini talak ara, el akunum yanmasile. Elda, nun Lyena Deiyoknye usulula anya arye, adiparyuk pin-pin kanye bobuka upbibirye, elti, buk si erebibirye, kil-kil asa unamabe. Ara, elce nun akunum lyepsuka atia.” Aning nyanamabe. Kanye deibuka unamaba ara, talye ati kum bukni, Allah Yahweh, el taruk mikip, amutuku dup, Sion mutuku dup deiplirye, nun lyepdopnamsila ati nyapsine!

Mazmur 60:11

Nyabukba, Israel nang sik ninye deiyoknye Raja arye nyabuk. “Bukni na nio, na mal olan nang ati, yatanye birye, nyaptuba, mikip weik nang aik dam bobinamnil do? Aning atonun, ‘Na mal olan nang olbinun’ tenen, yatanye birye, leibuka bituba, weik pala mutuku, el si Edom tam noutam bobinamnil do?

Mazmur 62:8

Ninye tukwak nang arye kum bukni, ikin upmanilibuk na ni Allah arye, lyepnilyopura, teleb kibuka erepdeipniliba, yuk nang arye, nati, si erebuka kininyake. Allah ara, elcuk melibuka kalikinulule. Yata ikin ning do nirya, el dam kum yanuka opnutua ati, el dam ara, na telebuk unune. Elda pia mikip weik keil aik atonun, tonda weik mutuku kon keil atonunye ulule.

Mazmur 62:1

Raja Daud birye, Mazmur mot sekuk. Ara, ‘Allah yupu mot, el si Jedutun lelim nyalamle touk nyanamak’ tenen, sekukce, Allah yupu mot nyana deiyoknye biti, arebuk.

Mazmur 46:1

Mot nyana ati deiyoknye bira, Daud deiyok kipnaba, sik Korah mutuku deipkirikdop nang nirya ara, Allah ati mot nyabuka, si erelamik.

Keluaran 14:27

Nyabukura, Musa el taruk laut mekwen deice pukukba, berekeltakne talak arye, Mesir ninye wekmeka, alaut mekwen nirya tamubuka noutam bisikuk yayuk. Yayukce Mesir ninye amekwen noutamak bikbik abuka bayikbuk, Allah el si Yahweh arye mekwen noutamak arye siknibuka obuk.

Hosea 14:2

Tonda tamubuka Allah el dam yamunce, anggun kanye imun usilye ning nirya boyamunce, Allah ati moronamlulume. Moronamlum ning ara ani. “Se, nun ni Allah, ‘Nunce anti moropnuyap yupu ara kekepsutume’ tenen, moropnukiyabe. Ara, nun malye wininyap ning ap, tenepye ning ap nirya ara, ‘Ance namin kipsimince, nun malye winin ning kum daneipsiminyopura, nunti teleb kipdeipnamsilam’ tenen, moropkiyabe. Winibuka teleb kipdeipsiminyopura, nun nirya arye tuba tonap, an siuk erenamkiabe. Aning ara, nyalina yupu deice arye nyapkipye touk, dipkoprob wininamabe.

Ratapan 3:23

Allah arye, ‘Naʼ tenen nang ati ara, tuba telebuk kipdeipnamsine,’ tenesulul ning ara, asum-asum nirya, beren tam talak arye deiyok koubuka, tenena uk usilirye, telebuk kilisulule. Allah elce nunti bico tenesilirye, elce, “Winipnamsine,” nyasulul yupu nirya ara, dipkoprob nong upnamle. Kum bataknamle. Tuba weika arye, teleb kibuka melinamsile.

Yeremia 14:8

Diba, nun ni Allah, anda nun Israel ninye ati, pia melibuka kalikisilyamnye ulyame. Tonda, yu ninye arye nunti, opmanto usinyak talak ara, melibuka lyesilyame. ‘Allah elcuk winisulule,’ tenekinyabe. Bukni, yata deiyok ati, ance kum kekelamsiyak nang atonun upnamsilam do? Winipmanto ara, ninye asik nang, tia yanuka tonok lukunyan yanuka mapmaca, adiparyuk balamak nang atonun upnamsilam do? Tonda, yuk mutuku ninye asik nang arye, nun mutuku tikilyanabica ani, adiparyuk tamubuka, bisik balamak nang atonun upnamsilam do?

