Allah arye, akwalibuka kimilanyak kilapu wenepnamle talak ara, sik kweirya teleb ning pununa ati, urasin malye ninguk arepnamle. Ati, sik akilapu tonok ara, wini talak nintong teleb len ning, sik nong deice likinyak bukni, dotalak ara, sik akilapu deice arye, lyun tong welepnamle. Sik akilapu deiyatinga koulongon ning, atalak ara, urasin teleb namin ning arye kounyak bukni, dotalak ara, pia malye kat tapu, basam turya atonun ning arye, punubuka deiyatinga ara, koupnamake. Atalak sik kisok potong siser arye, teleb kibuka lelekuka tapu kounyak bukni, dotalak ara, delo kumupnamle. Atalak ara, sik ongonyak baju ara, dekna weik, urasin pia teleb ning ongonyak bukni, dotalak ara, aning kwiriplobuka, pia malye baju, el si karung goni ato ninguk, ongopnamake. Ati ara, wini talak, sik Yerusalem kilapu ara, urasin pia teleb kilanyak bukni, dotalak ara, sik urasin ara, pia malye upnamaka ati, alye weik dakalamake.
Yesaya 32:11 - Eipomek11 Se, Anggun Yerusalem mutuku noutamak talye kanye bobuka ululum kilapu ap, tonda, anggunce, ‘Kume amutuku noutamak unyap kilapu ara, malye nang arye yanuka, kum wekmanto ak unyaba anya arye, yuk mutuku nang arye, amutuku yanuka kum olyasitinge,’ tenelulum kilapu ap, imun kanye winin ning akunum upsilyopura, ilil upsilirye sirim talipnamsile. Akilapuo, yuk talak ara weik ikin ning yanamsila ati ara, anggun urasin teleb baju kwiriplopmunce, malye ati bataklamaka baju dobuka, anggun deiyating delilamakak koupdongopnamlulume. Ara, talye ati kume. Winibuka koupdongopmumce, pia engenamluma ati nyapsine. Gade chapit la |
Yesaya 32:11
23 Referans Kwoze
Anggun tukwak mutuku umunye talak nirya ara, ninye kanye delina pia teleb ning nirya talibuka, mutan nang ululume. Winipmanto ning ara ani. Anggunda, ‘Sapi basam owala obuka dipnamape’ tenen, el dina weik arye arilamice bukni, weik neplirye, bol teleb uplyopura, asapi basam arye, ‘Na opnamniak,’ kum tenyamlye bukni, obuka dilamak atonun ululume. Sapi basam arye, ‘Na opnamniak,’ kum tenyamlye atonun, anggun babye, ‘Nun malye winin ning weik upsilyeura, aminyan talak ara, Allah arye wenebuka opnamsile’ tenena kumce, malye kanye kum boluluma ati, nyapsine.
Anggun malye weik winimunye ning nirya, kum batakmunyopura, na Allah arye, anggun baju ongomunye ning nirya kwiripsiniba, winiryuk deiamsik talak, urdem nong banang ulamlum touk unamlume. Tonda, ninye bin tonoknye ton, mek pia kum arye, tuku nirya kel-kel alulul mutuku noutam uliba, mek patalye deice arye, imun kanye bobuka diplamle atonun, narye anggunti, bataksinirye, anggun nong deice ikin ning weik deipsinyopura, dipkoprob imun kanye bobuka, unamlume.