Yesaya 40:10

Anggun nirya ara adilulume! Aning-aning deice tam ulirye, Weik Erena Deiyoknye Allah ara, elce, ‘Winipnamne,’ tenelye touk winilule anya arye, el mikip weik deice arye yanmale. El taruk koproba mikip deice arye, im sirya, mutuku sirya nirya unyak ninye ati, malye kibuka talinamle. El taruk mikip deice arye malye kibukce, talinamle ning ap, ninye ap ara, boyanmale. Tonda, el mining mapu, sik dengna ati arenamle ning babye, talibuka boyanmale. Aning-aning nirya menekuka yanganmal buk, el Allah ara aminyan yanganmale.

Yesaya 26:16

Se nun ni Allah Yahweh, nunda ikin weik ulamupu talak ara, ‘Allah aryuk melipnamsilʼ tenen, anti morolamkupu. Ance nunti akunum wenyapsulumba, kanye imun ulamsuka ani, nunce, ‘Nun ni Allah antibuk, melipsilyame!’ nyabuka, morolamupu.

Yesaya 26:8

Nun ni koproba Allah, ance nunti, “Anggunda aninguk wininamlume, aning ara, pia kum wininamlume,” nyabuka nyalisiminye ninguk, talibuka dobolbanyabe. Tonda nunce, ‘Se, nun ni Allah, el ap, elce mambul weik pil dolul ning ap, ninye mutuku sirya, im sirya nirya kel biktinge,’ teneplirye, nun kanye talima ap, nun tenen ning ap nirya deice arye, antibuk patasiliba, tuba-tuba tenikinyabe.

Yesaya 25:4

Aning babye talye ati kume. Deiyok ara, ance sik mikip mitang nang ap, aning-aning kum talikirye, pia bona utoto kum nang ap ara, ancuk sikti, kalikuka melinauk ulyame. Ati, ‘Elcuk melibuka kalikinamsilʼ tenen, an damuk wekelyanganyake. Aning-aning nirya patanauk unyak nang, sik bona utoto kum nang ara, sik kanye imun ning uplyopura, sikce an damuk wekelyakirye, tunim nyabuka talibukba, telebuk unyake. Weik kumanya ap, mok ap, yanganmalya babye, ancuk sik lelildongonanye ulyame. Tonda, keting buppu weik yu ning upmalya babye, ancuk sik lelilongonanye ulyame. Tonda, pia malye yu nang arye olyanamak talak ara, weik kumanya ap, mok ap arye yangalamle touk ubuka, olyanamak talak ara, ancuk sik mikip kum nang ati, kalikisilyame.

Mazmur 123:2

Ara, nun ikin unyaba ati, ance nunti dipdebuka melipsilyame na nio. Nun nirya arye, ‘'Nun ni Allah, elcuk melinamsil’ tenen, an atibuk patapsilyeba, anti morokinyabe. Winipmanto ara, bona talin nang, sik amu tam talye pil donyak nang arye, ‘Na deiyoknye birye, yata yupu nyapnamasil do?’ tenen, el dam dinauk unyak touk, nunce an dam dina ap, kekena ap unyabe. Diba winipmanto ara, talye pil dolamlye kil arye, el deiyok kil dam yanuka, ‘Yata yupu nyapnunil do?’ tenen, ebuka dina ap, kekena ap, ulye touk, nun babye, an dam yanuka kekenauk unamabe. Aning ati ara, nun urasin erebibirye, ‘'Nun ni Allah, el si Yahweh ara, dan sukum ulul do? Dan talak yalirye, teleb yupu nyapsilirye, melibuka lyepnamsil do?’ tenebuka unyabe. Tonda, anti dipdebuka kekenauk unyabe na nio. Ara, nunda malye wininyak nang unyap bukni, Allah arye aning namin kipsilirye, el kanye aryuk bico tenepsilirye, teleb kibuka melinamsil talak ara, min kum yanmalye talak nirya ara, nunce el dam yanuka, dinauk unamabe.