Se, Moab mutuku noutam bukni, anggun Hesyebon mutuku ululum nango, malye nyabuka, engepnamlume! Deiyok ara, anggun mutuku dam uamuk mutuku, Ai mutuku babye, yu nang arye, akunum obuka sice buklopmake! Aning atonun, anggun weik asik Raba mutuku noutam ululum kilapu nirya babye, weik yupu arye engenauk winipnamlume! Ngalukuka engelamunyak arye, anggun nong bol deice, parang arye sekuka opdanamalume. Winipmunyopura, ‘Se, nun tam nang akunum opmakeʼ tenen, anggun teleb baju ongolulum ning ara, kwiriplobuka, pia malye baju uk, kain karung ongonamlume. Ara, ‘Nun tam nang ati bicoeʼ tenen, lak kina ati, malye baju uk ongopnamlume. Winipmunyopura, imun kanye bona ap, kanye walwalabuka nyana ap, kipmunce, bikbik abuka otam binmana, atam yanmana, kinamlume. Winibuka wininamluma deiyok ara, ani. Ara, anggunce si erelulum isa, el si Milkon ap, el si erena ati deiyok nang, sik isa si erenyak imam-imam nang ap, apil dona ati melin nang ap, anggun mutuku obuka sice buklopnamsiak nang arye, anang nirya tapu koubikirye, sik mutuku tamubuka bobinamaka ati, anggun nirya engenauk unamlume. Anang bobuka bikirye, yuk mutuku delilbikceba, daunamake!
Winibuka nyanmekba, Yeremia birye nyabuk. “Se na kayapu nang, anggun Israel nango. Anggun malye-malye weik winilamlum ning ara, ‘Allah arye namin kipsutue. Nun malye winin ning kilibuka, kum kipdeipsutu’ tenen, anggun nirya, malye kain, el si kain sarong ongopmunce, butbuta deice mabuka donamalulume. Anggun ara, uku diplop malye atu dobuka, anggun kisok deice deipdanamalume. Ara, ‘Se, nun dipkoprob malye winilamupu’ tenen, lak kin ning ati, wininamlume,” nyabuk. “Tonda, winiplumce, min yuma mi dipnulirye, imun kanye bobuka, ngalukunmakirye, engelamak touk winibuka, engenamlume. Ara, ‘Anggun obuka kumdanyetibye’ tenen nang, anggun kel kum bikmamun buk, talye karin arye, anggun dam akunum olyanamsiyaka ati, nyapsine.” Yeremia birye, Israel ninye ati nyabuk.
Aning ara urdem ati kum nyapsine. Deiyok ara, sik Sion mutuku noutamak unyak ninye, pia malye unyak ninye nirya ara, ilil uplirye lukdanuka sirim talipnamle. Tonda, na Allah arye, ‘Wininamlulume, aning ara kum wininamlulume,’ nyalisinyak yupu ati, ‘Ayupu ara daupmalye’ nyabuka, batakanyak ninye nirya babye, ilil ati sirim talipnamle. Ilil weik uplyopura, sikce nyanamake. ‘Allah arye sik malye wininyak ninye ati, ‘Weik arye wenepnamne’ tenen, weik uku dilamle touk, imun kanye ning arepnamsil ning ara, winibuka arepsiliba, yata wiribuka tuba kam uptibye do?’ tenen, malye nyanamake. Aning atonun, ‘Uku pia dinamle ning atonun arepsilyopura, yatanye birye kam tuba uptu do? Kume, winibuka arepsiliba, yata wiribuka kam uptibye do?’ nyabuka, mambul kirikuka, sirim talilule.
Alaka kiamsuk ning deiyok ara ani. Ara, Asyur mutuku ninye deiyok kibuka talipnamlanye birye, sik abitinye mutuku nang, ara Mesir ap, Sudan mutuku ap, abitinye mutuku noutam unyak nang nirya ara, obuka tomoplirye, sik amutuku nang nirya bobuka wenen aik binuka dongopnamle. Nabi Yesaya birye, nong bananguk balamuk touk, sik anang nirya babye, nong bananguk binamake. Ara, ninye deiyok nang babye, talye amu tam unyak nang babye, wisi nang babye, wel nang babye, sik nirya ara baju ap, yan ap ongona kumce, nong bananguk bobuka binamle. Ara, sik Mesir mutuku unyak nang ara, weik alye una ap, malye kilina ap, unamaka ati, nong banang bobuka, pera mutuku bobinamle.