Mazmur 91:15

Anye bira, el ikin ning doproplirye, kanye imun uplye talak nirya ara, elce, “Na ti melipnilyame,” nyabuka, moropnilyopura, na kekepnirye, elti, pia kalikuka melinamne. Tonda, anye bira, el ikin ning dololamlye ning ati, lyepnirye, el dobuka ereipnamne. El anye bira, erebuka deipnyopura, yuk ninye nirya arye, el tibuk, si erenamake.

Mazmur 90:15

Na ni Allah, nun malye winibupu dekna ati, ikin ning areamsulumba, dololamupu ning nirya ara, ‘Apununa ati, kanye teleb bon ning, weik arye arenamsilam’ tenen, moropkine.

Mazmur 62:5

Sik yu weik nang ara, ‘E, yuk nang arye, aninye deiyok nang ati, ‘Telebe,’ nyabuka, si erebuka kinyaka ati, ‘Aning ara nun likʼ tenen, ‘Ati ateleb nanguk opnamabe,’ tenebikirye, pia tenenauk unyakce, yupu talinyake. Tonda, talye yupu nyana ap, kwinisa don yupu ap ara, sikce, ‘Aning ara, telebe uka,’ tenebikirye, kanye deibuka, pin-pin kanye bonyake. Sik si bambol arye nyakce yupu ara, tenepce arye, kekena teleb yupu nyanyak bukni, dipkoprob sik kanye talima noutam ara, ‘Anang ara, nun pia lik,’ tenebikirye, lik yupu nyanyake.

Mazmur 50:15

Tonda, na Allah arye nyapsine. “Ikin weik upsilye talak ara, anggunce nati, ‘Naio melibuka lyepropsilyame!’ nyabuka, moropnumunyeura, dipkoprob narye yanuka, lyepropnamsine. Akunum lyepsiminyeura, anggunce na si erebuka kina ati, “Nun ni Allah, pia teleb ulule,” nyabuka, yuk nang kekenak, lakak arye nyanamlume.

Mazmur 46:5

Bukni, Allah arye kintinip deibuk mutuku, el unak ara, pia teleb mek, amutuku noutamak pu dobuka biyuke. Winibukce, mek taruk bokukce, dana-dana biyuk mek nirya ara, amutuku unamak ninye eibikirye, kanye delinamake. Amutuku ara, malye ning ton kum ulirye, pia teleb mutuku ati ara, aning-aning deice tam, erepra ulula deiyoknye, Allah ara, amutuku ulule.

Mazmur 37:39

‘Nun ni Allah ara, pia mambulnye ulule’ tenen, diksukumuk wininyak ninye ati, Allah el si Yahweh aniryuk lyesulule. Tonda, weik imun ning, sik dam yanamle talak ara, Allah arye sikti, melibuka lyepnamle. Winipmanto ara, ninye arye, ‘Nun mal olan nang arye opsicak’ tenen, keil aik pum tam duknubuka balamak touk, sik diksukumuk wininyak ninye arye, ikin ning, sik dam yalyopura, ‘Allah aniryuk melibuka lyepnamsil’ tenen, Allah el dam anyuk banyake. El amu tamuk ubicopura, Allah Yahweh arye, aninye ati pia melilule.

Mazmur 25:3

Bukni, na kele, yatanye birye do nirya, ninye arye anti, diba tenepkikirye, ‘Allah elcuk melibuka lyepnamnil’ tenen, an si deice moropkikcopura, an adiparyuk dipkoprob melibuka lyelonamsilyame. Bukni, yata nang do nirya, deiyok kum upmalibuk, tilila yupu deice arye, talye-talye nyapkikce nang ara, ance anang wenepminba, sik anang nirya ara, alye dakanamake.

Mazmur 143:8

Ati na nio, na patapnil ning ara, ani. Ara, ance nunti, “Weik tonun bico tenepsinirye, pia teleb kilinamsine,” nyapdeiamsulum ning ara, dipkoprob aning nirya, tuba wininamsilame. Ati ara, narye beren tam talak nirya ara, aninguk tuba-tuba tenenune. Ara talye ati kume. Deiyok ara, ani. Ara, narye anti, ‘Allah aryuk, pia melinamnil’ tenen, pia diba tenekunune. Na talima nirya ap, na kanye ap, nong ap, ‘Na ni Allah, ancuk melinamnilam’ tenen, an deiceuk delikunune. Ati ara, ance nati, “Teleb bisik asukumuk binalame. Teleb winin ning ara, ani,” nyabuka, peterepniminba, dipkoprob teleb bisik biktinyopura, abisikuk binamne na nio!