Tonda, pia ikin kanye bobuka unmaka ati, amutuku bisik noutam, bakce nang nirya babye, sik baju ara, pia malye ning, karung koni baju ongobikirye banyake. Ara, ‘Amutuku bitinye dakuka sice buklopnamak ning ati,’ tenebikirye, ‘Bico uplyeba, engenmakirye, biknamake,’ tenena ati, abaju ongonamake. Ongopmakce ning ara, sik asik, kat ning arye, lu kibuka domikce, deice tam welebikirye, engenamake. Tonda, amutuku nang bulubuka yupu sisikinyaka babye, wekelbikirye, laka kibuka, asukum noutam arye engenamake. Tonda, sik aik koproba, pum tam arye engenamake. Amutuku noutam ara, tonoknye babye, talye kanye kum bolule. Sik nirya arye engenmakirye, sik nong nirya mitang upnamle.
Winipnamaka ara, talye ati kume. Ara, sik im sirya, mutuku sirya nirya, unyak nang nirya ara, ilil asa unamake. Winibikirye, mutuku kon bukuka, amu tam keil deiyok dam do, keil deiya pum tam do, wekelbikirye, duknulanyake. Ara, sik anang nirya arye, ‘Se, Allah el yu upliba, mikip weik deice arye wenepsilirye, nun nong deice deipnamsilʼ tenen, ilil weik uplya ati, duknulbinamake. Tonda, Allah el pia teleb ap, mikip weik ulye ning ap, lak kina ati, el weik dirina upnamle ning ara, ‘Eipnirye, adiparyuk duknupnamneʼ tenen, duknulbinamake. Aning ara, Allah arye, ‘Tukwak nang mutuku sirya, im sirya nirya ati, kanye imun ning, sik nong deice deipnyopura, ilil weik unamakʼ tenen, yanamle sum arye, winipnamlarya.
Allah arye winipnamle ati, anggun tukwak mutuku sirya, im sirya nirya, ululum nang nirya ara, ilil asa unamlulume. Winibuka umunyeura, mutuku kon bukuka, amu tam keil bukamukak pum tam do, keil deiya pum tam do, tuku paliyamica pum bisik do, wekmunce, duknupnamlume. Ara, sik aninye nirya arye, ‘Se, Allah el yu upliba, mikip weik deice arye wenepsilirye, nun nong deice deipnamsileʼ tenen, weik ilil upliba, duknulbinamake. Tonda, Allah el pia teleb ap, mikip weik ap ulya ati, el weik dirina upnamle ning ara, ‘Kum eiptibyeʼ tenen, duknulbinamake. Atenebuk sum uplyeura, tukwak mutuku sirya, im sirya nirya unyak nang nirya arye, talimauk diplirye, buku daksaklirye, ilil pia weik, asa unamake.
Ati ara, Allah Yahweh elce, anggun on nang dopdeipliba, anggun olyanamsiyak nang arye, sikce obuka, sirya daksicak arye, sik talipsiceura, sik anang amu tam umunyak arye, sik piluk talye donamlume. Adeice arye, anggunda dina ap, mek ap, patanauk ulamsiliba, unamlume. Tonda, anggun ongon baju kum upliba, nong banang dem unamlume. Aning atouk, anggunda aning yala-yala nirya ara, kum dasiliba, urdemuk unamlume. Allah el yu upliba, adiparyuk anggun wenena ati, ikin ning anggun nong deice deipsiliba, imun kanye bobuka ulamunya ani, kum kipnin banamsile. Winipmanto ning ara, malye winibice nang ati, rantai tapu arye koubiceura, wenen aik pum tam dongalamak atonun, ikin ning pia weik, anggun deice delinamsile. Winipnamsila deice arye, anggunda mitik tonun kipnin balamsilyopura, amenda talak anggunda, kum kipnamsile.
Yata karin talak arye, nun kanye talima noutam ara, ‘Se,’ tenen, lik weik akunum usulule. Se, yupa weik talak deice arye, ikinuk akunum ubupu ati, ara tuba kum winitibye na nio. Aning deiyok ara, ikin kum uplyeba, sik talye kanye bobuka, telebuk unyak nang arye, nunti, ‘Sikda malye nang unayake,’ tenesikirye, nyek-nyek nyabuka, malye yupu nyasinyake. Aning nirya ati, nunda akunum lik usulule. Diba, sik maknya kipdanuka, nun Israel nang ati, ‘Nun lik, anggunda mali nang uka,’ tenesikirye, malye yupu nyasinyak nang ati, nun akunum ‘Lik,’ tenenamabe na nio. Ati, ancuk, yanuka melipsilyame na nio.
Allah Yahweh, aning-aning nirya talibuka, deice tam erebuka, mikip weik ulul nye, elce im deice yin talin malaikat nirya talilule. Atalak ara, Allah arye anggunti nyapsuke. Ara, “Engepnulume, weik arye ngalukmunce, engepnamlume. Tonda, engepnamluma ati, anggun kisok potong koplulume! Koplopmunye ning ara, anggunce ikin kanye bopmunyakarye, malye baju el si karung koni ongopnamlume. “Aning nirya ara, ‘Se, nun babye malye ulamubuʼ tenen, bikilina ati aning winipnamlume,” Allah arye nyapdeipsuke.
Anggunce, ‘Aminyan talak yata winipnamsil do?’ tenen, pia kum tenilamluma ati ara, anggun Babel mutuku nang ara, na Allah arye ayupu nyapnusin ning ara, moubuka kekepnamnulume. Se, anggun Babel mutuku ululum nang ara, anggun kanye arye, “Nun kanye deipsilye ninguk teninamabe,’ tenebuka ululume. Anggunda, talye tunim abuka bukmunce anggun asik dobuka ulamlum mutuku ara, ‘Nunda pia mikip weik mutuku nang unyabe,’ tenebuka ulamlume. Tonda, ‘Kume sik yuk mutuku unyak nang nirya ara, nunti kum olyasitinge. Nunda pia telebuk unamabeʼ tenen, anggun talima erepdamunce, ulamlume. Aninguk kum bukni, anggunda, ‘Kume, nunda Allah atonun unyabe. Mikip pia weik unyak nang ton, kum unyaka anya arye, nun uk ara mambul weik nang pia unamnyabe. Anggunce kanye arye, ‘Kume, nunda, yukwak kilapu, sikce deiamik mapu nirya dibikiba, pia utotoa kum kilapu ulamak touk, nunda aning pia kum upnamsile. Nunda pia telebuk unamapca!’ tenelamlume.
‘Na dam tamubuka yanamak’ tenen, bico tenelamsirye, lo weik arelamsise bukni, na dam tamubuka, kum yangalamluma ati, se anggun Israel ninye umunyak nirya ara, narye wenepnamsine. Ati, anggunce, ‘Se, awinipnamsil ning ara, aminyan nun ni bira, Allah arye weik wenepnamsil’ tenen, kintinibuka unamlulume. Tonda, anggun Israel ninye nirya ara, ‘Se, nun ni koproba Allah ap, epdanamabe’ tenen, kanye moupmunce, ikin kanye bobuka unamlulume.
Minop talak, Niniwe mutuku noutam ara, ninye weik bulubikce, weik asik dobuka ulamikce, maknya kintinipdanuka ulamik. Sikce nyalalamik, “Kume, nunda, pia teleb aryuk unyabe. Nunda, pia dakeiam asa unyabe. Yuk mutuku nang nirya ara, kum olyanganamsiaka ati, nunda amutuku nun yuk unyabe. Nunda pia weik asik dobupa atonun, yuk mutuku nang nirya ara, nun teleb weik asik atonun ton, kum doptinge,” nyabuka nyalalamik. Winibuka nyalalamik bukni, amutuku pia teleb asik weik awamuk ning ara, wini talak ara, dan sukum ton ulul do? Niniwe mutuku weik asik domika ara, wini talak akunum kum dayuke. Talya bai tam kam ulamle ning, yala-yala nirya, ilil tenena kumce, talye mangkau arye, amutuku bulubuka wekelbikirye, dikdik senyake. Yata nang do nirya, amutuku bisik banamak nang ara, asik oldem ubuka ati, amutuku eibikirye, ‘Se, amutuku ulamik nang, yata deiyok ati, Allah arye, obuka sirya dakuk do?’ tenen, ilil upnamle. Allah arye, ayupu nirya nyabuk.