Mazmur 27:1

Daud birye nyabuk. Allah ance na dirina kilina ap, na lyena ap, Deiyoknye ulyame. Ara, weik kat poka cang arye erebuka dolamak touk, Allah Yahweh ance erebuka uminyeba, nara an amu tam unune. Ati ara, yuk nang nirya ati, ton birbir apnilirye, ilil kum unamnile.

Yesaya 17:10

Israel nango, anggun nirya kekeplulume! Na Allah arye, aning nirya winipnamsina ara, talye ati kuma. Deiyok ara, ani. Allah arye anggun nirya lyepromsuk deiyoknye bira na uka. Tonda, na Allah arye anggunti tuba melilamsirye, nara weik keil mutuku dup erebuka buklyeba, ninye arye, ‘Yu nang arye opsicakʼ tenen, akeil deice welebikirye duknulamak touk, ulamsise. Naryuk anggunti, pia melibuka kaleklamsise. Bukni anggunce nati akunum lubakipnulume. Aning ati ara, anggunce sik isa si erena ati, ‘Nun isa arye melipnamsiakʼ tenen, urasin teleb yala ning dobuka, wa wibuka koululume. Aning atonun, teleb pamlye ning taruk ton sekmunce, aning isa si erena ati tuba koululume.

Yesaya 37:3

Nabi Yesaya dam binuka, nyabik. “Na nio, nun deiyoknye Raja Hizkia birye, ‘Nyapnamlume,’ nyapdeipmasu yupu ara, nyapnukiyabe. Ara, atalak ara, sik Asyur mutuku nang arye, nun Yudea tam nang nirya ati, olyanamasiyaka anya arye, atalak ara, kanye imun weik upsile. Allah arye ikin ning deibuka wenepsilirye, malye kiplisulula anya arye, nun alye weik upnamsile. Winipmanto ara, nun Yehuda tam nang ara, mi deipnukirye, mi deiya uk dinmalya ani, mikip mitang upmaliba, mi kum deipmanto ulamak touk upsile. Deiyok ara, nun mikip ara, pia kume.

Yesaya 51:5

Narye anggunda, ‘Naʼ tenen, nang ati, anggun mal olan nang dam, narye lobuka lyepdopnamsina ati, kintinip deiamse ning ara, akunum dam uple. Minop yanamle! Tonda, narye ninye mutuku sirya, im sirya nirya ati, malye kipnamne ning ara, akunum yanmanto upmala. Dam akunum uple. Ati ara, sik weik laut mekwen lilundam unyak nang ara, ‘Se, Allah arye, dan talak yanuka melibuka lepnamsil do?’ tenen, kalikuka dinauk uninyake. Sikda, ‘Se, Allah el mikip weiknye biryuk, el taruk mikip arye pil doplirye, lyepnamsilʼ tenen, kalikuka dinauk unamake.

Mazmur 33:22

Nun ni Allah Yahweh, ‘Nun batakna kumce, pia bico tenesimince, teleb kibuka melinamsilam’ tenen, moropkiyabe. Ara, nunce anti, ‘Nun ni Allah, el dem arye melibuka lyelonamsil’ tenen, antibuk kintinibuka dinauk unamkiyabe. Winibuka tenebibirye, antibuk talibuka unamap talak nirya ara, ‘Ance melibuka, teleb ulinamsilam’ tenen, moropkiyabe, na nio.

Yesaya 8:17

Yakub birye deibukba, dadeipdanin balamika ani, deibik ninye nirya ara, Allah el si Yahweh arye, ‘Sik malye wininyak ning ara na like’ tenen, balye tamubuka, akunum batakmasile. Bukni, ‘Nun ni Allah Yahweh, dan talak tamubuka melipnamsil do?’ tenen, diba tenebuka, dinauk unamne. Nara, ‘Allah elcuk melipsutu’ tenen, Allah atibuk, diba tenebuka, el dam anyuk banamne. ‘Yuk ning arye, ton melipnutue,’ tenebuka, kum unamne,” nabi Yesaya birye, nyabuk.